೪. ಮಣಿಭದ್ದಸುತ್ತಂ

೨೩೮. ಏಕಂ ಸಮಯಂ ಭಗವಾ ಮಗಧೇಸು ವಿಹರತಿ ಮಣಿಮಾಲಿಕೇ ಚೇತಿಯೇ ಮಣಿಭದ್ದಸ್ಸ ಯಕ್ಖಸ್ಸ ಭವನೇ. ಅಥ ಖೋ ಮಣಿಭದ್ದೋ ಯಕ್ಖೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತೋ ಸನ್ತಿಕೇ ಇಮಂ ಗಾಥಂ ಅಭಾಸಿ –

‘‘ಸತೀಮತೋ ಸದಾ ಭದ್ದಂ, ಸತಿಮಾ ಸುಖಮೇಧತಿ;

ಸತೀಮತೋ ಸುವೇ ಸೇಯ್ಯೋ, ವೇರಾ ಚ ಪರಿಮುಚ್ಚತೀ’’ತಿ.

‘‘ಸತೀಮತೋ ಸದಾ ಭದ್ದಂ, ಸತಿಮಾ ಸುಖಮೇಧತಿ;

ಸತೀಮತೋ ಸುವೇ ಸೇಯ್ಯೋ, ವೇರಾ ನ ಪರಿಮುಚ್ಚತಿ.

‘‘ಯಸ್ಸ ಸಬ್ಬಮಹೋರತ್ತಂ [ರತ್ತಿಂ (ಸ್ಯಾ. ಕಂ. ಕ.)], ಅಹಿಂಸಾಯ ರತೋ ಮನೋ;

ಮೇತ್ತಂ ಸೋ ಸಬ್ಬಭೂತೇಸು, ವೇರಂ ತಸ್ಸ ನ ಕೇನಚೀ’’ತಿ.