೮. ಅನೇಕವಣ್ಣವಿಮಾನವತ್ಥು

೧೧೯೯. ‘‘ಅನೇಕವಣ್ಣಂ ದರಸೋಕನಾಸನಂ, ವಿಮಾನಮಾರುಯ್ಹ ಅನೇಕಚಿತ್ತಂ;

ಪರಿವಾರಿತೋ ಅಚ್ಛರಾಸಙ್ಗಣೇನ, ಸುನಿಮ್ಮಿತೋ ಭೂತಪತೀವ ಮೋದಸಿ.

೧೨೦೦. ‘‘ಸಮಸ್ಸಮೋ ನತ್ಥಿ ಕುತೋ ಪನುತ್ತರೋ [ಉತ್ತರಿ (ಕ.)], ಯಸೇನ ಪುಞ್ಞೇನ ಚ ಇದ್ಧಿಯಾ ಚ;

ಸಬ್ಬೇ ಚ ದೇವಾ ತಿದಸಗಣಾ ಸಮೇಚ್ಚ, ತಂ ತಂ ನಮಸ್ಸನ್ತಿ ಸಸಿಂವ ದೇವಾ;

ಇಮಾ ಚ ತೇ ಅಚ್ಛರಾಯೋ ಸಮನ್ತತೋ, ನಚ್ಚನ್ತಿ ಗಾಯನ್ತಿ ಪಮೋದಯನ್ತಿ.

೧೨೦೧. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ, ಮನುಸ್ಸಭೂತೋ ಕಿಮಕಾಸಿ ಪುಞ್ಞಂ;

ಕೇನಾಸಿ ಏವಂ ಜಲಿತಾನುಭಾವೋ, ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೨೦೨. ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ.

೧೨೦೩. ‘‘ಅಹಂ ಭದನ್ತೇ ಅಹುವಾಸಿ ಪುಬ್ಬೇ, ಸುಮೇಧನಾಮಸ್ಸ ಜಿನಸ್ಸ ಸಾವಕೋ;

ಪುಥುಜ್ಜನೋ ಅನನುಬೋಧೋಹಮಸ್ಮಿ [ಅನವಬೋಧೋಹಮಸ್ಮಿಂ (ಸೀ.), ಅನನುಬೋಧೋಹಮಾಸಿಂ (?)], ಸೋ ಸತ್ತ ವಸ್ಸಾನಿ ಪರಿಬ್ಬಜಿಸ್ಸಹಂ [ಪಬ್ಬಜಿಸ್ಸಹಂ (ಸ್ಯಾ. ಕ.), ಪಬ್ಬಜಿಸಾಹಂ (ಪೀ.)].

೧೨೦೪. ‘‘ಸೋಹಂ ಸುಮೇಧಸ್ಸ ಜಿನಸ್ಸ ಸತ್ಥುನೋ, ಪರಿನಿಬ್ಬುತಸ್ಸೋಘತಿಣ್ಣಸ್ಸ ತಾದಿನೋ;

ರತನುಚ್ಚಯಂ ಹೇಮಜಾಲೇನ ಛನ್ನಂ, ವನ್ದಿತ್ವಾ ಥೂಪಸ್ಮಿಂ ಮನಂ ಪಸಾದಯಿಂ.

೧೨೦೫. ‘‘ನ ಮಾಸಿ ದಾನಂ ನ ಚ ಮತ್ಥಿ ದಾತುಂ, ಪರೇ ಚ ಖೋ ತತ್ಥ ಸಮಾದಪೇಸಿಂ;

ಪೂಜೇಥ ನಂ ಪೂಜನೀಯಸ್ಸ [ಪೂಜನೇಯ್ಯಸ್ಸ (ಸ್ಯಾ. ಕ.)] ಧಾತುಂ, ಏವಂ ಕಿರ ಸಗ್ಗಮಿತೋ ಗಮಿಸ್ಸಥ.

೧೨೦೬. ‘‘ತದೇವ ಕಮ್ಮಂ ಕುಸಲಂ ಕತಂ ಮಯಾ, ಸುಖಞ್ಚ ದಿಬ್ಬಂ ಅನುಭೋಮಿ ಅತ್ತನಾ;

ಮೋದಾಮಹಂ ತಿದಸಗಣಸ್ಸ ಮಜ್ಝೇ, ನ ತಸ್ಸ ಪುಞ್ಞಸ್ಸ ಖಯಮ್ಪಿ ಅಜ್ಝಗ’’ನ್ತಿ.

ಅನೇಕವಣ್ಣವಿಮಾನಂ ಅಟ್ಠಮಂ.