೪. ಚಣ್ಡಾಲಿವಿಮಾನವತ್ಥು

೧೯೫. ‘‘ಚಣ್ಡಾಲಿ ವನ್ದ ಪಾದಾನಿ, ಗೋತಮಸ್ಸ ಯಸಸ್ಸಿನೋ;

ತಮೇವ [ತವೇವ (ಸೀ.)] ಅನುಕಮ್ಪಾಯ, ಅಟ್ಠಾಸಿ ಇಸಿಸತ್ತಮೋ [ಇಸಿಸುತ್ತಮೋ (ಸೀ.)].

೧೯೬. ‘‘ಅಭಿಪ್ಪಸಾದೇಹಿ ಮನಂ, ಅರಹನ್ತಮ್ಹಿ ತಾದಿನಿ [ತಾದಿನೇ (ಸ್ಯಾ. ಕ.)];

ಖಿಪ್ಪಂ ಪಞ್ಜಲಿಕಾ ವನ್ದ, ಪರಿತ್ತಂ ತವ ಜೀವಿತ’’ನ್ತಿ.

೧೯೭. ಚೋದಿತಾ ಭಾವಿತತ್ತೇನ, ಸರೀರನ್ತಿಮಧಾರಿನಾ;

ಚಣ್ಡಾಲೀ ವನ್ದಿ ಪಾದಾನಿ, ಗೋತಮಸ್ಸ ಯಸಸ್ಸಿನೋ.

೧೯೮. ತಮೇನಂ ಅವಧೀ ಗಾವೀ, ಚಣ್ಡಾಲಿಂ ಪಞ್ಜಲಿಂ ಠಿತಂ;

ನಮಸ್ಸಮಾನಂ ಸಮ್ಬುದ್ಧಂ, ಅನ್ಧಕಾರೇ ಪಭಙ್ಕರನ್ತಿ.

೧೯೯. ‘‘ಖೀಣಾಸವಂ ವಿಗತರಜಂ ಅನೇಜಂ, ಏಕಂ ಅರಞ್ಞಮ್ಹಿ ರಹೋ ನಿಸಿನ್ನಂ;

ದೇವಿದ್ಧಿಪತ್ತಾ ಉಪಸಙ್ಕಮಿತ್ವಾ, ವನ್ದಾಮಿ ತಂ ವೀರ ಮಹಾನುಭಾವ’’ನ್ತಿ.

೨೦೦. ‘‘ಸುವಣ್ಣವಣ್ಣಾ ಜಲಿತಾ ಮಹಾಯಸಾ, ವಿಮಾನಮೋರುಯ್ಹ ಅನೇಕಚಿತ್ತಾ;

ಪರಿವಾರಿತಾ ಅಚ್ಛರಾಸಙ್ಗಣೇನ [ಅಚ್ಛರಾನಂ ಗಣೇನ (ಸೀ.)], ಕಾ ತ್ವಂ ಸುಭೇ ದೇವತೇ ವನ್ದಸೇ ಮಮ’’ನ್ತಿ.

೨೦೧. ‘‘ಅಹಂ ಭದ್ದನ್ತೇ ಚಣ್ಡಾಲೀ, ತಯಾ ವೀರೇನ [ಥೇರೇನ (ಕ.)] ಪೇಸಿತಾ;

ವನ್ದಿಂ ಅರಹತೋ ಪಾದೇ, ಗೋತಮಸ್ಸ ಯಸಸ್ಸಿನೋ.

೨೦೨. ‘‘ಸಾಹಂ ವನ್ದಿತ್ವಾ [ವನ್ದಿತ್ವ (ಸೀ.)] ಪಾದಾನಿ, ಚುತಾ ಚಣ್ಡಾಲಯೋನಿಯಾ;

ವಿಮಾನಂ ಸಬ್ಬತೋ ಭದ್ದಂ, ಉಪಪನ್ನಮ್ಹಿ ನನ್ದನೇ.

೨೦೩. ‘‘ಅಚ್ಛರಾನಂ ಸತಸಹಸ್ಸಂ, ಪುರಕ್ಖತ್ವಾನ [ಪುರಕ್ಖಿತ್ವಾ ಮಂ (ಸ್ಯಾ. ಕ.)] ತಿಟ್ಠತಿ;

ತಾಸಾಹಂ ಪವರಾ ಸೇಟ್ಠಾ, ವಣ್ಣೇನ ಯಸಸಾಯುನಾ.

೨೦೪. ‘‘ಪಹೂತಕತಕಲ್ಯಾಣಾ, ಸಮ್ಪಜಾನಾ ಪಟಿಸ್ಸತಾ [ಪತಿಸ್ಸತಾ (ಸೀ. ಸ್ಯಾ.)];

ಮುನಿಂ ಕಾರುಣಿಕಂ ಲೋಕೇ, ತಂ ಭನ್ತೇ ವನ್ದಿತುಮಾಗತಾ’’ತಿ.

೨೦೫. ಇದಂ ವತ್ವಾನ ಚಣ್ಡಾಲೀ, ಕತಞ್ಞೂ ಕತವೇದಿನೀ;

ವನ್ದಿತ್ವಾ ಅರಹತೋ ಪಾದೇ, ತತ್ಥೇವನ್ತರಧಾಯಥಾತಿ [ತತ್ಥೇವನ್ತರಧಾಯತೀತಿ (ಸ್ಯಾ. ಕ.)].

ಚಣ್ಡಾಲಿವಿಮಾನಂ ಚತುತ್ಥಂ.