೧೭. ಕೇಸಕಾರೀವಿಮಾನವತ್ಥು

೧೫೦. ‘‘ಇದಂ ವಿಮಾನಂ ರುಚಿರಂ ಪಭಸ್ಸರಂ, ವೇಳುರಿಯಥಮ್ಭಂ ಸತತಂ ಸುನಿಮ್ಮಿತಂ;

ಸುವಣ್ಣರುಕ್ಖೇಹಿ ಸಮನ್ತಮೋತ್ಥತಂ, ಠಾನಂ ಮಮಂ ಕಮ್ಮವಿಪಾಕಸಮ್ಭವಂ.

೧೫೧. ‘‘ತತ್ರೂಪಪನ್ನಾ ಪುರಿಮಚ್ಛರಾ ಇಮಾ, ಸತಂ ಸಹಸ್ಸಾನಿ ಸಕೇನ ಕಮ್ಮುನಾ;

ತುವಂಸಿ ಅಜ್ಝುಪಗತಾ ಯಸಸ್ಸಿನೀ, ಓಭಾಸಯಂ ತಿಟ್ಠಸಿ ಪುಬ್ಬದೇವತಾ.

೧೫೨. ‘‘ಸಸೀ ಅಧಿಗ್ಗಯ್ಹ ಯಥಾ ವಿರೋಚತಿ, ನಕ್ಖತ್ತರಾಜಾರಿವ ತಾರಕಾಗಣಂ;

ತಥೇವ ತ್ವಂ ಅಚ್ಛರಾಸಙ್ಗಣಂ [ಅಚ್ಛರಾಸಙ್ಗಮಂ (ಸೀ.)] ಇಮಂ, ದದ್ದಲ್ಲಮಾನಾ ಯಸಸಾ ವಿರೋಚಸಿ.

೧೫೩. ‘‘ಕುತೋ ನು ಆಗಮ್ಮ ಅನೋಮದಸ್ಸನೇ, ಉಪಪನ್ನಾ ತ್ವಂ ಭವನಂ ಮಮಂ ಇದಂ;

ಬ್ರಹ್ಮಂವ ದೇವಾ ತಿದಸಾ ಸಹಿನ್ದಕಾ, ಸಬ್ಬೇ ನ ತಪ್ಪಾಮಸೇ ದಸ್ಸನೇನ ತ’’ನ್ತಿ.

೧೫೪. ‘‘ಯಮೇತಂ ಸಕ್ಕ ಅನುಪುಚ್ಛಸೇ ಮಮಂ, ‘ಕುತೋ ಚುತಾ ತ್ವಂ ಇಧ ಆಗತಾ’ತಿ [ಕುತೋ ಚುತಾ ಇಧ ಆಗತಾ ತುವಂ (ಸ್ಯಾ.), ಕುತೋ ಚುತಾಯ ಆಗತಿ ತವ (ಪೀ.)];

ಬಾರಾಣಸೀ ನಾಮ ಪುರತ್ಥಿ ಕಾಸಿನಂ, ತತ್ಥ ಅಹೋಸಿಂ ಪುರೇ ಕೇಸಕಾರಿಕಾ.

೧೫೫. ‘‘ಬುದ್ಧೇ ಚ ಧಮ್ಮೇ ಚ ಪಸನ್ನಮಾನಸಾ, ಸಙ್ಘೇ ಚ ಏಕನ್ತಗತಾ ಅಸಂಸಯಾ;

ಅಖಣ್ಡಸಿಕ್ಖಾಪದಾ ಆಗತಪ್ಫಲಾ, ಸಮ್ಬೋಧಿಧಮ್ಮೇ ನಿಯತಾ ಅನಾಮಯಾ’’ತಿ.

೧೫೬. ‘‘ತನ್ತ್ಯಾಭಿನನ್ದಾಮಸೇ ಸ್ವಾಗತಞ್ಚ [ಸಾಗತಞ್ಚ (ಸೀ.)] ತೇ, ಧಮ್ಮೇನ ಚ ತ್ವಂ ಯಸಸಾ ವಿರೋಚಸಿ;

ಬುದ್ಧೇ ಚ ಧಮ್ಮೇ ಚ ಪಸನ್ನಮಾನಸೇ, ಸಙ್ಘೇ ಚ ಏಕನ್ತಗತೇ ಅಸಂಸಯೇ;

ಅಖಣ್ಡಸಿಕ್ಖಾಪದೇ ಆಗತಪ್ಫಲೇ, ಸಮ್ಬೋಧಿಧಮ್ಮೇ ನಿಯತೇ ಅನಾಮಯೇ’’ತಿ.

ಕೇಸಕಾರೀವಿಮಾನಂ ಸತ್ತರಸಮಂ.

ಪೀಠವಗ್ಗೋ ಪಠಮೋ ನಿಟ್ಠಿತೋ.

ತಸ್ಸುದ್ದಾನಂ –

ಪಞ್ಚ ಪೀಠಾ ತಯೋ ನಾವಾ, ದೀಪತಿಲದಕ್ಖಿಣಾ ದ್ವೇ;

ಪತಿ ದ್ವೇ ಸುಣಿಸಾ ಉತ್ತರಾ, ಸಿರಿಮಾ ಕೇಸಕಾರಿಕಾ;

ವಗ್ಗೋ ತೇನ ಪವುಚ್ಚತೀತಿ.