೭. ದ್ವಿಧಾಪಥಸುತ್ತಂ

೭೭. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಕೋಸಲೇಸು ಅದ್ಧಾನಮಗ್ಗಪಟಿಪನ್ನೋ ಹೋತಿ ಆಯಸ್ಮತಾ ನಾಗಸಮಾಲೇನ ಪಚ್ಛಾಸಮಣೇನ. ಅದ್ದಸಾ ಖೋ ಆಯಸ್ಮಾ ನಾಗಸಮಾಲೋ ಅನ್ತರಾಮಗ್ಗೇ ದ್ವಿಧಾಪಥಂ [ದ್ವೇಧಾಪಥಂ (ಸೀ.)]. ದಿಸ್ವಾನ ಭಗವನ್ತಂ ಏತದವೋಚ – ‘‘ಅಯಂ, ಭನ್ತೇ, ಭಗವಾ ಪನ್ಥೋ; ಇಮಿನಾ ಗಚ್ಛಾಮಾ’’ತಿ. ಏವಂ ವುತ್ತೇ, ಭಗವಾ ಆಯಸ್ಮನ್ತಂ ನಾಗಸಮಾಲಂ ಏತದವೋಚ – ‘‘ಅಯಂ, ನಾಗಸಮಾಲ, ಪನ್ಥೋ; ಇಮಿನಾ ಗಚ್ಛಾಮಾ’’ತಿ.

ದುತಿಯಮ್ಪಿ…ಪೇ… ತತಿಯಮ್ಪಿ ಖೋ ಆಯಸ್ಮಾ ನಾಗಸಮಾಲೋ ಭಗವನ್ತಂ ಏತದವೋಚ – ‘‘ಅಯಂ, ಭನ್ತೇ, ಭಗವಾ ಪನ್ಥೋ; ಇಮಿನಾ ಗಚ್ಛಾಮಾ’’ತಿ. ತತಿಯಮ್ಪಿ ಖೋ ಭಗವಾ ಆಯಸ್ಮನ್ತಂ ನಾಗಸಮಾಲಂ ಏತದವೋಚ – ‘‘ಅಯಂ, ನಾಗಸಮಾಲ, ಪನ್ಥೋ; ಇಮಿನಾ ಗಚ್ಛಾಮಾ’’ತಿ. ಅಥ ಖೋ ಆಯಸ್ಮಾ ನಾಗಸಮಾಲೋ ಭಗವತೋ ಪತ್ತಚೀವರಂ ತತ್ಥೇವ ಛಮಾಯಂ ನಿಕ್ಖಿಪಿತ್ವಾ ಪಕ್ಕಾಮಿ – ‘‘ಇದಂ, ಭನ್ತೇ, ಭಗವತೋ ಪತ್ತಚೀವರ’’ನ್ತಿ.

ಅಥ ಖೋ ಆಯಸ್ಮತೋ ನಾಗಸಮಾಲಸ್ಸ ತೇನ ಪನ್ಥೇನ ಗಚ್ಛನ್ತಸ್ಸ ಅನ್ತರಾಮಗ್ಗೇ ಚೋರಾ ನಿಕ್ಖಮಿತ್ವಾ ಹತ್ಥೇಹಿ ಚ ಪಾದೇಹಿ ಚ ಆಕೋಟೇಸುಂ ಪತ್ತಞ್ಚ ಭಿನ್ದಿಂಸು ಸಙ್ಘಾಟಿಞ್ಚ ವಿಪ್ಫಾಲೇಸುಂ. ಅಥ ಖೋ ಆಯಸ್ಮಾ ನಾಗಸಮಾಲೋ ಭಿನ್ನೇನ ಪತ್ತೇನ ವಿಪ್ಫಾಲಿತಾಯ ಸಙ್ಘಾಟಿಯಾ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ನಾಗಸಮಾಲೋ ಭಗವನ್ತಂ ಏತದವೋಚ – ‘‘ಇಧ ಮಯ್ಹಂ, ಭನ್ತೇ, ತೇನ ಪನ್ಥೇನ ಗಚ್ಛನ್ತಸ್ಸ ಅನ್ತರಾಮಗ್ಗೇ ಚೋರಾ ನಿಕ್ಖಮಿತ್ವಾ ಹತ್ಥೇಹಿ ಚ ಪಾದೇಹಿ ಚ ಆಕೋಟೇಸುಂ, ಪತ್ತಞ್ಚ ಭಿನ್ದಿಂಸು, ಸಙ್ಘಾಟಿಞ್ಚ ವಿಪ್ಫಾಲೇಸು’’ನ್ತಿ.

ಅಥ ಖೋ ಭಗವಾ ಏತಮತ್ಥಂ ವಿದಿತ್ವಾ ತಾಯಂ ವೇಲಾಯಂ ಇಮಂ ಉದಾನಂ ಉದಾನೇಸಿ –

‘‘ಸದ್ಧಿಂ ಚರಮೇಕತೋ ವಸಂ,

ಮಿಸ್ಸೋ ಅಞ್ಞಜನೇನ ವೇದಗೂ;

ವಿದ್ವಾ ಪಜಹಾತಿ ಪಾಪಕಂ,

ಕೋಞ್ಚೋ ಖೀರಪಕೋವ ನಿನ್ನಗ’’ನ್ತಿ. ಸತ್ತಮಂ;