೭. ಗುತ್ತಾಥೇರೀಗಾಥಾ

೧೬೩. ‘‘ಗುತ್ತೇ ಯದತ್ಥಂ ಪಬ್ಬಜ್ಜಾ, ಹಿತ್ವಾ ಪುತ್ತಂ ವಸುಂ ಪಿಯಂ;

ತಮೇವ ಅನುಬ್ರೂಹೇಹಿ, ಮಾ ಚಿತ್ತಸ್ಸ ವಸಂ ಗಮಿ.

೧೬೪. ‘‘ಚಿತ್ತೇನ ವಞ್ಚಿತಾ ಸತ್ತಾ, ಮಾರಸ್ಸ ವಿಸಯೇ ರತಾ;

ಅನೇಕಜಾತಿಸಂಸಾರಂ, ಸನ್ಧಾವನ್ತಿ ಅವಿದ್ದಸೂ.

೧೬೫. ‘‘ಕಾಮಚ್ಛನ್ದಞ್ಚ ಬ್ಯಾಪಾದಂ, ಸಕ್ಕಾಯದಿಟ್ಠಿಮೇವ ಚ;

ಸೀಲಬ್ಬತಪರಾಮಾಸಂ, ವಿಚಿಕಿಚ್ಛಞ್ಚ ಪಞ್ಚಮಂ.

೧೬೬. ‘‘ಸಂಯೋಜನಾನಿ ಏತಾನಿ, ಪಜಹಿತ್ವಾನ ಭಿಕ್ಖುನೀ;

ಓರಮ್ಭಾಗಮನೀಯಾನಿ, ನಯಿದಂ ಪುನರೇಹಿಸಿ.

೧೬೭. ‘‘ರಾಗಂ ಮಾನಂ ಅವಿಜ್ಜಞ್ಚ, ಉದ್ಧಚ್ಚಞ್ಚ ವಿವಜ್ಜಿಯ;

ಸಂಯೋಜನಾನಿ ಛೇತ್ವಾನ, ದುಕ್ಖಸ್ಸನ್ತಂ ಕರಿಸ್ಸಸಿ.

೧೬೮. ‘‘ಖೇಪೇತ್ವಾ ಜಾತಿಸಂಸಾರಂ, ಪರಿಞ್ಞಾಯ ಪುನಬ್ಭವಂ;

ದಿಟ್ಠೇವ ಧಮ್ಮೇ ನಿಚ್ಛಾತಾ, ಉಪಸನ್ತಾ ಚರಿಸ್ಸತೀ’’ತಿ.

… ಗುತ್ತಾ ಥೇರೀ….