೫. ಪಞ್ಚಕನಿಪಾತೋ

೧. ಅಞ್ಞತರಾಥೇರೀಗಾಥಾ

೬೭. ‘‘ಪಣ್ಣವೀಸತಿವಸ್ಸಾನಿ, ಯತೋ ಪಬ್ಬಜಿತಾ ಅಹಂ;

ನಾಚ್ಛರಾಸಙ್ಘಾತಮತ್ತಮ್ಪಿ, ಚಿತ್ತಸ್ಸೂಪಸಮಜ್ಝಗಂ.

೬೮. ‘‘ಅಲದ್ಧಾ ಚೇತಸೋ ಸನ್ತಿಂ, ಕಾಮರಾಗೇನವಸ್ಸುತಾ;

ಬಾಹಾ ಪಗ್ಗಯ್ಹ ಕನ್ದನ್ತೀ, ವಿಹಾರಂ ಪಾವಿಸಿಂ ಅಹಂ.

೬೯. ‘‘ಸಾ ಭಿಕ್ಖುನಿಂ ಉಪಾಗಚ್ಛಿಂ, ಯಾ ಮೇ ಸದ್ಧಾಯಿಕಾ ಅಹು;

ಸಾ ಮೇ ಧಮ್ಮಮದೇಸೇಸಿ, ಖನ್ಧಾಯತನಧಾತುಯೋ.

೭೦. ‘‘ತಸ್ಸಾ ಧಮ್ಮಂ ಸುಣಿತ್ವಾನ, ಏಕಮನ್ತೇ ಉಪಾವಿಸಿಂ;

ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ.

೭೧. ‘‘ಚೇತೋಪರಿಚ್ಚಞಾಣಞ್ಚ [ಚೇತೋಪರಿಯಞಾಣಞ್ಚ (ಕ.)], ಸೋತಧಾತು ವಿಸೋಧಿತಾ;

ಇದ್ಧೀಪಿ ಮೇ ಸಚ್ಛಿಕತಾ, ಪತ್ತೋ ಮೇ ಆಸವಕ್ಖಯೋ;

ಛಳಭಿಞ್ಞಾ [ಛ ಮೇಭಿಞ್ಞಾ (ಸ್ಯಾ. ಕ.)] ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಅಞ್ಞತರಾ ಥೇರೀ ….

೨. ವಿಮಲಾಥೇರೀಗಾಥಾ

೭೨. ‘‘ಮತ್ತಾ ವಣ್ಣೇನ ರೂಪೇನ, ಸೋಭಗ್ಗೇನ ಯಸೇನ ಚ;

ಯೋಬ್ಬನೇನ ಚುಪತ್ಥದ್ಧಾ, ಅಞ್ಞಾಸಮತಿಮಞ್ಞಿಹಂ.

೭೩. ‘‘ವಿಭೂಸೇತ್ವಾ ಇಮಂ ಕಾಯಂ, ಸುಚಿತ್ತಂ ಬಾಲಲಾಪನಂ;

ಅಟ್ಠಾಸಿಂ ವೇಸಿದ್ವಾರಮ್ಹಿ, ಲುದ್ದೋ ಪಾಸಮಿವೋಡ್ಡಿಯ.

೭೪. ‘‘ಪಿಲನ್ಧನಂ ವಿದಂಸೇನ್ತೀ, ಗುಯ್ಹಂ ಪಕಾಸಿಕಂ ಬಹುಂ;

ಅಕಾಸಿಂ ವಿವಿಧಂ ಮಾಯಂ, ಉಜ್ಜಗ್ಘನ್ತೀ ಬಹುಂ ಜನಂ.

೭೫. ‘‘ಸಾಜ್ಜ ಪಿಣ್ಡಂ ಚರಿತ್ವಾನ, ಮುಣ್ಡಾ ಸಙ್ಘಾಟಿಪಾರುತಾ;

ನಿಸಿನ್ನಾ ರುಕ್ಖಮೂಲಮ್ಹಿ, ಅವಿತಕ್ಕಸ್ಸ ಲಾಭಿನೀ.

೭೬. ‘‘ಸಬ್ಬೇ ಯೋಗಾ ಸಮುಚ್ಛಿನ್ನಾ, ಯೇ ದಿಬ್ಬಾ ಯೇ ಚ ಮಾನುಸಾ;

ಖೇಪೇತ್ವಾ ಆಸವೇ ಸಬ್ಬೇ, ಸೀತಿಭೂತಾಮ್ಹಿ ನಿಬ್ಬುತಾ’’ತಿ.

… ವಿಮಲಾ ಪುರಾಣಗಣಿಕಾ ಥೇರೀ….

೩. ಸೀಹಾಥೇರೀಗಾಥಾ

೭೭. ‘‘ಅಯೋನಿಸೋ ಮನಸಿಕಾರಾ, ಕಾಮರಾಗೇನ ಅಟ್ಟಿತಾ;

ಅಹೋಸಿಂ ಉದ್ಧತಾ ಪುಬ್ಬೇ, ಚಿತ್ತೇ ಅವಸವತ್ತಿನೀ.

೭೮. ‘‘ಪರಿಯುಟ್ಠಿತಾ ಕ್ಲೇಸೇಹಿ, ಸುಭಸಞ್ಞಾನುವತ್ತಿನೀ;

ಸಮಂ ಚಿತ್ತಸ್ಸ ನ ಲಭಿಂ, ರಾಗಚಿತ್ತವಸಾನುಗಾ.

೭೯. ‘‘ಕಿಸಾ ಪಣ್ಡು ವಿವಣ್ಣಾ ಚ, ಸತ್ತ ವಸ್ಸಾನಿ ಚಾರಿಹಂ;

ನಾಹಂ ದಿವಾ ವಾ ರತ್ತಿಂ ವಾ, ಸುಖಂ ವಿನ್ದಿಂ ಸುದುಕ್ಖಿತಾ.

೮೦. ‘‘ತತೋ ರಜ್ಜುಂ ಗಹೇತ್ವಾನ, ಪಾವಿಸಿಂ ವನಮನ್ತರಂ;

ವರಂ ಮೇ ಇಧ ಉಬ್ಬನ್ಧಂ, ಯಞ್ಚ ಹೀನಂ ಪುನಾಚರೇ.

೮೧. ‘‘ದಳ್ಹಪಾಸಂ [ದಳ್ಹಂ ಪಾಸಂ (ಸೀ.)] ಕರಿತ್ವಾನ, ರುಕ್ಖಸಾಖಾಯ ಬನ್ಧಿಯ;

ಪಕ್ಖಿಪಿಂ ಪಾಸಂ ಗೀವಾಯಂ, ಅಥ ಚಿತ್ತಂ ವಿಮುಚ್ಚಿ ಮೇ’’ತಿ.

… ಸೀಹಾ ಥೇರೀ….

೪. ಸುನ್ದರೀನನ್ದಾಥೇರೀಗಾಥಾ

೮೨. ‘‘ಆತುರಂ ಅಸುಚಿಂ ಪೂತಿಂ, ಪಸ್ಸ ನನ್ದೇ ಸಮುಸ್ಸಯಂ;

ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ.

೮೩. ‘‘ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ;

ದುಗ್ಗನ್ಧಂ ಪೂತಿಕಂ ವಾತಿ, ಬಾಲಾನಂ ಅಭಿನನ್ದಿತಂ.

೮೪. ‘‘ಏವಮೇತಂ ಅವೇಕ್ಖನ್ತೀ, ರತ್ತಿನ್ದಿವಮತನ್ದಿತಾ;

ತತೋ ಸಕಾಯ ಪಞ್ಞಾಯ, ಅಭಿನಿಬ್ಬಿಜ್ಝ [ಅಭಿನಿಬ್ಬಿಜ್ಜ (ಸೀ. ಸ್ಯಾ.)] ದಕ್ಖಿಸಂ.

೮೫. ‘‘ತಸ್ಸಾ ಮೇ ಅಪ್ಪಮತ್ತಾಯ, ವಿಚಿನನ್ತಿಯಾ ಯೋನಿಸೋ;

ಯಥಾಭೂತಂ ಅಯಂ ಕಾಯೋ, ದಿಟ್ಠೋ ಸನ್ತರಬಾಹಿರೋ.

೮೬. ‘‘ಅಥ ನಿಬ್ಬಿನ್ದಹಂ ಕಾಯೇ, ಅಜ್ಝತ್ತಞ್ಚ ವಿರಜ್ಜಹಂ;

ಅಪ್ಪಮತ್ತಾ ವಿಸಂಯುತ್ತಾ, ಉಪಸನ್ತಾಮ್ಹಿ ನಿಬ್ಬುತಾ’’ತಿ.

… ಸುನ್ದರೀನನ್ದಾ ಥೇರೀ….

೫. ನನ್ದುತ್ತರಾಥೇರೀಗಾಥಾ

೮೭. ‘‘ಅಗ್ಗಿಂ ಚನ್ದಞ್ಚ ಸೂರಿಯಞ್ಚ, ದೇವತಾ ಚ ನಮಸ್ಸಿಹಂ;

ನದೀತಿತ್ಥಾನಿ ಗನ್ತ್ವಾನ, ಉದಕಂ ಓರುಹಾಮಿಹಂ.

೮೮. ‘‘ಬಹೂವತಸಮಾದಾನಾ, ಅಡ್ಢಂ ಸೀಸಸ್ಸ ಓಲಿಖಿಂ;

ಛಮಾಯ ಸೇಯ್ಯಂ ಕಪ್ಪೇಮಿ, ರತ್ತಿಂ ಭತ್ತಂ ನ ಭುಞ್ಜಹಂ.

೮೯. ‘‘ವಿಭೂಸಾಮಣ್ಡನರತಾ, ನ್ಹಾಪನುಚ್ಛಾದನೇಹಿ ಚ;

ಉಪಕಾಸಿಂ ಇಮಂ ಕಾಯಂ, ಕಾಮರಾಗೇನ ಅಟ್ಟಿತಾ.

೯೦. ‘‘ತತೋ ಸದ್ಧಂ ಲಭಿತ್ವಾನ, ಪಬ್ಬಜಿಂ ಅನಗಾರಿಯಂ;

ದಿಸ್ವಾ ಕಾಯಂ ಯಥಾಭೂತಂ, ಕಾಮರಾಗೋ ಸಮೂಹತೋ.

೯೧. ‘‘ಸಬ್ಬೇ ಭವಾ ಸಮುಚ್ಛಿನ್ನಾ, ಇಚ್ಛಾ ಚ ಪತ್ಥನಾಪಿ ಚ;

ಸಬ್ಬಯೋಗವಿಸಂಯುತ್ತಾ, ಸನ್ತಿಂ ಪಾಪುಣಿ ಚೇತಸೋ’’ತಿ.

… ನನ್ದುತ್ತರಾ ಥೇರೀ….

೬. ಮಿತ್ತಾಕಾಳೀಥೇರೀಗಾಥಾ

೯೨. ‘‘ಸದ್ಧಾಯ ಪಬ್ಬಜಿತ್ವಾನ, ಅಗಾರಸ್ಮಾನಗಾರಿಯಂ;

ವಿಚರಿಂಹಂ ತೇನ ತೇನ, ಲಾಭಸಕ್ಕಾರಉಸ್ಸುಕಾ.

೯೩. ‘‘ರಿಞ್ಚಿತ್ವಾ ಪರಮಂ ಅತ್ಥಂ, ಹೀನಮತ್ಥಂ ಅಸೇವಿಹಂ;

ಕಿಲೇಸಾನಂ ವಸಂ ಗನ್ತ್ವಾ, ಸಾಮಞ್ಞತ್ಥಂ ನ ಬುಜ್ಝಿಹಂ.

೯೪. ‘‘ತಸ್ಸಾ ಮೇ ಅಹು ಸಂವೇಗೋ, ನಿಸಿನ್ನಾಯ ವಿಹಾರಕೇ;

ಉಮ್ಮಗ್ಗಪಟಿಪನ್ನಾಮ್ಹಿ, ತಣ್ಹಾಯ ವಸಮಾಗತಾ.

೯೫. ‘‘ಅಪ್ಪಕಂ ಜೀವಿತಂ ಮಯ್ಹಂ, ಜರಾ ಬ್ಯಾಧಿ ಚ ಮದ್ದತಿ;

ಪುರಾಯಂ ಭಿಜ್ಜತಿ [ಜರಾಯ ಭಿಜ್ಜತೇ (ಸೀ.)] ಕಾಯೋ, ನ ಮೇ ಕಾಲೋ ಪಮಜ್ಜಿತುಂ.

೯೬. ‘‘ಯಥಾಭೂತಮವೇಕ್ಖನ್ತೀ, ಖನ್ಧಾನಂ ಉದಯಬ್ಬಯಂ;

ವಿಮುತ್ತಚಿತ್ತಾ ಉಟ್ಠಾಸಿಂ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಮಿತ್ತಾ ಕಾಳೀ ಥೇರೀ….

೭. ಸಕುಲಾಥೇರೀಗಾಥಾ

೯೭. ‘‘ಅಗಾರಸ್ಮಿಂ ವಸನ್ತೀಹಂ, ಧಮ್ಮಂ ಸುತ್ವಾನ ಭಿಕ್ಖುನೋ;

ಅದ್ದಸಂ ವಿರಜಂ ಧಮ್ಮಂ, ನಿಬ್ಬಾನಂ ಪದಮಚ್ಚುತಂ.

೯೮. ‘‘ಸಾಹಂ ಪುತ್ತಂ ಧೀತರಞ್ಚ, ಧನಧಞ್ಞಞ್ಚ ಛಡ್ಡಿಯ;

ಕೇಸೇ ಛೇದಾಪಯಿತ್ವಾನ, ಪಬ್ಬಜಿಂ ಅನಗಾರಿಯಂ.

೯೯. ‘‘ಸಿಕ್ಖಮಾನಾ ಅಹಂ ಸನ್ತೀ, ಭಾವೇನ್ತೀ ಮಗ್ಗಮಞ್ಜಸಂ;

ಪಹಾಸಿಂ ರಾಗದೋಸಞ್ಚ, ತದೇಕಟ್ಠೇ ಚ ಆಸವೇ.

೧೦೦. ‘‘ಭಿಕ್ಖುನೀ ಉಪಸಮ್ಪಜ್ಜ, ಪುಬ್ಬಜಾತಿಮನುಸ್ಸರಿಂ;

ದಿಬ್ಬಚಕ್ಖು ವಿಸೋಧಿತಂ [ವಿಸೋಧಿತಂ ದಿಬ್ಬಚಕ್ಖು (ಸೀ.)], ವಿಮಲಂ ಸಾಧುಭಾವಿತಂ.

೧೦೧. ‘‘ಸಙ್ಖಾರೇ ಪರತೋ ದಿಸ್ವಾ, ಹೇತುಜಾತೇ ಪಲೋಕಿತೇ [ಪಲೋಕಿನೇ (ಕ.)];

ಪಹಾಸಿಂ ಆಸವೇ ಸಬ್ಬೇ, ಸೀತಿಭೂತಾಮ್ಹಿ ನಿಬ್ಬುತಾ’’ತಿ.

… ಸಕುಲಾ ಥೇರೀ….

೮. ಸೋಣಾಥೇರೀಗಾಥಾ

೧೦೨. ‘‘ದಸ ಪುತ್ತೇ ವಿಜಾಯಿತ್ವಾ, ಅಸ್ಮಿಂ ರೂಪಸಮುಸ್ಸಯೇ;

ತತೋಹಂ ದುಬ್ಬಲಾ ಜಿಣ್ಣಾ, ಭಿಕ್ಖುನಿಂ ಉಪಸಙ್ಕಮಿಂ.

೧೦೩. ‘‘ಸಾ ಮೇ ಧಮ್ಮಮದೇಸೇಸಿ, ಖನ್ಧಾಯತನಧಾತುಯೋ;

ತಸ್ಸಾ ಧಮ್ಮಂ ಸುಣಿತ್ವಾನ, ಕೇಸೇ ಛೇತ್ವಾನ ಪಬ್ಬಜಿಂ.

೧೦೪. ‘‘ತಸ್ಸಾ ಮೇ ಸಿಕ್ಖಮಾನಾಯ, ದಿಬ್ಬಚಕ್ಖು ವಿಸೋಧಿತಂ;

ಪುಬ್ಬೇನಿವಾಸಂ ಜಾನಾಮಿ, ಯತ್ಥ ಮೇ ವುಸಿತಂ ಪುರೇ.

೧೦೫. ‘‘ಅನಿಮಿತ್ತಞ್ಚ ಭಾವೇಮಿ, ಏಕಗ್ಗಾ ಸುಸಮಾಹಿತಾ;

ಅನನ್ತರಾವಿಮೋಕ್ಖಾಸಿಂ, ಅನುಪಾದಾಯ ನಿಬ್ಬುತಾ.

೧೦೬. ‘‘ಪಞ್ಚಕ್ಖನ್ಧಾ ಪರಿಞ್ಞಾತಾ, ತಿಟ್ಠನ್ತಿ ಛಿನ್ನಮೂಲಕಾ;

ಧಿ ತವತ್ಥು ಜರೇ ಜಮ್ಮೇ, ನತ್ಥಿ ದಾನಿ ಪುನಬ್ಭವೋ’’ತಿ.

… ಸೋಣಾ ಥೇರೀ….

೯. ಭದ್ದಾಕುಣ್ಡಲಕೇಸಾಥೇರೀಗಾಥಾ

೧೦೭. ‘‘ಲೂನಕೇಸೀ ಪಙ್ಕಧರೀ, ಏಕಸಾಟೀ ಪುರೇ ಚರಿಂ;

ಅವಜ್ಜೇ ವಜ್ಜಮತಿನೀ, ವಜ್ಜೇ ಚಾವಜ್ಜದಸ್ಸಿನೀ.

೧೦೮. ‘‘ದಿವಾವಿಹಾರಾ ನಿಕ್ಖಮ್ಮ, ಗಿಜ್ಝಕೂಟಮ್ಹಿ ಪಬ್ಬತೇ;

ಅದ್ದಸಂ ವಿರಜಂ ಬುದ್ಧಂ, ಭಿಕ್ಖುಸಙ್ಘಪುರಕ್ಖತಂ.

೧೦೯. ‘‘ನಿಹಚ್ಚ ಜಾಣುಂ ವನ್ದಿತ್ವಾ, ಸಮ್ಮುಖಾ ಅಞ್ಜಲಿಂ ಅಕಂ;

‘ಏಹಿ ಭದ್ದೇ’ತಿ ಮಂ ಅವಚ, ಸಾ ಮೇ ಆಸೂಪಸಮ್ಪದಾ.

೧೧೦. ‘‘ಚಿಣ್ಣಾ ಅಙ್ಗಾ ಚ ಮಗಧಾ, ವಜ್ಜೀ ಕಾಸೀ ಚ ಕೋಸಲಾ;

ಅನಣಾ ಪಣ್ಣಾಸವಸ್ಸಾನಿ, ರಟ್ಠಪಿಣ್ಡಂ ಅಭುಞ್ಜಹಂ.

೧೧೧. ‘‘ಪುಞ್ಞಂ ವತ ಪಸವಿ ಬಹುಂ, ಸಪ್ಪಞ್ಞೋ ವತಾಯಂ ಉಪಾಸಕೋ;

ಯೋ ಭದ್ದಾಯ ಚೀವರಂ ಅದಾಸಿ, ವಿಪ್ಪಮುತ್ತಾಯ ಸಬ್ಬಗನ್ಥೇಹೀ’’ತಿ.

… ಭದ್ದಾ ಕುಣ್ಡಲಕೇಸಾ ಥೇರೀ….

೧೦. ಪಟಾಚಾರಾಥೇರೀಗಾಥಾ

೧೧೨. ‘‘ನಙ್ಗಲೇಹಿ ಕಸಂ ಖೇತ್ತಂ, ಬೀಜಾನಿ ಪವಪಂ ಛಮಾ;

ಪುತ್ತದಾರಾನಿ ಪೋಸೇನ್ತಾ, ಧನಂ ವಿನ್ದನ್ತಿ ಮಾಣವಾ.

೧೧೩. ‘‘ಕಿಮಹಂ ಸೀಲಸಮ್ಪನ್ನಾ, ಸತ್ಥುಸಾಸನಕಾರಿಕಾ;

ನಿಬ್ಬಾನಂ ನಾಧಿಗಚ್ಛಾಮಿ, ಅಕುಸೀತಾ ಅನುದ್ಧತಾ.

೧೧೪. ‘‘ಪಾದೇ ಪಕ್ಖಾಲಯಿತ್ವಾನ, ಉದಕೇಸು ಕರೋಮಹಂ;

ಪಾದೋದಕಞ್ಚ ದಿಸ್ವಾನ, ಥಲತೋ ನಿನ್ನಮಾಗತಂ.

೧೧೫. ‘‘ತತೋ ಚಿತ್ತಂ ಸಮಾಧೇಸಿಂ, ಅಸ್ಸಂ ಭದ್ರಂವಜಾನಿಯಂ;

ತತೋ ದೀಪಂ ಗಹೇತ್ವಾನ, ವಿಹಾರಂ ಪಾವಿಸಿಂ ಅಹಂ;

ಸೇಯ್ಯಂ ಓಲೋಕಯಿತ್ವಾನ, ಮಞ್ಚಕಮ್ಹಿ ಉಪಾವಿಸಿಂ.

೧೧೬. ‘‘ತತೋ ಸೂಚಿಂ ಗಹೇತ್ವಾನ, ವಟ್ಟಿಂ ಓಕಸ್ಸಯಾಮಹಂ;

ಪದೀಪಸ್ಸೇವ ನಿಬ್ಬಾನಂ, ವಿಮೋಕ್ಖೋ ಅಹು ಚೇತಸೋ’’ತಿ.

… ಪಟಾಚಾರಾ ಥೇರೀ….

೧೧. ತಿಂಸಮತ್ತಾಥೇರೀಗಾಥಾ

೧೧೭. ‘‘‘ಮುಸಲಾನಿ ಗಹೇತ್ವಾನ, ಧಞ್ಞಂ ಕೋಟ್ಟೇನ್ತಿ ಮಾಣವಾ [ಮಾನವಾ (ಸೀ.)];

ಪುತ್ತದಾರಾನಿ ಪೋಸೇನ್ತಾ, ಧನಂ ವಿನ್ದನ್ತಿ ಮಾಣವಾ.

೧೧೮. ‘‘‘ಕರೋಥ ಬುದ್ಧಸಾಸನಂ, ಯಂ ಕತ್ವಾ ನಾನುತಪ್ಪತಿ;

ಖಿಪ್ಪಂ ಪಾದಾನಿ ಧೋವಿತ್ವಾ, ಏಕಮನ್ತೇ ನಿಸೀದಥ;

ಚೇತೋಸಮಥಮನುಯುತ್ತಾ, ಕರೋಥ ಬುದ್ಧಸಾಸನಂ’.

೧೧೯. ‘‘ತಸ್ಸಾ ತಾ [ತಂ (ಸೀ.)] ವಚನಂ ಸುತ್ವಾ, ಪಟಾಚಾರಾಯ ಸಾಸನಂ;

ಪಾದೇ ಪಕ್ಖಾಲಯಿತ್ವಾನ, ಏಕಮನ್ತಂ ಉಪಾವಿಸುಂ;

ಚೇತೋಸಮಥಮನುಯುತ್ತಾ, ಅಕಂಸು ಬುದ್ಧಸಾಸನಂ.

೧೨೦. ‘‘ರತ್ತಿಯಾ ಪುರಿಮೇ ಯಾಮೇ, ಪುಬ್ಬಜಾತಿಮನುಸ್ಸರುಂ;

ರತ್ತಿಯಾ ಮಜ್ಝಿಮೇ ಯಾಮೇ, ದಿಬ್ಬಚಕ್ಖುಂ ವಿಸೋಧಯುಂ;

ರತ್ತಿಯಾ ಪಚ್ಛಿಮೇ ಯಾಮೇ, ತಮೋಖನ್ಧಂ ಪದಾಲಯುಂ.

೧೨೧. ‘‘ಉಟ್ಠಾಯ ಪಾದೇ ವನ್ದಿಂಸು, ‘ಕತಾ ತೇ ಅನುಸಾಸನೀ;

ಇನ್ದಂವ ದೇವಾ ತಿದಸಾ, ಸಙ್ಗಾಮೇ ಅಪರಾಜಿತಂ;

ಪುರಕ್ಖತ್ವಾ ವಿಹಸ್ಸಾಮ [ವಿಹರಾಮ (ಸೀ.), ವಿಹರಿಸ್ಸಾಮ (ಸ್ಯಾ.)], ತೇವಿಜ್ಜಾಮ್ಹ ಅನಾಸವಾ’’’ತಿ.

ಇತ್ಥಂ ಸುದಂ ತಿಂಸಮತ್ತಾ ಥೇರೀ ಭಿಕ್ಖುನಿಯೋ ಪಟಾಚಾರಾಯ ಸನ್ತಿಕೇ ಅಞ್ಞಂ ಬ್ಯಾಕರಿಂಸೂತಿ.

೧೨. ಚನ್ದಾಥೇರೀಗಾಥಾ

೧೨೨. ‘‘ದುಗ್ಗತಾಹಂ ಪುರೇ ಆಸಿಂ, ವಿಧವಾ ಚ ಅಪುತ್ತಿಕಾ;

ವಿನಾ ಮಿತ್ತೇಹಿ ಞಾತೀಹಿ, ಭತ್ತಚೋಳಸ್ಸ ನಾಧಿಗಂ.

೧೨೩. ‘‘ಪತ್ತಂ ದಣ್ಡಞ್ಚ ಗಣ್ಹಿತ್ವಾ, ಭಿಕ್ಖಮಾನಾ ಕುಲಾ ಕುಲಂ;

ಸೀತುಣ್ಹೇನ ಚ ಡಯ್ಹನ್ತೀ, ಸತ್ತ ವಸ್ಸಾನಿ ಚಾರಿಹಂ.

೧೨೪. ‘‘ಭಿಕ್ಖುನಿಂ ಪುನ ದಿಸ್ವಾನ, ಅನ್ನಪಾನಸ್ಸ ಲಾಭಿನಿಂ;

ಉಪಸಙ್ಕಮ್ಮ ಅವೋಚಂ [ಅವೋಚಿಂ (ಕ.)], ‘ಪಬ್ಬಜ್ಜಂ ಅನಗಾರಿಯಂ’.

೧೨೫. ‘‘ಸಾ ಚ ಮಂ ಅನುಕಮ್ಪಾಯ, ಪಬ್ಬಾಜೇಸಿ ಪಟಾಚಾರಾ;

ತತೋ ಮಂ ಓವದಿತ್ವಾನ, ಪರಮತ್ಥೇ ನಿಯೋಜಯಿ.

೧೨೬. ‘‘ತಸ್ಸಾಹಂ ವಚನಂ ಸುತ್ವಾ, ಅಕಾಸಿಂ ಅನುಸಾಸನಿಂ;

ಅಮೋಘೋ ಅಯ್ಯಾಯೋವಾದೋ, ತೇವಿಜ್ಜಾಮ್ಹಿ ಅನಾಸವಾ’’ತಿ.