೬. ಅಭಿರೂಪನನ್ದಾಥೇರೀಅಪದಾನಂ

೧೪೩. ‘‘ಏಕನವುತಿತೋ ಕಪ್ಪೇ, ವಿಪಸ್ಸೀ ನಾಮ ನಾಯಕೋ;

ಉಪ್ಪಜ್ಜಿ ಚಾರುದಸ್ಸನೋ, ಸಬ್ಬಧಮ್ಮೇಸು ಚಕ್ಖುಮಾ.

೧೪೪. ‘‘ತದಾಹಂ ಬನ್ಧುಮತಿಯಂ, ಇದ್ಧೇ ಫೀತೇ ಮಹಾಕುಲೇ;

ಜಾತಾ ಸುರೂಪಾ ದಯಿತಾ, ಪೂಜನೀಯಾ ಜನಸ್ಸ ಚ.

೧೪೫. ‘‘ಉಪಗನ್ತ್ವಾ ಮಹಾವೀರಂ, ವಿಪಸ್ಸಿಂ ಲೋಕನಾಯಕಂ;

ಧಮ್ಮಂ ಸುಣಿತ್ವಾ ಸರಣಂ, ಉಪೇಸಿಂ ನರನಾಯಕಂ.

೧೪೬. ‘‘ಸೀಲೇಸು ಸಂವುತಾ ಹುತ್ವಾ, ನಿಬ್ಬುತೇ ಚ ನರುತ್ತಮೇ;

ಧಾತುಥೂಪಸ್ಸ ಉಪರಿ, ಸೋಣ್ಣಚ್ಛತ್ತಮಪೂಜಯಿಂ.

೧೪೭. ‘‘ಮುತ್ತಚಾಗಾ ಸೀಲವತೀ, ಯಾವಜೀವಂ ತತೋ ಚುತಾ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗಾ ಅಹಂ.

೧೪೮. ‘‘ತದಾ ದಸಹಿ ಠಾನೇಹಿ, ಅಧಿಭೋತ್ವಾನ ಸೇಸಕೇ [ಅಧಿಭೋತ್ವಾ ಅಸೇಸತೋ (ಸ್ಯಾ.)];

ರೂಪಸದ್ದೇಹಿ ಗನ್ಧೇಹಿ, ರಸೇಹಿ ಫುಸನೇಹಿ ಚ.

೧೪೯. ‘‘ಆಯುನಾಪಿ ಚ ವಣ್ಣೇನ, ಸುಖೇನ ಯಸಸಾಪಿ ಚ;

ತಥೇವಾಧಿಪತೇಯ್ಯೇನ, ಅಧಿಗಯ್ಹ ವಿರೋಚಹಂ.

೧೫೦. ‘‘ಪಚ್ಛಿಮೇ ಚ ಭವೇ ದಾನಿ, ಜಾತಾಹಂ ಕಪಿಲವ್ಹಯೇ;

ಧೀತಾ ಖೇಮಕಸಕ್ಕಸ್ಸ, ನನ್ದಾ ನಾಮಾತಿ ವಿಸ್ಸುತಾ.

೧೫೧. ‘‘ಅಭಿರೂಪಸಮ್ಪದಮ್ಪಿ [ಅಭಿರುಪಂ ಉಪಪದಂ (ಸೀ.), ಅಭಿರುಪಂ ಉಪ್ಪಾದಂ (ಪೀ.)], ಅಹು ಮೇ ಕನ್ತಿಸೂಚಕಂ;

ಯದಾಹಂ ಯೋಬ್ಬನಪ್ಪತ್ತಾ, ರೂಪಲಾವಞ್ಞಭೂಸಿತಾ.

೧೫೨. ‘‘ತದಾ [ತದಾ ಮಮತ್ಥಂ (ಸೀ.), ಇಧ ಮಮತ್ತೇ (ಸ್ಯಾ. ಕ.)] ಮತ್ಥೇ ಸಕ್ಯಾನಂ, ವಿವಾದೋ ಸುಮಹಾ ಅಹು;

ಪಬ್ಬಾಜೇಸಿ ತತೋ ತಾತೋ, ಮಾ ಸಕ್ಯಾ ವಿನಸ್ಸಿಂಸುತಿ.

೧೫೩. ‘‘ಪಬ್ಬಜಿತ್ವಾ ತಥಾಗತಂ, ರೂಪದೇಸ್ಸಿಂ ನರುತ್ತಮಂ;

ಸುತ್ವಾನ ನೋಪಗಚ್ಛಾಮಿ, ಮಮ ರೂಪೇನ ಗಬ್ಬಿತಾ.

೧೫೪. ‘‘ಓವಾದಮ್ಪಿ ನ ಗಚ್ಛಾಮಿ, ಬುದ್ಧದಸ್ಸನಭೀರುತಾ;

ತದಾ ಜಿನೋ ಉಪಾಯೇನ, ಉಪನೇತ್ವಾ ಸಸನ್ತಿಕಂ.

೧೫೫. ‘‘ತಿಸ್ಸಿತ್ಥಿಯೋ [ತಿಸ್ಸೋ ಥೀಯೋ (ಸೀ. ಪೀ.)] ನಿದಸ್ಸೇಸಿ, ಇದ್ಧಿಯಾ ಮಗ್ಗಕೋವಿದೋ;

ಅಚ್ಛರಾರೂಪಸದಿಸಂ, ತರುಣಿಂ ಜರಿತಂ [ಜರಿಕಂ (ಸ್ಯಾ. ಕ.)] ಮತಂ.

೧೫೬. ‘‘ತಾಯೋ ದಿಸ್ವಾ ಸುಸಂವಿಗ್ಗಾ, ವಿರತ್ತಾಸೇ ಕಳೇವರೇ;

ಅಟ್ಠಾಸಿಂ ಭವನಿಬ್ಬಿನ್ದಾ, ತದಾ ಮಂ ಆಹ ನಾಯಕೋ.

೧೫೭. ‘‘‘ಆತುರಂ ಅಸುಚಿಂ ಪೂತಿಂ, ಪಸ್ಸ ನನ್ದೇ ಸಮುಸ್ಸಯಂ;

ಉಗ್ಘರನ್ತಂ ಪಗ್ಘರನ್ತಂ, ಬಾಲಾನಂ ಅಭಿನನ್ದಿತಂ.

೧೫೮. ‘‘‘ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ;

ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ.

೧೫೯. ‘‘‘ಏವಮೇತಂ ಅವೇಕ್ಖನ್ತೀ, ರತ್ತಿನ್ದಿವಮತನ್ದಿತಾ;

ತತೋ ಸಕಾಯ ಪಞ್ಞಾಯ, ಅಭಿನಿಬ್ಬಿಜ್ಝ ವಚ್ಛಸಿ’.

೧೬೦. ‘‘ತಸ್ಸಾ ಮೇ ಅಪ್ಪಮತ್ತಾಯ, ವಿಚರನ್ತಿಯಾ [ವಿಚರನ್ತ್ವಾಧ (ಸೀ.), ವಿಚಿನನ್ತೀಧ (ಸ್ಯಾ. ಪೀ.)] ಯೋನಿಸೋ;

ಯಥಾಭೂತಂ ಅಯಂ ಕಾಯೋ, ದಿಟ್ಠೋ ಸನ್ತರಬಾಹಿರೋ.

೧೬೧. ‘‘ಅಥ ನಿಬ್ಬಿನ್ದಹಂ ಕಾಯೇ, ಅಜ್ಝತ್ತಞ್ಚ ವಿರಜ್ಜಹಂ;

ಅಪ್ಪಮತ್ತಾ ವಿಸಂಯುತ್ತಾ, ಉಪಸನ್ತಾಮ್ಹಿ ನಿಬ್ಬುತಾ.

೧೬೨. ‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.

೧೬೩. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೧೬೪. ‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.

೧೬೫. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೧೬೬. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೬೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಅಭಿರೂಪನನ್ದಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಭಿರೂಪನನ್ದಾಥೇರಿಯಾಪದಾನಂ ಛಟ್ಠಂ.