೧೦. ಪೇಸಲಾಥೇರೀಅಪದಾನಂ

೨೨೦. ‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.

೨೨೧. ‘‘ಸಾವತ್ಥಿಯಂ ಪುರೇ ವರೇ, ಉಪಾಸಕಕುಲೇ ಅಹಂ;

ಪಸೂತಾ ತಂ [ನಂ (ಸ್ಯಾ.)] ಜಿನವರಂ, ದಿಸ್ವಾ ಸುತ್ವಾ ಚ ದೇಸನಂ.

೨೨೨. ‘‘ತಂ ವೀರಂ ಸರಣಂ ಗನ್ತ್ವಾ, ಸೀಲಾನಿ ಚ ಸಮಾದಿಯಿಂ;

ಕದಾಚಿ ಸೋ ಮಹಾವೀರೋ, ಮಹಾಜನಸಮಾಗಮೇ.

೨೨೩. ‘‘ಅತ್ತನೋ ಅಭಿಸಮ್ಬೋಧಿಂ, ಪಕಾಸೇಸಿ ನರಾಸಭೋ;

ಅನನುಸ್ಸುತಧಮ್ಮೇಸು, ಪುಬ್ಬೇ ದುಕ್ಖಾದಿಕೇಸು ಚ.

೨೨೪. ‘‘ಚಕ್ಖು ಞಾಣಞ್ಚ ಪಞ್ಞಾ ಚ, ವಿಜ್ಜಾಲೋಕೋ ಚ ಆಸಿ ಮೇ;

ತಂ ಸುತ್ವಾ ಉಗ್ಗಹೇತ್ವಾನ, ಪರಿಪುಚ್ಛಿಞ್ಚ ಭಿಕ್ಖವೋ.

೨೨೫. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೨೨೬. ‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ಸೇಟ್ಠಿಮಹಾಕುಲೇ;

ಉಪೇಚ್ಚ ಬುದ್ಧಂ ಸದ್ಧಮ್ಮಂ, ಸುತ್ವಾ ಸಚ್ಚೂಪಸಂಹಿತಂ.

೨೨೭. ‘‘ಪಬ್ಬಜಿತ್ವಾಚಿರೇನೇವ, ಸಚ್ಚತ್ಥಾನಿ [ಸಬ್ಬತ್ಥಾನಿ (ಸ್ಯಾ. ಕ.)] ವಿಚಿನ್ತಯಂ;

ಖೇಪೇತ್ವಾ ಆಸವೇ ಸಬ್ಬೇ, ಅರಹತ್ತಮಪಾಪುಣಿಂ.

೨೨೮. ‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.

೨೨೯. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೨೩೦. ‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ವಾಹಸಾ.

೨೩೧. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೀವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವಾ.

೨೩೨. ‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೨೩೩. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಪೇಸಲಾ [ಸೇಲಾ (ಸ್ಯಾ. ಪೀ.)] ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪೇಸಲಾಥೇರಿಯಾಪದಾನಂ ದಸಮಂ.

ಖತ್ತಿಯಾವಗ್ಗೋ ಚತುತ್ಥೋ.