೧. ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಅಪದಾನಂ

೧. ‘‘ಭವಾ ಸಬ್ಬೇ ಪರಿಕ್ಖೀಣಾ, ಭವಾ ಸನ್ತಿ ವಿಮೋಚಿತಾ;

ಸಬ್ಬಾಸವಾ ಚ ನೋ ನತ್ಥಿ, ಆರೋಚೇಮ ಮಹಾಮುನೇ.

೨. ‘‘ಪುರಿಮಂ ಕುಸಲಂ ಕಮ್ಮಂ [ಪರಿಕಮ್ಮಞ್ಚ ಕುಸಲಂ (ಸ್ಯಾ.)], ಯಂ ಕಿಞ್ಚಿ ಸಾಧುಪತ್ಥಿತಂ;

ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ.

೩. ‘‘ಬುದ್ಧಪಚ್ಚೇಕಬುದ್ಧಾನಂ, ಸಾವಕಾನಞ್ಚ ಪತ್ಥಿತಂ [ಬುದ್ಧಾನಂ ಸಾವಕಾನಞ್ಚ (ಸೀ. ಕ.)];

ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ.

೪. ‘‘ಉಚ್ಚನೀಚಮಯಂ ಕಮ್ಮಂ, ಭಿಕ್ಖೂನಂ ಸಾಧುಪತ್ಥಿತಂ;

ಉಚ್ಚಾಕುಲಪರಿಕಮ್ಮಂ, ಕತಮೇತಂ ಮಹಾಮುನೇ [ಕತಮ್ಹೇಹಿ ಮಹಾಮುನೇ (ಸ್ಯಾ. ಪೀ.)].

೫. ‘‘ತೇನೇವ ಸುಕ್ಕಮೂಲೇನ, ಚೋದಿತಾ ಕಮ್ಮಸಮ್ಪದಾ;

ಮಾನುಸಿಕಮತಿಕ್ಕನ್ತಾ, ಜಾಯಿಂಸು ಖತ್ತಿಯೇ ಕುಲೇ.

೬. ‘‘ಉಪ್ಪತ್ತೇ ಚ ಕತೇ ಕಮ್ಮೇ, ಜಾತಿಯಾ ವಾಪಿ ಏಕತೋ;

ಪಚ್ಛಿಮೇ ಏಕತೋ ಜಾತಾ, ಖತ್ತಿಯಾ ಕುಲಸಮ್ಭವಾ.

೭. ‘‘ರೂಪವತೀ ಭೋಗವತೀ, ಲಾಭಸಕ್ಕಾರಪೂಜಿತಾ;

ಅನ್ತೇಪುರೇ ಮಹಾವೀರ, ದೇವಾನಂ ವಿಯ ನನ್ದನೇ.

೮. ‘‘ನಿಬ್ಬಿನ್ದಿತ್ವಾ ಅಗಾರಮ್ಹಾ, ಪಬ್ಬಜಿಮ್ಹನಗಾರಿಯಂ;

ಕತಿಪಾಹಂ ಉಪಾದಾಯ, ಸಬ್ಬಾ ಪತ್ತಾಮ್ಹ ನಿಬ್ಬುತಿಂ.

೯. ‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ಉಪನೇನ್ತಿ ಬಹೂ ಅಮ್ಹೇ, ಸದಾ ಸಕ್ಕತಪೂಜಿತಾ.

೧೦. ‘‘ಕಿಲೇಸಾ ಝಾಪಿತಾ ಅಮ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೀವ ಬನ್ಧನಂ ಛೇತ್ವಾ, ವಿಹರಾಮ ಅನಾಸವಾ.

೧೧. ‘‘ಸ್ವಾಗತಂ ವತ ನೋ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೧೨. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಯಸವತೀಪಮುಖಾನಿ ಖತ್ತಿಯಕಞ್ಞಾಭಿಕ್ಖುನಿಯೋ ಅಟ್ಠಾರಸಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಾಪದಾನಂ ಪಠಮಂ.