೨. ಕಿಸಾಗೋತಮೀಥೇರೀಅಪದಾನಂ

೫೫. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೫೬. ‘‘ತದಾಹಂ ಹಂಸವತಿಯಂ, ಜಾತಾ ಅಞ್ಞತರೇ ಕುಲೇ;

ಉಪೇತ್ವಾ ತಂ ನರವರಂ, ಸರಣಂ ಸಮುಪಾಗಮಿಂ.

೫೭. ‘‘ಧಮ್ಮಞ್ಚ ತಸ್ಸ ಅಸ್ಸೋಸಿಂ, ಚತುಸಚ್ಚೂಪಸಞ್ಹಿತಂ;

ಮಧುರಂ ಪರಮಸ್ಸಾದಂ, ವಟ್ಟಸನ್ತಿಸುಖಾವಹಂ [ಚಿತ್ತಸನ್ತಿ … (ಸ್ಯಾ.)].

೫೮. ‘‘ತದಾ ಚ ಭಿಕ್ಖುನಿಂ ವೀರೋ, ಲೂಖಚೀವರಧಾರಿನಿಂ;

ಠಪೇನ್ತೋ ಏತದಗ್ಗಮ್ಹಿ, ವಣ್ಣಯೀ ಪುರಿಸುತ್ತಮೋ.

೫೯. ‘‘ಜನೇತ್ವಾನಪ್ಪಕಂ ಪೀತಿಂ, ಸುತ್ವಾ ಭಿಕ್ಖುನಿಯಾ ಗುಣೇ;

ಕಾರಂ ಕತ್ವಾನ ಬುದ್ಧಸ್ಸ, ಯಥಾಸತ್ತಿ ಯಥಾಬಲಂ.

೬೦. ‘‘ನಿಪಚ್ಚ ಮುನಿವರಂ ತಂ, ತಂ ಠಾನಮಭಿಪತ್ಥಯಿಂ;

ತದಾನುಮೋದಿ ಸಮ್ಬುದ್ಧೋ, ಠಾನಲಾಭಾಯ ನಾಯಕೋ.

೬೧. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೬೨. ‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;

ಕಿಸಾಗೋತಮೀ [ಗೋತಮೀ ನಾಮ (ಸೀ. ಕ.)] ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.

೬೩. ‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;

ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.

೬೪. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೬೫. ‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.

೬೬. ‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;

ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.

೬೭. ‘‘ಪಞ್ಚಮೀ ತಸ್ಸ ಧೀತಾಸಿಂ, ಧಮ್ಮಾ ನಾಮೇನ ವಿಸ್ಸುತಾ;

ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.

೬೮. ‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;

ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.

೬೯. ‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;

ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತ ಧೀತರೋ.

೭೦. ‘‘ಸಮಣೀ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;

ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.

೭೧. ‘‘ಖೇಮಾ ಉಪ್ಪಲವಣ್ಣಾ ಚ, ಪಟಾಚಾರಾ ಚ ಕುಣ್ಡಲಾ;

ಅಹಞ್ಚ ಧಮ್ಮದಿನ್ನಾ ಚ, ವಿಸಾಖಾ ಹೋತಿ ಸತ್ತಮೀ.

೭೨. ‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೭೩. ‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ಸೇಟ್ಠಿಕುಲೇ ಅಹಂ;

ದುಗ್ಗತೇ ಅಧನೇ ನಟ್ಠೇ [ನೀಚೇ (ಸ್ಯಾ.), ನಿದ್ಧೇ (ಪೀ.)], ಗತಾ ಚ ಸಧನಂ ಕುಲಂ.

೭೪. ‘‘ಪತಿಂ ಠಪೇತ್ವಾ ಸೇಸಾ ಮೇ, ದೇಸ್ಸನ್ತಿ ಅಧನಾ ಇತಿ;

ಯದಾ ಚ ಪಸೂತಾ [ಸಸುತಾ (ಸೀ. ಪೀ.)] ಆಸಿಂ, ಸಬ್ಬೇಸಂ ದಯಿತಾ ತದಾ.

೭೫. ‘‘ಯದಾ ಸೋ ತರುಣೋ ಭದ್ದೋ [ಪುತ್ತೋ (ಸೀ. ಸ್ಯಾ.)], ಕೋಮಲಕೋ [ಕೋಮಾರಕೋ (ಸ್ಯಾ.), ಕೋಮಲಙ್ಗೋ (ಸೀ. ಪೀ.)] ಸುಖೇಧಿತೋ;

ಸಪಾಣಮಿವ ಕನ್ತೋ ಮೇ, ತದಾ ಯಮವಸಂ ಗತೋ.

೭೬. ‘‘ಸೋಕಟ್ಟಾ ದೀನವದನಾ, ಅಸ್ಸುನೇತ್ತಾ ರುದಮ್ಮುಖಾ;

ಮತಂ ಕುಣಪಮಾದಾಯ, ವಿಲಪನ್ತೀ ಗಮಾಮಹಂ.

೭೭. ‘‘ತದಾ ಏಕೇನ ಸನ್ದಿಟ್ಠಾ, ಉಪೇತ್ವಾಭಿಸಕ್ಕುತ್ತಮಂ;

ಅವೋಚಂ ದೇಹಿ ಭೇಸಜ್ಜಂ, ಪುತ್ತಸಞ್ಜೀವನನ್ತಿ ಭೋ.

೭೮. ‘‘ನ ವಿಜ್ಜನ್ತೇ ಮತಾ ಯಸ್ಮಿಂ, ಗೇಹೇ ಸಿದ್ಧತ್ಥಕಂ ತತೋ;

ಆಹರಾತಿ ಜಿನೋ ಆಹ, ವಿನಯೋಪಾಯಕೋವಿದೋ.

೭೯. ‘‘ತದಾ ಗಮಿತ್ವಾ ಸಾವತ್ಥಿಂ, ನ ಲಭಿಂ ತಾದಿಸಂ ಘರಂ;

ಕುತೋ ಸಿದ್ಧತ್ಥಕಂ ತಸ್ಮಾ, ತತೋ ಲದ್ಧಾ ಸತಿಂ ಅಹಂ.

೮೦. ‘‘ಕುಣಪಂ ಛಡ್ಡಯಿತ್ವಾನ, ಉಪೇಸಿಂ ಲೋಕನಾಯಕಂ;

ದೂರತೋವ ಮಮಂ ದಿಸ್ವಾ, ಅವೋಚ ಮಧುರಸ್ಸರೋ.

೮೧. ‘‘‘ಯೋ ಚ ವಸ್ಸಸತಂ ಜೀವೇ, ಅಪಸ್ಸಂ ಉದಯಬ್ಬಯಂ;

ಏಕಾಹಂ ಜೀವಿತಂ ಸೇಯ್ಯೋ, ಪಸ್ಸತೋ ಉದಯಬ್ಬಯಂ.

೮೨. ‘‘‘ನ ಗಾಮಧಮ್ಮೋ ನಿಗಮಸ್ಸ ಧಮ್ಮೋ, ನ ಚಾಪಿಯಂ ಏಕಕುಲಸ್ಸ ಧಮ್ಮೋ;

ಸಬ್ಬಸ್ಸ ಲೋಕಸ್ಸ ಸದೇವಕಸ್ಸ, ಏಸೇವ ಧಮ್ಮೋ ಯದಿದಂ ಅನಿಚ್ಚತಾ’.

೮೩. ‘‘ಸಾಹಂ ಸುತ್ವಾನಿಮಾ [ಸಹಸುತ್ವಾನಿಮಾ (ಕ.)] ಗಾಥಾ, ಧಮ್ಮಚಕ್ಖುಂ ವಿಸೋಧಯಿಂ;

ತತೋ ವಿಞ್ಞಾತಸದ್ಧಮ್ಮಾ, ಪಬ್ಬಜಿಂ ಅನಗಾರಿಯಂ.

೮೪. ‘‘ತಥಾ ಪಬ್ಬಜಿತಾ ಸನ್ತೀ, ಯುಞ್ಜನ್ತೀ ಜಿನಸಾಸನೇ;

ನ ಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ.

೮೫. ‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.

೮೬. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.

೮೭. ‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.

೮೮. ‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

೮೯. ‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ವಾಹಸಾ.

೯೦. ‘‘ಸಙ್ಕಾರಕೂಟಾ ಆಹಿತ್ವಾ, ಸುಸಾನಾ ರಥಿಯಾಪಿ ಚ;

ತತೋ ಸಙ್ಘಾಟಿಕಂ ಕತ್ವಾ, ಲೂಖಂ ಧಾರೇಮಿ ಚೀವರಂ.

೯೧. ‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಲೂಖಚೀವರಧಾರಣೇ;

ಠಪೇಸಿ ಏತದಗ್ಗಮ್ಹಿ, ಪರಿಸಾಸು ವಿನಾಯಕೋ.

೯೨. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೯೩. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೯೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಕಿಸಾಗೋತಮೀ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕಿಸಾಗೋತಮೀಥೇರಿಯಾಪದಾನಂ ದುತಿಯಂ.