೯. ಪಞ್ಚದೀಪಿಕಾಥೇರೀಅಪದಾನಂ

೯೧. ‘‘ನಗರೇ ಹಂಸವತಿಯಾ, ಚಾರಿಕೀ [ಚಾರಿನಿಂ (ಸ್ಯಾ.)] ಆಸಹಂ ತದಾ;

ಆರಾಮೇನ ಚ ಆರಾಮಂ, ಚರಾಮಿ ಕುಸಲತ್ಥಿಕಾ.

೯೨. ‘‘ಕಾಳಪಕ್ಖಮ್ಹಿ ದಿವಸೇ, ಅದ್ದಸಂ ಬೋಧಿಮುತ್ತಮಂ;

ತತ್ಥ ಚಿತ್ತಂ ಪಸಾದೇತ್ವಾ, ಬೋಧಿಮೂಲೇ ನಿಸೀದಹಂ.

೯೩. ‘‘ಗರುಚಿತ್ತಂ ಉಪಟ್ಠೇತ್ವಾ, ಸಿರೇ ಕತ್ವಾನ ಅಞ್ಜಲಿಂ;

ಸೋಮನಸ್ಸಂ ಪವೇದೇತ್ವಾ, ಏವಂ ಚಿನ್ತೇಸಿ ತಾವದೇ.

೯೪. ‘‘‘ಯದಿ ಬುದ್ಧೋ ಅಮಿತಗುಣೋ, ಅಸಮಪ್ಪಟಿಪುಗ್ಗಲೋ;

ದಸ್ಸೇತು ಪಾಟಿಹೀರಂ ಮೇ, ಬೋಧಿ ಓಭಾಸತು ಅಯಂ’.

೯೫. ‘‘ಸಹ ಆವಜ್ಜಿತೇ ಮಯ್ಹಂ, ಬೋಧಿ ಪಜ್ಜಲಿ ತಾವದೇ;

ಸಬ್ಬಸೋಣ್ಣಮಯಾ ಆಸಿ, ದಿಸಾ ಸಬ್ಬಾ ವಿರೋಚತಿ.

೯೬. ‘‘ಸತ್ತರತ್ತಿನ್ದಿವಂ [ಸತ್ತರತ್ತಿದಿವಂ (ಪೀ. ಕ.)] ತತ್ಥ, ಬೋಧಿಮೂಲೇ ನಿಸೀದಹಂ;

ಸತ್ತಮೇ ದಿವಸೇ ಪತ್ತೇ, ದೀಪಪೂಜಂ ಅಕಾಸಹಂ.

೯೭. ‘‘ಆಸನಂ ಪರಿವಾರೇತ್ವಾ, ಪಞ್ಚದೀಪಾನಿ ಪಜ್ಜಲುಂ;

ಯಾವ ಉದೇತಿ ಸೂರಿಯೋ, ದೀಪಾ ಮೇ ಪಜ್ಜಲುಂ ತದಾ.

೯೮. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೯೯. ‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಪಞ್ಚದೀಪಾತಿ ವುಚ್ಚತಿ;

ಸಟ್ಠಿಯೋಜನಮುಬ್ಬೇಧಂ [ಸತಯೋಜನಮುಬ್ಬೇಧಂ (ಸೀ. ಸ್ಯಾ. ಪೀ.)], ತಿಂಸಯೋಜನವಿತ್ಥತಂ [ಸಟ್ಠಿ… (ಸ್ಯಾ. ಪೀ.)].

೧೦೦. ‘‘ಅಸಙ್ಖಿಯಾನಿ ದೀಪಾನಿ, ಪರಿವಾರೇ ಜಲನ್ತಿ ಮೇ;

ಯಾವತಾ ದೇವಭವನಂ, ದೀಪಾಲೋಕೇನ ಜೋತತಿ.

೧೦೧. ‘‘ಪರಮ್ಮುಖಾ ನಿಸೀದಿತ್ವಾ [ಪುರತ್ಥಾಭಿಮುಖಾ ಸನ್ತಿ (ಸ್ಯಾ.), ಪುರತ್ಥಾಭಿಮುಖಾ ಥಿತಾ (ಪೀ.)], ಯದಿ ಇಚ್ಛಾಮಿ ಪಸ್ಸಿತುಂ;

ಉದ್ಧಂ ಅಧೋ ಚ ತಿರಿಯಂ, ಸಬ್ಬಂ ಪಸ್ಸಾಮಿ ಚಕ್ಖುನಾ.

೧೦೨. ‘‘ಯಾವತಾ ಅಭಿಕಙ್ಖಾಮಿ, ದಟ್ಠುಂ ಸುಗತದುಗ್ಗತೇ [ಸುಕತದುಕ್ಕತೇ (ಪೀ.];

ತತ್ಥ ಆವರಣಂ ನತ್ಥಿ, ರುಕ್ಖೇಸು ಪಬ್ಬತೇಸು ವಾ.

೧೦೩. ‘‘ಅಸೀತಿ ದೇವರಾಜೂನಂ, ಮಹೇಸಿತ್ತಮಕಾರಯಿಂ;

ಸತಾನಂ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.

೧೦೪. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ದೀಪಸತಸಹಸ್ಸಾನಿ, ಪರಿವಾರೇ ಜಲನ್ತಿ ಮೇ.

೧೦೫. ‘‘ದೇವಲೋಕಾ ಚವಿತ್ವಾನ, ಉಪ್ಪಜ್ಜಿಂ ಮಾತುಕುಚ್ಛಿಯಂ;

ಮಾತುಕುಚ್ಛಿಗತಾ ಸನ್ತೀ [ಮಾತುಕುಚ್ಛಿಗತಂ ಸನ್ತಿಂ (ಸೀ.)], ಅಕ್ಖಿ ಮೇ ನ ನಿಮೀಲತಿ.

೧೦೬. ‘‘ದೀಪಸತಸಹಸ್ಸಾನಿ, ಪುಞ್ಞಕಮ್ಮಸಮಙ್ಗಿತಾ;

ಜಲನ್ತಿ ಸೂತಿಕಾಗೇಹೇ [ಸೂತಿಘರೇ ಪಜ್ಜಲನ್ತಿ (ಸಬ್ಬತ್ಥ)], ಪಞ್ಚದೀಪಾನಿದಂ ಫಲಂ.

೧೦೭. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಮಾನಸಂ ವಿನಿವತ್ತಯಿಂ;

ಅಜರಾಮತಂ ಸೀತಿಭಾವಂ, ನಿಬ್ಬಾನಂ ಫಸ್ಸಯಿಂ ಅಹಂ.

೧೦೮. ‘‘ಜಾತಿಯಾ ಸತ್ತವಸ್ಸಾಹಂ, ಅರಹತ್ತಮಪಾಪುಣಿಂ;

ಉಪಸಮ್ಪಾದಯೀ ಬುದ್ಧೋ, ಗುಣಮಞ್ಞಾಯ ಗೋತಮೋ.

೧೦೯. ‘‘ಮಣ್ಡಪೇ ರುಕ್ಖಮೂಲೇ ವಾ, ಪಾಸಾದೇಸು ಗುಹಾಸು ವಾ;

ಸುಞ್ಞಾಗಾರೇ ವಸನ್ತಿಯಾ [ಚ ಝಾಯನ್ತೇ (ಸೀ.), ಚ ಝಾಯನ್ತಾ (ಪೀ.), ಪಜ್ಝಾಯನ್ತಾ (ಸ್ಯಾ.)], ಪಞ್ಚದೀಪಾ ಜಲನ್ತಿ ಮೇ.

೧೧೦. ‘‘ದಿಬ್ಬಚಕ್ಖು ವಿಸುದ್ಧಂ ಮೇ, ಸಮಾಧಿಕುಸಲಾ ಅಹಂ;

ಅಭಿಞ್ಞಾಪಾರಮಿಪ್ಪತ್ತಾ, ಪಞ್ಚದೀಪಾನಿದಂ ಫಲಂ.

೧೧೧. ‘‘ಸಬ್ಬವೋಸಿತವೋಸಾನಾ, ಕತಕಿಚ್ಚಾ ಅನಾಸವಾ;

ಪಞ್ಚದೀಪಾ ಮಹಾವೀರ, ಪಾದೇ ವನ್ದಾಮಿ [ವನ್ದತಿ (ಸೀ. ಕ.)] ಚಕ್ಖುಮ.

೧೧೨. ‘‘ಸತಸಹಸ್ಸಿತೋ ಕಪ್ಪೇ, ಯಂ ದೀಪಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಞ್ಚದೀಪಾನಿದಂ ಫಲಂ.

೧೧೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೧೧೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೧೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಪಞ್ಚದೀಪಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಞ್ಚದೀಪಿಕಾಥೇರಿಯಾಪದಾನಂ ನವಮಂ.