೧೦. ಉದಕದಾಯಿಕಾಥೇರೀಅಪದಾನಂ

೧೧೬. ‘‘ನಗರೇ ಬನ್ಧುಮತಿಯಾ, ಅಹೋಸಿಂ ಉದಹಾರಿಕಾ;

ಉದಹಾರೇನ ಜೀವಾಮಿ, ತೇನ ಪೋಸೇಮಿ ದಾರಕೇ.

೧೧೭. ‘‘ದೇಯ್ಯಧಮ್ಮೋ ಚ ಮೇ ನತ್ಥಿ, ಪುಞ್ಞಕ್ಖೇತ್ತೇ ಅನುತ್ತರೇ;

ಕೋಟ್ಠಕಂ ಉಪಸಙ್ಕಮ್ಮ, ಉದಕಂ ಪಟ್ಠಪೇಸಹಂ.

೧೧೮. ‘‘ತೇನ ಕಮ್ಮೇನ ಸುಕತೇನ, ತಾವತಿಂಸಮಗಚ್ಛಹಂ;

ತತ್ಥ ಮೇ ಸುಕತಂ ಬ್ಯಮ್ಹಂ, ಉದಹಾರೇನ ನಿಮ್ಮಿತಂ.

೧೧೯. ‘‘ಅಚ್ಛರಾನಂ ಸಹಸ್ಸಸ್ಸ, ಅಹಞ್ಹಿ ಪವರಾ ತದಾ;

ದಸಟ್ಠಾನೇಹಿ ತಾ ಸಬ್ಬಾ, ಅಭಿಭೋಮಿ ಸದಾ ಅಹಂ.

೧೨೦. ‘‘ಪಞ್ಞಾಸಂ ದೇವರಾಜೂನಂ, ಮಹೇಸಿತ್ತಮಕಾರಯಿಂ;

ವೀಸತಿಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.

೧೨೧. ‘‘ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;

ದುಗ್ಗತಿಂ ನಾಭಿಜಾನಾಮಿ, ದಕದಾನಸ್ಸಿದಂ ಫಲಂ.

೧೨೨. ‘‘ಪಬ್ಬತಗ್ಗೇ ದುಮಗ್ಗೇ ವಾ, ಅನ್ತಲಿಕ್ಖೇ ಚ ಭೂಮಿಯಂ;

ಯದಾ ಉದಕಮಿಚ್ಛಾಮಿ, ಖಿಪ್ಪಂ ಪಟಿಲಭಾಮಹಂ.

೧೨೩. ‘‘ಅವುಟ್ಠಿಕಾ ದಿಸಾ ನತ್ಥಿ, ಸನ್ತತ್ತಾ ಕುಥಿತಾಪಿ [ಸನ್ತತ್ತಾ ಕುಥಿತಾ ನ ಚ (ಸೀ. ಪೀ.), ಸನ್ತತ್ತಾ ಖುಪ್ಪಿತಾ ಹಿ ಮೇ (ಸ್ಯಾ.)] ಚ;

ಮಮ ಸಙ್ಕಪ್ಪಮಞ್ಞಾಯ, ಮಹಾಮೇಘೋ ಪವಸ್ಸತಿ.

೧೨೪. ‘‘ಕದಾಚಿ ನೀಯಮಾನಾಯ, ಞಾತಿಸಙ್ಘೇನ ಮೇ ತದಾ;

ಯದಾ ಇಚ್ಛಾಮಹಂ ವಸ್ಸಂ, ಮಹಾಮೇಘೋ ಅಜಾಯಥ.

೧೨೫. ‘‘ಉಣ್ಹಂ ವಾ ಪರಿಳಾಹೋ ವಾ, ಸರೀರೇ ಮೇ ನ ವಿಜ್ಜತಿ;

ಕಾಯೇ ಚ ಮೇ ರಜೋ ನತ್ಥಿ, ದಕದಾನಸ್ಸಿದಂ ಫಲಂ.

೧೨೬. ‘‘ವಿಸುದ್ಧಮನಸಾ ಅಜ್ಜ, ಅಪೇತಮನಪಾಪಿಕಾ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೧೨೭. ‘‘ಏಕನವುತಿತೋ ಕಪ್ಪೇ, ಯಂ ದಕಂ ಅದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ದಕದಾನಸ್ಸಿದಂ ಫಲಂ.

೧೨೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೧೨೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಉದಕದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉದಕದಾಯಿಕಾಥೇರಿಯಾಪದಾನಂ ದಸಮಂ.

ಸುಮೇಧಾವಗ್ಗೋ ಪಠಮೋ.