೬. ಏಕಪಿಣ್ಡಪಾತದಾಯಿಕಾಥೇರೀಅಪದಾನಂ

೪೬. ‘‘ನಗರೇ ಬನ್ಧುಮತಿಯಾ, ಬನ್ಧುಮಾ ನಾಮ ಖತ್ತಿಯೋ;

ತಸ್ಸ ರಞ್ಞೋ ಅಹುಂ ಭರಿಯಾ, ಏಕಜ್ಝಂ ಚಾರಯಾಮಹಂ [ಏಕಚ್ಚಂ ವಾದಯಾಮಹಂ (ಸ್ಯಾ.)].

೪೭. ‘‘ರಹೋಗತಾ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;

‘ಆದಾಯ ಗಮನೀಯಞ್ಹಿ, ಕುಸಲಂ ನತ್ಥಿ ಮೇ ಕತಂ.

೪೮. ‘‘‘ಮಹಾಭಿತಾಪಂ ಕಟುಕಂ, ಘೋರರೂಪಂ ಸುದಾರುಣಂ;

ನಿರಯಂ ನೂನ ಗಚ್ಛಾಮಿ, ಏತ್ಥ ಮೇ ನತ್ಥಿ ಸಂಸಯೋ’.

೪೯. ‘‘ರಾಜಾನಂ ಉಪಸಙ್ಕಮ್ಮ, ಇದಂ ವಚನಮಬ್ರವಿಂ;

‘ಏಕಂ ಮೇ ಸಮಣಂ ದೇಹಿ, ಭೋಜಯಿಸ್ಸಾಮಿ ಖತ್ತಿಯ’.

೫೦. ‘‘ಅದಾಸಿ ಮೇ ಮಹಾರಾಜಾ, ಸಮಣಂ ಭಾವಿತಿನ್ದ್ರಿಯಂ;

ತಸ್ಸ ಪತ್ತಂ ಗಹೇತ್ವಾನ, ಪರಮನ್ನೇನ ಪೂರಯಿಂ [ತಪ್ಪಯಿಂ (ಸೀ.)].

೫೧. ‘‘ಪೂರಯಿತ್ವಾ ಪರಮನ್ನಂ, ಗನ್ಧಾಲೇಪಂ ಅಕಾಸಹಂ;

ಜಾಲೇನ ಪಿದಹಿತ್ವಾನ, ವತ್ಥಯುಗೇನ [ಪೀತಚೋಳೇನ (ಸ್ಯಾ.), ಮಹಾನೇಲೇನ (ಪೀ.)] ಛಾದಯಿಂ.

೫೨. ‘‘ಆರಮ್ಮಣಂ ಮಮಂ ಏತಂ, ಸರಾಮಿ ಯಾವಜೀವಿಹಂ;

ತತ್ಥ ಚಿತ್ತಂ ಪಸಾದೇತ್ವಾ, ತಾವತಿಂಸಮಗಚ್ಛಹಂ.

೫೩. ‘‘ತಿಂಸಾನಂ ದೇವರಾಜೂನಂ, ಮಹೇಸಿತ್ತಮಕಾರಯಿಂ;

ಮನಸಾ ಪತ್ಥಿತಂ ಮಯ್ಹಂ, ನಿಬ್ಬತ್ತತಿ ಯಥಿಚ್ಛಿತಂ [ಯತಿಚ್ಛಕಂ (ಸ್ಯಾ.), ಯದಿಚ್ಛಕಂ (ಪೀ. ಕ.)].

೫೪. ‘‘ವೀಸಾನಂ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ;

ಓಚಿತತ್ತಾವ [ಉಪಚಿತತ್ತಾ (ಸ್ಯಾ.)] ಹುತ್ವಾನ, ಸಂಸರಾಮಿ ಭವೇಸ್ವಹಂ.

೫೫. ‘‘ಸಬ್ಬಬನ್ಧನಮುತ್ತಾಹಂ, ಅಪೇತಾ ಮೇ ಉಪಾದಿಕಾ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೫೬. ‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.

೫೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೫೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೫೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಏಕಪಿಣ್ಡಪಾತದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಪಿಣ್ಡಪಾತದಾಯಿಕಾಥೇರಿಯಾಪದಾನಂ ಛಟ್ಠಂ.