೭. ಕಟಚ್ಛುಭಿಕ್ಖಾದಾಯಿಕಾಥೇರೀಅಪದಾನಂ

೬೦. ‘‘ಪಿಣ್ಡಚಾರಂ ಚರನ್ತಸ್ಸ, ತಿಸ್ಸನಾಮಸ್ಸ ಸತ್ಥುನೋ;

ಕಟಚ್ಛುಭಿಕ್ಖಂ ಪಗ್ಗಯ್ಹ, ಬುದ್ಧಸೇಟ್ಠಸ್ಸ ದಾಸಹಂ.

೬೧. ‘‘ಪಟಿಗ್ಗಹೇತ್ವಾ ಸಮ್ಬುದ್ಧೋ, ತಿಸ್ಸೋ ಲೋಕಗ್ಗನಾಯಕೋ;

ವೀಥಿಯಾ ಸಣ್ಠಿತೋ ಸತ್ಥಾ, ಅಕಾ ಮೇ ಅನುಮೋದನಂ.

೬೨. ‘‘‘ಕಟಚ್ಛುಭಿಕ್ಖಂ ದತ್ವಾನ, ತಾವತಿಂಸಂ ಗಮಿಸ್ಸಸಿ;

ಛತ್ತಿಂಸದೇವರಾಜೂನಂ, ಮಹೇಸಿತ್ತಂ ಕರಿಸ್ಸಸಿ.

೬೩. ‘‘‘ಪಞ್ಞಾಸಂ ಚಕ್ಕವತ್ತೀನಂ, ಮಹೇಸಿತ್ತಂ ಕರಿಸ್ಸಸಿ;

ಮನಸಾ ಪತ್ಥಿತಂ ಸಬ್ಬಂ, ಪಟಿಲಚ್ಛಸಿ ಸಬ್ಬದಾ.

೬೪. ‘‘‘ಸಮ್ಪತ್ತಿಂ ಅನುಭೋತ್ವಾನ, ಪಬ್ಬಜಿಸ್ಸಸಿಕಿಞ್ಚನಾ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸಸಿನಾಸವಾ’.

೬೫. ‘‘ಇದಂ ವತ್ವಾನ ಸಮ್ಬುದ್ಧೋ, ತಿಸ್ಸೋ ಲೋಕಗ್ಗನಾಯಕೋ;

ನಭಂ ಅಬ್ಭುಗ್ಗಮೀ ವೀರೋ, ಹಂಸರಾಜಾವ ಅಮ್ಬರೇ.

೬೬. ‘‘ಸುದಿನ್ನಂ ಮೇ ದಾನವರಂ [ಸುದಿನ್ನಮೇವ ಮೇ ದಾನಂ (ಸ್ಯಾ.)], ಸುಯಿಟ್ಠಾ ಯಾಗಸಮ್ಪದಾ;

ಕಟಚ್ಛುಭಿಕ್ಖಂ ದತ್ವಾನ, ಪತ್ತಾಹಂ ಅಚಲಂ ಪದಂ.

೬೭. ‘‘ದ್ವೇನವುತೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಭಿಕ್ಖಾದಾನಸ್ಸಿದಂ ಫಲಂ.

೬೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೬೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೭೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಕಟಚ್ಛುಭಿಕ್ಖಾದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕಟಚ್ಛುಭಿಕ್ಖಾದಾಯಿಕಾಥೇರಿಯಾಪದಾನಂ ಸತ್ತಮಂ.