೧. ಸುಮೇಧಾಥೇರೀಅಪದಾನಂ

ಅಥ ಥೇರಿಕಾಪದಾನಾನಿ ಸುಣಾಥ –

೧. ‘‘ಭಗವತಿ ಕೋಣಾಗಮನೇ, ಸಙ್ಘಾರಾಮಮ್ಹಿ ನವನಿವೇಸನಮ್ಹಿ [ನಿವೇಸಮ್ಹಿ (ಸ್ಯಾ.)];

ಸಖಿಯೋ ತಿಸ್ಸೋ ಜನಿಯೋ, ವಿಹಾರದಾನಂ ಅದಾಸಿಮ್ಹ.

೨. ‘‘ದಸಕ್ಖತ್ತುಂ ಸತಕ್ಖತ್ತುಂ, ದಸಸತಕ್ಖತ್ತುಂ ಸತಾನಞ್ಚ ಸತಕ್ಖತ್ತುಂ [ಸತಾನಿ ಚ ಸತ್ತಕ್ಖತ್ತುಂ (ಸೀ. ಕ.)];

ದೇವೇಸು ಉಪಪಜ್ಜಿಮ್ಹ, ಕೋ ವಾದೋ ಮಾನುಸೇ ಭವೇ.

೩. ‘‘ದೇವೇ ಮಹಿದ್ಧಿಕಾ ಅಹುಮ್ಹ, ಮಾನುಸಕಮ್ಹಿ ಕೋ ವಾದೋ;

ಸತ್ತರತನಮಹೇಸೀ [ಸತ್ತರತನಸ್ಸ ಮಹೇಸೀ (ಸೀ. ಪೀ.)], ಇತ್ಥಿರತನಂ ಅಹಂ ಭವಿಂ.

೪. ‘‘ಇಧ ಸಞ್ಚಿತಕುಸಲಾ [ತತ್ಥ ಸಞ್ಚಿತಂ ಕುಸಲಂ (ಸ್ಯಾ.)], ಸುಸಮಿದ್ಧಕುಲಪ್ಪಜಾ;

ಧನಞ್ಜಾನೀ ಚ ಖೇಮಾ ಚ, ಅಹಮ್ಪಿ ಚ ತಯೋ ಜನಾ.

೫. ‘‘ಆರಾಮಂ ಸುಕತಂ ಕತ್ವಾ, ಸಬ್ಬಾವಯವಮಣ್ಡಿತಂ;

ಬುದ್ಧಪ್ಪಮುಖಸಙ್ಘಸ್ಸ, ನಿಯ್ಯಾದೇತ್ವಾ ಸಮೋದಿತಾ.

೬. ‘‘ಯತ್ಥ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;

ದೇವೇಸು ಅಗ್ಗತಂ ಪತ್ತಾ, ಮನುಸ್ಸೇಸು ತಥೇವ ಚ.

೭. ‘‘ಇಮಸ್ಮಿಂಯೇವ ಕಪ್ಪಮ್ಹಿ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.

೮. ‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;

ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.

೯. ‘‘ತಸ್ಸಾಸುಂ ಸತ್ತ ಧೀತರೋ, ರಾಜಕಞ್ಞಾ ಸುಖೇಧಿತಾ [ಸುಖೇಥಿತಾ (ಸ್ಯಾ.)];

ಬುದ್ಧೋಪಟ್ಠಾನನಿರತಾ, ಬ್ರಹ್ಮಚರಿಯಂ ಚರಿಂಸು ತಾ.

೧೦. ‘‘ತಾಸಂ ಸಹಾಯಿಕಾ ಹುತ್ವಾ, ಸೀಲೇಸು ಸುಸಮಾಹಿತಾ;

ದತ್ವಾ ದಾನಾನಿ ಸಕ್ಕಚ್ಚಂ, ಅಗಾರೇವ ವತಂ [ಅಗಾರೇವ ವತ್ತಂ (ಸ್ಯಾ.)] ಚರಿಂ.

೧೧. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗಾ ಅಹಂ.

೧೨. ‘‘ತತೋ ಚುತಾ ಯಾಮಮಗಂ [ಯಾಮಸಗ್ಗಂ (ಸ್ಯಾ.)], ತತೋಹಂ ತುಸಿತಂ ಗತಾ;

ತತೋ ಚ ನಿಮ್ಮಾನರತಿಂ, ವಸವತ್ತಿಪುರಂ ತತೋ.

೧೩. ‘‘ಯತ್ಥ ಯತ್ಥೂಪಪಜ್ಜಾಮಿ, ಪುಞ್ಞಕಮ್ಮಸಮೋಹಿತಾ;

ತತ್ಥ ತತ್ಥೇವ ರಾಜೂನಂ, ಮಹೇಸಿತ್ತಮಕಾರಯಿಂ.

೧೪. ‘‘ತತೋ ಚುತಾ ಮನುಸ್ಸತ್ತೇ, ರಾಜೂನಂ ಚಕ್ಕವತ್ತಿನಂ;

ಮಣ್ಡಲೀನಞ್ಚ ರಾಜೂನಂ, ಮಹೇಸಿತ್ತಮಕಾರಯಿಂ.

೧೫. ‘‘ಸಮ್ಪತ್ತಿಮನುಭೋತ್ವಾನ, ದೇವೇಸು ಮಾನುಸೇಸು ಚ;

ಸಬ್ಬತ್ಥ ಸುಖಿತಾ ಹುತ್ವಾ, ನೇಕಜಾತೀಸು ಸಂಸರಿಂ.

೧೬. ‘‘ಸೋ ಹೇತು ಚ ಸೋ ಪಭವೋ, ತಮ್ಮೂಲಂ ಸಾಸನೇ ಖಮಂ [ತಮ್ಮೂಲಂ ಸಾ ಚ ಸಾಸನೇ ಖನ್ತಿ (ಸೀ. ಪೀ. ಕ.)];

ಪಠಮಂ ತಂ ಸಮೋಧಾನಂ, ತಂ ಧಮ್ಮರತಾಯ ನಿಬ್ಬಾನಂ [ನಿಬ್ಬುತಂ (ಸ್ಯಾ.)].

೧೭. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೀವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವಾ.

೧೮. ‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ [ಬುದ್ಧಸೇಟ್ಠಸ್ಸ (ಸೀ. ಸ್ಯಾ. ಕ.)] ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೧೯. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಸುಮೇಧಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುಮೇಧಾಥೇರಿಯಾಪದಾನಂ ಪಠಮಂ.