೧. ಸುನ್ದರಸಮುದ್ದತ್ಥೇರಗಾಥಾ

೪೫೯. ‘‘ಅಲಙ್ಕತಾ ಸುವಸನಾ, ಮಾಲಧಾರೀ [ಮಾಲಾಭಾರೀ (ಸೀ.), ಮಾಲಭಾರೀ (ಸ್ಯಾ.)] ವಿಭೂಸಿತಾ;

ಅಲತ್ತಕಕತಾಪಾದಾ, ಪಾದುಕಾರುಯ್ಹ ವೇಸಿಕಾ.

೪೬೦. ‘‘ಪಾದುಕಾ ಓರುಹಿತ್ವಾನ, ಪುರತೋ ಪಞ್ಜಲೀಕತಾ;

ಸಾ ಮಂ ಸಣ್ಹೇನ ಮುದುನಾ, ಮ್ಹಿತಪುಬ್ಬಂ [ಮಿಹಿತಪುಬ್ಬಂ (ಸೀ.)] ಅಭಾಸಥ’’.

೪೬೧. ‘‘ಯುವಾಸಿ ತ್ವಂ ಪಬ್ಬಜಿತೋ, ತಿಟ್ಠಾಹಿ ಮಮ ಸಾಸನೇ;

ಭುಞ್ಜ ಮಾನುಸಕೇ ಕಾಮೇ, ಅಹಂ ವಿತ್ತಂ ದದಾಮಿ ತೇ;

ಸಚ್ಚಂ ತೇ ಪಟಿಜಾನಾಮಿ, ಅಗ್ಗಿಂ ವಾ ತೇ ಹರಾಮಹಂ.

೪೬೨. ‘‘ಯದಾ ಜಿಣ್ಣಾ ಭವಿಸ್ಸಾಮ, ಉಭೋ ದಣ್ಡಪರಾಯನಾ;

ಉಭೋಪಿ ಪಬ್ಬಜಿಸ್ಸಾಮ, ಉಭಯತ್ಥ ಕಟಗ್ಗಹೋ’’.

೪೬೩. ‘‘ತಞ್ಚ ದಿಸ್ವಾನ ಯಾಚನ್ತಿಂ, ವೇಸಿಕಂ ಪಞ್ಜಲೀಕತಂ;

ಅಲಙ್ಕತಂ ಸುವಸನಂ, ಮಚ್ಚುಪಾಸಂವ ಓಡ್ಡಿತಂ.

೪೬೪. ‘‘ತತೋ ಮೇ ಮನಸೀಕಾರೋ…ಪೇ… ನಿಬ್ಬಿದಾ ಸಮತಿಟ್ಠಥ.

೪೬೫. ‘‘ತತೋ ಚಿತ್ತಂ ವಿಮುಚ್ಚಿ ಮೇ…ಪೇ… ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಸುನ್ದರಸಮುದ್ದೋ ಥೇರೋ….