೩. ಮಹಾನಾಗತ್ಥೇರಗಾಥಾ

೩೮೭. ‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ಪರಿಹಾಯತಿ ಸದ್ಧಮ್ಮಾ, ಮಚ್ಛೋ ಅಪ್ಪೋದಕೇ ಯಥಾ.

೩೮೮. ‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ನ ವಿರೂಹತಿ ಸದ್ಧಮ್ಮೇ, ಖೇತ್ತೇ ಬೀಜಂವ ಪೂತಿಕಂ.

೩೮೯. ‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ಆರಕಾ ಹೋತಿ ನಿಬ್ಬಾನಾ [ನಿಬ್ಬಾಣಾ (ಸೀ.)], ಧಮ್ಮರಾಜಸ್ಸ ಸಾಸನೇ.

೩೯೦. ‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ಉಪಲಬ್ಭತಿ;

ನ ವಿಹಾಯತಿ ಸದ್ಧಮ್ಮಾ, ಮಚ್ಛೋ ಬವ್ಹೋದಕೇ [ಬಹ್ವೋದಕೇ (ಸೀ.), ಬಹೋದಕೇ (ಸ್ಯಾ.)] ಯಥಾ.

೩೯೧. ‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ಉಪಲಬ್ಭತಿ;

ಸೋ ವಿರೂಹತಿ ಸದ್ಧಮ್ಮೇ, ಖೇತ್ತೇ ಬೀಜಂವ ಭದ್ದಕಂ.

೩೯೨. ‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ಉಪಲಬ್ಭತಿ;

ಸನ್ತಿಕೇ ಹೋತಿ ನಿಬ್ಬಾನಂ [ನಿಬ್ಬಾಣಂ (ಸೀ.)], ಧಮ್ಮರಾಜಸ್ಸ ಸಾಸನೇ’’ತಿ.

… ಮಹಾನಾಗೋ ಥೇರೋ….