೯. ವಿಜಿತಸೇನತ್ಥೇರಗಾಥಾ

೩೫೫. ‘‘ಓಲಗ್ಗೇಸ್ಸಾಮಿ ತೇ ಚಿತ್ತ, ಆಣಿದ್ವಾರೇವ ಹತ್ಥಿನಂ;

ನ ತಂ ಪಾಪೇ ನಿಯೋಜೇಸ್ಸಂ, ಕಾಮಜಾಲ [ಕಾಮಜಾಲಂ (ಸ್ಯಾ.)] ಸರೀರಜ [ಸರೀರಜಂ (ಸ್ಯಾ. ಕ.)].

೩೫೬. ‘‘ತ್ವಂ ಓಲಗ್ಗೋ ನ ಗಚ್ಛಸಿ [ನ ಗಞ್ಛಿಸಿ (ಪೀ)], ದ್ವಾರವಿವರಂ ಗಜೋವ ಅಲಭನ್ತೋ;

ನ ಚ ಚಿತ್ತಕಲಿ ಪುನಪ್ಪುನಂ, ಪಸಕ್ಕ [ಪಸಹಂ (ಸೀ. ಸ್ಯಾ. ಪೀ.)] ಪಾಪರತೋ ಚರಿಸ್ಸಸಿ.

೩೫೭. ‘‘ಯಥಾ ಕುಞ್ಜರಂ ಅದನ್ತಂ, ನವಗ್ಗಹಮಙ್ಕುಸಗ್ಗಹೋ;

ಬಲವಾ ಆವತ್ತೇತಿ ಅಕಾಮಂ, ಏವಂ ಆವತ್ತಯಿಸ್ಸಂ ತಂ.

೩೫೮. ‘‘ಯಥಾ ವರಹಯದಮಕುಸಲೋ, ಸಾರಥಿ ಪವರೋ ದಮೇತಿ ಆಜಞ್ಞಂ;

ಏವಂ ದಮಯಿಸ್ಸಂ ತಂ, ಪತಿಟ್ಠಿತೋ ಪಞ್ಚಸು ಬಲೇಸು.

೩೫೯. ‘‘ಸತಿಯಾ ತಂ ನಿಬನ್ಧಿಸ್ಸಂ, ಪಯುತ್ತೋ ತೇ ದಮೇಸ್ಸಾಮಿ [ಪಯತತ್ತೋ ವೋದಪೇಸ್ಸಾಮಿ (ಸೀ.)];

ವೀರಿಯಧುರನಿಗ್ಗಹಿತೋ, ನ ಯಿತೋ ದೂರಂ ಗಮಿಸ್ಸಸೇ ಚಿತ್ತಾ’’ತಿ.

… ವಿಜಿತಸೇನೋ ಥೇರೋ….