೭. ಸತ್ತಮವಗ್ಗೋ

೬೧. ‘‘ಪಸ್ಸತಿ ಪಸ್ಸೋ ಪಸ್ಸನ್ತಂ, ಅಪಸ್ಸನ್ತಞ್ಚ ಪಸ್ಸತಿ;

ಅಪಸ್ಸನ್ತೋ ಅಪಸ್ಸನ್ತಂ, ಪಸ್ಸನ್ತಞ್ಚ ನ ಪಸ್ಸತೀ’’ತಿ.

… ವಪ್ಪೋ ಥೇರೋ….

೬೨. ‘‘ಏಕಕಾ ಮಯಂ ಅರಞ್ಞೇ ವಿಹರಾಮ, ಅಪವಿದ್ಧಂವ ವನಸ್ಮಿಂ ದಾರುಕಂ;

ತಸ್ಸ ಮೇ ಬಹುಕಾ ಪಿಹಯನ್ತಿ, ನೇರಯಿಕಾ ವಿಯ ಸಗ್ಗಗಾಮಿನ’’ನ್ತಿ.

… ವಜ್ಜಿಪುತ್ತೋ ಥೇರೋ….

೬೩. ‘‘ಚುತಾ ಪತನ್ತಿ ಪತಿತಾ, ಗಿದ್ಧಾ ಚ ಪುನರಾಗತಾ;

ಕತಂ ಕಿಚ್ಚಂ ರತಂ ರಮ್ಮಂ, ಸುಖೇನನ್ವಾಗತಂ ಸುಖ’’ನ್ತಿ.

… ಪಕ್ಖೋ ಥೇರೋ….

೬೪. ‘‘ದುಮವ್ಹಯಾಯ ಉಪ್ಪನ್ನೋ, ಜಾತೋ ಪಣ್ಡರಕೇತುನಾ;

ಕೇತುಹಾ ಕೇತುನಾಯೇವ, ಮಹಾಕೇತುಂ ಪಧಂಸಯೀ’’ತಿ.

… ವಿಮಲಕೋಣ್ಡಞ್ಞೋ ಥೇರೋ….

೬೫. ‘‘ಉಕ್ಖೇಪಕತವಚ್ಛಸ್ಸ, ಸಙ್ಕಲಿತಂ ಬಹೂಹಿ ವಸ್ಸೇಹಿ;

ತಂ ಭಾಸತಿ ಗಹಟ್ಠಾನಂ, ಸುನಿಸಿನ್ನೋ ಉಳಾರಪಾಮೋಜ್ಜೋ’’ತಿ.

… ಉಕ್ಖೇಪಕತವಚ್ಛೋ ಥೇರೋ….

೬೬. ‘‘ಅನುಸಾಸಿ ಮಹಾವೀರೋ, ಸಬ್ಬಧಮ್ಮಾನ ಪಾರಗೂ;

ತಸ್ಸಾಹಂ ಧಮ್ಮಂ ಸುತ್ವಾನ, ವಿಹಾಸಿಂ ಸನ್ತಿಕೇ ಸತೋ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಮೇಘಿಯೋ ಥೇರೋ….

೬೭. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಏಕಧಮ್ಮಸವನೀಯೋ ಥೇರೋ….

೬೮. [ಉದಾ. ೩೭; ಪಾಚಿ. ೧೫೩] ‘‘ಅಧಿಚೇತಸೋ ಅಪ್ಪಮಜ್ಜತೋ, ಮುನಿನೋ ಮೋನಪಥೇಸು ಸಿಕ್ಖತೋ;

ಸೋಕಾ ನ ಭವನ್ತಿ ತಾದಿನೋ, ಉಪಸನ್ತಸ್ಸ ಸದಾ ಸತೀಮತೋ’’ತಿ.

… ಏಕುದಾನಿಯೋ ಥೇರೋ….

೬೯. ‘‘ಸುತ್ವಾನ ಧಮ್ಮಂ ಮಹತೋ ಮಹಾರಸಂ, ಸಬ್ಬಞ್ಞುತಞ್ಞಾಣವರೇನ ದೇಸಿತಂ;

ಮಗ್ಗಂ ಪಪಜ್ಜಿಂ [ಪಪಜ್ಜಂ (ಕ.)] ಅಮತಸ್ಸ ಪತ್ತಿಯಾ, ಸೋ ಯೋಗಕ್ಖೇಮಸ್ಸ ಪಥಸ್ಸ ಕೋವಿದೋ’’ತಿ.

… ಛನ್ನೋ ಥೇರೋ….

೭೦. ‘‘ಸೀಲಮೇವ ಇಧ ಅಗ್ಗಂ, ಪಞ್ಞವಾ ಪನ ಉತ್ತಮೋ;

ಮನುಸ್ಸೇಸು ಚ ದೇವೇಸು, ಸೀಲಪಞ್ಞಾಣತೋ ಜಯ’’ನ್ತಿ.

… ಪುಣ್ಣೋ ಥೇರೋ….

ವಗ್ಗೋ ಸತ್ತಮೋ ನಿಟ್ಠಿತೋ.

ತಸ್ಸುದ್ದಾನಂ –

ವಪ್ಪೋ ಚ ವಜ್ಜಿಪುತ್ತೋ ಚ, ಪಕ್ಖೋ ವಿಮಲಕೋಣ್ಡಞ್ಞೋ;

ಉಕ್ಖೇಪಕತವಚ್ಛೋ ಚ, ಮೇಘಿಯೋ ಏಕಧಮ್ಮಿಕೋ;

ಏಕುದಾನಿಯಛನ್ನಾ ಚ, ಪುಣ್ಣತ್ಥೇರೋ ಮಹಬ್ಬಲೋತಿ.