೫. ಪಞ್ಚಮವಗ್ಗೋ

೪೧. ‘‘ವಿವರಮನುಪತನ್ತಿ ವಿಜ್ಜುತಾ, ವೇಭಾರಸ್ಸ ಚ ಪಣ್ಡವಸ್ಸ ಚ;

ನಗವಿವರಗತೋ ಚ ಝಾಯತಿ, ಪುತ್ತೋ ಅಪ್ಪಟಿಮಸ್ಸ ತಾದಿನೋ’’ತಿ.

… ಸಿರಿವಡ್ಢೋ ಥೇರೋ….

೪೨. ‘‘ಚಾಲೇ ಉಪಚಾಲೇ ಸೀಸೂಪಚಾಲೇ ( ) [(ಚಾಲಾ ಉಪಚಾಲಾ, ಸೀಸೂಪಚಾಲಾ) (ಕ.)] ಪತಿಸ್ಸತಾ [ಪಟಿಸ್ಸತಿಕಾ (ಸ್ಯಾ. ಕ.)] ನು ಖೋ ವಿಹರಥ;

ಆಗತೋ ವೋ ವಾಲಂ ವಿಯ ವೇಧೀ’’ತಿ.

… ಖದಿರವನಿಯೋ ಥೇರೋ….

೪೩. ‘‘ಸುಮುತ್ತಿಕೋ ಸುಮುತ್ತಿಕೋ ಸಾಹು, ಸುಮುತ್ತಿಕೋಮ್ಹಿ ತೀಹಿ ಖುಜ್ಜಕೇಹಿ;

ಅಸಿತಾಸು ಮಯಾ ನಙ್ಗಲಾಸು, ಮಯಾ ಖುದ್ದಕುದ್ದಾಲಾಸು ಮಯಾ.

ಯದಿಪಿ ಇಧಮೇವ ಇಧಮೇವ, ಅಥ ವಾಪಿ ಅಲಮೇವ ಅಲಮೇವ;

ಝಾಯ ಸುಮಙ್ಗಲ ಝಾಯ ಸುಮಙ್ಗಲ, ಅಪ್ಪಮತ್ತೋ ವಿಹರ ಸುಮಙ್ಗಲಾ’’ತಿ.

… ಸುಮಙ್ಗಲೋ ಥೇರೋ….

೪೪. [ಸಂ. ನಿ. ೧.೨೩೯] ‘‘ಮತಂ ವಾ ಅಮ್ಮ ರೋದನ್ತಿ, ಯೋ ವಾ ಜೀವಂ ನ ದಿಸ್ಸತಿ;

ಜೀವನ್ತಂ ಮಂ ಅಮ್ಮ ಪಸ್ಸನ್ತೀ, ಕಸ್ಮಾ ಮಂ ಅಮ್ಮ ರೋದಸೀ’’ತಿ.

… ಸಾನುತ್ಥೇರೋ….

೪೫. ‘‘ಯಥಾಪಿ ಭದ್ದೋ ಆಜಞ್ಞೋ, ಖಲಿತ್ವಾ ಪತಿತಿಟ್ಠತಿ;

ಏವಂ ದಸ್ಸನಸಮ್ಪನ್ನಂ, ಸಮ್ಮಾಸಮ್ಬುದ್ಧಸಾವಕ’’ನ್ತಿ.

… ರಮಣೀಯವಿಹಾರಿತ್ಥೇರೋ….

೪೬. ‘‘ಸದ್ಧಾಯಾಹಂ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸತಿ ಪಞ್ಞಾ ಚ ಮೇ ವುಡ್ಢಾ, ಚಿತ್ತಞ್ಚ ಸುಸಮಾಹಿತಂ;

ಕಾಮಂ ಕರಸ್ಸು ರೂಪಾನಿ, ನೇವ ಮಂ ಬ್ಯಾಧಯಿಸ್ಸಸೀ’’ತಿ [ಬಾಧಯಿಸ್ಸಸೀತಿ (ಸೀ.), ಬ್ಯಾಥಯಿಸ್ಸಸೀತಿ (?)].

… ಸಮಿದ್ಧಿತ್ಥೇರೋ….

೪೭. ‘‘ನಮೋ ತೇ ಬುದ್ಧ ವೀರತ್ಥು, ವಿಪ್ಪಮುತ್ತೋಸಿ ಸಬ್ಬಧಿ;

ತುಯ್ಹಾಪದಾನೇ ವಿಹರಂ, ವಿಹರಾಮಿ ಅನಾಸವೋ’’ತಿ.

… ಉಜ್ಜಯೋ ಥೇರೋ….

೪೮. ‘‘ಯತೋ ಅಹಂ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ನಾಭಿಜಾನಾಮಿ ಸಙ್ಕಪ್ಪಂ, ಅನರಿಯಂ ದೋಸಸಂಹಿತ’’ನ್ತಿ.

… ಸಞ್ಜಯೋ ಥೇರೋ….

೪೯. ‘‘ಚಿಹಚಿಹಾಭಿನದಿತೇ [ವಿಹವಿಹಾಭಿನದಿತೇ (ಸೀ. ಸ್ಯಾ.)], ಸಿಪ್ಪಿಕಾಭಿರುತೇಹಿ ಚ;

ನ ಮೇ ತಂ ಫನ್ದತಿ ಚಿತ್ತಂ, ಏಕತ್ತನಿರತಂ ಹಿ ಮೇ’’ತಿ.

… ರಾಮಣೇಯ್ಯಕೋ ಥೇರೋ….

೫೦. ‘‘ಧರಣೀ ಚ ಸಿಞ್ಚತಿ ವಾತಿ, ಮಾಲುತೋ ವಿಜ್ಜುತಾ ಚರತಿ ನಭೇ;

ಉಪಸಮನ್ತಿ ವಿತಕ್ಕಾ, ಚಿತ್ತಂ ಸುಸಮಾಹಿತಂ ಮಮಾ’’ತಿ.

… ವಿಮಲೋ ಥೇರೋ….

ವಗ್ಗೋ ಪಞ್ಚಮೋ ನಿಟ್ಠಿತೋ.

ತಸ್ಸುದ್ದಾನಂ –

ಸಿರೀವಡ್ಢೋ ರೇವತೋ ಥೇರೋ, ಸುಮಙ್ಗಲೋ ಸಾನುಸವ್ಹಯೋ;

ರಮಣೀಯವಿಹಾರೀ ಚ, ಸಮಿದ್ಧಿಉಜ್ಜಯಸಞ್ಜಯಾ;

ರಾಮಣೇಯ್ಯೋ ಚ ಸೋ ಥೇರೋ, ವಿಮಲೋ ಚ ರಣಞ್ಜಹೋತಿ.