೩. ತತಿಯವಗ್ಗೋ

೨೧. ‘‘ನಾಹಂ ಭಯಸ್ಸ ಭಾಯಾಮಿ, ಸತ್ಥಾ ನೋ ಅಮತಸ್ಸ ಕೋವಿದೋ;

ಯತ್ಥ ಭಯಂ ನಾವತಿಟ್ಠತಿ, ತೇನ ಮಗ್ಗೇನ ವಜನ್ತಿ ಭಿಕ್ಖವೋ’’ತಿ.

… ನಿಗ್ರೋಧೋ ಥೇರೋ….

೨೨. ‘‘ನೀಲಾ ಸುಗೀವಾ ಸಿಖಿನೋ, ಮೋರಾ ಕಾರಮ್ಭಿಯಂ [ಕಾರಂವಿಯಂ (ಸೀ.), ಕಾರವಿಯಂ (ಸ್ಯಾ.)] ಅಭಿನದನ್ತಿ;

ತೇ ಸೀತವಾತಕೀಳಿತಾ [ಸೀತವಾತಕದ್ದಿತಕಲಿತಾ (ಸೀ.), ಸೀತವಾತಕಲಿತಾ (ಸ್ಯಾ.)], ಸುತ್ತಂ ಝಾಯಂ [ಝಾನಂ (ಸ್ಯಾ.), ಝಾಯಿಂ (?)] ನಿಬೋಧೇನ್ತೀ’’ತಿ.

… ಚಿತ್ತಕೋ ಥೇರೋ….

೨೩. ‘‘ಅಹಂ ಖೋ ವೇಳುಗುಮ್ಬಸ್ಮಿಂ, ಭುತ್ವಾನ ಮಧುಪಾಯಸಂ;

ಪದಕ್ಖಿಣಂ ಸಮ್ಮಸನ್ತೋ, ಖನ್ಧಾನಂ ಉದಯಬ್ಬಯಂ;

ಸಾನುಂ ಪಟಿಗಮಿಸ್ಸಾಮಿ, ವಿವೇಕಮನುಬ್ರೂಹಯ’’ನ್ತಿ.

… ಗೋಸಾಲೋ ಥೇರೋ….

೨೪. ‘‘ಅನುವಸ್ಸಿಕೋ ಪಬ್ಬಜಿತೋ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಸುಗನ್ಧೋ ಥೇರೋ….

೨೫. ‘‘ಓಭಾಸಜಾತಂ ಫಲಗಂ, ಚಿತ್ತಂ ಯಸ್ಸ ಅಭಿಣ್ಹಸೋ;

ತಾದಿಸಂ ಭಿಕ್ಖುಮಾಸಜ್ಜ, ಕಣ್ಹ ದುಕ್ಖಂ ನಿಗಚ್ಛಸೀ’’ತಿ.

… ನನ್ದಿಯೋ ಥೇರೋ….

೨೬. ‘‘ಸುತ್ವಾ ಸುಭಾಸಿತಂ ವಾಚಂ, ಬುದ್ಧಸ್ಸಾದಿಚ್ಚಬನ್ಧುನೋ;

ಪಚ್ಚಬ್ಯಧಿಂ ಹಿ ನಿಪುಣಂ, ವಾಲಗ್ಗಂ ಉಸುನಾ ಯಥಾ’’ತಿ.

… ಅಭಯೋ ಥೇರೋ….

೨೭. ‘‘ದಬ್ಬಂ ಕುಸಂ ಪೋಟಕಿಲಂ, ಉಸೀರಂ ಮುಞ್ಜಪಬ್ಬಜಂ;

ಉರಸಾ ಪನುದಿಸ್ಸಾಮಿ, ವಿವೇಕಮನುಬ್ರೂಹಯ’’ನ್ತಿ.

… ಲೋಮಸಕಙ್ಗಿಯೋ ಥೇರೋ….

೨೮. ‘‘ಕಚ್ಚಿ ನೋ ವತ್ಥಪಸುತೋ, ಕಚ್ಚಿ ನೋ ಭೂಸನಾರತೋ;

ಕಚ್ಚಿ ಸೀಲಮಯಂ ಗನ್ಧಂ, ಕಿಂ ತ್ವಂ ವಾಯಸಿ [ಕಚ್ಚಿ ಸೀಲಮಯಂ ಗನ್ಧಂ, ತ್ವಂ ವಾಸಿ (ಸ್ಯಾ.)] ನೇತರಾ ಪಜಾ’’ತಿ.

… ಜಮ್ಬುಗಾಮಿಕಪುತ್ತೋ ಥೇರೋ….

೨೯. ‘‘ಸಮುನ್ನಮಯಮತ್ತಾನಂ, ಉಸುಕಾರೋವ ತೇಜನಂ;

ಚಿತ್ತಂ ಉಜುಂ ಕರಿತ್ವಾನ, ಅವಿಜ್ಜಂ ಭಿನ್ದ ಹಾರಿತಾ’’ತಿ.

… ಹಾರಿತೋ ಥೇರೋ….

೩೦. ‘‘ಆಬಾಧೇ ಮೇ ಸಮುಪ್ಪನ್ನೇ, ಸತಿ ಮೇ ಉದಪಜ್ಜಥ;

ಆಬಾಧೋ ಮೇ ಸಮುಪ್ಪನ್ನೋ, ಕಾಲೋ ಮೇ ನಪ್ಪಮಜ್ಜಿತು’’ನ್ತಿ.

… ಉತ್ತಿಯೋ ಥೇರೋ….

ವಗ್ಗೋ ತತಿಯೋ ನಿಟ್ಠಿತೋ.

ತಸ್ಸುದ್ದಾನಂ –

ನಿಗ್ರೋಧೋ ಚಿತ್ತಕೋ ಥೇರೋ, ಗೋಸಾಲಥೇರೋ ಸುಗನ್ಧೋ;

ನನ್ದಿಯೋ ಅಭಯೋ ಥೇರೋ, ಥೇರೋ ಲೋಮಸಕಙ್ಗಿಯೋ;

ಜಮ್ಬುಗಾಮಿಕಪುತ್ತೋ ಚ, ಹಾರಿತೋ ಉತ್ತಿಯೋ ಇಸೀತಿ.