೮. ಸಲ್ಲಸುತ್ತಂ

೫೭೯. ಅನಿಮಿತ್ತಮನಞ್ಞಾತಂ, ಮಚ್ಚಾನಂ ಇಧ ಜೀವಿತಂ;

ಕಸಿರಞ್ಚ ಪರಿತ್ತಞ್ಚ, ತಞ್ಚ ದುಕ್ಖೇನ ಸಂಯುತಂ.

೫೮೦. ನ ಹಿ ಸೋ ಉಪಕ್ಕಮೋ ಅತ್ಥಿ, ಯೇನ ಜಾತಾ ನ ಮಿಯ್ಯರೇ;

ಜರಮ್ಪಿ ಪತ್ವಾ ಮರಣಂ, ಏವಂಧಮ್ಮಾ ಹಿ ಪಾಣಿನೋ.

೫೮೧. ಫಲಾನಮಿವ ಪಕ್ಕಾನಂ, ಪಾತೋ ಪತನತೋ [ಪಪತತೋ (ಸೀ. ಪೀ. ಅಟ್ಠ.)] ಭಯಂ;

ಏವಂ ಜಾತಾನ ಮಚ್ಚಾನಂ, ನಿಚ್ಚಂ ಮರಣತೋ ಭಯಂ.

೫೮೨. ಯಥಾಪಿ ಕುಮ್ಭಕಾರಸ್ಸ, ಕತಾ ಮತ್ತಿಕಭಾಜನಾ;

ಸಬ್ಬೇ ಭೇದನಪರಿಯನ್ತಾ [ಭೇದಪರಿಯನ್ತಾ (ಸ್ಯಾ.)], ಏವಂ ಮಚ್ಚಾನ ಜೀವಿತಂ.

೫೮೩. ದಹರಾ ಚ ಮಹನ್ತಾ ಚ, ಯೇ ಬಾಲಾ ಯೇ ಚ ಪಣ್ಡಿತಾ;

ಸಬ್ಬೇ ಮಚ್ಚುವಸಂ ಯನ್ತಿ, ಸಬ್ಬೇ ಮಚ್ಚುಪರಾಯಣಾ.

೫೮೪. ತೇಸಂ ಮಚ್ಚುಪರೇತಾನಂ, ಗಚ್ಛತಂ ಪರಲೋಕತೋ;

ನ ಪಿತಾ ತಾಯತೇ ಪುತ್ತಂ, ಞಾತೀ ವಾ ಪನ ಞಾತಕೇ.

೫೮೫. ಪೇಕ್ಖತಂ ಯೇವ ಞಾತೀನಂ, ಪಸ್ಸ ಲಾಲಪತಂ ಪುಥು;

ಏಕಮೇಕೋವ ಮಚ್ಚಾನಂ, ಗೋವಜ್ಝೋ ವಿಯ ನೀಯತಿ [ನಿಯ್ಯತಿ (ಬಹೂಸು)].

೫೮೬. ಏವಮಬ್ಭಾಹತೋ ಲೋಕೋ, ಮಚ್ಚುನಾ ಚ ಜರಾಯ ಚ;

ತಸ್ಮಾ ಧೀರಾ ನ ಸೋಚನ್ತಿ, ವಿದಿತ್ವಾ ಲೋಕಪರಿಯಾಯಂ.

೫೮೭. ಯಸ್ಸ ಮಗ್ಗಂ ನ ಜಾನಾಸಿ, ಆಗತಸ್ಸ ಗತಸ್ಸ ವಾ;

ಉಭೋ ಅನ್ತೇ ಅಸಮ್ಪಸ್ಸಂ, ನಿರತ್ಥಂ ಪರಿದೇವಸಿ.

೫೮೮. ಪರಿದೇವಯಮಾನೋ ಚೇ, ಕಿಞ್ಚಿದತ್ಥಂ ಉದಬ್ಬಹೇ;

ಸಮ್ಮೂಳ್ಹೋ ಹಿಂಸಮತ್ತಾನಂ, ಕಯಿರಾ ಚೇ ನಂ ವಿಚಕ್ಖಣೋ.

೫೮೯. ನ ಹಿ ರುಣ್ಣೇನ ಸೋಕೇನ, ಸನ್ತಿಂ ಪಪ್ಪೋತಿ ಚೇತಸೋ;

ಭಿಯ್ಯಸ್ಸುಪ್ಪಜ್ಜತೇ ದುಕ್ಖಂ, ಸರೀರಂ ಚುಪಹಞ್ಞತಿ.

೫೯೦. ಕಿಸೋ ವಿವಣ್ಣೋ ಭವತಿ, ಹಿಂಸಮತ್ತಾನಮತ್ತನಾ;

ನ ತೇನ ಪೇತಾ ಪಾಲೇನ್ತಿ, ನಿರತ್ಥಾ ಪರಿದೇವನಾ.

೫೯೧. ಸೋಕಮಪ್ಪಜಹಂ ಜನ್ತು, ಭಿಯ್ಯೋ ದುಕ್ಖಂ ನಿಗಚ್ಛತಿ;

ಅನುತ್ಥುನನ್ತೋ ಕಾಲಙ್ಕತಂ [ಕಾಲಕತಂ (ಸೀ. ಸ್ಯಾ.)], ಸೋಕಸ್ಸ ವಸಮನ್ವಗೂ.

೫೯೨. ಅಞ್ಞೇಪಿ ಪಸ್ಸ ಗಮಿನೇ, ಯಥಾಕಮ್ಮೂಪಗೇ ನರೇ;

ಮಚ್ಚುನೋ ವಸಮಾಗಮ್ಮ, ಫನ್ದನ್ತೇವಿಧ ಪಾಣಿನೋ.

೫೯೩. ಯೇನ ಯೇನ ಹಿ ಮಞ್ಞನ್ತಿ, ತತೋ ತಂ ಹೋತಿ ಅಞ್ಞಥಾ;

ಏತಾದಿಸೋ ವಿನಾಭಾವೋ, ಪಸ್ಸ ಲೋಕಸ್ಸ ಪರಿಯಾಯಂ.

೫೯೪. ಅಪಿ ವಸ್ಸಸತಂ ಜೀವೇ, ಭಿಯ್ಯೋ ವಾ ಪನ ಮಾಣವೋ;

ಞಾತಿಸಙ್ಘಾ ವಿನಾ ಹೋತಿ, ಜಹಾತಿ ಇಧ ಜೀವಿತಂ.

೫೯೫. ತಸ್ಮಾ ಅರಹತೋ ಸುತ್ವಾ, ವಿನೇಯ್ಯ ಪರಿದೇವಿತಂ;

ಪೇತಂ ಕಾಲಙ್ಕತಂ ದಿಸ್ವಾ, ನೇಸೋ ಲಬ್ಭಾ ಮಯಾ ಇತಿ.

೫೯೬. ಯಥಾ ಸರಣಮಾದಿತ್ತಂ, ವಾರಿನಾ ಪರಿನಿಬ್ಬಯೇ [ಪರಿನಿಬ್ಬುತೋ (ಸೀ. ಕ.)];

ಏವಮ್ಪಿ ಧೀರೋ ಸಪಞ್ಞೋ, ಪಣ್ಡಿತೋ ಕುಸಲೋ ನರೋ;

ಖಿಪ್ಪಮುಪ್ಪತಿತಂ ಸೋಕಂ, ವಾತೋ ತೂಲಂವ ಧಂಸಯೇ.

೫೯೭. ಪರಿದೇವಂ ಪಜಪ್ಪಞ್ಚ, ದೋಮನಸ್ಸಞ್ಚ ಅತ್ತನೋ;

ಅತ್ತನೋ ಸುಖಮೇಸಾನೋ, ಅಬ್ಬಹೇ ಸಲ್ಲಮತ್ತನೋ.

೫೯೮. ಅಬ್ಬುಳ್ಹಸಲ್ಲೋ ಅಸಿತೋ, ಸನ್ತಿಂ ಪಪ್ಪುಯ್ಯ ಚೇತಸೋ;

ಸಬ್ಬಸೋಕಂ ಅತಿಕ್ಕನ್ತೋ, ಅಸೋಕೋ ಹೋತಿ ನಿಬ್ಬುತೋತಿ.

ಸಲ್ಲಸುತ್ತಂ ಅಟ್ಠಮಂ ನಿಟ್ಠಿತಂ.