೬. ಸಭಿಯಸುತ್ತಂ

ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಸಭಿಯಸ್ಸ ಪರಿಬ್ಬಾಜಕಸ್ಸ ಪುರಾಣಸಾಲೋಹಿತಾಯ ದೇವತಾಯ ಪಞ್ಹಾ ಉದ್ದಿಟ್ಠಾ ಹೋನ್ತಿ – ‘‘ಯೋ ತೇ, ಸಭಿಯ, ಸಮಣೋ ವಾ ಬ್ರಾಹ್ಮಣೋ ವಾ ಇಮೇ ಪಞ್ಹೇ ಪುಟ್ಠೋ ಬ್ಯಾಕರೋತಿ ತಸ್ಸ ಸನ್ತಿಕೇ ಬ್ರಹ್ಮಚರಿಯಂ ಚರೇಯ್ಯಾಸೀ’’ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ ತಸ್ಸಾ ದೇವತಾಯ ಸನ್ತಿಕೇ ತೇ ಪಞ್ಹೇ ಉಗ್ಗಹೇತ್ವಾ ಯೇ ತೇ ಸಮಣಬ್ರಾಹ್ಮಣಾ ಸಙ್ಘಿನೋ ಗಣಿನೋ ಗಣಾಚರಿಯಾ ಞಾತಾ ಯಸಸ್ಸಿನೋ ತಿತ್ಥಕರಾ ಸಾಧುಸಮ್ಮತಾ ಬಹುಜನಸ್ಸ, ಸೇಯ್ಯಥಿದಂ – ಪೂರಣೋ ಕಸ್ಸಪೋ ಮಕ್ಖಲಿಗೋಸಾಲೋ ಅಜಿತೋ ಕೇಸಕಮ್ಬಲೋ ಪಕುಧೋ [ಕಕುಧೋ (ಸೀ.) ಪಕುದ್ಧೋ (ಸ್ಯಾ. ಕಂ.)] ಕಚ್ಚಾನೋ ಸಞ್ಚಯೋ [ಸಞ್ಜಯೋ (ಸೀ. ಸ್ಯಾ. ಕಂ. ಪೀ.)] ಬೇಲಟ್ಠಪುತ್ತೋ [ಬೇಲ್ಲಟ್ಠಿಪುತ್ತೋ (ಸೀ. ಪೀ.), ವೇಳಟ್ಠಪುತ್ತೋ (ಸ್ಯಾ.)] ನಿಗಣ್ಠೋ ನಾಟಪುತ್ತೋ [ನಾತಪುತ್ತೋ (ಸೀ. ಪೀ.)], ತೇ ಉಪಸಙ್ಕಮಿತ್ವಾ ತೇ ಪಞ್ಹೇ ಪುಚ್ಛತಿ. ತೇ ಸಭಿಯೇನ ಪರಿಬ್ಬಾಜಕೇನ ಪಞ್ಹೇ ಪುಟ್ಠಾ ನ ಸಮ್ಪಾಯನ್ತಿ; ಅಸಮ್ಪಾಯನ್ತಾ ಕೋಪಞ್ಚ ದೋಸಞ್ಚ ಅಪ್ಪಚ್ಚಯಞ್ಚ ಪಾತುಕರೋನ್ತಿ. ಅಪಿ ಚ ಸಭಿಯಂ ಯೇವ ಪರಿಬ್ಬಾಜಕಂ ಪಟಿಪುಚ್ಛನ್ತಿ.

ಅಥ ಖೋ ಸಭಿಯಸ್ಸ ಪರಿಬ್ಬಾಜಕಸ್ಸ ಏತದಹೋಸಿ – ‘‘ಯೇ ಖೋ ತೇ ಭೋನ್ತೋ ಸಮಣಬ್ರಾಹ್ಮಣಾ ಸಙ್ಘಿನೋ ಗಣಿನೋ ಗಣಾಚರಿಯಾ ಞಾತಾ ಯಸಸ್ಸಿನೋ ತಿತ್ಥಕರಾ ಸಾಧುಸಮ್ಮತಾ ಬಹುಜನಸ್ಸ, ಸೇಯ್ಯಥಿದಂ – ಪೂರಣೋ ಕಸ್ಸಪೋ…ಪೇ… ನಿಗಣ್ಠೋ ನಾಟಪುತ್ತೋ, ತೇ ಮಯಾ ಪಞ್ಹೇ ಪುಟ್ಠಾ ನ ಸಮ್ಪಾಯನ್ತಿ, ಅಸಮ್ಪಾಯನ್ತಾ ಕೋಪಞ್ಚ ದೋಸಞ್ಚ ಅಪ್ಪಚ್ಚಯಞ್ಚ ಪಾತುಕರೋನ್ತಿ; ಅಪಿ ಚ ಮಞ್ಞೇವೇತ್ಥ ಪಟಿಪುಚ್ಛನ್ತಿ. ಯನ್ನೂನ್ನಾಹಂ ಹೀನಾಯಾವತ್ತಿತ್ವಾ ಕಾಮೇ ಪರಿಭುಞ್ಜೇಯ್ಯ’’ನ್ತಿ.

ಅಥ ಖೋ ಸಭಿಯಸ್ಸ ಪರಿಬ್ಬಾಜಕಸ್ಸ ಏತದಹೋಸಿ – ‘‘ಅಯಮ್ಪಿ ಖೋ ಸಮಣೋ ಗೋತಮೋ ಸಙ್ಘೀ ಚೇವ ಗಣೀ ಚ ಗಣಾಚರಿಯೋ ಚ ಞಾತೋ ಯಸಸ್ಸೀ ತಿತ್ಥಕರೋ ಸಾಧುಸಮ್ಮತೋ ಬಹುಜನಸ್ಸ; ಯಂನೂನಾಹಂ ಸಮಣಂ ಗೋತಮಂ ಉಪಸಙ್ಕಮಿತ್ವಾ ಇಮೇ ಪಞ್ಹೇ ಪುಚ್ಛೇಯ್ಯ’’ನ್ತಿ.

ಅಥ ಖೋ ಸಭಿಯಸ್ಸ ಪರಿಬ್ಬಾಜಕಸ್ಸ ಏತದಹೋಸಿ – ‘‘ಯೇಪಿ ಖೋ ತೇ [ಯೇ ಖೋ ತೇ (ಸ್ಯಾ.), ಯಂ ಖೋ ತೇ (ಕ.)] ಭೋನ್ತೋ ಸಮಣಬ್ರಾಹ್ಮಣಾ ಜಿಣ್ಣಾ ವುಡ್ಢಾ ಮಹಲ್ಲಕಾ ಅದ್ಧಗತಾ ವಯೋಅನುಪ್ಪತ್ತಾ ಥೇರಾ ರತ್ತಞ್ಞೂ ಚಿರಪಬ್ಬಜಿತಾ ಸಙ್ಘಿನೋ ಗಣಿನೋ ಗಣಾಚರಿಯಾ ಞಾತಾ ಯಸಸ್ಸಿನೋ ತಿತ್ಥಕರಾ ಸಾಧುಸಮ್ಮತಾ ಬಹುಜನಸ್ಸ, ಸೇಯ್ಯಥಿದಂ – ಪೂರಣೋ ಕಸ್ಸಪೋ…ಪೇ. … ನಿಗಣ್ಠೋ ನಾಟಪುತ್ತೋ, ತೇಪಿ ಮಯಾ ಪಞ್ಹೇ ಪುಟ್ಠಾ ನ ಸಮ್ಪಾಯನ್ತಿ, ಅಸಮ್ಪಾಯನ್ತಾ ಕೋಪಞ್ಚ ದೋಸಞ್ಚ ಅಪ್ಪಚ್ಚಯಞ್ಚ ಪಾತುಕರೋನ್ತಿ, ಅಪಿ ಚ ಮಞ್ಞೇವೇತ್ಥ ಪಟಿಪುಚ್ಛನ್ತಿ; ಕಿಂ ಪನ ಮೇ ಸಮಣೋ ಗೋತಮೋ ಇಮೇ ಪಞ್ಹೇ ಪುಟ್ಠೋ ಬ್ಯಾಕರಿಸ್ಸತಿ! ಸಮಣೋ ಹಿ ಗೋತಮೋ ದಹರೋ ಚೇವ ಜಾತಿಯಾ, ನವೋ ಚ ಪಬ್ಬಜ್ಜಾಯಾ’’ತಿ.

ಅಥ ಖೋ ಸಭಿಯಸ್ಸ ಪರಿಬ್ಬಾಜಕಸ್ಸ ಏತದಹೋಸಿ – ‘‘ಸಮಣೋ ಖೋ [ಸಮಣೋ ಖೋ ಗೋತಮೋ (ಸ್ಯಾ. ಕ.)] ದಹರೋತಿ ನ ಉಞ್ಞಾತಬ್ಬೋ ನ ಪರಿಭೋತಬ್ಬೋ. ದಹರೋಪಿ ಚೇಸ ಸಮಣೋ ಗೋತಮೋ ಮಹಿದ್ಧಿಕೋ ಹೋತಿ ಮಹಾನುಭಾವೋ, ಯಂನೂನಾಹಂ ಸಮಣಂ ಗೋತಮಂ ಉಪಸಙ್ಕಮಿತ್ವಾ ಇಮೇ ಪಞ್ಹೇ ಪುಚ್ಛೇಯ್ಯ’’ನ್ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ ಯೇನ ರಾಜಗಹಂ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ರಾಜಗಹಂ ವೇಳುವನಂ ಕಲನ್ದಕನಿವಾಪೋ, ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ. ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಸಭಿಯೋ ಪರಿಬ್ಬಾಜಕೋ ಭಗವನ್ತಂ ಗಾಥಾಯ ಅಜ್ಝಭಾಸಿ –

೫೧೫. ‘‘ಕಙ್ಖೀ ವೇಚಿಕಿಚ್ಛೀ ಆಗಮಂ, (ಇತಿ ಸಭಿಯೋ)

ಪಞ್ಹೇ ಪುಚ್ಛಿತುಂ ಅಭಿಕಙ್ಖಮಾನೋ;

ತೇಸನ್ತಕರೋ ಭವಾಹಿ [ಭವಾಹಿ ಮೇ (ಪೀ. ಕ.)] ಪಞ್ಹೇ ಮೇ ಪುಟ್ಠೋ,

ಅನುಪುಬ್ಬಂ ಅನುಧಮ್ಮಂ ಬ್ಯಾಕರೋಹಿ ಮೇ’’.

೫೧೬. ‘‘ದೂರತೋ ಆಗತೋಸಿ ಸಭಿಯ, (ಇತಿ ಭಗವಾ)

ಪಞ್ಹೇ ಪುಚ್ಛಿತುಂ ಅಭಿಕಙ್ಖಮಾನೋ;

ತೇಸನ್ತಕರೋ ಭವಾಮಿ [ತೇಸಮನ್ತಕರೋಮಿ ತೇ (ಕ.)] ಪಞ್ಹೇ ತೇ ಪುಟ್ಠೋ,

ಅನುಪುಬ್ಬಂ ಅನುಧಮ್ಮಂ ಬ್ಯಾಕರೋಮಿ ತೇ.

೫೧೭. ‘‘ಪುಚ್ಛ ಮಂ ಸಭಿಯ ಪಞ್ಹಂ, ಯಂ ಕಿಞ್ಚಿ ಮನಸಿಚ್ಛಸಿ;

ತಸ್ಸ ತಸ್ಸೇವ ಪಞ್ಹಸ್ಸ, ಅಹಂ ಅನ್ತಂ ಕರೋಮಿ ತೇ’’ತಿ.

ಅಥ ಖೋ ಸಭಿಯಸ್ಸ ಪರಿಬ್ಬಾಜಕಸ್ಸ ಏತದಹೋಸಿ – ‘‘ಅಚ್ಛರಿಯಂ ವತ, ಭೋ, ಅಬ್ಭುತಂ ವತ, ಭೋ! ಯಂ ವತಾಹಂ ಅಞ್ಞೇಸು ಸಮಣಬ್ರಾಹ್ಮಣೇಸು ಓಕಾಸಕಮ್ಮಮತ್ತಮ್ಪಿ [ಓಕಾಸಮತ್ತಮ್ಪಿ (ಸೀ. ಪೀ.)] ನಾಲತ್ಥಂ ತಂ ಮೇ ಇದಂ ಸಮಣೇನ ಗೋತಮೇನ ಓಕಾಸಕಮ್ಮಂ ಕತ’’ನ್ತಿ. ಅತ್ತಮನೋ ಪಮುದಿತೋ ಉದಗ್ಗೋ ಪೀತಿಸೋಮನಸ್ಸಜಾತೋ ಭಗವನ್ತಂ ಪಞ್ಹಂ ಅಪುಚ್ಛಿ –

೫೧೮. ‘‘ಕಿಂ ಪತ್ತಿನಮಾಹು ಭಿಕ್ಖುನಂ, (ಇತಿ ಸಭಿಯೋ)

ಸೋರತಂ ಕೇನ ಕಥಞ್ಚ ದನ್ತಮಾಹು;

ಬುದ್ಧೋತಿ ಕಥಂ ಪವುಚ್ಚತಿ,

ಪುಟ್ಠೋ ಮೇ ಭಗವಾ ಬ್ಯಾಕರೋಹಿ’’.

೫೧೯. ‘‘ಪಜ್ಜೇನ ಕತೇನ ಅತ್ತನಾ, (ಸಭಿಯಾತಿ ಭಗವಾ)

ಪರಿನಿಬ್ಬಾನಗತೋ ವಿತಿಣ್ಣಕಙ್ಖೋ;

ವಿಭವಞ್ಚ ಭವಞ್ಚ ವಿಪ್ಪಹಾಯ,

ವುಸಿತವಾ ಖೀಣಪುನಬ್ಭವೋ ಸ ಭಿಕ್ಖು.

೫೨೦. ‘‘ಸಬ್ಬತ್ಥ ಉಪೇಕ್ಖಕೋ ಸತಿಮಾ, ನ ಸೋ ಹಿಂಸತಿ ಕಞ್ಚಿ ಸಬ್ಬಲೋಕೇ;

ತಿಣ್ಣೋ ಸಮಣೋ ಅನಾವಿಲೋ, ಉಸ್ಸದಾ ಯಸ್ಸ ನ ಸನ್ತಿ ಸೋರತೋ ಸೋ.

೫೨೧. ‘‘ಯಸ್ಸಿನ್ದ್ರಿಯಾನಿ ಭಾವಿತಾನಿ, ಅಜ್ಝತ್ತಂ ಬಹಿದ್ಧಾ ಚ ಸಬ್ಬಲೋಕೇ;

ನಿಬ್ಬಿಜ್ಝ ಇಮಂ ಪರಞ್ಚ ಲೋಕಂ, ಕಾಲಂ ಕಙ್ಖತಿ ಭಾವಿತೋ ಸ ದನ್ತೋ.

೫೨೨. ‘‘ಕಪ್ಪಾನಿ ವಿಚೇಯ್ಯ ಕೇವಲಾನಿ, ಸಂಸಾರಂ ದುಭಯಂ ಚುತೂಪಪಾತಂ;

ವಿಗತರಜಮನಙ್ಗಣಂ ವಿಸುದ್ಧಂ, ಪತ್ತಂ ಜಾತಿಖಯಂ ತಮಾಹು ಬುದ್ಧ’’ನ್ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ ಭಗವತೋ ಭಾಸಿತಂ ಅಭಿನನ್ದಿತ್ವಾ ಅನುಮೋದಿತ್ವಾ ಅತ್ತಮನೋ ಪಮುದಿತೋ ಉದಗ್ಗೋ ಪೀತಿಸೋಮನಸ್ಸಜಾತೋ ಭಗವನ್ತಂ ಉತ್ತರಿಂ [ಉತ್ತರಿ (ಕ.)] ಪಞ್ಹಂ ಅಪುಚ್ಛಿ –

೫೨೩. ‘‘ಕಿಂ ಪತ್ತಿನಮಾಹು ಬ್ರಾಹ್ಮಣಂ, (ಇತಿ ಸಭಿಯೋ)

ಸಮಣಂ ಕೇನ ಕಥಞ್ಚ ನ್ಹಾತಕೋತಿ;

ನಾಗೋತಿ ಕಥಂ ಪವುಚ್ಚತಿ,

ಪುಟ್ಠೋ ಮೇ ಭಗವಾ ಬ್ಯಾಕರೋಹಿ’’.

೫೨೪. ‘‘ಬಾಹಿತ್ವಾ ಸಬ್ಬಪಾಪಕಾನಿ, (ಸಭಿಯಾತಿ ಭಗವಾ)

ವಿಮಲೋ ಸಾಧುಸಮಾಹಿತೋ ಠಿತತ್ತೋ;

ಸಂಸಾರಮತಿಚ್ಚ ಕೇವಲೀ ಸೋ,

ಅಸಿತೋ ತಾದಿ ಪವುಚ್ಚತೇ ಸ ಬ್ರಹ್ಮಾ.

೫೨೫. ‘‘ಸಮಿತಾವಿ ಪಹಾಯ ಪುಞ್ಞಪಾಪಂ, ವಿರಜೋ ಞತ್ವಾ ಇಮಂ ಪರಞ್ಚ ಲೋಕಂ;

ಜಾತಿಮರಣಂ ಉಪಾತಿವತ್ತೋ, ಸಮಣೋ ತಾದಿ ಪವುಚ್ಚತೇ ತಥತ್ತಾ.

೫೨೬. ‘‘ನಿನ್ಹಾಯ [ನಿನಹಾಯ (ಸ್ಯಾ.)] ಸಬ್ಬಪಾಪಕಾನಿ, ಅಜ್ಝತ್ತಂ ಬಹಿದ್ಧಾ ಚ ಸಬ್ಬಲೋಕೇ;

ದೇವಮನುಸ್ಸೇಸು ಕಪ್ಪಿಯೇಸು, ಕಪ್ಪಂ ನೇತಿ ತಮಾಹು ನ್ಹಾತಕೋ’’ತಿ.

೫೨೭. ‘‘ಆಗುಂ ನ ಕರೋತಿ ಕಿಞ್ಚಿ ಲೋಕೇ, ಸಬ್ಬಸಂಯೋಗೇ [ಸಬ್ಬಯೋಗೇ (ಕ.)] ವಿಸಜ್ಜ ಬನ್ಧನಾನಿ;

ಸಬ್ಬತ್ಥ ನ ಸಜ್ಜತೀ ವಿಮುತ್ತೋ, ನಾಗೋ ತಾದಿ ಪವುಚ್ಚತೇ ತಥತ್ತಾ’’ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ…ಪೇ… ಭಗವನ್ತಂ ಉತ್ತರಿಂ ಪಞ್ಹಂ ಅಪುಚ್ಛಿ –

೫೨೮. ‘‘ಕಂ ಖೇತ್ತಜಿನಂ ವದನ್ತಿ ಬುದ್ಧಾ, (ಇತಿ ಸಭಿಯೋ)

ಕುಸಲಂ ಕೇನ ಕಥಞ್ಚ ಪಣ್ಡಿತೋತಿ;

ಮುನಿ ನಾಮ ಕಥಂ ಪವುಚ್ಚತಿ,

ಪುಟ್ಠೋ ಮೇ ಭಗವಾ ಬ್ಯಾಕರೋಹಿ’’.

೫೨೯. ‘‘ಖೇತ್ತಾನಿ ವಿಚೇಯ್ಯ ಕೇವಲಾನಿ, (ಸಭಿಯಾತಿ ಭಗವಾ)

ದಿಬ್ಬಂ ಮಾನುಸಕಞ್ಚ ಬ್ರಹ್ಮಖೇತ್ತಂ;

ಸಬ್ಬಖೇತ್ತಮೂಲಬನ್ಧನಾ ಪಮುತ್ತೋ,

ಖೇತ್ತಜಿನೋ ತಾದಿ ಪವುಚ್ಚತೇ ತಥತ್ತಾ.

೫೩೦. ‘‘ಕೋಸಾನಿ ವಿಚೇಯ್ಯ ಕೇವಲಾನಿ, ದಿಬ್ಬಂ ಮಾನುಸಕಞ್ಚ ಬ್ರಹ್ಮಕೋಸಂ;

ಸಬ್ಬಕೋಸಮೂಲಬನ್ಧನಾ ಪಮುತ್ತೋ, ಕುಸಲೋ ತಾದಿ ಪವುಚ್ಚತೇ ತಥತ್ತಾ.

೫೩೧. ‘‘ದುಭಯಾನಿ ವಿಚೇಯ್ಯ ಪಣ್ಡರಾನಿ, ಅಜ್ಝತ್ತಂ ಬಹಿದ್ಧಾ ಚ ಸುದ್ಧಿಪಞ್ಞೋ;

ಕಣ್ಹಂ ಸುಕ್ಕಂ ಉಪಾತಿವತ್ತೋ, ಪಣ್ಡಿತೋ ತಾದಿ ಪವುಚ್ಚತೇ ತಥತ್ತಾ.

೫೩೨. ‘‘ಅಸತಞ್ಚ ಸತಞ್ಚ ಞತ್ವಾ ಧಮ್ಮಂ, ಅಜ್ಝತ್ತಂ ಬಹಿದ್ಧಾ ಚ ಸಬ್ಬಲೋಕೇ;

ದೇವಮನುಸ್ಸೇಹಿ ಪೂಜನೀಯೋ, ಸಙ್ಗಂ ಜಾಲಮತಿಚ್ಚ ಸೋ ಮುನೀ’’ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ…ಪೇ… ಭಗವನ್ತಂ ಉತ್ತರಿಂ ಪಞ್ಹಂ ಅಪುಚ್ಛಿ –

೫೩೩. ‘‘ಕಿಂ ಪತ್ತಿನಮಾಹು ವೇದಗುಂ, (ಇತಿ ಸಭಿಯೋ)

ಅನುವಿದಿತಂ ಕೇನ ಕಥಞ್ಚ ವೀರಿಯವಾತಿ;

ಆಜಾನಿಯೋ ಕಿನ್ತಿ ನಾಮ ಹೋತಿ,

ಪುಟ್ಠೋ ಮೇ ಭಗವಾ ಬ್ಯಾಕರೋಹಿ’’.

೫೩೪. ‘‘ವೇದಾನಿ ವಿಚೇಯ್ಯ ಕೇವಲಾನಿ, (ಸಭಿಯಾತಿ ಭಗವಾ)

ಸಮಣಾನಂ ಯಾನಿಧತ್ಥಿ [ಯಾನಿಪತ್ಥಿ (ಸೀ. ಸ್ಯಾ. ಪೀ.)] ಬ್ರಾಹ್ಮಣಾನಂ;

ಸಬ್ಬವೇದನಾಸು ವೀತರಾಗೋ,

ಸಬ್ಬಂ ವೇದಮತಿಚ್ಚ ವೇದಗೂ ಸೋ.

೫೩೫. ‘‘ಅನುವಿಚ್ಚ ಪಪಞ್ಚನಾಮರೂಪಂ, ಅಜ್ಝತ್ತಂ ಬಹಿದ್ಧಾ ಚ ರೋಗಮೂಲಂ;

ಸಬ್ಬರೋಗಮೂಲಬನ್ಧನಾ ಪಮುತ್ತೋ, ಅನುವಿದಿತೋ ತಾದಿ ಪವುಚ್ಚತೇ ತಥತ್ತಾ.

೫೩೬. ‘‘ವಿರತೋ ಇಧ ಸಬ್ಬಪಾಪಕೇಹಿ, ನಿರಯದುಕ್ಖಂ ಅತಿಚ್ಚ ವೀರಿಯವಾ ಸೋ;

ಸೋ ವೀರಿಯವಾ ಪಧಾನವಾ, ಧೀರೋ ತಾದಿ ಪವುಚ್ಚತೇ ತಥತ್ತಾ.

೫೩೭. ‘‘ಯಸ್ಸಸ್ಸು ಲುನಾನಿ ಬನ್ಧನಾನಿ, ಅಜ್ಝತ್ತಂ ಬಹಿದ್ಧಾ ಚ ಸಙ್ಗಮೂಲಂ;

ಸಬ್ಬಸಙ್ಗಮೂಲಬನ್ಧನಾ ಪಮುತ್ತೋ, ಆಜಾನಿಯೋ ತಾದಿ ಪವುಚ್ಚತೇ ತಥತ್ತಾ’’ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ…ಪೇ… ಭಗವನ್ತಂ ಉತ್ತರಿಂ ಪಞ್ಹಂ ಅಪುಚ್ಛಿ –

೫೩೮. ‘‘ಕಿಂ ಪತ್ತಿನಮಾಹು ಸೋತ್ತಿಯಂ, (ಇತಿ ಸಭಿಯೋ)

ಅರಿಯಂ ಕೇನ ಕಥಞ್ಚ ಚರಣವಾತಿ;

ಪರಿಬ್ಬಾಜಕೋ ಕಿನ್ತಿ ನಾಮ ಹೋತಿ,

ಪುಟ್ಠೋ ಮೇ ಭಗವಾ ಬ್ಯಾಕರೋಹಿ’’.

೫೩೯. ‘‘ಸುತ್ವಾ ಸಬ್ಬಧಮ್ಮಂ ಅಭಿಞ್ಞಾಯ ಲೋಕೇ, (ಸಭಿಯಾತಿ ಭಗವಾ)

ಸಾವಜ್ಜಾನವಜ್ಜಂ ಯದತ್ಥಿ ಕಿಞ್ಚಿ;

ಅಭಿಭುಂ ಅಕಥಂಕಥಿಂ ವಿಮುತ್ತಂ,

ಅನಿಘಂ ಸಬ್ಬಧಿಮಾಹು ಸೋತ್ತಿಯೋತಿ.

೫೪೦. ‘‘ಛೇತ್ವಾ ಆಸವಾನಿ ಆಲಯಾನಿ, ವಿದ್ವಾ ಸೋ ನ ಉಪೇತಿ ಗಬ್ಭಸೇಯ್ಯಂ;

ಸಞ್ಞಂ ತಿವಿಧಂ ಪನುಜ್ಜ ಪಙ್ಕಂ, ಕಪ್ಪಂ ನೇತಿ ತಮಾಹು ಅರಿಯೋತಿ.

೫೪೧. ‘‘ಯೋ ಇಧ ಚರಣೇಸು ಪತ್ತಿಪತ್ತೋ, ಕುಸಲೋ ಸಬ್ಬದಾ ಆಜಾನಾತಿ [ಆಜಾನಿ (ಸ್ಯಾ.)] ಧಮ್ಮಂ;

ಸಬ್ಬತ್ಥ ನ ಸಜ್ಜತಿ ವಿಮುತ್ತಚಿತ್ತೋ [ವಿಮುತ್ತೋ (ಸೀ.)], ಪಟಿಘಾ ಯಸ್ಸ ನ ಸನ್ತಿ ಚರಣವಾ ಸೋ.

೫೪೨. ‘‘ದುಕ್ಖವೇಪಕ್ಕಂ ಯದತ್ಥಿ ಕಮ್ಮಂ, ಉದ್ಧಮಧೋ ತಿರಿಯಂ ವಾಪಿ [ತಿರಿಯಞ್ಚಾಪಿ (ಸ್ಯಾ.)] ಮಜ್ಝೇ;

ಪರಿಬ್ಬಾಜಯಿತ್ವಾ ಪರಿಞ್ಞಚಾರೀ, ಮಾಯಂ ಮಾನಮಥೋಪಿ ಲೋಭಕೋಧಂ;

ಪರಿಯನ್ತಮಕಾಸಿ ನಾಮರೂಪಂ, ತಂ ಪರಿಬ್ಬಾಜಕಮಾಹು ಪತ್ತಿಪತ್ತ’’ನ್ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ ಭಗವತೋ ಭಾಸಿತಂ ಅಭಿನನ್ದಿತ್ವಾ ಅನುಮೋದಿತ್ವಾ ಅತ್ತಮನೋ ಪಮುದಿತೋ ಉದಗ್ಗೋ ಪೀತಿಸೋಮನಸ್ಸಜಾತೋ ಉಟ್ಠಾಯಾಸನಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಯೇನ ಭಗವಾ ತೇನಞ್ಜಲಿಂ ಪಣಾಮೇತ್ವಾ ಭಗವನ್ತಂ ಸಮ್ಮುಖಾ ಸಾರುಪ್ಪಾಹಿ ಗಾಥಾಹಿ ಅಭಿತ್ಥವಿ –

೫೪೩. ‘‘ಯಾನಿ ಚ ತೀಣಿ ಯಾನಿ ಚ ಸಟ್ಠಿ, ಸಮಣಪ್ಪವಾದಸಿತಾನಿ [ಸಮಣಪ್ಪವಾದನಿಸ್ಸಿತಾನಿ (ಸ್ಯಾ. ಕ.)] ಭೂರಿಪಞ್ಞ;

ಸಞ್ಞಕ್ಖರಸಞ್ಞನಿಸ್ಸಿತಾನಿ, ಓಸರಣಾನಿ ವಿನೇಯ್ಯ ಓಘತಮಗಾ.

೫೪೪. ‘‘ಅನ್ತಗೂಸಿ ಪಾರಗೂ [ಪಾರಗೂಸಿ (ಸ್ಯಾ. ಪೀ. ಕ.)] ದುಕ್ಖಸ್ಸ, ಅರಹಾಸಿ ಸಮ್ಮಾಸಮ್ಬುದ್ಧೋ ಖೀಣಾಸವಂ ತಂ ಮಞ್ಞೇ;

ಜುತಿಮಾ ಮುತಿಮಾ ಪಹೂತಪಞ್ಞೋ, ದುಕ್ಖಸ್ಸನ್ತಕರಂ ಅತಾರೇಸಿ ಮಂ.

೫೪೫. ‘‘ಯಂ ಮೇ ಕಙ್ಖಿತಮಞ್ಞಾಸಿ, ವಿಚಿಕಿಚ್ಛಾ ಮಂ ತಾರಯಿ ನಮೋ ತೇ;

ಮುನಿ ಮೋನಪಥೇಸು ಪತ್ತಿಪತ್ತ, ಅಖಿಲ ಆದಿಚ್ಚಬನ್ಧು ಸೋರತೋಸಿ.

೫೪೬. ‘‘ಯಾ ಮೇ ಕಙ್ಖಾ ಪುರೇ ಆಸಿ, ತಂ ಮೇ ಬ್ಯಾಕಾಸಿ ಚಕ್ಖುಮಾ;

ಅದ್ಧಾ ಮುನೀಸಿ ಸಮ್ಬುದ್ಧೋ, ನತ್ಥಿ ನೀವರಣಾ ತವ.

೫೪೭. ‘‘ಉಪಾಯಾಸಾ ಚ ತೇ ಸಬ್ಬೇ, ವಿದ್ಧಸ್ತಾ ವಿನಳೀಕತಾ;

ಸೀತಿಭೂತೋ ದಮಪ್ಪತ್ತೋ, ಧಿತಿಮಾ ಸಚ್ಚನಿಕ್ಕಮೋ.

೫೪೮. ‘‘ತಸ್ಸ ತೇ ನಾಗನಾಗಸ್ಸ, ಮಹಾವೀರಸ್ಸ ಭಾಸತೋ;

ಸಬ್ಬೇ ದೇವಾನುಮೋದನ್ತಿ, ಉಭೋ ನಾರದಪಬ್ಬತಾ.

೫೪೯. ‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;

ಸದೇವಕಸ್ಮಿಂ ಲೋಕಸ್ಮಿಂ, ನತ್ಥಿ ತೇ ಪಟಿಪುಗ್ಗಲೋ.

೫೫೦. ‘‘ತುವಂ ಬುದ್ಧೋ ತುವಂ ಸತ್ಥಾ, ತುವಂ ಮಾರಾಭಿಭೂ ಮುನಿ;

ತುವಂ ಅನುಸಯೇ ಛೇತ್ವಾ, ತಿಣ್ಣೋ ತಾರೇಸಿ ಮಂ ಪಜಂ.

೫೫೧. ‘‘ಉಪಧೀ ತೇ ಸಮತಿಕ್ಕನ್ತಾ, ಆಸವಾ ತೇ ಪದಾಲಿತಾ;

ಸೀಹೋಸಿ ಅನುಪಾದಾನೋ, ಪಹೀನಭಯಭೇರವೋ.

೫೫೨. ‘‘ಪುಣ್ಡರೀಕಂ ಯಥಾ ವಗ್ಗು, ತೋಯೇ ನ ಉಪಲಿಮ್ಪತಿ [ತೋಯೇನ ನ ಉಪಲಿಪ್ಪತಿ (ಸೀ.), ತೋಯೇ ನ ಉಪಲಿಪ್ಪತಿ (ಪೀ.), ತೋಯೇನ ನ ಉಪಲಿಮ್ಪತಿ (ಕ.)];

ಏವಂ ಪುಞ್ಞೇ ಚ ಪಾಪೇ ಚ, ಉಭಯೇ ತ್ವಂ ನ ಲಿಮ್ಪಸಿ;

ಪಾದೇ ವೀರ ಪಸಾರೇಹಿ, ಸಭಿಯೋ ವನ್ದತಿ ಸತ್ಥುನೋ’’ತಿ.

ಅಥ ಖೋ ಸಭಿಯೋ ಪರಿಬ್ಬಾಜಕೋ ಭಗವತೋ ಪಾದೇಸು ಸಿರಸಾ ನಿಪತಿತ್ವಾ ಭಗವನ್ತಂ ಏತದವೋಚ – ‘‘ಅಭಿಕ್ಕನ್ತಂ, ಭನ್ತೇ…ಪೇ… ಏಸಾಹಂ ಭಗವನ್ತಂ ಸರಣಂ ಗಚ್ಛಾಮಿ ಧಮ್ಮಞ್ಚ ಭಿಕ್ಖುಸಙ್ಘಞ್ಚ; ಲಭೇಯ್ಯಾಹಂ, ಭನ್ತೇ, ಭಗವತೋ ಸನ್ತಿಕೇ ಪಬ್ಬಜ್ಜಂ, ಲಭೇಯ್ಯಂ ಉಪಸಮ್ಪದ’’ನ್ತಿ.

‘‘ಯೋ ಖೋ, ಸಭಿಯ, ಅಞ್ಞತಿತ್ಥಿಯಪುಬ್ಬೋ ಇಮಸ್ಮಿಂ ಧಮ್ಮವಿನಯೇ ಆಕಙ್ಖತಿ ಪಬ್ಬಜ್ಜಂ, ಆಕಙ್ಖತಿ ಉಪಸಮ್ಪದಂ, ಸೋ ಚತ್ತಾರೋ ಮಾಸೇ ಪರಿವಸತಿ; ಚತುನ್ನಂ ಮಾಸಾನಂ ಅಚ್ಚಯೇನ ಆರದ್ಧಚಿತ್ತಾ ಭಿಕ್ಖೂ ಪಬ್ಬಾಜೇನ್ತಿ, ಉಪಸಮ್ಪಾದೇನ್ತಿ ಭಿಕ್ಖುಭಾವಾಯ. ಅಪಿ ಚ ಮೇತ್ಥ ಪುಗ್ಗಲವೇಮತ್ತತಾ ವಿದಿತಾ’’ತಿ.

‘‘ಸಚೇ, ಭನ್ತೇ, ಅಞ್ಞತಿತ್ಥಿಯಪುಬ್ಬಾ ಇಮಸ್ಮಿಂ ಧಮ್ಮವಿನಯೇ ಆಕಙ್ಖನ್ತಾ ಪಬ್ಬಜ್ಜಂ, ಆಕಙ್ಖನ್ತಾ ಉಪಸಮ್ಪದಂ ಚತ್ತಾರೋ ಮಾಸೇ ಪರಿವಸನ್ತಿ, ಚತುನ್ನಂ ಮಾಸಾನಂ ಅಚ್ಚಯೇನ ಆರದ್ಧಚಿತ್ತಾ ಭಿಕ್ಖೂ ಪಬ್ಬಾಜೇನ್ತಿ, ಉಪಸಮ್ಪಾದೇನ್ತಿ ಭಿಕ್ಖುಭಾವಾಯ, ಅಹಂ ಚತ್ತಾರಿ ವಸ್ಸಾನಿ ಪರಿವಸಿಸ್ಸಾಮಿ; ಚತುನ್ನಂ ವಸ್ಸಾನಂ ಅಚ್ಚಯೇನ ಆರದ್ಧಚಿತ್ತಾ ಭಿಕ್ಖೂ ಪಬ್ಬಾಜೇನ್ತು ಉಪಸಮ್ಪಾದೇನ್ತು ಭಿಕ್ಖುಭಾವಾಯಾ’’ತಿ. ಅಲತ್ಥ ಖೋ ಸಭಿಯೋ ಪರಿಬ್ಬಾಜಕೋ ಭಗವತೋ ಸನ್ತಿಕೇ ಪಬ್ಬಜ್ಜಂ ಅಲತ್ಥ ಉಪಸಮ್ಪದಂ…ಪೇ… ಅಞ್ಞತರೋ ಖೋ ಪನಾಯಸ್ಮಾ ಸಭಿಯೋ ಅರಹತಂ ಅಹೋಸೀತಿ.

ಸಭಿಯಸುತ್ತಂ ಛಟ್ಠಂ ನಿಟ್ಠಿತಂ.