೮. ನಾವಾಸುತ್ತಂ

೩೧೮. ಯಸ್ಮಾ ಹಿ ಧಮ್ಮಂ ಪುರಿಸೋ ವಿಜಞ್ಞಾ, ಇನ್ದಂವ ನಂ ದೇವತಾ ಪೂಜಯೇಯ್ಯ;

ಸೋ ಪೂಜಿತೋ ತಸ್ಮಿ ಪಸನ್ನಚಿತ್ತೋ, ಬಹುಸ್ಸುತೋ ಪಾತುಕರೋತಿ ಧಮ್ಮಂ.

೩೧೯. ತದಟ್ಠಿಕತ್ವಾನ ನಿಸಮ್ಮ ಧೀರೋ, ಧಮ್ಮಾನುಧಮ್ಮಂ ಪಟಿಪಜ್ಜಮಾನೋ;

ವಿಞ್ಞೂ ವಿಭಾವೀ ನಿಪುಣೋ ಚ ಹೋತಿ, ಯೋ ತಾದಿಸಂ ಭಜತಿ ಅಪ್ಪಮತ್ತೋ.

೩೨೦. ಖುದ್ದಞ್ಚ ಬಾಲಂ ಉಪಸೇವಮಾನೋ, ಅನಾಗತತ್ಥಞ್ಚ ಉಸೂಯಕಞ್ಚ;

ಇಧೇವ ಧಮ್ಮಂ ಅವಿಭಾವಯಿತ್ವಾ, ಅವಿತಿಣ್ಣಕಙ್ಖೋ ಮರಣಂ ಉಪೇತಿ.

೩೨೧. ಯಥಾ ನರೋ ಆಪಗಮೋತರಿತ್ವಾ, ಮಹೋದಕಂ ಸಲಿಲಂ ಸೀಘಸೋತಂ;

ಸೋ ವುಯ್ಹಮಾನೋ ಅನುಸೋತಗಾಮೀ, ಕಿಂ ಸೋ ಪರೇ ಸಕ್ಖತಿ ತಾರಯೇತುಂ.

೩೨೨. ತಥೇವ ಧಮ್ಮಂ ಅವಿಭಾವಯಿತ್ವಾ, ಬಹುಸ್ಸುತಾನಂ ಅನಿಸಾಮಯತ್ಥಂ;

ಸಯಂ ಅಜಾನಂ ಅವಿತಿಣ್ಣಕಙ್ಖೋ, ಕಿಂ ಸೋ ಪರೇ ಸಕ್ಖತಿ ನಿಜ್ಝಪೇತುಂ.

೩೨೩. ಯಥಾಪಿ ನಾವಂ ದಳ್ಹಮಾರುಹಿತ್ವಾ, ಫಿಯೇನ [ಪಿಯೇನ (ಸೀ. ಸ್ಯಾ.)] ರಿತ್ತೇನ ಸಮಙ್ಗಿಭೂತೋ;

ಸೋ ತಾರಯೇ ತತ್ಥ ಬಹೂಪಿ ಅಞ್ಞೇ, ತತ್ರೂಪಯಞ್ಞೂ ಕುಸಲೋ ಮುತೀಮಾ [ಮತೀಮಾ (ಸ್ಯಾ. ಕ.)].

೩೨೪. ಏವಮ್ಪಿ ಯೋ ವೇದಗು ಭಾವಿತತ್ತೋ, ಬಹುಸ್ಸುತೋ ಹೋತಿ ಅವೇಧಧಮ್ಮೋ;

ಸೋ ಖೋ ಪರೇ ನಿಜ್ಝಪಯೇ ಪಜಾನಂ, ಸೋತಾವಧಾನೂಪನಿಸೂಪಪನ್ನೇ.

೩೨೫. ತಸ್ಮಾ ಹವೇ ಸಪ್ಪುರಿಸಂ ಭಜೇಥ, ಮೇಧಾವಿನಞ್ಚೇವ ಬಹುಸ್ಸುತಞ್ಚ;

ಅಞ್ಞಾಯ ಅತ್ಥಂ ಪಟಿಪಜ್ಜಮಾನೋ, ವಿಞ್ಞಾತಧಮ್ಮೋ ಸ ಸುಖಂ [ಸೋ ಸುಖಂ (ಸೀ.)] ಲಭೇಥಾತಿ.

ನಾವಾಸುತ್ತಂ ಅಟ್ಠಮಂ ನಿಟ್ಠಿತಂ.