೬. ಧಮ್ಮಚರಿಯಸುತ್ತಂ

೨೭೬. ಧಮ್ಮಚರಿಯಂ ಬ್ರಹ್ಮಚರಿಯಂ, ಏತದಾಹು ವಸುತ್ತಮಂ;

ಪಬ್ಬಜಿತೋಪಿ ಚೇ ಹೋತಿ, ಅಗಾರಾ ಅನಗಾರಿಯಂ.

೨೭೭. ಸೋ ಚೇ ಮುಖರಜಾತಿಕೋ, ವಿಹೇಸಾಭಿರತೋ ಮಗೋ;

ಜೀವಿತಂ ತಸ್ಸ ಪಾಪಿಯೋ, ರಜಂ ವಡ್ಢೇತಿ ಅತ್ತನೋ.

೨೭೮. ಕಲಹಾಭಿರತೋ ಭಿಕ್ಖು, ಮೋಹಧಮ್ಮೇನ ಆವುತೋ;

ಅಕ್ಖಾತಮ್ಪಿ ನ ಜಾನಾತಿ, ಧಮ್ಮಂ ಬುದ್ಧೇನ ದೇಸಿತಂ.

೨೭೯. ವಿಹೇಸಂ ಭಾವಿತತ್ತಾನಂ, ಅವಿಜ್ಜಾಯ ಪುರಕ್ಖತೋ;

ಸಂಕಿಲೇಸಂ ನ ಜಾನಾತಿ, ಮಗ್ಗಂ ನಿರಯಗಾಮಿನಂ.

೨೮೦. ವಿನಿಪಾತಂ ಸಮಾಪನ್ನೋ, ಗಬ್ಭಾ ಗಬ್ಭಂ ತಮಾ ತಮಂ;

ಸ ವೇ ತಾದಿಸಕೋ ಭಿಕ್ಖು, ಪೇಚ್ಚ ದುಕ್ಖಂ ನಿಗಚ್ಛತಿ.

೨೮೧. ಗೂಥಕೂಪೋ ಯಥಾ ಅಸ್ಸ, ಸಮ್ಪುಣ್ಣೋ ಗಣವಸ್ಸಿಕೋ;

ಯೋ ಚ ಏವರೂಪೋ ಅಸ್ಸ, ದುಬ್ಬಿಸೋಧೋ ಹಿ ಸಾಙ್ಗಣೋ.

೨೮೨. ಯಂ ಏವರೂಪಂ ಜಾನಾಥ, ಭಿಕ್ಖವೋ ಗೇಹನಿಸ್ಸಿತಂ;

ಪಾಪಿಚ್ಛಂ ಪಾಪಸಙ್ಕಪ್ಪಂ, ಪಾಪಆಚಾರಗೋಚರಂ.

೨೮೩. ಸಬ್ಬೇ ಸಮಗ್ಗಾ ಹುತ್ವಾನ, ಅಭಿನಿಬ್ಬಜ್ಜಿಯಾಥ [ಅಭಿನಿಬ್ಬಜ್ಜಯಾಥ (ಸೀ. ಪೀ. ಅ. ನಿ. ೮.೧೦)] ನಂ;

ಕಾರಣ್ಡವಂ [ಕಾರಣ್ಡಂ ವ (ಸ್ಯಾ. ಕ.) ಅ. ನಿ. ೮.೧೦] ನಿದ್ಧಮಥ, ಕಸಮ್ಬುಂ ಅಪಕಸ್ಸಥ [ಅವಕಸ್ಸಥ (ಸೀ. ಸ್ಯಾ. ಕ.)].

೨೮೪. ತತೋ ಪಲಾಪೇ [ಪಲಾಸೇ (ಕ.)] ವಾಹೇಥ, ಅಸ್ಸಮಣೇ ಸಮಣಮಾನಿನೇ;

ನಿದ್ಧಮಿತ್ವಾನ ಪಾಪಿಚ್ಛೇ, ಪಾಪಆಚಾರಗೋಚರೇ.

೨೮೫. ಸುದ್ಧಾ ಸುದ್ಧೇಹಿ ಸಂವಾಸಂ, ಕಪ್ಪಯವ್ಹೋ ಪತಿಸ್ಸತಾ;

ತತೋ ಸಮಗ್ಗಾ ನಿಪಕಾ, ದುಕ್ಖಸ್ಸನ್ತಂ ಕರಿಸ್ಸಥಾತಿ.

ಧಮ್ಮಚರಿಯಸುತ್ತಂ [ಕಪಿಲಸುತ್ತಂ (ಅಟ್ಠ.)] ಛಟ್ಠಂ ನಿಟ್ಠಿತಂ.