೨. ಆಮಗನ್ಧಸುತ್ತಂ

೨೪೨. ‘‘ಸಾಮಾಕಚಿಙ್ಗೂಲಕಚೀನಕಾನಿ ಚ, ಪತ್ತಪ್ಫಲಂ ಮೂಲಫಲಂ ಗವಿಪ್ಫಲಂ;

ಧಮ್ಮೇನ ಲದ್ಧಂ ಸತಮಸ್ನಮಾನಾ [ಸತಮಸಮಾನಾ (ಸೀ. ಪೀ.), ಸತಮಸ್ಸಮಾನಾ (ಸ್ಯಾ. ಕಂ.)], ನ ಕಾಮಕಾಮಾ ಅಲಿಕಂ ಭಣನ್ತಿ.

೨೪೩. ‘‘ಯದಸ್ನಮಾನೋ ಸುಕತಂ ಸುನಿಟ್ಠಿತಂ, ಪರೇಹಿ ದಿನ್ನಂ ಪಯತಂ ಪಣೀತಂ;

ಸಾಲೀನಮನ್ನಂ ಪರಿಭುಞ್ಜಮಾನೋ, ಸೋ ಭುಞ್ಜಸೀ ಕಸ್ಸಪ ಆಮಗನ್ಧಂ.

೨೪೪. ‘‘ನ ಆಮಗನ್ಧೋ ಮಮ ಕಪ್ಪತೀತಿ, ಇಚ್ಚೇವ ತ್ವಂ ಭಾಸಸಿ ಬ್ರಹ್ಮಬನ್ಧು;

ಸಾಲೀನಮನ್ನಂ ಪರಿಭುಞ್ಜಮಾನೋ, ಸಕುನ್ತಮಂಸೇಹಿ ಸುಸಙ್ಖತೇಹಿ;

ಪುಚ್ಛಾಮಿ ತಂ ಕಸ್ಸಪ ಏತಮತ್ಥಂ, ಕಥಂ ಪಕಾರೋ ತವ ಆಮಗನ್ಧೋ’’.

೨೪೫. ‘‘ಪಾಣಾತಿಪಾತೋ ವಧಛೇದಬನ್ಧನಂ, ಥೇಯ್ಯಂ ಮುಸಾವಾದೋ ನಿಕತಿವಞ್ಚನಾನಿ ಚ;

ಅಜ್ಝೇನಕುತ್ತಂ [ಅಜ್ಝೇನ ಕುಜ್ಜಂ (ಸೀ. ಪೀ.)] ಪರದಾರಸೇವನಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ.

೨೪೬. ‘‘ಯೇ ಇಧ ಕಾಮೇಸು ಅಸಞ್ಞತಾ ಜನಾ, ರಸೇಸು ಗಿದ್ಧಾ ಅಸುಚಿಭಾವಮಸ್ಸಿತಾ [ಅಸುಚೀಕಮಿಸ್ಸಿತಾ (ಸೀ. ಸ್ಯಾ. ಕಂ. ಪೀ.)];

ನತ್ಥಿಕದಿಟ್ಠೀ ವಿಸಮಾ ದುರನ್ನಯಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ.

೨೪೭. ‘‘ಯೇ ಲೂಖಸಾ ದಾರುಣಾ ಪಿಟ್ಠಿಮಂಸಿಕಾ [ಯೇ ಲೂಖರಸಾ ದಾರುಣಾ ಪರಪಿಟ್ಠಿಮಂಸಿಕಾ (ಕ.)], ಮಿತ್ತದ್ದುನೋ ನಿಕ್ಕರುಣಾತಿಮಾನಿನೋ;

ಅದಾನಸೀಲಾ ನ ಚ ದೇನ್ತಿ ಕಸ್ಸಚಿ, ಏಸಾಮಗನ್ಧೋ ನ ಹಿ ಮಂಸಭೋಜನಂ.

೨೪೮. ‘‘ಕೋಧೋ ಮದೋ ಥಮ್ಭೋ ಪಚ್ಚುಪಟ್ಠಾಪನಾ [ಪಚ್ಚುಟ್ಠಾಪನಾ ಚ (ಸೀ. ಸ್ಯಾ.), ಪಚ್ಚುಟ್ಠಾಪನಾ (ಪೀ.)], ಮಾಯಾ ಉಸೂಯಾ ಭಸ್ಸಸಮುಸ್ಸಯೋ ಚ;

ಮಾನಾತಿಮಾನೋ ಚ ಅಸಬ್ಭಿ ಸನ್ಥವೋ, ಏಸಾಮಗನ್ಧೋ ನ ಹಿ ಮಂಸಭೋಜನಂ.

೨೪೯. ‘‘ಯೇ ಪಾಪಸೀಲಾ ಇಣಘಾತಸೂಚಕಾ, ವೋಹಾರಕೂಟಾ ಇಧ ಪಾಟಿರೂಪಿಕಾ [ಪಾತಿರೂಪಿಕಾ (?)];

ನರಾಧಮಾ ಯೇಧ ಕರೋನ್ತಿ ಕಿಬ್ಬಿಸಂ, ಏಸಾಮಗನ್ಧೋ ನ ಹಿ ಮಂಸಭೋಜನಂ.

೨೫೦. ‘‘ಯೇ ಇಧ ಪಾಣೇಸು ಅಸಞ್ಞತಾ ಜನಾ, ಪರೇಸಮಾದಾಯ ವಿಹೇಸಮುಯ್ಯುತಾ;

ದುಸ್ಸೀಲಲುದ್ದಾ ಫರುಸಾ ಅನಾದರಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ.

೨೫೧. ‘‘ಏತೇಸು ಗಿದ್ಧಾ ವಿರುದ್ಧಾತಿಪಾತಿನೋ, ನಿಚ್ಚುಯ್ಯುತಾ ಪೇಚ್ಚ ತಮಂ ವಜನ್ತಿ ಯೇ;

ಪತನ್ತಿ ಸತ್ತಾ ನಿರಯಂ ಅವಂಸಿರಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ.

೨೫೨. ‘‘ನ ಮಚ್ಛಮಂಸಾನಮನಾಸಕತ್ತಂ [ನ ಮಚ್ಛಮಂಸಂ ನ ಅನಾಸಕತ್ತಂ (ಸೀ. ಅಟ್ಠ ಮೂಲಪಾಠೋ), ನ ಮಂಚ್ಛಮಂಸಾನಾನಾಸಕತ್ತಂ (ಸ್ಯಾ. ಕ.)], ನ ನಗ್ಗಿಯಂ ನ ಮುಣ್ಡಿಯಂ ಜಟಾಜಲ್ಲಂ;

ಖರಾಜಿನಾನಿ ನಾಗ್ಗಿಹುತ್ತಸ್ಸುಪಸೇವನಾ, ಯೇ ವಾಪಿ ಲೋಕೇ ಅಮರಾ ಬಹೂ ತಪಾ;

ಮನ್ತಾಹುತೀ ಯಞ್ಞಮುತೂಪಸೇವನಾ, ಸೋಧೇನ್ತಿ ಮಚ್ಚಂ ಅವಿತಿಣ್ಣಕಙ್ಖಂ.

೨೫೩. ‘‘ಯೋ ತೇಸು [ಸೋತೇಸು (ಸೀ. ಪೀ.)] ಗುತ್ತೋ ವಿದಿತಿನ್ದ್ರಿಯೋ ಚರೇ, ಧಮ್ಮೇ ಠಿತೋ ಅಜ್ಜವಮದ್ದವೇ ರತೋ;

ಸಙ್ಗಾತಿಗೋ ಸಬ್ಬದುಕ್ಖಪ್ಪಹೀನೋ, ನ ಲಿಪ್ಪತಿ [ನ ಲಿಮ್ಪತಿ (ಸ್ಯಾ. ಕಂ ಕ.)] ದಿಟ್ಠಸುತೇಸು ಧೀರೋ’’.

೨೫೪. ಇಚ್ಚೇತಮತ್ಥಂ ಭಗವಾ ಪುನಪ್ಪುನಂ, ಅಕ್ಖಾಸಿ ನಂ [ತಂ (ಸೀ. ಪೀ.)] ವೇದಯಿ ಮನ್ತಪಾರಗೂ;

ಚಿತ್ರಾಹಿ ಗಾಥಾಹಿ ಮುನೀ ಪಕಾಸಯಿ, ನಿರಾಮಗನ್ಧೋ ಅಸಿತೋ ದುರನ್ನಯೋ.

೨೫೫. ಸುತ್ವಾನ ಬುದ್ಧಸ್ಸ ಸುಭಾಸಿತಂ ಪದಂ, ನಿರಾಮಗನ್ಧಂ ಸಬ್ಬದುಕ್ಖಪ್ಪನೂದನಂ;

ನೀಚಮನೋ ವನ್ದಿ ತಥಾಗತಸ್ಸ, ತತ್ಥೇವ ಪಬ್ಬಜ್ಜಮರೋಚಯಿತ್ಥಾತಿ.

ಆಮಗನ್ಧಸುತ್ತಂ ದುತಿಯಂ ನಿಟ್ಠಿತಂ.