೩. ಹಿರಿಸುತ್ತಂ

೨೫೬. ಹಿರಿಂ ತರನ್ತಂ ವಿಜಿಗುಚ್ಛಮಾನಂ, ತವಾಹಮಸ್ಮಿ [ಸಖಾಹಮಸ್ಮಿ (ಸೀ. ಸ್ಯಾ. ಕಂ. ಪೀ.)] ಇತಿ ಭಾಸಮಾನಂ;

ಸಯ್ಹಾನಿ ಕಮ್ಮಾನಿ ಅನಾದಿಯನ್ತಂ, ನೇಸೋ ಮಮನ್ತಿ ಇತಿ ನಂ ವಿಜಞ್ಞಾ.

೨೫೭. ಅನನ್ವಯಂ [ಅತ್ಥನ್ವಯಂ (ಕ.)] ಪಿಯಂ ವಾಚಂ, ಯೋ ಮಿತ್ತೇಸು ಪಕುಬ್ಬತಿ;

ಅಕರೋನ್ತಂ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

೨೫೮. ನ ಸೋ ಮಿತ್ತೋ ಯೋ ಸದಾ ಅಪ್ಪಮತ್ತೋ, ಭೇದಾಸಙ್ಕೀ ರನ್ಧಮೇವಾನುಪಸ್ಸೀ;

ಯಸ್ಮಿಞ್ಚ ಸೇತಿ ಉರಸೀವ ಪುತ್ತೋ, ಸ ವೇ ಮಿತ್ತೋ ಯೋ ಪರೇಹಿ ಅಭೇಜ್ಜೋ.

೨೫೯. ಪಾಮುಜ್ಜಕರಣಂ ಠಾನಂ, ಪಸಂಸಾವಹನಂ ಸುಖಂ;

ಫಲಾನಿಸಂಸೋ ಭಾವೇತಿ, ವಹನ್ತೋ ಪೋರಿಸಂ ಧುರಂ.

೨೬೦. ಪವಿವೇಕರಸಂ ಪಿತ್ವಾ, ರಸಂ ಉಪಸಮಸ್ಸ ಚ;

ನಿದ್ದರೋ ಹೋತಿ ನಿಪ್ಪಾಪೋ, ಧಮ್ಮಪೀತಿರಸಂ ಪಿವನ್ತಿ.

ಹಿರಿಸುತ್ತಂ ತತಿಯಂ ನಿಟ್ಠಿತಂ.