೧. ರತನಸುತ್ತಂ

೨೨೪. ಯಾನೀಧ ಭೂತಾನಿ ಸಮಾಗತಾನಿ, ಭುಮ್ಮಾನಿ [ಭೂಮಾನಿ (ಕ.)] ವಾ ಯಾನಿ ವ ಅನ್ತಲಿಕ್ಖೇ;

ಸಬ್ಬೇವ ಭೂತಾ ಸುಮನಾ ಭವನ್ತು, ಅಥೋಪಿ ಸಕ್ಕಚ್ಚ ಸುಣನ್ತು ಭಾಸಿತಂ.

೨೨೫. ತಸ್ಮಾ ಹಿ ಭೂತಾ ನಿಸಾಮೇಥ ಸಬ್ಬೇ, ಮೇತ್ತಂ ಕರೋಥ ಮಾನುಸಿಯಾ ಪಜಾಯ;

ದಿವಾ ಚ ರತ್ತೋ ಚ ಹರನ್ತಿ ಯೇ ಬಲಿಂ, ತಸ್ಮಾ ಹಿ ನೇ ರಕ್ಖಥ ಅಪ್ಪಮತ್ತಾ.

೨೨೬. ಯಂ ಕಿಞ್ಚಿ ವಿತ್ತಂ ಇಧ ವಾ ಹುರಂ ವಾ, ಸಗ್ಗೇಸು ವಾ ಯಂ ರತನಂ ಪಣೀತಂ;

ನ ನೋ ಸಮಂ ಅತ್ಥಿ ತಥಾಗತೇನ, ಇದಮ್ಪಿ ಬುದ್ಧೇ ರತನಂ ಪಣೀತಂ;

ಏತೇನ ಸಚ್ಚೇನ ಸುವತ್ಥಿ ಹೋತು.

೨೨೭. ಖಯಂ ವಿರಾಗಂ ಅಮತಂ ಪಣೀತಂ, ಯದಜ್ಝಗಾ ಸಕ್ಯಮುನೀ ಸಮಾಹಿತೋ;

ನ ತೇನ ಧಮ್ಮೇನ ಸಮತ್ಥಿ ಕಿಞ್ಚಿ, ಇದಮ್ಪಿ ಧಮ್ಮೇ ರತನಂ ಪಣೀತಂ;

ಏತೇನ ಸಚ್ಚೇನ ಸುವತ್ಥಿ ಹೋತು.

೨೨೮. ಯಂ ಬುದ್ಧಸೇಟ್ಠೋ ಪರಿವಣ್ಣಯೀ ಸುಚಿಂ, ಸಮಾಧಿಮಾನನ್ತರಿಕಞ್ಞಮಾಹು;

ಸಮಾಧಿನಾ ತೇನ ಸಮೋ ನ ವಿಜ್ಜತಿ, ಇದಮ್ಪಿ ಧಮ್ಮೇ ರತನಂ ಪಣೀತಂ;

ಏತೇನ ಸಚ್ಚೇನ ಸುವತ್ಥಿ ಹೋತು.

೨೨೯. ಯೇ ಪುಗ್ಗಲಾ ಅಟ್ಠ ಸತಂ ಪಸತ್ಥಾ, ಚತ್ತಾರಿ ಏತಾನಿ ಯುಗಾನಿ ಹೋನ್ತಿ;

ತೇ ದಕ್ಖಿಣೇಯ್ಯಾ ಸುಗತಸ್ಸ ಸಾವಕಾ, ಏತೇಸು ದಿನ್ನಾನಿ ಮಹಪ್ಫಲಾನಿ;

ಇದಮ್ಪಿ ಸಙ್ಘೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೦. ಯೇ ಸುಪ್ಪಯುತ್ತಾ ಮನಸಾ ದಳ್ಹೇನ, ನಿಕ್ಕಾಮಿನೋ ಗೋತಮಸಾಸನಮ್ಹಿ;

ತೇ ಪತ್ತಿಪತ್ತಾ ಅಮತಂ ವಿಗಯ್ಹ, ಲದ್ಧಾ ಮುಧಾ ನಿಬ್ಬುತಿಂ [ನಿಬ್ಬುತಿ (ಕ.)] ಭುಞ್ಜಮಾನಾ;

ಇದಮ್ಪಿ ಸಙ್ಘೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೧. ಯಥಿನ್ದಖೀಲೋ ಪಥವಿಸ್ಸಿತೋ [ಪದವಿಸ್ಸಿತೋ (ಕ. ಸೀ.), ಪಠವಿಂ ಸಿತೋ (ಕ. ಸೀ. ಸ್ಯಾ. ಕಂ. ಪೀ.)] ಸಿಯಾ, ಚತುಬ್ಭಿ ವಾತೇಹಿ ಅಸಮ್ಪಕಮ್ಪಿಯೋ;

ತಥೂಪಮಂ ಸಪ್ಪುರಿಸಂ ವದಾಮಿ, ಯೋ ಅರಿಯಸಚ್ಚಾನಿ ಅವೇಚ್ಚ ಪಸ್ಸತಿ;

ಇದಮ್ಪಿ ಸಙ್ಘೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೨. ಯೇ ಅರಿಯಸಚ್ಚಾನಿ ವಿಭಾವಯನ್ತಿ, ಗಮ್ಭೀರಪಞ್ಞೇನ ಸುದೇಸಿತಾನಿ;

ಕಿಞ್ಚಾಪಿ ತೇ ಹೋನ್ತಿ ಭುಸಂ ಪಮತ್ತಾ, ನ ತೇ ಭವಂ ಅಟ್ಠಮಮಾದಿಯನ್ತಿ;

ಇದಮ್ಪಿ ಸಙ್ಘೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೩. ಸಹಾವಸ್ಸ ದಸ್ಸನಸಮ್ಪದಾಯ [ಸಹಾವಸದ್ದಸ್ಸನಸಮ್ಪದಾಯ (ಕ.)], ತಯಸ್ಸು ಧಮ್ಮಾ ಜಹಿತಾ ಭವನ್ತಿ;

ಸಕ್ಕಾಯದಿಟ್ಠಿ ವಿಚಿಕಿಚ್ಛಿತಞ್ಚ, ಸೀಲಬ್ಬತಂ ವಾಪಿ ಯದತ್ಥಿ ಕಿಞ್ಚಿ.

೨೩೪. ಚತೂಹಪಾಯೇಹಿ ಚ ವಿಪ್ಪಮುತ್ತೋ, ಛಚ್ಚಾಭಿಠಾನಾನಿ [ಛ ಚಾಭಿಠಾನಾನಿ (ಸೀ. ಸ್ಯಾ.)] ಭಬ್ಬ ಕಾತುಂ [ಅಭಬ್ಬೋ ಕಾತುಂ (ಸೀ.)];

ಇದಮ್ಪಿ ಸಙ್ಘೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೫. ಕಿಞ್ಚಾಪಿ ಸೋ ಕಮ್ಮ [ಕಮ್ಮಂ (ಸೀ. ಸ್ಯಾ. ಕಂ. ಪೀ.)] ಕರೋತಿ ಪಾಪಕಂ, ಕಾಯೇನ ವಾಚಾ ಉದ ಚೇತಸಾ ವಾ;

ಅಭಬ್ಬ [ಅಭಬ್ಬೋ (ಬಹೂಸು)] ಸೋ ತಸ್ಸ ಪಟಿಚ್ಛದಾಯ [ಪಟಿಚ್ಛಾದಾಯ (ಸೀ.)], ಅಭಬ್ಬತಾ ದಿಟ್ಠಪದಸ್ಸ ವುತ್ತಾ;

ಇದಮ್ಪಿ ಸಙ್ಘೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೬. ವನಪ್ಪಗುಮ್ಬೇ ಯಥ [ಯಥಾ (ಸೀ. ಸ್ಯಾ.)] ಫುಸ್ಸಿತಗ್ಗೇ, ಗಿಮ್ಹಾನಮಾಸೇ ಪಠಮಸ್ಮಿಂ [ಪಠಮಸ್ಮಿ (?)] ಗಿಮ್ಹೇ;

ತಥೂಪಮಂ ಧಮ್ಮವರಂ ಅದೇಸಯಿ [ಅದೇಸಯೀ (ಸೀ.)], ನಿಬ್ಬಾನಗಾಮಿಂ ಪರಮಂ ಹಿತಾಯ;

ಇದಮ್ಪಿ ಬುದ್ಧೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೭. ವರೋ ವರಞ್ಞೂ ವರದೋ ವರಾಹರೋ, ಅನುತ್ತರೋ ಧಮ್ಮವರಂ ಅದೇಸಯಿ;

ಇದಮ್ಪಿ ಬುದ್ಧೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೮. ಖೀಣಂ ಪುರಾಣಂ ನವ ನತ್ಥಿ ಸಮ್ಭವಂ, ವಿರತ್ತಚಿತ್ತಾಯತಿಕೇ ಭವಸ್ಮಿಂ;

ತೇ ಖೀಣಬೀಜಾ ಅವಿರೂಳ್ಹಿಛನ್ದಾ, ನಿಬ್ಬನ್ತಿ ಧೀರಾ ಯಥಾಯಂ [ಯಥಯಂ (ಕ.)] ಪದೀಪೋ;

ಇದಮ್ಪಿ ಸಙ್ಘೇ ರತನಂ ಪಣೀತಂ, ಏತೇನ ಸಚ್ಚೇನ ಸುವತ್ಥಿ ಹೋತು.

೨೩೯. ಯಾನೀಧ ಭೂತಾನಿ ಸಮಾಗತಾನಿ, ಭುಮ್ಮಾನಿ ವಾ ಯಾನಿ ವ ಅನ್ತಲಿಕ್ಖೇ;

ತಥಾಗತಂ ದೇವಮನುಸ್ಸಪೂಜಿತಂ, ಬುದ್ಧಂ ನಮಸ್ಸಾಮ ಸುವತ್ಥಿ ಹೋತು.

೨೪೦. ಯಾನೀಧ ಭೂತಾನಿ ಸಮಾಗತಾನಿ, ಭುಮ್ಮಾನಿ ವಾ ಯಾನಿ ವ ಅನ್ತಲಿಕ್ಖೇ;

ತಥಾಗತಂ ದೇವಮನುಸ್ಸಪೂಜಿತಂ, ಧಮ್ಮಂ ನಮಸ್ಸಾಮ ಸುವತ್ಥಿ ಹೋತು.

೨೪೧. ಯಾನೀಧ ಭೂತಾನಿ ಸಮಾಗತಾನಿ, ಭುಮ್ಮಾನಿ ವಾ ಯಾನಿ ವ ಅನ್ತಲಿಕ್ಖೇ;

ತಥಾಗತಂ ದೇವಮನುಸ್ಸಪೂಜಿತಂ, ಸಙ್ಘಂ ನಮಸ್ಸಾಮ ಸುವತ್ಥಿ ಹೋತೂತಿ.

ರತನಸುತ್ತಂ ಪಠಮಂ ನಿಟ್ಠಿತಂ.