೩. ನನ್ದಕಪೇತವತ್ಥು

೬೫೮. ರಾಜಾ ಪಿಙ್ಗಲಕೋ ನಾಮ, ಸುರಟ್ಠಾನಂ ಅಧಿಪತಿ ಅಹು;

ಮೋರಿಯಾನಂ ಉಪಟ್ಠಾನಂ ಗನ್ತ್ವಾ, ಸುರಟ್ಠಂ ಪುನರಾಗಮಾ.

೬೫೯. ಉಣ್ಹೇ ಮಜ್ಝನ್ಹಿಕೇ [ಮಜ್ಝನ್ತಿಕೇ (ಸಬ್ಬತ್ಥ)] ಕಾಲೇ, ರಾಜಾ ಪಙ್ಕಂ [ವಙ್ಕಂ (ಕ.)] ಉಪಾಗಮಿ;

ಅದ್ದಸ ಮಗ್ಗಂ ರಮಣೀಯಂ, ಪೇತಾನಂ ತಂ ವಣ್ಣುಪಥಂ [ವಣ್ಣನಾಪಥಂ (ಸೀ. ಸ್ಯಾ.)].

೬೬೦. ಸಾರಥಿಂ ಆಮನ್ತಯೀ ರಾಜಾ –

‘‘ಅಯಂ ಮಗ್ಗೋ ರಮಣೀಯೋ, ಖೇಮೋ ಸೋವತ್ಥಿಕೋ ಸಿವೋ;

ಇಮಿನಾ ಸಾರಥಿ ಯಾಮ, ಸುರಟ್ಠಾನಂ ಸನ್ತಿಕೇ ಇತೋ’’.

೬೬೧. ತೇನ ಪಾಯಾಸಿ ಸೋರಟ್ಠೋ, ಸೇನಾಯ ಚತುರಙ್ಗಿನಿಯಾ;

ಉಬ್ಬಿಗ್ಗರೂಪೋ ಪುರಿಸೋ, ಸೋರಟ್ಠಂ ಏತದಬ್ರವಿ.

೬೬೨. ‘‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಭಿಂಸನಂ ಲೋಮಹಂಸನಂ;

ಪುರತೋ ದಿಸ್ಸತಿ ಮಗ್ಗೋ, ಪಚ್ಛತೋ ಚ ನ ದಿಸ್ಸತಿ.

೬೬೩. ‘‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಯಮಪುರಿಸಾನ ಸನ್ತಿಕೇ;

ಅಮಾನುಸೋ ವಾಯತಿ ಗನ್ಧೋ, ಘೋಸೋ ಸುಯ್ಯತಿ [ಸೂಯತಿ (ಸೀ. ಸ್ಯಾ.)] ದಾರುಣೋ’’.

೬೬೪. ಸಂವಿಗ್ಗೋ ರಾಜಾ ಸೋರಟ್ಠೋ, ಸಾರಥಿಂ ಏತದಬ್ರವಿ;

‘‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಭಿಂಸನಂ ಲೋಮಹಂಸನಂ;

ಪುರತೋ ದಿಸ್ಸತಿ ಮಗ್ಗೋ, ಪಚ್ಛತೋ ಚ ನ ದಿಸ್ಸತಿ.

೬೬೫. ‘‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಯಮಪುರಿಸಾನ ಸನ್ತಿಕೇ;

ಅಮಾನುಸೋ ವಾಯತಿ ಗನ್ಧೋ, ಘೋಸೋ ಸುಯ್ಯತಿ ದಾರುಣೋ’’.

೬೬೬. ಹತ್ಥಿಕ್ಖನ್ಧಂ ಸಮಾರುಯ್ಹ, ಓಲೋಕೇನ್ತೋ ಚತುದ್ದಿಸಂ [ಚತುದ್ದಿಸ್ಸಾ (ಕ.)];

ಅದ್ದಸ ನಿಗ್ರೋಧಂ ರಮಣೀಯಂ [ರುಕ್ಖಂ ನಿಗ್ರೋಧಂ (ಸ್ಯಾ. ಕ.)], ಪಾದಪಂ ಛಾಯಾಸಮ್ಪನ್ನಂ;

ನೀಲಬ್ಭವಣ್ಣಸದಿಸಂ, ಮೇಘವಣ್ಣಸಿರೀನಿಭಂ.

೬೬೭. ಸಾರಥಿಂ ಆಮನ್ತಯೀ ರಾಜಾ, ‘‘ಕಿಂ ಏಸೋ ದಿಸ್ಸತಿ ಬ್ರಹಾ;

ನೀಲಬ್ಭವಣ್ಣಸದಿಸೋ, ಮೇಘವಣ್ಣಸಿರೀನಿಭೋ’’.

೬೬೮. ‘‘ನಿಗ್ರೋಧೋ ಸೋ ಮಹಾರಾಜ, ಪಾದಪೋ ಛಾಯಾಸಮ್ಪನ್ನೋ;

ನೀಲಬ್ಭವಣ್ಣಸದಿಸೋ, ಮೇಘವಣ್ಣಸಿರೀನಿಭೋ’’.

೬೬೯. ತೇನ ಪಾಯಾಸಿ ಸೋರಟ್ಠೋ, ಯೇನ ಸೋ ದಿಸ್ಸತೇ ಬ್ರಹಾ;

ನೀಲಬ್ಭವಣ್ಣಸದಿಸೋ, ಮೇಘವಣ್ಣಸಿರೀನಿಭೋ.

೬೭೦. ಹತ್ಥಿಕ್ಖನ್ಧತೋ ಓರುಯ್ಹ, ರಾಜಾ ರುಕ್ಖಂ ಉಪಾಗಮಿ;

ನಿಸೀದಿ ರುಕ್ಖಮೂಲಸ್ಮಿಂ, ಸಾಮಚ್ಚೋ ಸಪರಿಜ್ಜನೋ;

ಪೂರಂ ಪಾನೀಯಸರಕಂ, ಪೂವೇ ವಿತ್ತೇ ಚ ಅದ್ದಸ.

೬೭೧. ಪುರಿಸೋ ಚ ದೇವವಣ್ಣೀ, ಸಬ್ಬಾಭರಣಭೂಸಿತೋ;

ಉಪಸಙ್ಕಮಿತ್ವಾ ರಾಜಾನಂ, ಸೋರಟ್ಠಂ ಏತದಬ್ರವಿ.

೬೭೨. ‘‘ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;

ಪಿವತು ದೇವೋ ಪಾನೀಯಂ, ಪೂವೇ ಖಾದ ಅರಿನ್ದಮ’’.

೬೭೩. ಪಿವಿತ್ವಾ ರಾಜಾ ಪಾನೀಯಂ, ಸಾಮಚ್ಚೋ ಸಪರಿಜ್ಜನೋ;

ಪೂವೇ ಖಾದಿತ್ವಾ ಪಿತ್ವಾ ಚ, ಸೋರಟ್ಠೋ ಏತದಬ್ರವಿ.

೬೭೪. ‘‘ದೇವತಾ ನುಸಿ ಗನ್ಧಬ್ಬೋ, ಅದು ಸಕ್ಕೋ ಪುರಿನ್ದದೋ;

ಅಜಾನನ್ತಾ ತಂ ಪುಚ್ಛಾಮ, ಕಥಂ ಜಾನೇಮು ತಂ ಮಯ’’ನ್ತಿ.

೬೭೫. ‘‘ನಾಮ್ಹಿ ದೇವೋ ನ ಗನ್ಧಬ್ಬೋ, ನಾಪಿ [ನಮ್ಹಿ (ಕ.)] ಸಕ್ಕೋ ಪುರಿನ್ದದೋ;

ಪೇತೋ ಅಹಂ ಮಹಾರಾಜ, ಸುರಟ್ಠಾ ಇಧ ಮಾಗತೋ’’ತಿ.

೬೭೬. ‘‘ಕಿಂಸೀಲೋ ಕಿಂಸಮಾಚಾರೋ, ಸುರಟ್ಠಸ್ಮಿಂ ಪುರೇ ತುವಂ;

ಕೇನ ತೇ ಬ್ರಹ್ಮಚರಿಯೇನ, ಆನುಭಾವೋ ಅಯಂ ತವಾ’’ತಿ.

೬೭೭. ‘‘ತಂ ಸುಣೋಹಿ ಮಹಾರಾಜ, ಅರಿನ್ದಮ ರಟ್ಠವಡ್ಢನ;

ಅಮಚ್ಚಾ ಪಾರಿಸಜ್ಜಾ ಚ, ಬ್ರಾಹ್ಮಣೋ ಚ ಪುರೋಹಿತೋ.

೬೭೮. ‘‘ಸುರಟ್ಠಸ್ಮಿಂ ಅಹಂ ದೇವ, ಪುರಿಸೋ ಪಾಪಚೇತಸೋ;

ಮಿಚ್ಛಾದಿಟ್ಠಿ ಚ ದುಸ್ಸೀಲೋ, ಕದರಿಯೋ ಪರಿಭಾಸಕೋ.

೬೭೯. ‘‘‘ದದನ್ತಾನಂ ಕರೋನ್ತಾನಂ, ವಾರಯಿಸ್ಸಂ ಬಹುಜ್ಜನಂ;

ಅಞ್ಞೇಸಂ ದದಮಾನಾನಂ, ಅನ್ತರಾಯಕರೋ ಅಹಂ.

೬೮೦. ‘‘‘ವಿಪಾಕೋ ನತ್ಥಿ ದಾನಸ್ಸ, ಸಂಯಮಸ್ಸ ಕುತೋ ಫಲಂ;

ನತ್ಥಿ ಆಚರಿಯೋ ನಾಮ, ಅದನ್ತಂ ಕೋ ದಮೇಸ್ಸತಿ.

೬೮೧. ‘‘‘ಸಮತುಲ್ಯಾನಿ ಭೂತಾನಿ, ಕುತೋ [ಕುಲೇ (ಸ್ಯಾ. ಕ.)] ಜೇಟ್ಠಾಪಚಾಯಿಕೋ;

ನತ್ಥಿ ಬಲಂ ವೀರಿಯಂ ವಾ, ಕುತೋ ಉಟ್ಠಾನಪೋರಿಸಂ.

೬೮೨. ‘‘‘ನತ್ಥಿ ದಾನಫಲಂ ನಾಮ, ನ ವಿಸೋಧೇತಿ ವೇರಿನಂ;

ಲದ್ಧೇಯ್ಯಂ ಲಭತೇ ಮಚ್ಚೋ, ನಿಯತಿಪರಿಣಾಮಜಂ [ಪರಿಣಾಮಜಾ (ಸೀ. ಕ.)].

೬೮೩. ‘‘‘ನತ್ಥಿ ಮಾತಾ ಪಿತಾ ಭಾತಾ, ಲೋಕೋ ನತ್ಥಿ ಇತೋ ಪರಂ;

ನತ್ಥಿ ದಿನ್ನಂ ನತ್ಥಿ ಹುತಂ, ಸುನಿಹಿತಂ ನ ವಿಜ್ಜತಿ.

೬೮೪. ‘‘‘ಯೋಪಿ ಹನೇಯ್ಯ ಪುರಿಸಂ, ಪರಸ್ಸ ಛಿನ್ದತೇ [ಪುರಿಸಸ್ಸ ಛಿನ್ದೇ (ಸ್ಯಾ. ಕ.)] ಸಿರಂ;

ನ ಕೋಚಿ ಕಞ್ಚಿ ಹನತಿ, ಸತ್ತನ್ನಂ ವಿವರಮನ್ತರೇ.

೬೮೫. ‘‘‘ಅಚ್ಛೇಜ್ಜಾಭೇಜ್ಜೋ ಹಿ [ಭೇಜ್ಜೋ (ಸೀ.), ಅಭೇಜ್ಜೋ (ಸ್ಯಾ.), ಭೇಜ್ಜಾಸಿ (ಕ.)] ಜೀವೋ, ಅಟ್ಠಂಸೋ ಗುಳಪರಿಮಣ್ಡಲೋ;

ಯೋಜನಾನಂ ಸತಂ ಪಞ್ಚ, ಕೋ ಜೀವಂ ಛೇತ್ತುಮರಹತಿ.

೬೮೬. ‘‘‘ಯಥಾ ಸುತ್ತಗುಳೇ ಖಿತ್ತೇ, ನಿಬ್ಬೇಠೇನ್ತಂ ಪಲಾಯತಿ;

ಏವಮೇವ ಚ ಸೋ ಜೀವೋ, ನಿಬ್ಬೇಠೇನ್ತೋ ಪಲಾಯತಿ.

೬೮೭. ‘‘‘ಯಥಾ ಗಾಮತೋ ನಿಕ್ಖಮ್ಮ, ಅಞ್ಞಂ ಗಾಮಂ ಪವಿಸತಿ;

ಏವಮೇವ ಚ ಸೋ ಜೀವೋ, ಅಞ್ಞಂ ಬೋನ್ದಿಂ ಪವಿಸತಿ.

೬೮೮. ‘‘‘ಯಥಾ ಗೇಹತೋ ನಿಕ್ಖಮ್ಮ, ಅಞ್ಞಂ ಗೇಹಂ ಪವಿಸತಿ;

ಏವಮೇವ ಚ ಸೋ ಜೀವೋ, ಅಞ್ಞಂ ಬೋನ್ದಿಂ ಪವಿಸತಿ.

೬೮೯. ‘‘‘ಚುಲ್ಲಾಸೀತಿ [ಚುಳಾಸೀತಿ (ಸೀ. ಸ್ಯಾ. ಕ.)] ಮಹಾಕಪ್ಪಿನೋ [ಮಹಾಕಪ್ಪುನೋ (ಸೀ.)], ಸತಸಹಸ್ಸಾನಿ ಹಿ;

ಯೇ ಬಾಲಾ ಯೇ ಚ ಪಣ್ಡಿತಾ, ಸಂಸಾರಂ ಖೇಪಯಿತ್ವಾನ;

ದುಕ್ಖಸ್ಸನ್ತಂ ಕರಿಸ್ಸರೇ.

೬೯೦. ‘‘‘ಮಿತಾನಿ ಸುಖದುಕ್ಖಾನಿ, ದೋಣೇಹಿ ಪಿಟಕೇಹಿ ಚ;

ಜಿನೋ ಸಬ್ಬಂ ಪಜಾನಾತಿ’, ಸಮ್ಮೂಳ್ಹಾ ಇತರಾ ಪಜಾ.

೬೯೧. ‘‘ಏವಂದಿಟ್ಠಿ ಪುರೇ ಆಸಿಂ, ಸಮ್ಮೂಳ್ಹೋ ಮೋಹಪಾರುತೋ;

ಮಿಚ್ಛಾದಿಟ್ಠಿ ಚ ದುಸ್ಸೀಲೋ, ಕದರಿಯೋ ಪರಿಭಾಸಕೋ.

೬೯೨. ‘‘ಓರಂ ಮೇ ಛಹಿ ಮಾಸೇಹಿ, ಕಾಲಙ್ಕಿರಿಯಾ ಭವಿಸ್ಸತಿ;

ಏಕನ್ತಕಟುಕಂ ಘೋರಂ, ನಿರಯಂ ಪಪತಿಸ್ಸಹಂ.

೬೯೩. [ಪೇ. ವ. ೭೦] ‘‘ಚತುಕ್ಕಣ್ಣಂ ಚತುದ್ವಾರಂ, ವಿಭತ್ತಂ ಭಾಗಸೋ ಮಿತಂ;

ಅಯೋಪಾಕಾರಪರಿಯನ್ತಂ, ಅಯಸಾ ಪಟಿಕುಜ್ಜಿತಂ.

೬೯೪. [ಪೇ. ವ. ೭೧] ‘‘ತಸ್ಸ ಅಯೋಮಯಾ ಭೂಮಿ, ಜಲಿತಾ ತೇಜಸಾ ಯುತಾ;

ಸಮನ್ತಾ ಯೋಜನಸತಂ, ಫರಿತ್ವಾ ತಿಟ್ಠತಿ ಸಬ್ಬದಾ.

೬೯೫. ‘‘ವಸ್ಸಾನಿ ಸತಸಹಸ್ಸಾನಿ, ಘೋಸೋ ಸುಯ್ಯತಿ ತಾವದೇ;

ಲಕ್ಖೋ ಏಸೋ ಮಹಾರಾಜ, ಸತಭಾಗವಸ್ಸಕೋಟಿಯೋ.

೬೯೬. ‘‘ಕೋಟಿಸತಸಹಸ್ಸಾನಿ, ನಿರಯೇ ಪಚ್ಚರೇ ಜನಾ;

ಮಿಚ್ಛಾದಿಟ್ಠೀ ಚ ದುಸ್ಸೀಲಾ, ಯೇ ಚ ಅರಿಯೂಪವಾದಿನೋ.

೬೯೭. ‘‘ತತ್ಥಾಹಂ ದೀಘಮದ್ಧಾನಂ, ದುಕ್ಖಂ ವೇದಿಸ್ಸ ವೇದನಂ;

ಫಲಂ ಪಾಪಸ್ಸ ಕಮ್ಮಸ್ಸ, ತಸ್ಮಾ ಸೋಚಾಮಹಂ ಭುಸಂ.

೬೯೮. ‘‘ತಂ ಸುಣೋಹಿ ಮಹಾರಾಜ, ಅರಿನ್ದಮ ರಟ್ಠವಡ್ಢನ;

ಧೀತಾ ಮಯ್ಹಂ ಮಹಾರಾಜ, ಉತ್ತರಾ ಭದ್ದಮತ್ಥು ತೇ.

೬೯೯. ‘‘ಕರೋತಿ ಭದ್ದಕಂ ಕಮ್ಮಂ, ಸೀಲೇಸುಪೋಸಥೇ ರತಾ;

ಸಞ್ಞತಾ ಸಂವಿಭಾಗೀ ಚ, ವದಞ್ಞೂ ವೀತಮಚ್ಛರಾ.

೭೦೦. ‘‘ಅಖಣ್ಡಕಾರೀ ಸಿಕ್ಖಾಯ, ಸುಣ್ಹಾ ಪರಕುಲೇಸು ಚ;

ಉಪಾಸಿಕಾ ಸಕ್ಯಮುನಿನೋ, ಸಮ್ಬುದ್ಧಸ್ಸ ಸಿರೀಮತೋ.

೭೦೧. ‘‘ಭಿಕ್ಖು ಚ ಸೀಲಸಮ್ಪನ್ನೋ, ಗಾಮಂ ಪಿಣ್ಡಾಯ ಪಾವಿಸಿ;

ಓಕ್ಖಿತ್ತಚಕ್ಖು ಸತಿಮಾ, ಗುತ್ತದ್ವಾರೋ ಸುಸಂವುತೋ.

೭೦೨. ‘‘ಸಪದಾನಂ ಚರಮಾನೋ, ಅಗಮಾ ತಂ ನಿವೇಸನಂ;

‘ತಮದ್ದಸ ಮಹಾರಾಜ, ಉತ್ತರಾ ಭದ್ದಮತ್ಥು ತೇ’.

೭೦೩. ‘‘ಪೂರಂ ಪಾನೀಯಸರಕಂ, ಪೂವೇ ವಿತ್ತೇ ಚ ಸಾ ಅದಾ;

‘ಪಿತಾ ಮೇ ಕಾಲಙ್ಕತೋ, ಭನ್ತೇ ತಸ್ಸೇತಂ ಉಪಕಪ್ಪತು’.

೭೦೪. ‘‘ಸಮನನ್ತರಾನುದ್ದಿಟ್ಠೇ, ವಿಪಾಕೋ ಉದಪಜ್ಜಥ;

ಭುಞ್ಜಾಮಿ ಕಾಮಕಾಮೀಹಂ, ರಾಜಾ ವೇಸ್ಸವಣೋ ಯಥಾ.

೭೦೫. ‘‘ತಂ ಸುಣೋಹಿ ಮಹಾರಾಜ, ಅರಿನ್ದಮ ರಟ್ಠವಡ್ಢನ;

ಸದೇವಕಸ್ಸ ಲೋಕಸ್ಸ, ಬುದ್ಧೋ ಅಗ್ಗೋ ಪವುಚ್ಚತಿ;

ತಂ ಬುದ್ಧಂ ಸರಣಂ ಗಚ್ಛ, ಸಪುತ್ತದಾರೋ ಅರಿನ್ದಮ.

೭೦೬. ‘‘ಅಟ್ಠಙ್ಗಿಕೇನ ಮಗ್ಗೇನ, ಫುಸನ್ತಿ ಅಮತಂ ಪದಂ;

ತಂ ಧಮ್ಮಂ ಸರಣಂ ಗಚ್ಛ, ಸಪುತ್ತದಾರೋ ಅರಿನ್ದಮ.

೭೦೭. ‘‘ಚತ್ತಾರೋ ಚ ಪಟಿಪನ್ನಾ [ಮಗ್ಗಪಟಿಪನ್ನಾ (ಸೀ. ಸ್ಯಾ.)], ಚತ್ತಾರೋ ಚ ಫಲೇ ಠಿತಾ;

ಏಸ ಸಙ್ಘೋ ಉಜುಭೂತೋ, ಪಞ್ಞಾಸೀಲಸಮಾಹಿತೋ;

ತಂ ಸಙ್ಘಂ ಸರಣಂ ಗಚ್ಛ, ಸಪುತ್ತದಾರೋ ಅರಿನ್ದಮ.

೭೦೮. ‘‘ಪಾಣಾತಿಪಾತಾ ವಿರಮಸ್ಸು ಖಿಪ್ಪಂ, ಲೋಕೇ ಅದಿನ್ನಂ ಪರಿವಜ್ಜಯಸ್ಸು;

ಅಮಜ್ಜಪೋ ಮಾ ಚ ಮುಸಾ ಅಭಾಣೀ, ಸಕೇನ ದಾರೇನ ಚ ಹೋಹಿ ತುಟ್ಠೋ’’ತಿ.

೭೦೯. ‘‘ಅತ್ಥಕಾಮೋಸಿ ಮೇ ಯಕ್ಖ, ಹಿತಕಾಮೋಸಿ ದೇವತೇ;

ಕರೋಮಿ ತುಯ್ಹಂ ವಚನಂ, ತ್ವಂಸಿ ಆಚರಿಯೋ ಮಮ.

೭೧೦. ‘‘ಉಪೇಮಿ ಸರಣಂ ಬುದ್ಧಂ, ಧಮ್ಮಞ್ಚಾಪಿ ಅನುತ್ತರಂ;

ಸಙ್ಘಞ್ಚ ನರದೇವಸ್ಸ, ಗಚ್ಛಾಮಿ ಸರಣಂ ಅಹಂ.

೭೧೧. ‘‘ಪಾಣಾತಿಪಾತಾ ವಿರಮಾಮಿ ಖಿಪ್ಪಂ, ಲೋಕೇ ಅದಿನ್ನಂ ಪರಿವಜ್ಜಯಾಮಿ;

ಅಮಜ್ಜಪೋ ನೋ ಚ ಮುಸಾ ಭಣಾಮಿ, ಸಕೇನ ದಾರೇನ ಚ ಹೋಮಿ ತುಟ್ಠೋ.

೭೧೨. ‘‘ಓಫುಣಾಮಿ [ಓಪುಣಾಮಿ (ಸೀ.), ಓಫುನಾಮಿ (ಸ್ಯಾ. ಕ.), ಓಪುನಾಮಿ (?)] ಮಹಾವಾತೇ, ನದಿಯಾ ಸೀಘಗಾಮಿಯಾ;

ವಮಾಮಿ ಪಾಪಿಕಂ ದಿಟ್ಠಿಂ, ಬುದ್ಧಾನಂ ಸಾಸನೇ ರತೋ’’.

೭೧೩. ಇದಂ ವತ್ವಾನ ಸೋರಟ್ಠೋ, ವಿರಮಿತ್ವಾ ಪಾಪದಸ್ಸನಾ [ಪಾಪದಸ್ಸನಂ (ಸ್ಯಾ. ಕ.)];

ನಮೋ ಭಗವತೋ ಕತ್ವಾ, ಪಾಮೋಕ್ಖೋ ರಥಮಾರುಹೀತಿ.

ನನ್ದಕಪೇತವತ್ಥು ತತಿಯಂ.