೬. ಸೇರಿಣೀಪೇತವತ್ಥು

೪೬೪. ‘‘ನಗ್ಗಾ ದುಬ್ಬಣ್ಣರೂಪಾಸಿ, ಕಿಸಾ ಧಮನಿಸನ್ಥತಾ;

ಉಪ್ಫಾಸುಲಿಕೇ ಕಿಸಿಕೇ, ಕಾ ನು ತ್ವಂ ಇಧ ತಿಟ್ಠಸೀ’’ತಿ.

೪೬೫. ‘‘ಅಹಂ ಭದನ್ತೇ ಪೇತೀಮ್ಹಿ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’’ತಿ.

೪೬೬. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ಕುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಪೇತಲೋಕಂ ಇತೋ ಗತಾ’’ತಿ.

೪೬೭. ‘‘ಅನಾವಟೇಸು ತಿತ್ಥೇಸು, ವಿಚಿನಿಂ ಅಡ್ಢಮಾಸಕಂ;

ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಾಸಿಮತ್ತನೋ.

೪೬೮. ‘‘ನದಿಂ ಉಪೇಮಿ ತಸಿತಾ, ರಿತ್ತಕಾ ಪರಿವತ್ತತಿ;

ಛಾಯಂ ಉಪೇಮಿ ಉಣ್ಹೇಸು, ಆತಪೋ ಪರಿವತ್ತತಿ.

೪೬೯. ‘‘ಅಗ್ಗಿವಣ್ಣೋ ಚ ಮೇ ವಾತೋ, ಡಹನ್ತೋ ಉಪವಾಯತಿ;

ಏತಞ್ಚ ಭನ್ತೇ ಅರಹಾಮಿ, ಅಞ್ಞಞ್ಚ ಪಾಪಕಂ ತತೋ.

೪೭೦. ‘‘ಗನ್ತ್ವಾನ ಹತ್ಥಿನಿಂ ಪುರಂ, ವಜ್ಜೇಸಿ ಮಯ್ಹ ಮಾತರಂ;

‘ಧೀತಾ ಚ ತೇ ಮಯಾ ದಿಟ್ಠಾ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’.

೪೭೧. ‘‘ಅತ್ಥಿ ಮೇ ಏತ್ಥ ನಿಕ್ಖಿತ್ತಂ, ಅನಕ್ಖಾತಞ್ಚ ತಂ ಮಯಾ;

ಚತ್ತಾರಿಸತಸಹಸ್ಸಾನಿ, ಪಲ್ಲಙ್ಕಸ್ಸ ಚ ಹೇಟ್ಠತೋ.

೪೭೨. ‘‘ತತೋ ಮೇ ದಾನಂ ದದತು, ತಸ್ಸಾ ಚ ಹೋತು ಜೀವಿಕಾ;

ದಾನಂ ದತ್ವಾ ಚ ಮೇ ಮಾತಾ, ದಕ್ಖಿಣಂ ಅನುದಿಚ್ಛತು [ಅನುದಿಸ್ಸತು (ಸೀ. ಪೀ.), ಅನ್ವಾದಿಸ್ಸತು (ಸ್ಯಾ.)];

ತದಾಹಂ ಸುಖಿತಾ ಹೇಸ್ಸಂ, ಸಬ್ಬಕಾಮಸಮಿದ್ಧಿನೀ’’ತಿ.

೪೭೩. ‘‘ಸಾಧೂ’’ತಿ ಸೋ ಪಟಿಸ್ಸುತ್ವಾ, ಗನ್ತ್ವಾನ ಹತ್ಥಿನಿಂ ಪುರಂ;

ಅವೋಚ ತಸ್ಸಾ ಮಾತರಂ –

‘ಧೀತಾ ಚ ತೇ ಮಯಾ ದಿಟ್ಠಾ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’.

೪೭೪. ‘‘ಸಾ ಮಂ ತತ್ಥ ಸಮಾದಪೇಸಿ, ( ) [(ಗನ್ತ್ವಾನ ಹತ್ಥಿನಿಂ ಪುರಂ) (ಸ್ಯಾ. ಕ.)] ವಜ್ಜೇಸಿ ಮಯ್ಹ ಮಾತರಂ;

‘ಧೀತಾ ಚ ತೇ ಮಯಾ ದಿಟ್ಠಾ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’.

೪೭೫. ‘‘ಅತ್ಥಿ ಚ ಮೇ ಏತ್ಥ ನಿಕ್ಖಿತ್ತಂ, ಅನಕ್ಖಾತಞ್ಚ ತಂ ಮಯಾ;

ಚತ್ತಾರಿಸತಸಹಸ್ಸಾನಿ, ಪಲ್ಲಙ್ಕಸ್ಸ ಚ ಹೇಟ್ಠತೋ.

೪೭೬. ‘‘ತತೋ ಮೇ ದಾನಂ ದದತು, ತಸ್ಸಾ ಚ ಹೋತು ಜೀವಿಕಾ;

ದಾನಂ ದತ್ವಾ ಚ ಮೇ ಮಾತಾ, ದಕ್ಖಿಣಂ ಅನುದಿಚ್ಛತು ( ) [(ತತೋ ತುವಂ ದಾನಂ ದೇಹಿ, ತಸ್ಸಾ ದಕ್ಖಿಣಮಾದಿಸೀ) (ಕ.)];

‘ತದಾ ಸಾ ಸುಖಿತಾ ಹೇಸ್ಸಂ, ಸಬ್ಬಕಾಮಸಮಿದ್ಧಿನೀ’’’ತಿ.

೪೭೭. ತತೋ ಹಿ ಸಾ ದಾನಮದಾ, ತಸ್ಸಾ ದಕ್ಖಿಣಮಾದಿಸೀ;

ಪೇತೀ ಚ ಸುಖಿತಾ ಆಸಿ, ತಸ್ಸಾ ಚಾಸಿ ಸುಜೀವಿಕಾತಿ.

ಸೇರಿಣೀಪೇತವತ್ಥು ಛಟ್ಠಂ.