೧೨. ಕಣ್ಣಮುಣ್ಡಪೇತಿವತ್ಥು

೩೪೮. ‘‘ಸೋಣ್ಣಸೋಪಾನಫಲಕಾ, ಸೋಣ್ಣವಾಲುಕಸನ್ಥತಾ;

ತತ್ಥ ಸೋಗನ್ಧಿಯಾ ವಗ್ಗೂ, ಸುಚಿಗನ್ಧಾ ಮನೋರಮಾ.

೩೪೯. ‘‘ನಾನಾರುಕ್ಖೇಹಿ ಸಞ್ಛನ್ನಾ, ನಾನಾಗನ್ಧಸಮೇರಿತಾ;

ನಾನಾಪದುಮಸಞ್ಛನ್ನಾ, ಪುಣ್ಡರೀಕಸಮೋತತಾ [ಸಮೋಹತಾ (ಕ.)].

೩೫೦. ‘‘ಸುರಭಿಂ ಸಮ್ಪವಾಯನ್ತಿ, ಮನುಞ್ಞಾ ಮಾಲುತೇರಿತಾ;

ಹಂಸಕೋಞ್ಚಾಭಿರುದಾ ಚ, ಚಕ್ಕವಕ್ಕಾಭಿಕೂಜಿತಾ.

೩೫೧. ‘‘ನಾನಾದಿಜಗಣಾಕಿಣ್ಣಾ, ನಾನಾಸರಗಣಾಯುತಾ;

ನಾನಾಫಲಧರಾ ರುಕ್ಖಾ, ನಾನಾಪುಪ್ಫಧರಾ ವನಾ.

೩೫೨. ‘‘ನ ಮನುಸ್ಸೇಸು ಈದಿಸಂ, ನಗರಂ ಯಾದಿಸಂ ಇದಂ;

ಪಾಸಾದಾ ಬಹುಕಾ ತುಯ್ಹಂ, ಸೋವಣ್ಣರೂಪಿಯಾಮಯಾ;

ದದ್ದಲ್ಲಮಾನಾ ಆಭೇನ್ತಿ [ಆಭನ್ತಿ (ಕ.)], ಸಮನ್ತಾ ಚತುರೋ ದಿಸಾ.

೩೫೩. ‘‘ಪಞ್ಚ ದಾಸಿಸತಾ ತುಯ್ಹಂ, ಯಾ ತೇಮಾ ಪರಿಚಾರಿಕಾ;

ತಾ [ಕಾ (ಕ.)] ಕಮ್ಬುಕಾಯೂರಧರಾ [ಕಮ್ಬುಕೇಯೂರಧರಾ (ಸೀ.)], ಕಞ್ಚನಾವೇಳಭೂಸಿತಾ.

೩೫೪. ‘‘ಪಲ್ಲಙ್ಕಾ ಬಹುಕಾ ತುಯ್ಹಂ, ಸೋವಣ್ಣರೂಪಿಯಾಮಯಾ;

ಕದಲಿಮಿಗಸಞ್ಛನ್ನಾ [ಕಾದಲಿಮಿಗಸಞ್ಛನ್ನಾ (ಸೀ.)], ಸಜ್ಜಾ ಗೋನಕಸನ್ಥತಾ.

೩೫೫. ‘‘ಯತ್ಥ ತ್ವಂ ವಾಸೂಪಗತಾ, ಸಬ್ಬಕಾಮಸಮಿದ್ಧಿನೀ;

ಸಮ್ಪತ್ತಾಯಡ್ಢರತ್ತಾಯ [… ರತ್ತಿಯಾ (ಕ.)], ತತೋ ಉಟ್ಠಾಯ ಗಚ್ಛಸಿ.

೩೫೬. ‘‘ಉಯ್ಯಾನಭೂಮಿಂ ಗನ್ತ್ವಾನ, ಪೋಕ್ಖರಞ್ಞಾ ಸಮನ್ತತೋ;

ತಸ್ಸಾ ತೀರೇ ತುವಂ ಠಾಸಿ, ಹರಿತೇ ಸದ್ದಲೇ ಸುಭೇ.

೩೫೭. ‘‘ತತೋ ತೇ ಕಣ್ಣಮುಣ್ಡೋ ಸುನಖೋ, ಅಙ್ಗಮಙ್ಗಾನಿ ಖಾದತಿ;

ಯದಾ ಚ ಖಾಯಿತಾ ಆಸಿ, ಅಟ್ಠಿಸಙ್ಖಲಿಕಾ ಕತಾ;

ಓಗಾಹಸಿ ಪೋಕ್ಖರಣಿಂ, ಹೋತಿ ಕಾಯೋ ಯಥಾ ಪುರೇ.

೩೫೮. ‘‘ತತೋ ತ್ವಂ ಅಙ್ಗಪಚ್ಚಙ್ಗೀ [ಅಙ್ಗಪಚ್ಚಙ್ಗಾ (ಕ.)], ಸುಚಾರು ಪಿಯದಸ್ಸನಾ;

ವತ್ಥೇನ ಪಾರುಪಿತ್ವಾನ, ಆಯಾಸಿ ಮಮ ಸನ್ತಿಕಂ.

೩೫೯. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಕಣ್ಣಮುಣ್ಡೋ ಸುನಖೋ ತವಅಙ್ಗಮಙ್ಗಾನಿ ಖಾದತೀ’’ತಿ.

೩೬೦. ‘‘ಕಿಮಿಲಾಯಂ [ಕಿಮ್ಬಿಲಾಯಂ (ಸೀ. ಸ್ಯಾ.)] ಗಹಪತಿ, ಸದ್ಧೋ ಆಸಿ ಉಪಾಸಕೋ;

ತಸ್ಸಾಹಂ ಭರಿಯಾ ಆಸಿಂ, ದುಸ್ಸೀಲಾ ಅತಿಚಾರಿನೀ.

೩೬೧. ‘‘ಸೋ ಮಂ ಅತಿಚರಮಾನಾಯ [ಏವಮಾತಿಚರಮಾನಾಯ (ಸ್ಯಾ. ಪೀ.)], ಸಾಮಿಕೋ ಏತದಬ್ರವಿ;

‘ನೇತಂ ಛನ್ನಂ [ನೇತಂ ಛನ್ನಂ ನ (ಸೀ.), ನೇತಂ ಛನ್ನಂ ನೇತಂ (ಕ.)] ಪತಿರೂಪಂ, ಯಂ ತ್ವಂ ಅತಿಚರಾಸಿ ಮಂ’.

೩೬೨. ‘‘ಸಾಹಂ ಘೋರಞ್ಚ ಸಪಥಂ, ಮುಸಾವಾದಞ್ಚ ಭಾಸಿಸಂ;

‘ನಾಹಂ ತಂ ಅತಿಚರಾಮಿ, ಕಾಯೇನ ಉದ ಚೇತಸಾ.

೩೬೩. ‘‘‘ಸಚಾಹಂ ತಂ ಅತಿಚರಾಮಿ, ಕಾಯೇನ ಉದ ಚೇತಸಾ;

ಕಣ್ಣಮುಣ್ಡೋ ಯಂ ಸುನಖೋ, ಅಙ್ಗಮಙ್ಗಾನಿ ಖಾದತು’.

೩೬೪. ‘‘ತಸ್ಸ ಕಮ್ಮಸ್ಸ ವಿಪಾಕಂ, ಮುಸಾವಾದಸ್ಸ ಚೂಭಯಂ;

ಸತ್ತೇವ ವಸ್ಸಸತಾನಿ, ಅನುಭೂತಂ ಯತೋ ಹಿ ಮೇ;

ಕಣ್ಣಮುಣ್ಡೋ ಚ ಸುನಖೋ, ಅಙ್ಗಮಙ್ಗಾನಿ ಖಾದತಿ.

೩೬೫. ‘‘ತ್ವಞ್ಚ ದೇವ ಬಹುಕಾರೋ, ಅತ್ಥಾಯ ಮೇ ಇಧಾಗತೋ;

ಸುಮುತ್ತಾಹಂ ಕಣ್ಣಮುಣ್ಡಸ್ಸ, ಅಸೋಕಾ ಅಕುತೋಭಯಾ.

೩೬೬. ‘‘ತಾಹಂ ದೇವ ನಮಸ್ಸಾಮಿ, ಯಾಚಾಮಿ ಪಞ್ಜಲೀಕತಾ;

ಭುಞ್ಜ ಅಮಾನುಸೇ ಕಾಮೇ, ರಮ ದೇವ ಮಯಾ ಸಹಾ’’ತಿ.

೩೬೭. ‘‘ಭುತ್ತಾ ಅಮಾನುಸಾ ಕಾಮಾ, ರಮಿತೋಮ್ಹಿ ತಯಾ ಸಹ;

ತಾಹಂ ಸುಭಗೇ ಯಾಚಾಮಿ, ಖಿಪ್ಪಂ ಪಟಿನಯಾಹಿ ಮ’’ನ್ತಿ.

ಕಣ್ಣಮುಣ್ಡಪೇತಿವತ್ಥು ದ್ವಾದಸಮಂ.