೨. ಉಬ್ಬರಿವಗ್ಗೋ

೧. ಸಂಸಾರಮೋಚಕಪೇತಿವತ್ಥು

೯೫. ‘‘ನಗ್ಗಾ ದುಬ್ಬಣ್ಣರೂಪಾಸಿ, ಕಿಸಾ ಧಮನಿಸನ್ಥತಾ;

ಉಪ್ಫಾಸುಲಿಕೇ [ಉಪ್ಪಾಸುಳಿಕೇ (ಕ.)] ಕಿಸಿಕೇ, ಕಾ ನು ತ್ವಂ ಇಧ ತಿಟ್ಠಸೀ’’ತಿ.

೯೬. ‘‘ಅಹಂ ಭದನ್ತೇ ಪೇತೀಮ್ಹಿ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’’ತಿ.

೯೭. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಪೇತಲೋಕಂ ಇತೋ ಗತಾ’’ತಿ.

೯೮. ‘‘ಅನುಕಮ್ಪಕಾ ಮಯ್ಹಂ ನಾಹೇಸುಂ ಭನ್ತೇ, ಪಿತಾ ಚ ಮಾತಾ ಅಥವಾಪಿ ಞಾತಕಾ;

ಯೇ ಮಂ ನಿಯೋಜೇಯ್ಯುಂ ದದಾಹಿ ದಾನಂ, ಪಸನ್ನಚಿತ್ತಾ ಸಮಣಬ್ರಾಹ್ಮಣಾನಂ.

೯೯. ‘‘ಇತೋ ಅಹಂ ವಸ್ಸಸತಾನಿ ಪಞ್ಚ, ಯಂ ಏವರೂಪಾ ವಿಚರಾಮಿ ನಗ್ಗಾ;

ಖುದಾಯ ತಣ್ಹಾಯ ಚ ಖಜ್ಜಮಾನಾ, ಪಾಪಸ್ಸ ಕಮ್ಮಸ್ಸ ಫಲಂ ಮಮೇದಂ.

೧೦೦. ‘‘ವನ್ದಾಮಿ ತಂ ಅಯ್ಯ ಪಸನ್ನಚಿತ್ತಾ, ಅನುಕಮ್ಪ ಮಂ ವೀರ ಮಹಾನುಭಾವ;

ದತ್ವಾ ಚ ಮೇ ಆದಿಸ ಯಂ ಹಿ ಕಿಞ್ಚಿ, ಮೋಚೇಹಿ ಮಂ ದುಗ್ಗತಿಯಾ ಭದನ್ತೇ’’ತಿ.

೧೦೧. ಸಾಧೂತಿ ಸೋ ಪಟಿಸ್ಸುತ್ವಾ, ಸಾರಿಪುತ್ತೋನುಕಮ್ಪಕೋ;

ಭಿಕ್ಖೂನಂ ಆಲೋಪಂ ದತ್ವಾ, ಪಾಣಿಮತ್ತಞ್ಚ ಚೋಳಕಂ;

ಥಾಲಕಸ್ಸ ಚ ಪಾನೀಯಂ, ತಸ್ಸಾ ದಕ್ಖಿಣಮಾದಿಸಿ.

೧೦೨. ಸಮನನ್ತರಾನುದ್ದಿಟ್ಠೇ, ವಿಪಾಕೋ ಉದಪಜ್ಜಥ;

ಭೋಜನಚ್ಛಾದನಪಾನೀಯಂ, ದಕ್ಖಿಣಾಯ ಇದಂ ಫಲಂ.

೧೦೩. ತತೋ ಸುದ್ಧಾ ಸುಚಿವಸನಾ, ಕಾಸಿಕುತ್ತಮಧಾರಿನೀ;

ವಿಚಿತ್ತವತ್ಥಾಭರಣಾ, ಸಾರಿಪುತ್ತಂ ಉಪಸಙ್ಕಮಿ.

೧೦೪. ‘‘ಅಭಿಕ್ಕನ್ತೇನ ವಣ್ಣೇನ, ಯಾ ತ್ವಂ ತಿಟ್ಠಸಿ ದೇವತೇ;

ಓಭಾಸೇನ್ತೀ ದಿಸಾ ಸಬ್ಬಾ, ಓಸಧೀ ವಿಯ ತಾರಕಾ.

೧೦೫. ‘‘ಕೇನ ತೇತಾದಿಸೋ ವಣ್ಣೋ, ಕೇನ ತೇ ಇಧ ಮಿಜ್ಝತಿ;

ಉಪ್ಪಜ್ಜನ್ತಿ ಚ ತೇ ಭೋಗಾ, ಯೇ ಕೇಚಿ ಮನಸೋ ಪಿಯಾ.

೧೦೬. ‘‘ಪುಚ್ಛಾಮಿ ತಂ ದೇವಿ ಮಹಾನುಭಾವೇ, ಮನುಸ್ಸಭೂತಾ ಕಿಮಕಾಸಿ ಪುಞ್ಞಂ;

ಕೇನಾಸಿ ಏವಂ ಜಲಿತಾನುಭಾವಾ, ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೦೭. ‘‘ಉಪ್ಪಣ್ಡುಕಿಂ ಕಿಸಂ ಛಾತಂ, ನಗ್ಗಂ ಸಮ್ಪತಿತಚ್ಛವಿಂ [ಆಪತಿತಚ್ಛವಿಂ (ಸೀ.)];

ಮುನಿ ಕಾರುಣಿಕೋ ಲೋಕೇ, ತಂ ಮಂ ಅದ್ದಕ್ಖಿ ದುಗ್ಗತಂ.

೧೦೮. ‘‘ಭಿಕ್ಖೂನಂ ಆಲೋಪಂ ದತ್ವಾ, ಪಾಣಿಮತ್ತಞ್ಚ ಚೋಳಕಂ;

ಥಾಲಕಸ್ಸ ಚ ಪಾನೀಯಂ, ಮಮ ದಕ್ಖಿಣಮಾದಿಸಿ.

೧೦೯. ‘‘ಆಲೋಪಸ್ಸ ಫಲಂ ಪಸ್ಸ, ಭತ್ತಂ ವಸ್ಸಸತಂ ದಸ;

ಭುಞ್ಜಾಮಿ ಕಾಮಕಾಮಿನೀ, ಅನೇಕರಸಬ್ಯಞ್ಜನಂ.

೧೧೦. ‘‘ಪಾಣಿಮತ್ತಸ್ಸ ಚೋಳಸ್ಸ, ವಿಪಾಕಂ ಪಸ್ಸ ಯಾದಿಸಂ;

ಯಾವತಾ ನನ್ದರಾಜಸ್ಸ, ವಿಜಿತಸ್ಮಿಂ ಪಟಿಚ್ಛದಾ.

೧೧೧. ‘‘ತತೋ ಬಹುತರಾ ಭನ್ತೇ, ವತ್ಥಾನಚ್ಛಾದನಾನಿ ಮೇ;

ಕೋಸೇಯ್ಯಕಮ್ಬಲೀಯಾನಿ, ಖೋಮಕಪ್ಪಾಸಿಕಾನಿ ಚ.

೧೧೨. ‘‘ವಿಪುಲಾ ಚ ಮಹಗ್ಘಾ ಚ, ತೇಪಾಕಾಸೇವಲಮ್ಬರೇ;

ಸಾಹಂ ತಂ ಪರಿದಹಾಮಿ, ಯಂ ಯಂ ಹಿ ಮನಸೋ ಪಿಯಂ.

೧೧೩. ‘‘ಥಾಲಕಸ್ಸ ಚ ಪಾನೀಯಂ, ವಿಪಾಕಂ ಪಸ್ಸ ಯಾದಿಸಂ;

ಗಮ್ಭೀರಾ ಚತುರಸ್ಸಾ ಚ, ಪೋಕ್ಖರಞ್ಞೋ ಸುನಿಮ್ಮಿತಾ.

೧೧೪. ‘‘ಸೇತೋದಕಾ ಸುಪ್ಪತಿತ್ಥಾ, ಸೀತಾ ಅಪ್ಪಟಿಗನ್ಧಿಯಾ;

ಪದುಮುಪ್ಪಲಸಞ್ಛನ್ನಾ, ವಾರಿಕಿಞ್ಜಕ್ಖಪೂರಿತಾ.

೧೧೫. ‘‘ಸಾಹಂ ರಮಾಮಿ ಕೀಳಾಮಿ, ಮೋದಾಮಿ ಅಕುತೋಭಯಾ;

ಮುನಿಂ ಕಾರುಣಿಕಂ ಲೋಕೇ, ಭನ್ತೇ ವನ್ದಿತುಮಾಗತಾ’’ತಿ.

ಸಂಸಾರಮೋಚಕಪೇತಿವತ್ಥು ಪಠಮಂ.

೨. ಸಾರಿಪುತ್ತತ್ಥೇರಮಾತುಪೇತಿವತ್ಥು

೧೧೬. ‘‘ನಗ್ಗಾ ದುಬ್ಬಣ್ಣರೂಪಾಸಿ, ಕಿಸಾ ಧಮನಿಸನ್ಥತಾ;

ಉಪ್ಫಾಸುಲಿಕೇ ಕಿಸಿಕೇ, ಕಾ ನು ತ್ವಂ ಇಧ ತಿಟ್ಠಸಿ’’.

೧೧೭. ‘‘ಅಹಂ ತೇ ಸಕಿಯಾ ಮಾತಾ, ಪುಬ್ಬೇ ಅಞ್ಞಾಸು ಜಾತೀಸು;

ಉಪಪನ್ನಾ ಪೇತ್ತಿವಿಸಯಂ, ಖುಪ್ಪಿಪಾಸಸಮಪ್ಪಿತಾ.

೧೧೮. ‘‘ಛಡ್ಡಿತಂ ಖಿಪಿತಂ ಖೇಳಂ, ಸಿಙ್ಘಾಣಿಕಂ ಸಿಲೇಸುಮಂ;

ವಸಞ್ಚ ಡಯ್ಹಮಾನಾನಂ, ವಿಜಾತಾನಞ್ಚ ಲೋಹಿತಂ.

೧೧೯. ‘‘ವಣಿಕಾನಞ್ಚ ಯಂ ಘಾನ-ಸೀಸಚ್ಛಿನ್ನಾನ ಲೋಹಿತಂ;

ಖುದಾಪರೇತಾ ಭುಞ್ಜಾಮಿ, ಇತ್ಥಿಪುರಿಸನಿಸ್ಸಿತಂ.

೧೨೦. ‘‘ಪುಬ್ಬಲೋಹಿತಂ ಭಕ್ಖಾಮಿ [ಪುಬ್ಬಲೋಹಿತಭಕ್ಖಾಸ್ಮಿ (ಸೀ.)], ಪಸೂನಂ ಮಾನುಸಾನ ಚ;

ಅಲೇಣಾ ಅನಗಾರಾ ಚ, ನೀಲಮಞ್ಚಪರಾಯಣಾ.

೧೨೧. ‘‘ದೇಹಿ ಪುತ್ತಕ ಮೇ ದಾನಂ, ದತ್ವಾ ಅನ್ವಾದಿಸಾಹಿ ಮೇ;

ಅಪ್ಪೇವ ನಾಮ ಮುಚ್ಚೇಯ್ಯಂ, ಪುಬ್ಬಲೋಹಿತಭೋಜನಾ’’ತಿ.

೧೨೨. ಮಾತುಯಾ ವಚನಂ ಸುತ್ವಾ, ಉಪತಿಸ್ಸೋನುಕಮ್ಪಕೋ;

ಆಮನ್ತಯಿ ಮೋಗ್ಗಲ್ಲಾನಂ, ಅನುರುದ್ಧಞ್ಚ ಕಪ್ಪಿನಂ.

೧೨೩. ಚತಸ್ಸೋ ಕುಟಿಯೋ ಕತ್ವಾ, ಸಙ್ಘೇ ಚಾತುದ್ದಿಸೇ ಅದಾ;

ಕುಟಿಯೋ ಅನ್ನಪಾನಞ್ಚ, ಮಾತು ದಕ್ಖಿಣಮಾದಿಸೀ.

೧೨೪. ಸಮನನ್ತರಾನುದ್ದಿಟ್ಠೇ, ವಿಪಾಕೋ ಉದಪಜ್ಜಥ;

ಭೋಜನಂ ಪಾನೀಯಂ ವತ್ಥಂ, ದಕ್ಖಿಣಾಯ ಇದಂ ಫಲಂ.

೧೨೫. ತತೋ ಸುದ್ಧಾ ಸುಚಿವಸನಾ, ಕಾಸಿಕುತ್ತಮಧಾರಿನೀ;

ವಿಚಿತ್ತವತ್ಥಾಭರಣಾ, ಕೋಲಿತಂ ಉಪಸಙ್ಕಮಿ.

೧೨೬. ‘‘ಅಭಿಕ್ಕನ್ತೇನ ವಣ್ಣೇನ, ಯಾ ತ್ವಂ ತಿಟ್ಠಸಿ ದೇವತೇ;

ಓಭಾಸೇನ್ತೀ ದಿಸಾ ಸಬ್ಬಾ, ಓಸಧೀ ವಿಯ ತಾರಕಾ.

೧೨೭. ‘‘ಕೇನ ತೇತಾದಿಸೋ ವಣ್ಣೋ, ಕೇನ ತೇ ಇಧ ಮಿಜ್ಝತಿ;

ಉಪ್ಪಜ್ಜನ್ತಿ ಚ ತೇ ಭೋಗಾ, ಯೇ ಕೇಚಿ ಮನಸೋ ಪಿಯಾ.

೧೨೮. ‘‘ಪುಚ್ಛಾಮಿ ತಂ ದೇವಿ ಮಹಾನುಭಾವೇ, ಮನುಸ್ಸಭೂತಾ ಕಿಮಕಾಸಿ ಪುಞ್ಞಂ;

ಕೇನಾಸಿ ಏವಂ ಜಲಿತಾನುಭಾವಾ, ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೨೯. ‘‘ಸಾರಿಪುತ್ತಸ್ಸಾಹಂ ಮಾತಾ, ಪುಬ್ಬೇ ಅಞ್ಞಾಸು ಜಾತೀಸು;

ಉಪಪನ್ನಾ ಪೇತ್ತಿವಿಸಯಂ, ಖುಪ್ಪಿಪಾಸಸಮಪ್ಪಿತಾ.

೧೩೦. ‘‘ಛಡ್ಡಿತಂ ಖಿಪಿತಂ ಖೇಳಂ, ಸಿಙ್ಘಾಣಿಕಂ ಸಿಲೇಸುಮಂ;

ವಸಞ್ಚ ಡಯ್ಹಮಾನಾನಂ, ವಿಜಾತಾನಞ್ಚ ಲೋಹಿತಂ.

೧೩೧. ‘‘ವಣಿಕಾನಞ್ಚ ಯಂ ಘಾನ-ಸೀಸಚ್ಛಿನ್ನಾನ ಲೋಹಿತಂ;

ಖುದಾಪರೇತಾ ಭುಞ್ಜಾಮಿ, ಇತ್ಥಿಪುರಿಸನಿಸ್ಸಿತಂ.

೧೩೨. ‘‘ಪುಬ್ಬಲೋಹಿತಂ ಭಕ್ಖಿಸ್ಸಂ, ಪಸೂನಂ ಮಾನುಸಾನ ಚ;

ಅಲೇಣಾ ಅನಗಾರಾ ಚ, ನೀಲಮಞ್ಚಪರಾಯಣಾ.

೧೩೩. ‘‘ಸಾರಿಪುತ್ತಸ್ಸ ದಾನೇನ, ಮೋದಾಮಿ ಅಕುತೋಭಯಾ;

ಮುನಿಂ ಕಾರುಣಿಕಂ ಲೋಕೇ, ಭನ್ತೇ ವನ್ದಿತುಮಾಗತಾ’’ತಿ.

ಸಾರಿಪುತ್ತತ್ಥೇರಸ್ಸ ಮಾತುಪೇತಿವತ್ಥು ದುತಿಯಂ.

೩. ಮತ್ತಾಪೇತಿವತ್ಥು

೧೩೪. ‘‘ನಗ್ಗಾ ದುಬ್ಬಣ್ಣರೂಪಾಸಿ, ಕಿಸಾ ಧಮನಿಸನ್ಥತಾ;

ಉಪ್ಫಾಸುಲಿಕೇ ಕಿಸಿಕೇ, ಕಾ ನು ತ್ವಂ ಇಧ ತಿಟ್ಠಸೀ’’ತಿ.

೧೩೫. ‘‘ಅಹಂ ಮತ್ತಾ ತುವಂ ತಿಸ್ಸಾ, ಸಪತ್ತೀ ತೇ ಪುರೇ ಅಹುಂ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’’ತಿ.

೧೩೬. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಪೇತಲೋಕಂ ಇತೋ ಗತಾ’’ತಿ.

೧೩೭. ‘‘ಚಣ್ಡೀ ಚ ಫರುಸಾ ಚಾಸಿಂ, ಇಸ್ಸುಕೀ ಮಚ್ಛರೀ ಸಠಾ [ಸಠೀ (ಸೀ.)];

ತಾಹಂ ದುರುತ್ತಂ ವತ್ವಾನ, ಪೇತಲೋಕಂ ಇತೋ ಗತಾ’’ತಿ.

೧೩೮. ಸಬ್ಬಂ [ಸಚ್ಚಂ (ಕ.)] ಅಹಮ್ಪಿ ಜಾನಾಮಿ, ಯಥಾ ತ್ವಂ ಚಣ್ಡಿಕಾ ಅಹು;

ಅಞ್ಞಞ್ಚ ಖೋ ತಂ ಪುಚ್ಛಾಮಿ, ಕೇನಾಸಿ ಪಂಸುಕುನ್ಥಿತಾ’’ತಿ.

೧೩೯. ‘‘ಸೀಸಂನ್ಹಾತಾ ತುವಂ ಆಸಿ, ಸುಚಿವತ್ಥಾ ಅಲಙ್ಕತಾ;

ಅಹಞ್ಚ ಖೋ [ಖೋ ತಂ (ಸೀ. ಕ.)] ಅಧಿಮತ್ತಂ, ಸಮಲಙ್ಕತತರಾ ತಯಾ.

೧೪೦. ‘‘ತಸ್ಸಾ ಮೇ ಪೇಕ್ಖಮಾನಾಯ, ಸಾಮಿಕೇನ ಸಮನ್ತಯಿ;

ತತೋ ಮೇ ಇಸ್ಸಾ ವಿಪುಲಾ, ಕೋಧೋ ಮೇ ಸಮಜಾಯಥ.

೧೪೧. ‘‘ತತೋ ಪಂಸುಂ ಗಹೇತ್ವಾನ, ಪಂಸುನಾ ತಂ ಹಿ ಓಕಿರಿಂ [ತಂ ವಿಕೀರಿಹಂ (ಸ್ಯಾ. ಕ.)];

ತಸ್ಸ ಕಮ್ಮವಿಪಾಕೇನ, ತೇನಮ್ಹಿ ಪಂಸುಕುನ್ಥಿತಾ’’ತಿ.

೧೪೨. ‘‘ಸಚ್ಚಂ ಅಹಮ್ಪಿ ಜಾನಾಮಿ, ಪಂಸುನಾ ಮಂ ತ್ವಮೋಕಿರಿ;

ಅಞ್ಞಞ್ಚ ಖೋ ತಂ ಪುಚ್ಛಾಮಿ, ಕೇನ ಖಜ್ಜಸಿ ಕಚ್ಛುಯಾ’’ತಿ.

೧೪೩. ‘‘ಭೇಸಜ್ಜಹಾರೀ ಉಭಯೋ, ವನನ್ತಂ ಅಗಮಿಮ್ಹಸೇ;

ತ್ವಞ್ಚ ಭೇಸಜ್ಜಮಾಹರಿ, ಅಹಞ್ಚ ಕಪಿಕಚ್ಛುನೋ.

೧೪೪. ‘‘ತಸ್ಸಾ ತ್ಯಾಜಾನಮಾನಾಯ, ಸೇಯ್ಯಂ ತ್ಯಾಹಂ ಸಮೋಕಿರಿಂ;

ತಸ್ಸ ಕಮ್ಮವಿಪಾಕೇನ, ತೇನ ಖಜ್ಜಾಮಿ ಕಚ್ಛುಯಾ’’ತಿ.

೧೪೫. ‘‘ಸಚ್ಚಂ ಅಹಮ್ಪಿ ಜಾನಾಮಿ, ಸೇಯ್ಯಂ ಮೇ ತ್ವಂ ಸಮೋಕಿರಿ;

ಅಞ್ಞಞ್ಚ ಖೋ ತಂ ಪುಚ್ಛಾಮಿ, ಕೇನಾಸಿ ನಗ್ಗಿಯಾ ತುವ’’ನ್ತಿ.

೧೪೬. ‘‘ಸಹಾಯಾನಂ ಸಮಯೋ ಆಸಿ, ಞಾತೀನಂ ಸಮಿತೀ ಅಹು;

ತ್ವಞ್ಚ ಆಮನ್ತಿತಾ ಆಸಿ, ಸಸಾಮಿನೀ ನೋ ಚ ಖೋ ಅಹಂ.

೧೪೭. ‘‘ತಸ್ಸಾ ತ್ಯಾಜಾನಮಾನಾಯ, ದುಸ್ಸಂ ತ್ಯಾಹಂ ಅಪಾನುದಿಂ;

ತಸ್ಸ ಕಮ್ಮವಿಪಾಕೇನ, ತೇನಮ್ಹಿ ನಗ್ಗಿಯಾ ಅಹ’’ನ್ತಿ.

೧೪೮. ‘‘ಸಚ್ಚಂ ಅಹಮ್ಪಿ ಜಾನಾಮಿ, ದುಸ್ಸಂ ಮೇ ತ್ವಂ ಅಪಾನುದಿ;

ಅಞ್ಞಞ್ಚ ಖೋ ತಂ ಪುಚ್ಛಾಮಿ, ಕೇನಾಸಿ ಗೂಥಗನ್ಧಿನೀ’’ತಿ.

೧೪೯. ‘‘ತವ ಗನ್ಧಞ್ಚ ಮಾಲಞ್ಚ, ಪಚ್ಚಗ್ಘಞ್ಚ ವಿಲೇಪನಂ;

ಗೂಥಕೂಪೇ ಅಧಾರೇಸಿಂ [ಅಧಾರೇಸಿಂ (ಕ.)], ತಂ ಪಾಪಂ ಪಕತಂ ಮಯಾ;

ತಸ್ಸ ಕಮ್ಮವಿಪಾಕೇನ, ತೇನಮ್ಹಿ ಗೂಥಗನ್ಧಿನೀ’’ತಿ.

೧೫೦. ‘‘ಸಚ್ಚಂ ಅಹಮ್ಪಿ ಜಾನಾಮಿ, ತಂ ಪಾಪಂ ಪಕತಂ ತಯಾ;

ಅಞ್ಞಞ್ಚ ಖೋ ತಂ ಪುಚ್ಛಾಮಿ, ಕೇನಾಸಿ ದುಗ್ಗತಾ ತುವ’’ನ್ತಿ.

೧೫೧. ‘‘ಉಭಿನ್ನಂ ಸಮಕಂ ಆಸಿ, ಯಂ ಗೇಹೇ ವಿಜ್ಜತೇ ಧನಂ;

ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಾಸಿಮತ್ತನೋ;

ತಸ್ಸ ಕಮ್ಮವಿಪಾಕೇನ, ತೇನಮ್ಹಿ ದುಗ್ಗತಾ ಅಹಂ.

೧೫೨. ‘‘ತದೇವ ಮಂ ತ್ವಂ ಅವಚ, ‘ಪಾಪಕಮ್ಮಂ ನಿಸೇವಸಿ;

ನ ಹಿ ಪಾಪೇಹಿ ಕಮ್ಮೇಹಿ, ಸುಲಭಾ ಹೋತಿ ಸುಗ್ಗತೀ’’’ತಿ.

೧೫೩. ‘‘ವಾಮತೋ ಮಂ ತ್ವಂ ಪಚ್ಚೇಸಿ, ಅಥೋಪಿ ಮಂ ಉಸೂಯಸಿ;

ಪಸ್ಸ ಪಾಪಾನಂ ಕಮ್ಮಾನಂ, ವಿಪಾಕೋ ಹೋತಿ ಯಾದಿಸೋ.

೧೫೪. ‘‘ತೇ ಘರಾ ತಾ ಚ ದಾಸಿಯೋ [ತೇ ಘರದಾಸಿಯೋ ಆಸುಂ (ಸೀ. ಸ್ಯಾ.), ತೇ ಘರೇ ದಾಸಿಯೋ ಚೇವ (ಕ.)], ತಾನೇವಾಭರಣಾನಿಮೇ;

ತೇ ಅಞ್ಞೇ ಪರಿಚಾರೇನ್ತಿ, ನ ಭೋಗಾ ಹೋನ್ತಿ ಸಸ್ಸತಾ.

೧೫೫. ‘‘ಇದಾನಿ ಭೂತಸ್ಸ ಪಿತಾ, ಆಪಣಾ ಗೇಹಮೇಹಿತಿ;

ಅಪ್ಪೇವ ತೇ ದದೇ ಕಿಞ್ಚಿ, ಮಾ ಸು ತಾವ ಇತೋ ಅಗಾ’’ತಿ.

೧೫೬. ‘‘ನಗ್ಗಾ ದುಬ್ಬಣ್ಣರೂಪಾಮ್ಹಿ, ಕಿಸಾ ಧಮನಿಸನ್ಥತಾ;

ಕೋಪೀನಮೇತಂ ಇತ್ಥೀನಂ, ಮಾ ಮಂ ಭೂತಪಿತಾದ್ದಸಾ’’ತಿ.

೧೫೭. ‘‘ಹನ್ದ ಕಿಂ ವಾ ತ್ಯಾಹಂ [ಕಿಂ ತ್ಯಾಹಂ (ಸೀ. ಸ್ಯಾ.), ಕಿಂ ವತಾಹಂ (ಕ.)] ದಮ್ಮಿ, ಕಿಂ ವಾ ತೇಧ [ಕಿಂ ವಾ ಚ ತೇ (ಸೀ. ಸ್ಯಾ.), ಕಿಂ ವಿಧ ತೇ (ಕ.)] ಕರೋಮಹಂ;

ಯೇನ ತ್ವಂ ಸುಖಿತಾ ಅಸ್ಸ, ಸಬ್ಬಕಾಮಸಮಿದ್ಧಿನೀ’’ತಿ.

೧೫೮. ‘‘ಚತ್ತಾರೋ ಭಿಕ್ಖೂ ಸಙ್ಘತೋ, ಚತ್ತಾರೋ ಪನ ಪುಗ್ಗಲಾ;

ಅಟ್ಠ ಭಿಕ್ಖೂ ಭೋಜಯಿತ್ವಾ, ಮಮ ದಕ್ಖಿಣಮಾದಿಸ;

ತದಾಹಂ ಸುಖಿತಾ ಹೇಸ್ಸಂ, ಸಬ್ಬಕಾಮಸಮಿದ್ಧಿನೀ’’ತಿ.

೧೫೯. ಸಾಧೂತಿ ಸಾ ಪಟಿಸ್ಸುತ್ವಾ, ಭೋಜಯಿತ್ವಾಟ್ಠ ಭಿಕ್ಖವೋ;

ವತ್ಥೇಹಚ್ಛಾದಯಿತ್ವಾನ, ತಸ್ಸಾ ದಕ್ಖಿಣಮಾದಿಸೀ.

೧೬೦. ಸಮನನ್ತರಾನುದ್ದಿಟ್ಠೇ, ವಿಪಾಕೋ ಉದಪಜ್ಜಥ;

ಭೋಜನಚ್ಛಾದನಪಾನೀಯಂ, ದಕ್ಖಿಣಾಯ ಇದಂ ಫಲಂ.

೧೬೧. ತತೋ ಸುದ್ಧಾ ಸುಚಿವಸನಾ, ಕಾಸಿಕುತ್ತಮಧಾರಿನೀ;

ವಿಚಿತ್ತವತ್ಥಾಭರಣಾ, ಸಪತ್ತಿಂ ಉಪಸಙ್ಕಮಿ.

೧೬೨. ‘‘ಅಭಿಕ್ಕನ್ತೇನ ವಣ್ಣೇನ, ಯಾ ತ್ವಂ ತಿಟ್ಠಸಿ ದೇವತೇ;

ಓಭಾಸೇನ್ತೀ ದಿಸಾ ಸಬ್ಬಾ, ಓಸಧೀ ವಿಯ ತಾರಕಾ.

೧೬೩. ‘‘ಕೇನ ತೇತಾದಿಸೋ ವಣ್ಣೋ, ಕೇನ ತೇ ಇಧ ಮಿಜ್ಝತಿ;

ಉಪ್ಪಜ್ಜನ್ತಿ ಚ ತೇ ಭೋಗಾ, ಯೇ ಕೇಚಿ ಮನಸೋ ಪಿಯಾ.

೧೬೪. ‘‘ಪುಚ್ಛಾಮಿ ತಂ ದೇವಿ ಮಹಾನುಭಾವೇ, ಮನುಸ್ಸಭೂತಾ ಕಿಮಕಾಸಿ ಪುಞ್ಞಂ;

ಕೇನಾಸಿ ಏವಂ ಜಲಿತಾನುಭಾವಾ, ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.