೧೦. ಉತ್ತರಮಾತುಪೇತಿವತ್ಥು

೩೩೧. ದಿವಾವಿಹಾರಗತಂ ಭಿಕ್ಖುಂ, ಗಙ್ಗಾತೀರೇ ನಿಸಿನ್ನಕಂ;

ತಂ ಪೇತೀ ಉಪಸಙ್ಕಮ್ಮ, ದುಬ್ಬಣ್ಣಾ ಭೀರುದಸ್ಸನಾ.

೩೩೨. ಕೇಸಾ ಚಸ್ಸಾ ಅತಿದೀಘಾ [ಅಹೂ ದೀಘಾ (ಕ.)], ಯಾವಭೂಮಾವಲಮ್ಬರೇ [ಯಾವ ಭೂಮ್ಯಾ’ವಲಮ್ಬರೇ (?)];

ಕೇಸೇಹಿ ಸಾ ಪಟಿಚ್ಛನ್ನಾ, ಸಮಣಂ ಏತದಬ್ರವಿ.

೩೩೩. ‘‘ಪಞ್ಚಪಣ್ಣಾಸವಸ್ಸಾನಿ, ಯತೋ ಕಾಲಙ್ಕತಾ ಅಹಂ;

ನಾಭಿಜಾನಾಮಿ ಭುತ್ತಂ ವಾ, ಪೀತಂ ವಾ ಪನ ಪಾನಿಯಂ;

ದೇಹಿ ತ್ವಂ ಪಾನಿಯಂ ಭನ್ತೇ, ತಸಿತಾ ಪಾನಿಯಾಯ ಮೇ’’ತಿ.

೩೩೪. ‘‘ಅಯಂ ಸೀತೋದಿಕಾ ಗಙ್ಗಾ, ಹಿಮವನ್ತತೋ [ಹಿಮವನ್ತಾವ (ಕ.)] ಸನ್ದತಿ;

ಪಿವ ಏತ್ತೋ ಗಹೇತ್ವಾನ, ಕಿಂ ಮಂ ಯಾಚಸಿ ಪಾನಿಯ’’ನ್ತಿ.

೩೩೫. ‘‘ಸಚಾಹಂ ಭನ್ತೇ ಗಙ್ಗಾಯ, ಸಯಂ ಗಣ್ಹಾಮಿ ಪಾನಿಯಂ;

ಲೋಹಿತಂ ಮೇ ಪರಿವತ್ತತಿ, ತಸ್ಮಾ ಯಾಚಾಮಿ ಪಾನಿಯ’’ನ್ತಿ.

೩೩೬. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಗಙ್ಗಾ ತೇ ಹೋತಿ ಲೋಹಿತ’’ನ್ತಿ.

೩೩೭. ‘‘ಪುತ್ತೋ ಮೇ ಉತ್ತರೋ ನಾಮ [ಪುತ್ತೋ ಮೇ ಭನ್ತೇ ಉತ್ತರೋ (ಕ.)], ಸದ್ಧೋ ಆಸಿ ಉಪಾಸಕೋ;

ಸೋ ಚ ಮಯ್ಹಂ ಅಕಾಮಾಯ, ಸಮಣಾನಂ ಪವೇಚ್ಛತಿ.

೩೩೮. ‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ತಮಹಂ ಪರಿಭಾಸಾಮಿ, ಮಚ್ಛೇರೇನ ಉಪದ್ದುತಾ.

೩೩೯. ‘‘ಯಂ ತ್ವಂ ಮಯ್ಹಂ ಅಕಾಮಾಯ, ಸಮಣಾನಂ ಪವೇಚ್ಛಸಿ;

ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ.

೩೪೦. ‘‘ಏತಂ ತೇ ಪರಲೋಕಸ್ಮಿಂ, ಲೋಹಿತಂ ಹೋತು ಉತ್ತರ;

ತಸ್ಸ ಕಮ್ಮಸ್ಸ ವಿಪಾಕೇನ, ಗಙ್ಗಾ ಮೇ ಹೋತಿ ಲೋಹಿತ’’ನ್ತಿ.

ಉತ್ತರಮಾತುಪೇತಿವತ್ಥು ದಸಮಂ.