೯. ಮಹಾಪೇಸಕಾರಪೇತಿವತ್ಥು

೫೪. ‘‘ಗೂಥಞ್ಚ ಮುತ್ತಂ ರುಹಿರಞ್ಚ ಪುಬ್ಬಂ, ಪರಿಭುಞ್ಜತಿ ಕಿಸ್ಸ ಅಯಂ ವಿಪಾಕೋ;

ಅಯಂ ನು ಕಿಂ ಕಮ್ಮಮಕಾಸಿ ನಾರೀ, ಯಾ ಸಬ್ಬದಾ ಲೋಹಿತಪುಬ್ಬಭಕ್ಖಾ.

೫೫. ‘‘ನವಾನಿ ವತ್ಥಾನಿ ಸುಭಾನಿ ಚೇವ, ಮುದೂನಿ ಸುದ್ಧಾನಿ ಚ ಲೋಮಸಾನಿ;

ದಿನ್ನಾನಿ ಮಿಸ್ಸಾ ಕಿತಕಾ [ಕಿಟಕಾ (ಕ.)] ಭವನ್ತಿ, ಅಯಂ ನು ಕಿಂ ಕಮ್ಮಮಕಾಸಿ ನಾರೀ’’ತಿ.

೫೬. ‘‘ಭರಿಯಾ ಮಮೇಸಾ ಅಹೂ ಭದನ್ತೇ, ಅದಾಯಿಕಾ ಮಚ್ಛರಿನೀ ಕದರಿಯಾ;

ಸಾ ಮಂ ದದನ್ತಂ ಸಮಣಬ್ರಾಹ್ಮಣಾನಂ, ಅಕ್ಕೋಸತಿ ಚ ಪರಿಭಾಸತಿ ಚ.

೫೭. ‘‘‘ಗೂಥಞ್ಚ ಮುತ್ತಂ ರುಹಿರಞ್ಚ ಪುಬ್ಬಂ, ಪರಿಭುಞ್ಜ ತ್ವಂ ಅಸುಚಿಂ ಸಬ್ಬಕಾಲಂ;

ಏತಂ ತೇ ಪರಲೋಕಸ್ಮಿಂ ಹೋತು, ವತ್ಥಾ ಚ ತೇ ಕಿಟಕಸಮಾ ಭವನ್ತು’;

ಏತಾದಿಸಂ ದುಚ್ಚರಿತಂ ಚರಿತ್ವಾ, ಇಧಾಗತಾ ಚಿರರತ್ತಾಯ ಖಾದತೀ’’ತಿ.

ಮಹಾಪೇಸಕಾರಪೇತಿವತ್ಥು ನವಮಂ.