೧೦. ಖಲ್ಲಾಟಿಯಪೇತಿವತ್ಥು

೫೮. ‘‘ಕಾ ನು ಅನ್ತೋವಿಮಾನಸ್ಮಿಂ, ತಿಟ್ಠನ್ತೀ ನೂಪನಿಕ್ಖಮಿ;

ಉಪನಿಕ್ಖಮಸ್ಸು ಭದ್ದೇ, ಪಸ್ಸಾಮ ತಂ ಬಹಿಟ್ಠಿತ’’ನ್ತಿ.

೫೯. ‘‘ಅಟ್ಟೀಯಾಮಿ ಹರಾಯಾಮಿ, ನಗ್ಗಾ ನಿಕ್ಖಮಿತುಂ ಬಹಿ;

ಕೇಸೇಹಮ್ಹಿ ಪಟಿಚ್ಛನ್ನಾ, ಪುಞ್ಞಂ ಮೇ ಅಪ್ಪಕಂ ಕತ’’ನ್ತಿ.

೬೦. ‘‘ಹನ್ದುತ್ತರೀಯಂ ದದಾಮಿ ತೇ, ಇದಂ ದುಸ್ಸಂ ನಿವಾಸಯ;

ಇದಂ ದುಸ್ಸಂ ನಿವಾಸೇತ್ವಾ, ಏಹಿ ನಿಕ್ಖಮ ಸೋಭನೇ;

ಉಪನಿಕ್ಖಮಸ್ಸು ಭದ್ದೇ, ಪಸ್ಸಾಮ ತಂ ಬಹಿಟ್ಠಿತ’’ನ್ತಿ.

೬೧. ‘‘ಹತ್ಥೇನ ಹತ್ಥೇ ತೇ ದಿನ್ನಂ, ನ ಮಯ್ಹಂ ಉಪಕಪ್ಪತಿ;

ಏಸೇತ್ಥುಪಾಸಕೋ ಸದ್ಧೋ, ಸಮ್ಮಾಸಮ್ಬುದ್ಧಸಾವಕೋ.

೬೨. ‘‘ಏತಂ ಅಚ್ಛಾದಯಿತ್ವಾನ, ಮಮ ದಕ್ಖಿಣಮಾದಿಸ;

ತಥಾಹಂ [ಅಥಾಹಂ (ಸೀ.)] ಸುಖಿತಾ ಹೇಸ್ಸಂ, ಸಬ್ಬಕಾಮಸಮಿದ್ಧಿನೀ’’ತಿ.

೬೩. ತಞ್ಚ ತೇ ನ್ಹಾಪಯಿತ್ವಾನ, ವಿಲಿಮ್ಪೇತ್ವಾನ ವಾಣಿಜಾ;

ವತ್ಥೇಹಚ್ಛಾದಯಿತ್ವಾನ, ತಸ್ಸಾ ದಕ್ಖಿಣಮಾದಿಸುಂ.

೬೪. ಸಮನನ್ತರಾನುದ್ದಿಟ್ಠೇ [ಸಮನನ್ತರಾ ಅನುದ್ದಿಟ್ಠೇ (ಸ್ಯಾ. ಕ.)], ವಿಪಾಕೋ ಉದಪಜ್ಜಥ [ಉಪಪಜ್ಜಥ (ಸೀ. ಸ್ಯಾ.)];

ಭೋಜನಚ್ಛಾದನಪಾನೀಯಂ [ಭೋಜನಚ್ಛಾದನಂ ಪಾನೀಯಂ (ಸ್ಯಾ. ಕ.)], ದಕ್ಖಿಣಾಯ ಇದಂ ಫಲಂ.

೬೫. ತತೋ ಸುದ್ಧಾ ಸುಚಿವಸನಾ, ಕಾಸಿಕುತ್ತಮಧಾರಿನೀ;

ಹಸನ್ತೀ ವಿಮಾನಾ ನಿಕ್ಖಮಿ, ‘ದಕ್ಖಿಣಾಯ ಇದಂ ಫಲ’’’ನ್ತಿ.

೬೬. ‘‘ಸುಚಿತ್ತರೂಪಂ ರುಚಿರಂ, ವಿಮಾನಂ ತೇ ಪಭಾಸತಿ;

ದೇವತೇ ಪುಚ್ಛಿತಾಚಿಕ್ಖ, ಕಿಸ್ಸ ಕಮ್ಮಸ್ಸಿದಂ ಫಲ’’ನ್ತಿ.

೬೭. ‘‘ಭಿಕ್ಖುನೋ ಚರಮಾನಸ್ಸ, ದೋಣಿನಿಮ್ಮಜ್ಜನಿಂ ಅಹಂ;

ಅದಾಸಿಂ ಉಜುಭೂತಸ್ಸ, ವಿಪ್ಪಸನ್ನೇನ ಚೇತಸಾ.

೬೮. ‘‘ತಸ್ಸ ಕಮ್ಮಸ್ಸ ಕುಸಲಸ್ಸ, ವಿಪಾಕಂ ದೀಘಮನ್ತರಂ;

ಅನುಭೋಮಿ ವಿಮಾನಸ್ಮಿಂ, ತಞ್ಚ ದಾನಿ ಪರಿತ್ತಕಂ.

೬೯. ‘‘ಉದ್ಧಂ ಚತೂಹಿ ಮಾಸೇಹಿ, ಕಾಲಂಕಿರಿಯಾ [ಕಾಲಂಕಿರಿಯಾ (ಕ.)] ಭವಿಸ್ಸತಿ;

ಏಕನ್ತಕಟುಕಂ ಘೋರಂ, ನಿರಯಂ ಪಪತಿಸ್ಸಹಂ.

೭೦. [ಮ. ನಿ. ೩.೨೫೦, ೨೬೭; ಅ. ನಿ. ೩.೩೬; ಪೇ. ವ. ೨೪೦, ೬೯೩] ‘‘ಚತುಕ್ಕಣ್ಣಂ ಚತುದ್ವಾರಂ, ವಿಭತ್ತಂ ಭಾಗಸೋ ಮಿತಂ;

ಅಯೋಪಾಕಾರಪರಿಯನ್ತಂ, ಅಯಸಾ ಪಟಿಕುಜ್ಜಿತಂ.

೭೧. ‘‘ತಸ್ಸ ಅಯೋಮಯಾ ಭೂಮಿ, ಜಲಿತಾ ತೇಜಸಾ ಯುತಾ;

ಸಮನ್ತಾ ಯೋಜನಸತಂ, ಫರಿತ್ವಾ ತಿಟ್ಠತಿ ಸಬ್ಬದಾ.

೭೨. ‘‘ತತ್ಥಾಹಂ ದೀಘಮದ್ಧಾನಂ, ದುಕ್ಖಂ ವೇದಿಸ್ಸ ವೇದನಂ;

ಫಲಞ್ಚ ಪಾಪಕಮ್ಮಸ್ಸ, ತಸ್ಮಾ ಸೋಚಾಮಹಂ ಭುಸ’’ನ್ತಿ.

ಖಲ್ಲಾಟಿಯಪೇತಿವತ್ಥು ದಸಮಂ.