೧೧. ನಾಗಪೇತವತ್ಥು

೭೩. ‘‘ಪುರತೋವ [ಪುರತೋ ಚ (ಸ್ಯಾ.)] ಸೇತೇನ ಪಲೇತಿ ಹತ್ಥಿನಾ, ಮಜ್ಝೇ ಪನ ಅಸ್ಸತರೀರಥೇನ;

ಪಚ್ಛಾ ಚ ಕಞ್ಞಾ ಸಿವಿಕಾಯ ನೀಯತಿ, ಓಭಾಸಯನ್ತೀ ದಸ ಸಬ್ಬತೋ [ಸಬ್ಬತೋ (ಕ.)] ದಿಸಾ.

೭೪. ‘‘ತುಮ್ಹೇ ಪನ ಮುಗ್ಗರಹತ್ಥಪಾಣಿನೋ, ರುದಂಮುಖಾ ಛಿನ್ನಪಭಿನ್ನಗತ್ತಾ;

ಮನುಸ್ಸಭೂತಾ ಕಿಮಕತ್ಥ ಪಾಪಂ, ಯೇನಞ್ಞಮಞ್ಞಸ್ಸ ಪಿವಾಥ ಲೋಹಿತ’’ನ್ತಿ.

೭೫. ‘‘ಪುರತೋವ ಯೋ ಗಚ್ಛತಿ ಕುಞ್ಜರೇನ, ಸೇತೇನ ನಾಗೇನ ಚತುಕ್ಕಮೇನ;

ಅಮ್ಹಾಕ ಪುತ್ತೋ ಅಹು ಜೇಟ್ಠಕೋ ಸೋ [ಸೋವ ಜೇಟ್ಠೋ (ಕ.)], ದಾನಾನಿ ದತ್ವಾನ ಸುಖೀ ಪಮೋದತಿ.

೭೬. ‘‘ಯೋ ಸೋ ಮಜ್ಝೇ ಅಸ್ಸತರೀರಥೇನ, ಚತುಬ್ಭಿ ಯುತ್ತೇನ ಸುವಗ್ಗಿತೇನ;

ಅಮ್ಹಾಕ ಪುತ್ತೋ ಅಹು ಮಜ್ಝಿಮೋ ಸೋ, ಅಮಚ್ಛರೀ ದಾನವತೀ ವಿರೋಚತಿ.

೭೭. ‘‘ಯಾ ಸಾ ಚ ಪಚ್ಛಾ ಸಿವಿಕಾಯ ನೀಯತಿ, ನಾರೀ ಸಪಞ್ಞಾ ಮಿಗಮನ್ದಲೋಚನಾ;

ಅಮ್ಹಾಕ ಧೀತಾ ಅಹು ಸಾ ಕನಿಟ್ಠಿಕಾ, ಭಾಗಡ್ಢಭಾಗೇನ ಸುಖೀ ಪಮೋದತಿ.

೭೮. ‘‘ಏತೇ ಚ ದಾನಾನಿ ಅದಂಸು ಪುಬ್ಬೇ, ಪಸನ್ನಚಿತ್ತಾ ಸಮಣಬ್ರಾಹ್ಮಣಾನಂ;

ಮಯಂ ಪನ ಮಚ್ಛರಿನೋ ಅಹುಮ್ಹ, ಪರಿಭಾಸಕಾ ಸಮಣಬ್ರಾಹ್ಮಣಾನಂ;

ಏತೇ ಚ ದತ್ವಾ ಪರಿಚಾರಯನ್ತಿ, ಮಯಞ್ಚ ಸುಸ್ಸಾಮ ನಳೋವ ಛಿನ್ನೋ’’ತಿ [ಖಿತ್ತೋತಿ (ಸೀ.)].

೭೯. ‘‘ಕಿಂ ತುಮ್ಹಾಕಂ ಭೋಜನಂ ಕಿಂ ಸಯಾನಂ, ಕಥಞ್ಚ ಯಾಪೇಥ ಸುಪಾಪಧಮ್ಮಿನೋ;

ಪಹೂತಭೋಗೇಸು ಅನಪ್ಪಕೇಸು, ಸುಖಂ ವಿರಾಧಾಯ [ವಿರಾಗಾಯ (ಸ್ಯಾ. ಕ.)] ದುಕ್ಖಜ್ಜ ಪತ್ತಾ’’ತಿ.

೮೦. ‘‘ಅಞ್ಞಮಞ್ಞಂ ವಧಿತ್ವಾನ, ಪಿವಾಮ ಪುಬ್ಬಲೋಹಿತಂ;

ಬಹುಂ ಪಿತ್ವಾ ನ ಧಾತಾ ಹೋಮ, ನಚ್ಛಾದಿಮ್ಹಸೇ [ನರುಚ್ಚಾದಿಮ್ಹಸೇ (ಕ.)] ಮಯಂ.

೮೧. ‘‘ಇಚ್ಚೇವ ಮಚ್ಚಾ ಪರಿದೇವಯನ್ತಿ, ಅದಾಯಕಾ ಪೇಚ್ಚ [ಮಚ್ಛರಿನೋ (ಕ.)] ಯಮಸ್ಸ ಠಾಯಿನೋ;

ಯೇ ತೇ ವಿದಿಚ್ಚ [ವಿದಿತ್ವಾ (ಸೀ.)] ಅಧಿಗಮ್ಮ ಭೋಗೇ, ನ ಭುಞ್ಜರೇ ನಾಪಿ ಕರೋನ್ತಿ ಪುಞ್ಞಂ.

೮೨. ‘‘ತೇ ಖುಪ್ಪಿಪಾಸೂಪಗತಾ ಪರತ್ಥ, ಪಚ್ಛಾ [ಪೇತಾ (ಸೀ.)] ಚಿರಂ ಝಾಯರೇ ಡಯ್ಹಮಾನಾ;

ಕಮ್ಮಾನಿ ಕತ್ವಾನ ದುಖುದ್ರಾನಿ, ಅನುಭೋನ್ತಿ ದುಕ್ಖಂ ಕಟುಕಪ್ಫಲಾನಿ.

೮೩. ‘‘ಇತ್ತರಂ ಹಿ ಧನಂ ಧಞ್ಞಂ, ಇತ್ತರಂ ಇಧ ಜೀವಿತಂ;

ಇತ್ತರಂ ಇತ್ತರತೋ ಞತ್ವಾ, ದೀಪಂ ಕಯಿರಾಥ ಪಣ್ಡಿತೋ.

೮೪. ‘‘ಯೇ ತೇ ಏವಂ ಪಜಾನನ್ತಿ, ನರಾ ಧಮ್ಮಸ್ಸ ಕೋವಿದಾ;

ತೇ ದಾನೇ ನಪ್ಪಮಜ್ಜನ್ತಿ, ಸುತ್ವಾ ಅರಹತಂ ವಚೋ’’ತಿ.

ನಾಗಪೇತವತ್ಥು ಏಕಾದಸಮಂ.