೬. ಪಞ್ಚಪುತ್ತಖಾದಪೇತಿವತ್ಥು

೨೬. ‘‘ನಗ್ಗಾ ದುಬ್ಬಣ್ಣರೂಪಾಸಿ, ದುಗ್ಗನ್ಧಾ ಪೂತಿ ವಾಯಸಿ;

ಮಕ್ಖಿಕಾಹಿ ಪರಿಕಿಣ್ಣಾ [ಮಕ್ಖಿಕಾಪರಿಕಿಣ್ಣಾ ಚ (ಸೀ.)], ಕಾ ನು ತ್ವಂ ಇಧ ತಿಟ್ಠಸೀ’’ತಿ.

೨೭. ‘‘ಅಹಂ ಭದನ್ತೇ [ಭದ್ದನ್ತೇ (ಕ.)] ಪೇತೀಮ್ಹಿ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ.

೨೮. ‘‘ಕಾಲೇನ ಪಞ್ಚ ಪುತ್ತಾನಿ, ಸಾಯಂ ಪಞ್ಚ ಪುನಾಪರೇ;

ವಿಜಾಯಿತ್ವಾನ ಖಾದಾಮಿ, ತೇಪಿ ನಾ ಹೋನ್ತಿ ಮೇ ಅಲಂ.

೨೯. ‘‘ಪರಿಡಯ್ಹತಿ ಧೂಮಾಯತಿ, ಖುದಾಯ [ಖುದ್ದಾಯ (ಕ.)] ಹದಯಂ ಮಮ;

ಪಾನೀಯಂ ನ ಲಭೇ ಪಾತುಂ, ಪಸ್ಸ ಮಂ ಬ್ಯಸನಂ ಗತ’’ನ್ತಿ.

೩೦. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಪುತ್ತಮಂಸಾನಿ ಖಾದಸೀ’’ತಿ.

೩೧. ‘‘ಸಪತೀ [ಸಪತ್ತೀ (ಸೀ.)] ಮೇ ಗಬ್ಭಿನೀ ಆಸಿ, ತಸ್ಸಾ ಪಾಪಂ ಅಚೇತಯಿಂ;

ಸಾಹಂ ಪದುಟ್ಠಮನಸಾ, ಅಕರಿಂ ಗಬ್ಭಪಾತನಂ.

೩೨. ‘‘ತಸ್ಸಾ ದ್ವೇಮಾಸಿಕೋ ಗಬ್ಭೋ, ಲೋಹಿತಞ್ಞೇವ ಪಗ್ಘರಿ;

ತದಸ್ಸಾ ಮಾತಾ ಕುಪಿತಾ, ಮಯ್ಹಂ ಞಾತೀ ಸಮಾನಯಿ;

ಸಪಥಞ್ಚ ಮಂ ಕಾರೇಸಿ, ಪರಿಭಾಸಾಪಯೀ ಚ ಮಂ.

೩೩. ‘‘ಸಾಹಂ ಘೋರಞ್ಚ ಸಪಥಂ, ಮುಸಾವಾದಂ ಅಭಾಸಿಸಂ;

ಪುತ್ತಮಂಸಾನಿ ಖಾದಾಮಿ, ಸಚೇ ತಂ ಪಕತಂ ಮಯಾ.

೩೪. ‘‘ತಸ್ಸ ಕಮ್ಮಸ್ಸ ವಿಪಾಕೇನ [ವಿಪಾಕಂ (ಸ್ಯಾ. ಕ.)], ಮುಸಾವಾದಸ್ಸ ಚೂಭಯಂ;

ಪುತ್ತಮಂಸಾನಿ ಖಾದಾಮಿ, ಪುಬ್ಬಲೋಹಿತಮಕ್ಖಿತಾ’’ತಿ.

ಪಞ್ಚಪುತ್ತಖಾದಪೇತಿವತ್ಥು [ಪಞ್ಚಪುತ್ತಖಾದಪೇತವತ್ಥು (ಸೀ. ಸ್ಯಾ. ಪೀ.) ಏವಮುಪರಿಪಿ] ಛಟ್ಠಂ.