೭. ಸತ್ತಪುತ್ತಖಾದಪೇತಿವತ್ಥು

೩೫. ‘‘ನಗ್ಗಾ ದುಬ್ಬಣ್ಣರೂಪಾಸಿ, ದುಗ್ಗನ್ಧಾ ಪೂತಿ ವಾಯಸಿ;

ಮಕ್ಖಿಕಾಹಿ ಪರಿಕಿಣ್ಣಾ, ಕಾ ನು ತ್ವಂ ಇಧ ತಿಟ್ಠಸೀ’’ತಿ.

೩೬. ‘‘ಅಹಂ ಭದನ್ತೇ ಪೇತೀಮ್ಹಿ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ.

೩೭. ‘‘ಕಾಲೇನ ಸತ್ತ ಪುತ್ತಾನಿ, ಸಾಯಂ ಸತ್ತ ಪುನಾಪರೇ;

ವಿಜಾಯಿತ್ವಾನ ಖಾದಾಮಿ, ತೇಪಿ ನಾ ಹೋನ್ತಿ ಮೇ ಅಲಂ.

೩೮. ‘‘ಪರಿಡಯ್ಹತಿ ಧೂಮಾಯತಿ, ಖುದಾಯ ಹದಯಂ ಮಮ;

ನಿಬ್ಬುತಿಂ ನಾಧಿಗಚ್ಛಾಮಿ, ಅಗ್ಗಿದಡ್ಢಾವ ಆತಪೇ’’ತಿ.

೩೯. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಪುತ್ತಮಂಸಾನಿ ಖಾದಸೀ’’ತಿ.

೪೦. ‘‘ಅಹೂ ಮಯ್ಹಂ ದುವೇ ಪುತ್ತಾ, ಉಭೋ ಸಮ್ಪತ್ತಯೋಬ್ಬನಾ;

ಸಾಹಂ ಪುತ್ತಬಲೂಪೇತಾ, ಸಾಮಿಕಂ ಅತಿಮಞ್ಞಿಸಂ.

೪೧. ‘‘ತತೋ ಮೇ ಸಾಮಿಕೋ ಕುದ್ಧೋ, ಸಪತ್ತಿಂ ಮಯ್ಹಮಾನಯಿ;

ಸಾ ಚ ಗಬ್ಭಂ ಅಲಭಿತ್ಥ, ತಸ್ಸಾ ಪಾಪಂ ಅಚೇತಯಿಂ.

೪೨. ‘‘ಸಾಹಂ ಪದುಟ್ಠಮನಸಾ, ಅಕರಿಂ ಗಬ್ಭಪಾತನಂ;

ತಸ್ಸಾ ತೇಮಾಸಿಕೋ ಗಬ್ಭೋ, ಪುಬ್ಬಲೋಹಿತಕೋ [ಪುಬ್ಬಲೋಹಿತಕೋ (ಕ.)] ಪತಿ.

೪೩. ‘‘ತದಸ್ಸಾ ಮಾತಾ ಕುಪಿತಾ, ಮಯ್ಹಂ ಞಾತೀ ಸಮಾನಯಿ;

ಸಪಥಞ್ಚ ಮಂ ಕಾರೇಸಿ, ಪರಿಭಾಸಾಪಯೀ ಚ ಮಂ.

೪೪. ‘‘ಸಾಹಂ ಘೋರಞ್ಚ ಸಪಥಂ, ಮುಸಾವಾದಂ ಅಭಾಸಿಸಂ;

‘ಪುತ್ತಮಂಸಾನಿ ಖಾದಾಮಿ, ಸಚೇ ತಂ ಪಕತಂ ಮಯಾ’.

೪೫. ‘‘ತಸ್ಸ ಕಮ್ಮಸ್ಸ ವಿಪಾಕೇನ, ಮುಸಾವಾದಸ್ಸ ಚೂಭಯಂ;

ಪುತ್ತಮಂಸಾನಿ ಖಾದಾಮಿ, ಪುಬ್ಬಲೋಹಿತಮಕ್ಖಿತಾ’’ತಿ.

ಸತ್ತಪುತ್ತಖಾದಪೇತಿವತ್ಥು ಸತ್ತಮಂ.