೧. ಮಹಾಪಞ್ಞಾಕಥಾ

೧. ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ದುಕ್ಖಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅನತ್ತಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ…ಪೇ… ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ?

ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ದುಕ್ಖಾನುಪಸ್ಸನಾ ಭಾವಿತಾ ಬಹುಲೀಕತಾ ನಿಬ್ಬೇಧಿಕಪಞ್ಞಂ ಪರಿಪೂರೇತಿ. ಅನತ್ತಾನುಪಸ್ಸನಾ ಭಾವಿತಾ ಬಹುಲೀಕತಾ ಮಹಾಪಞ್ಞಂ ಪರಿಪೂರೇತಿ. ನಿಬ್ಬಿದಾನುಪಸ್ಸನಾ ಭಾವಿತಾ ಬಹುಲೀಕತಾ ತಿಕ್ಖಪಞ್ಞಂ ಪರಿಪೂರೇತಿ. ವಿರಾಗಾನುಪಸ್ಸನಾ ಭಾವಿತಾ ಬಹುಲೀಕತಾ ವಿಪುಲಪಞ್ಞಂ ಪರಿಪೂರೇತಿ. ನಿರೋಧಾನುಪಸ್ಸನಾ ಭಾವಿತಾ ಬಹುಲೀಕತಾ ಗಮ್ಭೀರಪಞ್ಞಂ ಪರಿಪೂರೇತಿ. ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಅಸಾಮನ್ತಪಞ್ಞಂ [ಅಸ್ಸಾಮನ್ತಪಞ್ಞಂ (ಸ್ಯಾ.)] ಪರಿಪೂರೇತಿ. ಇಮಾ ಸತ್ತ ಪಞ್ಞಾ ಭಾವಿತಾ ಬಹುಲೀಕತಾ ಪಣ್ಡಿಚ್ಚಂ ಪರಿಪೂರೇನ್ತಿ. ಇಮಾ ಅಟ್ಠ ಪಞ್ಞಾ ಭಾವಿತಾ ಬಹುಲೀಕತಾ ಪುಥುಪಞ್ಞಂ ಪರಿಪೂರೇನ್ತಿ. ಇಮಾ ನವ ಪಞ್ಞಾ ಭಾವಿತಾ ಬಹುಲೀಕತಾ ಹಾಸಪಞ್ಞಂ ಪರಿಪೂರೇನ್ತಿ.

ಹಾಸಪಞ್ಞಾ ಪಟಿಭಾನಪಟಿಸಮ್ಭಿದಾ. ತಸ್ಸಾ ಅತ್ಥವವತ್ಥಾನತೋ ಅತ್ಥಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ಧಮ್ಮವವತ್ಥಾನತೋ ಧಮ್ಮಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ನಿರುತ್ತಿವವತ್ಥಾನತೋ ನಿರುತ್ತಿಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ಪಟಿಭಾನವವತ್ಥಾನತೋ ಪಟಿಭಾನಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ತಸ್ಸಿಮಾ ಚತಸ್ಸೋ ಪಟಿಸಮ್ಭಿದಾಯೋ ಅಧಿಗತಾ ಹೋನ್ತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ.

ರೂಪೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ…ಪೇ… ರೂಪೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ರೂಪೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ…ಪೇ… ರೂಪೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಅಸಾಮನ್ತಪಞ್ಞಂ ಪರಿಪೂರೇತಿ. ಇಮಾ ಸತ್ತ ಪಞ್ಞಾ ಭಾವಿತಾ ಬಹುಲೀಕತಾ ಪಣ್ಡಿಚ್ಚಂ ಪರಿಪೂರೇನ್ತಿ. ಇಮಾ ಅಟ್ಠ ಪಞ್ಞಾ ಭಾವಿತಾ ಬಹುಲೀಕತಾ ಪುಥುಪಞ್ಞಂ ಪರಿಪೂರೇನ್ತಿ. ಇಮಾ ನವ ಪಞ್ಞಾ ಭಾವಿತಾ ಬಹುಲೀಕತಾ ಹಾಸಪಞ್ಞಂ ಪರಿಪೂರೇನ್ತಿ.

ಹಾಸಪಞ್ಞಾ ಪಟಿಭಾನಪಟಿಸಮ್ಭಿದಾ. ತಸ್ಸಾ ಅತ್ಥವವತ್ಥಾನತೋ ಅತ್ಥಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ಧಮ್ಮವವತ್ಥಾನತೋ ಧಮ್ಮಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ನಿರುತ್ತಿವವತ್ಥಾನತೋ ನಿರುತ್ತಿಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ಪಟಿಭಾನವವತ್ಥಾನತೋ ಪಟಿಭಾನಪಟಿಸಮ್ಭಿದಾ ಅಧಿಗತಾ ಹೋತಿ, ಸಚ್ಛಿಕತಾ ಫಸ್ಸಿತಾ ಪಞ್ಞಾಯ. ತಸ್ಸಿಮಾ ಚತಸ್ಸೋ ಪಟಿಸಮ್ಭಿದಾಯೋ ಅಧಿಗತಾ ಹೋನ್ತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ.

ವೇದನಾಯ…ಪೇ… ಸಞ್ಞಾಯ… ಸಙ್ಖಾರೇಸು… ವಿಞ್ಞಾಣೇ… ಚಕ್ಖುಸ್ಮಿಂ…ಪೇ… ಜರಾಮರಣೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ…ಪೇ… ಜರಾಮರಣೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಜರಾಮರಣೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ…ಪೇ… ಜರಾಮರಣೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಅಸಾಮನ್ತಪಞ್ಞಂ ಪರಿಪೂರೇತಿ. ಇಮಾ ಸತ್ತ ಪಞ್ಞಾ ಭಾವಿತಾ ಬಹುಲೀಕತಾ ಪಣ್ಡಿಚ್ಚಂ ಪರಿಪೂರೇನ್ತಿ. ಇಮಾ ಅಟ್ಠ ಪಞ್ಞಾ ಭಾವಿತಾ ಬಹುಲೀಕತಾ ಪುಥುಪಞ್ಞಂ ಪರಿಪೂರೇನ್ತಿ. ಇಮಾ ನವ ಪಞ್ಞಾ ಭಾವಿತಾ ಬಹುಲೀಕತಾ ಹಾಸಪಞ್ಞಂ ಪರಿಪೂರೇನ್ತಿ.

೨. ರೂಪೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ರೂಪೇ ದುಕ್ಖಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ದುಕ್ಖಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ರೂಪೇ ಅನತ್ತಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ಅನತ್ತಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ರೂಪೇ ನಿಬ್ಬಿದಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ನಿಬ್ಬಿದಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ರೂಪೇ ವಿರಾಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ವಿರಾಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ರೂಪೇ ನಿರೋಧಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ನಿರೋಧಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ರೂಪೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ?

ರೂಪೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ರೂಪೇ ದುಕ್ಖಾನುಪಸ್ಸನಾ ಭಾವಿತಾ ಬಹುಲೀಕತಾ ನಿಬ್ಬೇಧಿಕಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ದುಕ್ಖಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ರೂಪೇ ಅನತ್ತಾನುಪಸ್ಸನಾ ಭಾವಿತಾ ಬಹುಲೀಕತಾ ಮಹಾಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ಅನತ್ತಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ರೂಪೇ ನಿಬ್ಬಿದಾನುಪಸ್ಸನಾ ಭಾವಿತಾ ಬಹುಲೀಕತಾ ತಿಕ್ಖಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ನಿಬ್ಬಿದಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ರೂಪೇ ವಿರಾಗಾನುಪಸ್ಸನಾ ಭಾವಿತಾ ಬಹುಲೀಕತಾ ವಿಪುಲಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ವಿರಾಗಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ರೂಪೇ ನಿರೋಧಾನುಪಸ್ಸನಾ ಭಾವಿತಾ ಬಹುಲೀಕತಾ ಗಮ್ಭೀರಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ನಿರೋಧಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ರೂಪೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಅಸಾಮನ್ತಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ರೂಪೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ಇಮಾ ಸತ್ತ ಪಞ್ಞಾ ಭಾವಿತಾ ಬಹುಲೀಕತಾ ಪಣ್ಡಿಚ್ಚಂ ಪರಿಪೂರೇನ್ತಿ. ಇಮಾ ಅಟ್ಠ ಪಞ್ಞಾ ಭಾವಿತಾ ಬಹುಲೀಕತಾ ಪುಥುಪಞ್ಞಂ ಪರಿಪೂರೇನ್ತಿ. ಇಮಾ ನವ ಪಞ್ಞಾ ಭಾವಿತಾ ಬಹುಲೀಕತಾ ಹಾಸಪಞ್ಞಂ ಪರಿಪೂರೇನ್ತಿ.

ವೇದನಾಯ…ಪೇ… ಸಞ್ಞಾಯ… ಸಙ್ಖಾರೇಸು… ವಿಞ್ಞಾಣೇ… ಚಕ್ಖುಸ್ಮಿಂ…ಪೇ… ಜರಾಮರಣೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ಜರಾಮರಣೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ…ಪೇ… ಜರಾಮರಣೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಅತೀತಾನಾಗತಪಚ್ಚುಪ್ಪನ್ನೇ ಜರಾಮರಣೇ ಪಟಿನಿಸ್ಸಗ್ಗಾನುಪಸ್ಸನಾ ಭಾವಿತಾ ಬಹುಲೀಕತಾ ಕತಮಂ ಪಞ್ಞಂ ಪರಿಪೂರೇತಿ? ಜರಾಮರಣೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ. ಅತೀತಾನಾಗತಪಚ್ಚುಪ್ಪನ್ನೇ ಜರಾಮರಣೇ ಅನಿಚ್ಚಾನುಪಸ್ಸನಾ ಭಾವಿತಾ ಬಹುಲೀಕತಾ ಜವನಪಞ್ಞಂ ಪರಿಪೂರೇತಿ…ಪೇ… ತಸ್ಸಿಮಾ ಚತಸ್ಸೋ ಪಟಿಸಮ್ಭಿದಾಯೋ ಅಧಿಗತಾ ಹೋನ್ತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ.

೩. ‘‘ಚತ್ತಾರೋಮೇ, ಭಿಕ್ಖವೇ [ಸಂ. ನಿ. ೫.೧೮೫೧], ಧಮ್ಮಾ ಭಾವಿತಾ ಬಹುಲೀಕತಾ ಸೋತಾಪತ್ತಿಫಲಸಚ್ಛಿಕಿರಿಯಾಯ ಸಂವತ್ತನ್ತಿ. ಕತಮೇ ಚತ್ತಾರೋ? ಸಪ್ಪುರಿಸಸಂಸೇವೋ, ಸದ್ಧಮ್ಮಸ್ಸವನಂ, ಯೋನಿಸೋಮನಸಿಕಾರೋ, ಧಮ್ಮಾನುಧಮ್ಮಪಟಿಪತ್ತಿ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಧಮ್ಮಾ ಭಾವಿತಾ ಬಹುಲೀಕತಾ ಸೋತಾಪತ್ತಿಫಲಸಚ್ಛಿಕಿರಿಯಾಯ ಸಂವತ್ತನ್ತಿ.

‘‘ಚತ್ತಾರೋಮೇ, ಭಿಕ್ಖವೇ, ಧಮ್ಮಾ ಭಾವಿತಾ ಬಹುಲೀಕತಾ ಸಕದಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತನ್ತಿ…ಪೇ… ಅನಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತನ್ತಿ…ಪೇ… ಅರಹತ್ತಫಲಸಚ್ಛಿಕಿರಿಯಾಯ ಸಂವತ್ತನ್ತಿ. ಕತಮೇ ಚತ್ತಾರೋ? ಸಪ್ಪುರಿಸಸಂಸೇವೋ, ಸದ್ಧಮ್ಮಸ್ಸವನಂ, ಯೋನಿಸೋಮನಸಿಕಾರೋ, ಧಮ್ಮಾನುಧಮ್ಮಪಟಿಪತ್ತಿ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಧಮ್ಮಾ ಭಾವಿತಾ ಬಹುಲೀಕತಾ ಅರಹತ್ತಮಗ್ಗಫಲಸಚ್ಛಿಕಿರಿಯಾಯ ಸಂವತ್ತನ್ತಿ.

‘‘ಚತ್ತಾರೋಮೇ, ಭಿಕ್ಖವೇ, ಧಮ್ಮಾ ಭಾವಿತಾ ಬಹುಲೀಕತಾ ಪಞ್ಞಾಪಟಿಲಾಭಾಯ ಸಂವತ್ತನ್ತಿ…ಪೇ… ಪಞ್ಞಾಬುದ್ಧಿಯಾ ಸಂವತ್ತನ್ತಿ, ಪಞ್ಞಾವೇಪುಲ್ಲಾಯ ಸಂವತ್ತನ್ತಿ, ಮಹಾಪಞ್ಞತಾಯ ಸಂವತ್ತನ್ತಿ, ಪುಥುಪಞ್ಞತಾಯ ಸಂವತ್ತನ್ತಿ, ವಿಪುಲಪಞ್ಞತಾಯ ಸಂವತ್ತನ್ತಿ, ಗಮ್ಭೀರಪಞ್ಞತಾಯ ಸಂವತ್ತನ್ತಿ, ಅಸಾಮನ್ತಪಞ್ಞತಾಯ [ಅಸ್ಸಾಮನ್ತಪಞ್ಞತಾಯ (ಸ್ಯಾ.) ಸಂ. ನಿ. ೩ ಪಸ್ಸಿತಬ್ಬಾ] ಸಂವತ್ತನ್ತಿ, ಭೂರಿಪಞ್ಞತಾಯ ಸಂವತ್ತನ್ತಿ, ಪಞ್ಞಾಬಾಹುಲ್ಲಾಯ ಸಂವತ್ತನ್ತಿ, ಸೀಘಪಞ್ಞತಾಯ ಸಂವತ್ತನ್ತಿ, ಲಹುಪಞ್ಞತಾಯ ಸಂವತ್ತನ್ತಿ, ಹಾಸಪಞ್ಞತಾಯ ಸಂವತ್ತನ್ತಿ, ಜವನಪಞ್ಞತಾಯ ಸಂವತ್ತನ್ತಿ, ತಿಕ್ಖಪಞ್ಞತಾಯ ಸಂವತ್ತನ್ತಿ, ನಿಬ್ಬೇಧಿಕಪಞ್ಞತಾಯ ಸಂವತ್ತನ್ತಿ. ಕತಮೇ ಚತ್ತಾರೋ? ಸಪ್ಪುರಿಸಸಂಸೇವೋ, ಸದ್ಧಮ್ಮಸ್ಸವನಂ, ಯೋನಿಸೋಮನಸಿಕಾರೋ, ಧಮ್ಮಾನುಧಮ್ಮಪಟಿಪತ್ತಿ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಧಮ್ಮಾ ಭಾವಿತಾ ಬಹುಲೀಕತಾ ಪಞ್ಞಾಪಟಿಲಾಭಾಯ ಸಂವತ್ತನ್ತಿ, ಪಞ್ಞಾಬುದ್ಧಿಯಾ ಸಂವತ್ತನ್ತಿ…ಪೇ… ನಿಬ್ಬೇಧಿಕಪಞ್ಞತಾಯ ಸಂವತ್ತನ್ತಿ’’.

೧. ಸೋಳಸಪಞ್ಞಾನಿದ್ದೇಸೋ

೪. ಪಞ್ಞಾಪಟಿಲಾಭಾಯ ಸಂವತ್ತನ್ತೀತಿ ಕತಮೋ ಪಞ್ಞಾಪಟಿಲಾಭೋ? ಚತುನ್ನಂ ಮಗ್ಗಞಾಣಾನಂ, ಚತುನ್ನಂ ಫಲಞಾಣಾನಂ, ಚತುನ್ನಂ ಪಟಿಸಮ್ಭಿದಾಞಾಣಾನಂ, ಛನ್ನಂ ಅಭಿಞ್ಞಾಞಾಣಾನಂ, ತೇಸತ್ತತೀನಂ ಞಾಣಾನಂ, ಸತ್ತಸತ್ತತೀನಂ ಞಾಣಾನಂ ಲಾಭೋ ಪಟಿಲಾಭೋ ಪತ್ತಿ ಸಮ್ಪತ್ತಿ ಫಸ್ಸನಾ [ಫುಸನಾ (ಕ.)] ಸಚ್ಛಿಕಿರಿಯಾ ಉಪಸಮ್ಪದಾ. ಪಞ್ಞಾಪಟಿಲಾಭಾಯ ಸಂವತ್ತನ್ತೀತಿ – ಅಯಂ ಪಞ್ಞಾ ಪಟಿಲಾಭೋ.

ಪಞ್ಞಾಬುದ್ಧಿಯಾ ಸಂವತ್ತನ್ತೀತಿ ಕತಮಾ ಪಞ್ಞಾಬುದ್ಧಿ? ಸತ್ತನ್ನಞ್ಚ ಸೇಕ್ಖಾನಂ ಪುಥುಜ್ಜನಕಲ್ಯಾಣಕಸ್ಸ ಚ ಪಞ್ಞಾ ವಡ್ಢತಿ, ಅರಹತೋ ಪಞ್ಞಾ ವಡ್ಢತಿ. ವಡ್ಢಿತವಡ್ಢನಾ ಪಞ್ಞಾಬುದ್ಧಿಯಾ ಸಂವತ್ತನ್ತೀತಿ – ಅಯಂ ಪಞ್ಞಾಬುದ್ಧಿ.

ಪಞ್ಞಾವೇಪುಲ್ಲಾಯ ಸಂವತ್ತನ್ತೀತಿ ಕತಮಂ ಪಞ್ಞಾವೇಪುಲ್ಲಂ? ಸತ್ತನ್ನಂ ಸೇಕ್ಖಾನಂ ಪುಥುಜ್ಜನಕಲ್ಯಾಣಕಸ್ಸ ಚ ಪಞ್ಞಾವೇಪುಲ್ಲಂ ಗಚ್ಛತಿ. ಅರಹತೋ ಪಞ್ಞಾ ವೇಪುಲ್ಲಗತಾ ಪಞ್ಞಾವೇಪುಲ್ಲಾಯ ಸಂವತ್ತನ್ತೀತಿ – ಇದಂ ಪಞ್ಞಾವೇಪುಲ್ಲಂ.

ಮಹಾಪಞ್ಞತಾಯ ಸಂವತ್ತನ್ತೀತಿ ಕತಮಾ ಮಹಾಪಞ್ಞಾ? ಮಹನ್ತೇ ಅತ್ಥೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಧಮ್ಮೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾ ನಿರುತ್ತಿಯೋ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾನಿ ಪಟಿಭಾನಾನಿ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಸೀಲಕ್ಖನ್ಧೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಸಮಾಧಿಕ್ಖನ್ಧೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಪಞ್ಞಾಕ್ಖನ್ಧೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ವಿಮುತ್ತಿಕ್ಖನ್ಧೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ವಿಮುತ್ತಿಞಾಣದಸ್ಸನಕ್ಖನ್ಧೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾನಿ ಠಾನಾಟ್ಠಾನಾನಿ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾ ವಿಹಾರಸಮಾಪತ್ತಿಯೋ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾನಿ ಅರಿಯಸಚ್ಚಾನಿ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಸತಿಪಟ್ಠಾನೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಸಮ್ಮಪ್ಪಧಾನೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಇದ್ಧಿಪಾದೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾನಿ ಇನ್ದ್ರಿಯಾನಿ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾನಿ ಬಲಾನಿ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತೇ ಬೋಜ್ಝಙ್ಗೇ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಂ ಅರಿಯಮಗ್ಗಂ [ಮಹನ್ತೇ ಅರಿಯಮಗ್ಗೇ (ಕ.)] ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾನಿ ಸಾಮಞ್ಞಫಲಾನಿ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಾ ಅಭಿಞ್ಞಾಯೋ [ಮಹಾಭಿಞ್ಞಾಯೋ (ಕ.)] ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹನ್ತಂ ಪರಮತ್ಥಂ ನಿಬ್ಬಾನಂ ಪರಿಗ್ಗಣ್ಹಾತೀತಿ – ಮಹಾಪಞ್ಞಾ. ಮಹಾಪಞ್ಞತಾಯ ಸಂವತ್ತನ್ತೀತಿ – ಅಯಂ ಮಹಾಪಞ್ಞಾ.

ಪುಥುಪಞ್ಞತಾಯ ಸಂವತ್ತನ್ತೀತಿ ಕತಮಾ ಪುಥುಪಞ್ಞಾ? ಪುಥುನಾನಾಖನ್ಧೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಧಾತೂಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಆಯತನೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಪಟಿಚ್ಚಸಮುಪ್ಪಾದೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಸುಞ್ಞತಮನುಪಲಬ್ಭೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಅತ್ಥೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಧಮ್ಮೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾನಿರುತ್ತೀಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಪಟಿಭಾನೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಸೀಲಕ್ಖನ್ಧೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಸಮಾಧಿಕ್ಖನ್ಧೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಪಞ್ಞಾಕ್ಖನ್ಧೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾವಿಮುತ್ತಿಕ್ಖನ್ಧೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾವಿಮುತ್ತಿಞಾಣದಸ್ಸನಕ್ಖನ್ಧೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಠಾನಾಟ್ಠಾನೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾವಿಹಾರಸಮಾಪತ್ತೀಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಅರಿಯಸಚ್ಚೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಸತಿಪಟ್ಠಾನೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಸಮ್ಮಪ್ಪಧಾನೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಇದ್ಧಿಪಾದೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಇನ್ದ್ರಿಯೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಬಲೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಬೋಜ್ಝಙ್ಗೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಅರಿಯಮಗ್ಗೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಸಾಮಞ್ಞಫಲೇಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುನಾನಾಅಭಿಞ್ಞಾಸು ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುಜ್ಜನಸಾಧಾರಣೇ ಧಮ್ಮೇ ಅತಿಕ್ಕಮ್ಮ [ಸಮತಿಕ್ಕಮ್ಮ (ಸ್ಯಾ.)] ಪರಮತ್ಥೇ ನಿಬ್ಬಾನೇ ಞಾಣಂ ಪವತ್ತತೀತಿ – ಪುಥುಪಞ್ಞಾ. ಪುಥುಪಞ್ಞತಾಯ ಸಂವತ್ತನ್ತೀತಿ – ಅಯಂ ಪುಥುಪಞ್ಞಾ.

ವಿಪುಲಪಞ್ಞತಾಯ ಸಂವತ್ತನ್ತೀತಿ ಕತಮಾ ವಿಪುಲಪಞ್ಞಾ? ವಿಪುಲೇ ಅತ್ಥೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಧಮ್ಮೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾ ನಿರುತ್ತಿಯೋ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾನಿ ಪಟಿಭಾನಾನಿ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಸೀಲಕ್ಖನ್ಧೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಸಮಾಧಿಕ್ಖನ್ಧೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಪಞ್ಞಾಕ್ಖನ್ಧೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ವಿಮುತ್ತಿಕ್ಖನ್ಧೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ವಿಮುತ್ತಿಞಾಣದಸ್ಸನಕ್ಖನ್ಧೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾನಿ ಠಾನಾಟ್ಠಾನಾನಿ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾ ವಿಹಾರಸಮಾಪತ್ತಿಯೋ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾನಿ ಅರಿಯಸಚ್ಚಾನಿ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಸತಿಪಟ್ಠಾನೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಸಮ್ಮಪ್ಪಧಾನೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಇದ್ಧಿಪಾದೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾನಿ ಇನ್ದ್ರಿಯಾನಿ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾನಿ ಬಲಾನಿ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಬೋಜ್ಝಙ್ಗೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲೇ ಅರಿಯಮಗ್ಗೇ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾನಿ ಸಾಮಞ್ಞಫಲಾನಿ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಾ ಅಭಿಞ್ಞಾಯೋ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಂ ಪರಮತ್ಥಂ ನಿಬ್ಬಾನಂ ಪರಿಗ್ಗಣ್ಹಾತೀತಿ – ವಿಪುಲಪಞ್ಞಾ. ವಿಪುಲಪಞ್ಞತಾಯ ಸಂವತ್ತನ್ತೀತಿ – ಅಯಂ ವಿಪುಲಪಞ್ಞಾ.

ಗಮ್ಭೀರಪಞ್ಞತಾಯ ಸಂವತ್ತನ್ತೀತಿ ಕತಮಾ ಗಮ್ಭೀರಪಞ್ಞಾ? ಗಮ್ಭೀರೇಸು ಖನ್ಧೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರಾಸು ಧಾತೂಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಆಯತನೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಪಟಿಚ್ಚಸಮುಪ್ಪಾದೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಸುಞ್ಞತಮನುಪಲಬ್ಭೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಅತ್ಥೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಧಮ್ಮೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರಾಸು ನಿರುತ್ತೀಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಪಟಿಭಾನೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಸೀಲಕ್ಖನ್ಧೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಸಮಾಧಿಕ್ಖನ್ಧೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಪಞ್ಞಾಕ್ಖನ್ಧೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ವಿಮುತ್ತಿಕ್ಖನ್ಧೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ವಿಮುತ್ತಿಞಾಣದಸ್ಸನಕ್ಖನ್ಧೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಠಾನಾಟ್ಠಾನೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರಾಸು ವಿಹಾರಸಮಾಪತ್ತೀಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಅರಿಯಸಚ್ಚೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಸತಿಪಟ್ಠಾನೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಸಮ್ಮಪ್ಪಧಾನೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಇದ್ಧಿಪಾದೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಇನ್ದ್ರಿಯೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಬಲೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಬೋಜ್ಝಙ್ಗೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಅರಿಯಮಗ್ಗೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇಸು ಸಾಮಞ್ಞಫಲೇಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರಾಸು ಅಭಿಞ್ಞಾಸು ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರೇ ಪರಮತ್ಥೇ ನಿಬ್ಬಾನೇ ಞಾಣಂ ಪವತ್ತತೀತಿ – ಗಮ್ಭೀರಪಞ್ಞಾ. ಗಮ್ಭೀರಪಞ್ಞತಾಯ ಸಂವತ್ತನ್ತೀತಿ – ಅಯಂ ಗಮ್ಭೀರಪಞ್ಞಾ.

ಅಸಾಮನ್ತಪಞ್ಞತಾಯ ಸಂವತ್ತನ್ತೀತಿ ಕತಮಾ ಅಸಾಮನ್ತಪಞ್ಞಾ? ಯಸ್ಸ ಪುಗ್ಗಲಸ್ಸ ಅತ್ಥವವತ್ಥಾನತೋ ಅತ್ಥಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ, ಧಮ್ಮವವತ್ಥಾನತೋ ಧಮ್ಮಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ, ನಿರುತ್ತಿವವತ್ಥಾನತೋ ನಿರುತ್ತಿಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ, ಪಟಿಭಾನವವತ್ಥಾನತೋ ಪಟಿಭಾನಪಟಿಸಮ್ಭಿದಾ ಅಧಿಗತಾ ಹೋತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯ, ತಸ್ಸ ಅತ್ಥೇ ಚ ಧಮ್ಮೇ ಚ ನಿರುತ್ತಿಯಾ ಚ ಪಟಿಭಾನೇ ಚ ನ ಅಞ್ಞೋ ಕೋಚಿ ಸಕ್ಕೋತಿ ಅಭಿಸಮ್ಭವಿತುಂ. ಅನಭಿಸಮ್ಭವನೀಯೋ ಚ ಸೋ ಅಞ್ಞೇಹೀತಿ – ಅಸಾಮನ್ತಪಞ್ಞೋ.

ಪುಥುಜ್ಜನಕಲ್ಯಾಣಕಸ್ಸ ಪಞ್ಞಾ ಅಟ್ಠಮಕಸ್ಸ ಪಞ್ಞಾಯ ದೂರೇ ವಿದೂರೇ ಸುವಿದೂರೇ ನ ಸನ್ತಿಕೇ ನ ಸಾಮನ್ತಾ. ಪುಥುಜ್ಜನಕಲ್ಯಾಣಕಂ ಉಪಾದಾಯ ಅಟ್ಠಮಕೋ ಅಸಾಮನ್ತಪಞ್ಞೋ. ಅಟ್ಠಮಕಸ್ಸ ಪಞ್ಞಾ ಸೋತಾಪನ್ನಸ್ಸ ಪಞ್ಞಾಯ ದೂರೇ ವಿದೂರೇ ಸುವಿದೂರೇ ನ ಸನ್ತಿಕೇ ನ ಸಾಮನ್ತಾ. ಅಟ್ಠಮಕಂ ಉಪಾದಾಯ ಸೋತಾಪನ್ನೋ ಅಸಾಮನ್ತಪಞ್ಞೋ. ಸೋತಾಪನ್ನಸ್ಸ ಪಞ್ಞಾ ಸಕದಾಗಾಮಿಸ್ಸ ಪಞ್ಞಾಯ ದೂರೇ ವಿದೂರೇ ಸುವಿದೂರೇ ನ ಸನ್ತಿಕೇ ನ ಸಾಮನ್ತಾ. ಸೋತಾಪನ್ನಂ ಉಪಾದಾಯ ಸಕದಾಗಾಮಿ ಅಸಾಮನ್ತಪಞ್ಞೋ. ಸಕದಾಗಾಮಿಸ್ಸ ಪಞ್ಞಾ ಅನಾಗಾಮಿಸ್ಸ ಪಞ್ಞಾಯ ದೂರೇ ವಿದೂರೇ ಸುವಿದೂರೇ ನ ಸನ್ತಿಕೇ ನ ಸಾಮನ್ತಾ. ಸಕದಾಗಾಮಿಂ ಉಪಾದಾಯ ಅನಾಗಾಮೀ ಅಸಾಮನ್ತಪಞ್ಞೋ. ಅನಾಗಾಮಿಸ್ಸ ಪಞ್ಞಾ ಅರಹತೋ ಪಞ್ಞಾಯ ದೂರೇ ವಿದೂರೇ ಸುವಿದೂರೇ ನ ಸನ್ತಿಕೇ ನ ಸಾಮನ್ತಾ. ಅನಾಗಾಮಿಂ ಉಪಾದಾಯ ಅರಹಾ ಅಸಾಮನ್ತಪಞ್ಞೋ. ಅರಹತೋ ಪಞ್ಞಾ ಪಚ್ಚೇಕಸಮ್ಬುದ್ಧಸ್ಸ [ಪಚ್ಚೇಕಬುದ್ಧಸ್ಸ (ಸ್ಯಾ. ಕ.) ಅಟ್ಠಕಥಾ ಓಲೋಕೇತಬ್ಬಾ] ಪಞ್ಞಾಯ ದೂರೇ ವಿದೂರೇ ಸುವಿದೂರೇ ನ ಸನ್ತಿಕೇ ನ ಸಾಮನ್ತಾ. ಅರಹನ್ತಂ ಉಪಾದಾಯ ಪಚ್ಚೇಕಬುದ್ಧೋ ಅಸಾಮನ್ತಪಞ್ಞೋ. ಪಚ್ಚೇಕಬುದ್ಧಞ್ಚ ಸದೇವಕಞ್ಚ ಲೋಕಂ ಉಪಾದಾಯ ತಥಾಗತೋ ಅರಹಂ ಸಮ್ಮಾಸಮ್ಬುದ್ಧೋ ಅಗ್ಗೋ ಅಸಾಮನ್ತಪಞ್ಞೋ.

೫. ಪಞ್ಞಾಪಭೇದಕುಸಲೋ ಪಭಿನ್ನಞಾಣೋ ಅಧಿಗತಪ್ಪಟಿಸಮ್ಭಿದೋ ಚತುವೇಸಾರಜ್ಜಪ್ಪತ್ತೋ ದಸಬಲಧಾರೀ ಪುರಿಸಾಸಭೋ ಪುರಿಸಸೀಹೋ ಪುರಿಸನಾಗೋ ಪುರಿಸಾಜಞ್ಞೋ ಪುರಿಸಧೋರಯ್ಹೋ ಅನನ್ತಞಾಣೋ ಅನನ್ತತೇಜೋ ಅನನ್ತಯಸೋ ಅಡ್ಢೋ ಮಹದ್ಧನೋ ಧನವಾ ನೇತಾ ವಿನೇತಾ ಅನುನೇತಾ ಪಞ್ಞಾಪೇತಾ ನಿಜ್ಝಾಪೇತಾ ಪೇಕ್ಖೇತಾ ಪಸಾದೇತಾ. ಸೋ ಹಿ ಭಗವಾ ಅನುಪ್ಪನ್ನಸ್ಸ ಮಗ್ಗಸ್ಸ ಉಪ್ಪಾದೇತಾ, ಅಸಞ್ಜಾತಸ್ಸ ಮಗ್ಗಸ್ಸ ಸಞ್ಜನೇತಾ [ಸಞ್ಜಾನೇತಾ (ಸ್ಯಾ.)], ಅನಕ್ಖಾತಸ್ಸ ಮಗ್ಗಸ್ಸ ಅಕ್ಖಾತಾ, ಮಗ್ಗಞ್ಞೂ ಮಗ್ಗವಿದೂ ಮಗ್ಗಕೋವಿದೋ ಮಗ್ಗಾನುಗಾಮೀ [ಮಗ್ಗಾನುಗಾ (ಸ್ಯಾ.) ಮಹಾನಿ. ೬೯ ಪಸ್ಸಿತಬ್ಬೋ] ಚ ಪನಸ್ಸ ಏತರಹಿ ಸಾವಕಾ ವಿಹರನ್ತಿ ಪಚ್ಛಾ ಸಮನ್ನಾಗತಾ.

ಸೋ ಹಿ ಭಗವಾ ಜಾನಂ ಜಾನಾತಿ, ಪಸ್ಸಂ ಪಸ್ಸತಿ, ಚಕ್ಖುಭೂತೋ ಞಾಣಭೂತೋ ಧಮ್ಮಭೂತೋ ಬ್ರಹ್ಮಭೂತೋ ವತ್ತಾ ಪವತ್ತಾ ಅತ್ಥಸ್ಸ ನಿನ್ನೇತಾ ಅಮತಸ್ಸ ದಾತಾ ಧಮ್ಮಸ್ಸಾಮೀ ತಥಾಗತೋ. ನತ್ಥಿ ತಸ್ಸ ಭಗವತೋ ಅಞ್ಞಾತಂ ಅದಿಟ್ಠಂ ಅವಿದಿತಂ ಅಸಚ್ಛಿಕತಂ ಅಫಸ್ಸಿತಂ ಪಞ್ಞಾಯ. ಅತೀತಂ ಅನಾಗತಂ ಪಚ್ಚುಪ್ಪನ್ನಂ [ಅತೀತಾನಾಗತಪಚ್ಚುಪ್ಪನ್ನಂ (ಸ್ಯಾ.) ಮಹಾನಿ. ೬೯] ಉಪಾದಾಯ ಸಬ್ಬೇ ಧಮ್ಮಾ ಸಬ್ಬಾಕಾರೇನ ಬುದ್ಧಸ್ಸ ಭಗವತೋ ಞಾಣಮುಖೇ ಆಪಾಥಂ ಆಗಚ್ಛನ್ತಿ. ಯಂ ಕಿಞ್ಚಿ ನೇಯ್ಯಂ ನಾಮ ಅತ್ಥಿ ತಂ ಸಬ್ಬಂ ಜಾನಿತಬ್ಬಂ [ಸಬ್ಬಂ ಧಮ್ಮಂ ಜಾನಿತಬ್ಬಂ (ಕ.)]. ಅತ್ತತ್ಥೋ ವಾ ಪರತ್ಥೋ ವಾ ಉಭಯತ್ಥೋ ವಾ ದಿಟ್ಠಧಮ್ಮಿಕೋ ವಾ ಅತ್ಥೋ ಸಮ್ಪರಾಯಿಕೋ ವಾ ಅತ್ಥೋ ಉತ್ತಾನೋ ವಾ ಅತ್ಥೋ ಗಮ್ಭೀರೋ ವಾ ಅತ್ಥೋ ಗೂಳ್ಹೋ ವಾ ಅತ್ಥೋ ಪಟಿಚ್ಛನ್ನೋ ವಾ ಅತ್ಥೋ ನೇಯ್ಯೋ ವಾ ಅತ್ಥೋ ನೀತೋ ವಾ ಅತ್ಥೋ ಅನವಜ್ಜೋ ವಾ ಅತ್ಥೋ ನಿಕ್ಕಿಲೇಸೋ ವಾ ಅತ್ಥೋ ವೋದಾನೋ ವಾ ಅತ್ಥೋ ಪರಮತ್ಥೋ ವಾ ಅತ್ಥೋ, ಸಬ್ಬಂ ತಂ ಅನ್ತೋಬುದ್ಧಞಾಣೇ ಪರಿವತ್ತತಿ.

ಸಬ್ಬಂ ಕಾಯಕಮ್ಮಂ ಬುದ್ಧಸ್ಸ ಭಗವತೋ ಞಾಣಾನುಪರಿವತ್ತಿ. ಸಬ್ಬಂ ವಚೀಕಮ್ಮಂ ಬುದ್ಧಸ್ಸ ಭಗವತೋ ಞಾಣಾನುಪರಿವತ್ತಿ. ಸಬ್ಬಂ ಮನೋಕಮ್ಮಂ ಬುದ್ಧಸ್ಸ ಭಗವತೋ ಞಾಣಾನುಪರಿವತ್ತಿ. ಅತೀತೇ ಬುದ್ಧಸ್ಸ ಭಗವತೋ ಅಪ್ಪಟಿಹತಂ ಞಾಣಂ. ಅನಾಗತೇ ಬುದ್ಧಸ್ಸ ಭಗವತೋ ಅಪ್ಪಟಿಹತಂ ಞಾಣಂ. ಪಚ್ಚುಪ್ಪನ್ನೇ ಬುದ್ಧಸ್ಸ ಭಗವತೋ ಅಪ್ಪಟಿಹತಂ ಞಾಣಂ. ಯಾವತಕಂ ನೇಯ್ಯಂ ತಾವತಕಂ ಞಾಣಂ, ಯಾವತಕಂ ಞಾಣಂ ತಾವತಕಂ ನೇಯ್ಯಂ. ನೇಯ್ಯಪರಿಯನ್ತಿಕಂ ಞಾಣಂ, ಞಾಣಪರಿಯನ್ತಿಕಂ ನೇಯ್ಯಂ. ನೇಯ್ಯಂ ಅತಿಕ್ಕಮಿತ್ವಾ ಞಾಣಂ ನಪ್ಪವತ್ತತಿ. ಞಾಣಂ ಅತಿಕ್ಕಮಿತ್ವಾ ನೇಯ್ಯಪಥೋ ನತ್ಥಿ. ಅಞ್ಞಮಞ್ಞಪರಿಯನ್ತಟ್ಠಾಯಿನೋ ತೇ ಧಮ್ಮಾ. ಯಥಾ ದ್ವಿನ್ನಂ ಸಮುಗ್ಗಪಟಲಾನಂ ಸಮ್ಮಾ ಫುಸಿತಾನಂ [ಸುಫುಸ್ಸಿತಾನಂ (ಸ್ಯಾ. ಕ.)] ಹೇಟ್ಠಿಮಂ ಸಮುಗ್ಗಪಟಲಂ ಉಪರಿಮಂ ನಾತಿವತ್ತತಿ, ಉಪರಿಮಂ ಸಮುಗ್ಗಪಟಲಂ ಹೇಟ್ಠಿಮಂ ನಾತಿವತ್ತತಿ, ಅಞ್ಞಮಞ್ಞಪರಿಯನ್ತಟ್ಠಾಯಿನೋ; ಏವಮೇವ ಬುದ್ಧಸ್ಸ ಭಗವತೋ ನೇಯ್ಯಞ್ಚ ಞಾಣಞ್ಚ ಅಞ್ಞಮಞ್ಞಪರಿಯನ್ತಟ್ಠಾಯಿನೋ. ಯಾವತಕಂ ನೇಯ್ಯಂ ತಾವತಕಂ ಞಾಣಂ, ಯಾವತಕಂ ಞಾಣಂ ತಾವತಕಂ ನೇಯ್ಯಂ. ನೇಯ್ಯಪರಿಯನ್ತಿಕಂ ಞಾಣಂ, ಞಾಣಪರಿಯನ್ತಿಕಂ ನೇಯ್ಯಂ. ನೇಯ್ಯಂ ಅತಿಕ್ಕಮಿತ್ವಾ ಞಾಣಂ ನಪ್ಪವತ್ತತಿ. ಞಾಣಂ ಅತಿಕ್ಕಮಿತ್ವಾ ನೇಯ್ಯಪಥೋ ನತ್ಥಿ. ಅಞ್ಞಮಞ್ಞಪರಿಯನ್ತಟ್ಠಾಯಿನೋ ತೇ ಧಮ್ಮಾ. ಸಬ್ಬಧಮ್ಮೇಸು ಬುದ್ಧಸ್ಸ ಭಗವತೋ ಞಾಣಂ ಪವತ್ತತಿ.

ಸಬ್ಬೇ ಧಮ್ಮಾ ಬುದ್ಧಸ್ಸ ಭಗವತೋ ಆವಜ್ಜನಪ್ಪಟಿಬದ್ಧಾ ಆಕಙ್ಖಪ್ಪಟಿಬದ್ಧಾ ಮನಸಿಕಾರಪ್ಪಟಿಬದ್ಧಾ ಚಿತ್ತುಪ್ಪಾದಪ್ಪಟಿಬದ್ಧಾ. ಸಬ್ಬಸತ್ತೇಸು ಬುದ್ಧಸ್ಸ ಭಗವತೋ ಞಾಣಂ ಪವತ್ತತಿ. ಸಬ್ಬೇಸಂ ಸತ್ತಾನಂ ಬುದ್ಧೋ ಆಸಯಂ ಜಾನಾತಿ, ಅನುಸಯಂ ಜಾನಾತಿ, ಚರಿತಂ [ಚರಿಯಂ (ಸ್ಯಾ.) ಮಹಾನಿ. ೬೯ ಪಸ್ಸಿತಬ್ಬಾ] ಜಾನಾತಿ, ಅಧಿಮುತ್ತಿಂ ಜಾನಾತಿ. ಅಪ್ಪರಜಕ್ಖೇ ಮಹಾರಜಕ್ಖೇ ತಿಕ್ಖಿನ್ದ್ರಿಯೇ ಮುದಿನ್ದ್ರಿಯೇ ಸ್ವಾಕಾರೇ ದ್ವಾಕಾರೇ ಸುವಿಞ್ಞಾಪಯೇ ದುವಿಞ್ಞಾಪಯೇ ಭಬ್ಬಾಭಬ್ಬೇ ಸತ್ತೇ ಪಜಾನಾತಿ. ಸದೇವಕೋ ಲೋಕೋ ಸಮಾರಕೋ ಸಬ್ರಹ್ಮಕೋ ಸಸ್ಸಮಣಬ್ರಾಹ್ಮಣೀ ಪಜಾ ಸದೇವಮನುಸ್ಸಾ ಅನ್ತೋಬುದ್ಧಞಾಣೇ ಪರಿವತ್ತತಿ.

ಯಥಾ ಯೇ ಕೇಚಿ ಮಚ್ಛಕಚ್ಛಪಾ, ಅನ್ತಮಸೋ ತಿಮಿತಿಮಿಙ್ಗಲಂ ಉಪಾದಾಯ, ಅನ್ತೋಮಹಾಸಮುದ್ದೇ ಪರಿವತ್ತನ್ತಿ, ಏವಮೇವಂ ಸದೇವಕೋ ಲೋಕೋ ಸಮಾರಕೋ ಸಬ್ರಹ್ಮಕೋ ಸಸ್ಸಮಣಬ್ರಾಹ್ಮಣೀ ಪಜಾ ಸದೇವಮನುಸ್ಸಾ ಅನ್ತೋಬುದ್ಧಞಾಣೇ ಪರಿವತ್ತತಿ. ಯಥಾ ಯೇ ಕೇಚಿ ಪಕ್ಖಿನೋ, ಅನ್ತಮಸೋ ಗರುಳಂ ವೇನತೇಯ್ಯಂ ಉಪಾದಾಯ, ಆಕಾಸಸ್ಸ ಪದೇಸೇ ಪರಿವತ್ತನ್ತಿ; ಏವಮೇವ ಯೇಪಿ ತೇ ಸಾರಿಪುತ್ತಸಮಾ ಪಞ್ಞಾಯ ತೇಪಿ ಬುದ್ಧಞಾಣಸ್ಸ ಪದೇಸೇ ಪರಿವತ್ತನ್ತಿ. ಬುದ್ಧಞಾಣಂ ದೇವಮನುಸ್ಸಾನಂ ಪಞ್ಞಂ ಫರಿತ್ವಾ ಅತಿಘಂಸಿತ್ವಾ ತಿಟ್ಠತಿ. ಯೇಪಿ ತೇ ಖತ್ತಿಯಪಣ್ಡಿತಾ ಬ್ರಾಹ್ಮಣಪಣ್ಡಿತಾ ಗಹಪತಿಪಣ್ಡಿತಾ ಸಮಣಪಣ್ಡಿತಾ ನಿಪುಣಾ ಕತಪರಪ್ಪವಾದಾ ವಾಲವೇಧಿರೂಪಾ ವೋಭಿನ್ದನ್ತಾ [ತೇ ಭಿನ್ದನ್ತಾ (ಸ್ಯಾ. ಕ.)] ಮಞ್ಞೇ ಚರನ್ತಿ ಪಞ್ಞಾಗತೇನ ದಿಟ್ಠಿಗತಾನಿ, ತೇ ಪಞ್ಹಂ ಅಭಿಸಙ್ಖರಿತ್ವಾ ಅಭಿಸಙ್ಖರಿತ್ವಾ ತಥಾಗತಂ ಉಪಸಙ್ಕಮಿತ್ವಾ ಪುಚ್ಛನ್ತಿ ಗೂಳ್ಹಾನಿ ಚ ಪಟಿಚ್ಛನ್ನಾನಿ ಚ, ಕಥಿತಾ ವಿಸಜ್ಜಿತಾ ಚ ತೇ ಪಞ್ಹಾ ಭಗವತಾ ಹೋನ್ತಿ ನಿದ್ದಿಟ್ಠಕಾರಣಾ [ನಿದ್ದಿಟ್ಠಿಕಾರಣಾ (ಸ್ಯಾ.)]. ಉಪಕ್ಖಿತ್ತಕಾ ಚ ತೇ ಭಗವತೋ ಸಮ್ಪಜ್ಜನ್ತಿ. ಅಥ ಖೋ ಭಗವಾ ತತ್ಥ ಅತಿರೋಚತಿ ಯದಿದಂ ಪಞ್ಞಾಯಾತಿ. ಅಗ್ಗೋ ಅಸಾಮನ್ತಪಞ್ಞೋ, ಅಸಾಮನ್ತಪಞ್ಞತಾಯ ಸಂವತ್ತನ್ತೀತಿ – ಅಯಂ ಅಸಾಮನ್ತಪಞ್ಞಾ.

೬. ಭೂರಿಪಞ್ಞತಾಯ ಸಂವತ್ತನ್ತೀತಿ ಕತಮಾ ಭೂರಿಪಞ್ಞಾ? ರಾಗಂ ಅಭಿಭುಯ್ಯತೀತಿ – ಭೂರಿಪಞ್ಞಾ. ಅಭಿಭವಿತಾತಿ – ಭೂರಿಪಞ್ಞಾ. ದೋಸಂ ಅಭಿಭುಯ್ಯತೀತಿ – ಭೂರಿಪಞ್ಞಾ. ಅಭಿಭವಿತಾತಿ – ಭೂರಿಪಞ್ಞಾ. ಮೋಹಂ ಅಭಿಭುಯ್ಯತೀತಿ – ಭೂರಿಪಞ್ಞಾ. ಅಭಿಭವಿತಾತಿ – ಭೂರಿಪಞ್ಞಾ. ಕೋಧಂ…ಪೇ… ಉಪನಾಹಂ … ಮಕ್ಖಂ… ಪಳಾಸಂ… ಇಸ್ಸಂ… ಮಚ್ಛರಿಯಂ… ಮಾಯಂ… ಸಾಠೇಯ್ಯಂ… ಥಮ್ಭಂ… ಸಾರಮ್ಭಂ… ಮಾನಂ… ಅತಿಮಾನಂ… ಮದಂ… ಪಮಾದಂ… ಸಬ್ಬೇ ಕಿಲೇಸೇ… ಸಬ್ಬೇ ದುಚ್ಚರಿತೇ… ಸಬ್ಬೇ ಅಭಿಸಙ್ಖಾರೇ…ಪೇ… ಸಬ್ಬೇ ಭವಗಾಮಿಕಮ್ಮೇ ಅಭಿಭುಯ್ಯತೀತಿ – ಭೂರಿಪಞ್ಞಾ. ಅಭಿಭವಿತಾತಿ – ಭೂರಿಪಞ್ಞಾ. ರಾಗೋ ಅರಿ. ತಂ ಅರಿಂ ಮದ್ದನಿಪಞ್ಞಾತಿ – ಭೂರಿಪಞ್ಞಾ. ದೋಸೋ ಅರಿ. ತಂ ಅರಿಂ ಮದ್ದನಿಪಞ್ಞಾತಿ – ಭೂರಿಪಞ್ಞಾ. ಮೋಹೋ ಅರಿ. ತಂ ಅರಿಂ ಮದ್ದನಿಪಞ್ಞಾತಿ – ಭೂರಿಪಞ್ಞಾ. ಕೋಧೋ…ಪೇ… ಉಪನಾಹೋ… ಮಕ್ಖೋ… ಪಳಾಸೋ… ಇಸ್ಸಾ… ಮಚ್ಛರಿಯಂ… ಮಾಯಾ… ಸಾಠೇಯ್ಯಂ… ಥಮ್ಭೋ… ಸಾರಮ್ಭೋ… ಮಾನೋ… ಅತಿಮಾನೋ… ಮದೋ… ಪಮಾದೋ… ಸಬ್ಬೇ ಕಿಲೇಸಾ… ಸಬ್ಬೇ ದುಚ್ಚರಿತಾ… ಸಬ್ಬೇ ಅಭಿಸಙ್ಖಾರಾ…ಪೇ… ಸಬ್ಬೇ ಭವಗಾಮಿಕಮ್ಮಾ ಅರಿ. ತಂ ಅರಿಂ ಮದ್ದನಿಪಞ್ಞಾತಿ – ಭೂರಿಪಞ್ಞಾ. ಭೂರಿ ವುಚ್ಚತಿ ಪಥವೀ [ಪಠವೀ (ಸ್ಯಾ.)]. ತಾಯ ಪಥವಿಸಮಾಯ ವಿತ್ಥತಾಯ ವಿಪುಲಾಯ ಪಞ್ಞಾಯ ಸಮನ್ನಾಗತೋತಿ – ಭೂರಿಪಞ್ಞಾ. ಅಪಿ ಚ, ಪಞ್ಞಾಯ ಮೇತಂ ಅಧಿವಚನಂ. ಭೂರಿ ಮೇಧಾ ಪರಿಣಾಯಿಕಾತಿ – ಭೂರಿಪಞ್ಞಾ. ಭೂರಿಪಞ್ಞತಾಯ ಸಂವತ್ತನ್ತೀತಿ – ಅಯಂ ಭೂರಿಪಞ್ಞಾ.

ಪಞ್ಞಾಬಾಹುಲ್ಲಾಯ ಸಂವತ್ತನ್ತೀತಿ ಕತಮಂ ಪಞ್ಞಾಬಾಹುಲ್ಲಂ? ಇಧೇಕಚ್ಚೋ ಪಞ್ಞಾಗರುಕೋ ಹೋತಿ ಪಞ್ಞಾಚರಿತೋ ಪಞ್ಞಾಸಯೋ ಪಞ್ಞಾಧಿಮುತ್ತೋ ಪಞ್ಞಾಧಜೋ ಪಞ್ಞಾಕೇತು ಪಞ್ಞಾಧಿಪತೇಯ್ಯೋ ವಿಚಯಬಹುಲೋ ಪವಿಚಯಬಹುಲೋ ಓಕ್ಖಾಯನಬಹುಲೋ ಸಮೋಕ್ಖಾಯನಬಹುಲೋ [ಸಮ್ಪೇಕ್ಖಾಯನಬಹುಲೋ (ಸ್ಯಾ. ಕ.) ಮಹಾನಿ. ೨೦೪ ಪಸ್ಸಿತಬ್ಬಾ] ಸಮ್ಪೇಕ್ಖಾಯನಧಮ್ಮೋ ವಿಭೂತವಿಹಾರೀ ತಚ್ಚರಿತೋ ತಗ್ಗರುಕೋ ತಬ್ಬಹುಲೋ ತನ್ನಿನ್ನೋ ತಪ್ಪೋಣೋ ತಪ್ಪಬ್ಭಾರೋ ತದಧಿಮುತ್ತೋ ತದಧಿಪತೇಯ್ಯೋ. ಯಥಾ ಗಣಗರುಕೋ ವುಚ್ಚತಿ ‘‘ಗಣಬಾಹುಲಿಕೋ’’ತಿ, ಚೀವರಗರುಕೋ ವುಚ್ಚತಿ ‘‘ಚೀವರಬಾಹುಲಿಕೋ’’ತಿ, ಪತ್ತಗರುಕೋ ವುಚ್ಚತಿ ‘‘ಪತ್ತಬಾಹುಲಿಕೋ’’ತಿ, ಸೇನಾಸನಗರುಕೋ ವುಚ್ಚತಿ ‘‘ಸೇನಾಸನಬಾಹುಲಿಕೋ’’ತಿ; ಏವಮೇವಂ ಇಧೇಕಚ್ಚೋ ಪಞ್ಞಾ ಗರುಕೋ ಹೋತಿ ಪಞ್ಞಾಚರಿತೋ ಪಞ್ಞಾಸಯೋ ಪಞ್ಞಾಧಿಮುತ್ತೋ ಪಞ್ಞಾಧಜೋ ಪಞ್ಞಾಕೇತು ಪಞ್ಞಾಧಿಪತೇಯ್ಯೋ ವಿಚಯಬಹುಲೋ ಪವಿಚಯಬಹುಲೋ ಓಕ್ಖಾಯನಬಹುಲೋ ಸಮೋಕ್ಖಾಯನಬಹುಲೋ ಸಮ್ಪೇಕ್ಖಾಯನಧಮ್ಮೋ ವಿಭೂತವಿಹಾರೀ ತಚ್ಚರಿತೋ ತಗ್ಗರುಕೋ ತಬ್ಬಹುಲೋ ತನ್ನಿನ್ನೋ ತಪ್ಪೋಣೋ ತಪ್ಪಬ್ಭಾರೋ ತದಧಿಮುತ್ತೋ ತದಧಿಪತೇಯ್ಯೋ. ಪಞ್ಞಾಬಾಹುಲ್ಲಾಯ ಸಂವತ್ತನ್ತೀತಿ – ಇದಂ ಪಞ್ಞಾಬಾಹುಲ್ಲಂ.

ಸೀಘಪಞ್ಞತಾಯ ಸಂವತ್ತನ್ತೀತಿ ಕತಮಾ ಸೀಘಪಞ್ಞಾ? ಸೀಘಂ ಸೀಘಂ ಸೀಲಾನಿ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಇನ್ದ್ರಿಯಸಂವರಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಭೋಜನೇ ಮತ್ತಞ್ಞುತಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಜಾಗರಿಯಾನುಯೋಗಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಸೀಲಕ್ಖನ್ಧಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಸಮಾಧಿಕ್ಖನ್ಧಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಪಞ್ಞಾಕ್ಖನ್ಧಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ವಿಮುತ್ತಿಕ್ಖನ್ಧಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ವಿಮುತ್ತಿಞಾಣದಸ್ಸನಕ್ಖನ್ಧಂ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಠಾನಾಟ್ಠಾನಾನಿ ಪಟಿವಿಜ್ಝತೀತಿ – ಸೀಘಪಞ್ಞಾ. ಸೀಘಂ ಸೀಘಂ ವಿಹಾರಸಮಾಪತ್ತಿಯೋ ಪರಿಪೂರೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಅರಿಯಸಚ್ಚಾನಿ ಪಟಿವಿಜ್ಝತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಸತಿಪಟ್ಠಾನೇ ಭಾವೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಸಮ್ಮಪ್ಪಧಾನೇ ಭಾವೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಇದ್ಧಿಪಾದೇ ಭಾವೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಇನ್ದ್ರಿಯಾನಿ ಭಾವೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಬಲಾನಿ ಭಾವೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಬೋಜ್ಝಙ್ಗೇ ಭಾವೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಅರಿಯಮಗ್ಗಂ ಭಾವೇತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಸಾಮಞ್ಞಫಲಾನಿ ಸಚ್ಛಿಕರೋತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಅಭಿಞ್ಞಾಯೋ ಪಟಿವಿಜ್ಝತೀತಿ – ಸೀಘಪಞ್ಞಾ. ಸೀಘಂ ಸೀಘಂ ಪರಮತ್ಥಂ ನಿಬ್ಬಾನಂ ಸಚ್ಛಿಕರೋತೀತಿ – ಸೀಘಪಞ್ಞಾ. ಸೀಘಪಞ್ಞತಾಯ ಸಂವತ್ತನ್ತೀತಿ – ಅಯಂ ಸೀಘಪಞ್ಞಾ.

ಲಹುಪಞ್ಞತಾಯ ಸಂವತ್ತನ್ತೀತಿ ಕತಮಾ ಲಹುಪಞ್ಞಾ? ಲಹುಂ ಲಹುಂ ಸೀಲಾನಿ ಪರಿಪೂರೇತೀತಿ – ಲಹುಪಞ್ಞಾ. ಲಹುಂ ಲಹುಂ ಇನ್ದ್ರಿಯಸಂವರಂ ಪರಿಪೂರೇತೀತಿ – ಲಹುಪಞ್ಞಾ. ಲಹುಂ ಲಹುಂ ಭೋಜನೇ ಮತ್ತಞ್ಞುತಂ ಪರಿಪೂರೇತೀತಿ – ಲಹುಪಞ್ಞಾ. ಲಹುಂ ಲಹುಂ ಜಾಗರಿಯಾನುಯೋಗಂ ಪರಿಪೂರೇತೀತಿ – ಲಹುಪಞ್ಞಾ. ಲಹುಂ ಲಹುಂ ಸೀಲಕ್ಖನ್ಧಂ …ಪೇ… ಸಮಾಧಿಕ್ಖನ್ಧಂ … ಪಞ್ಞಾಕ್ಖನ್ಧಂ… ವಿಮುತ್ತಿಕ್ಖನ್ಧಂ… ವಿಮುತ್ತಿಞಾಣದಸ್ಸನಕ್ಖನ್ಧಂ ಪರಿಪೂರೇತೀತಿ – ಲಹುಪಞ್ಞಾ. ಲಹುಂ ಲಹುಂ ಠಾನಾಟ್ಠಾನಾನಿ ಪಟಿವಿಜ್ಝತೀತಿ – ಲಹುಪಞ್ಞಾ. ಲಹುಂ ಲಹುಂ ವಿಹಾರಸಮಾಪತ್ತಿಯೋ ಪರಿಪೂರೇತೀತಿ – ಲಹುಪಞ್ಞಾ. ಲಹುಂ ಲಹುಂ ಅರಿಯಸಚ್ಚಾನಿ ಪಟಿವಿಜ್ಝತೀತಿ – ಲಹುಪಞ್ಞಾ. ಲಹುಂ ಲಹುಂ ಸತಿಪಟ್ಠಾನೇ ಭಾವೇತೀತಿ – ಲಹುಪಞ್ಞಾ. ಲಹುಂ ಲಹುಂ ಸಮ್ಮಪ್ಪಧಾನೇ ಭಾವೇತೀತಿ – ಲಹುಪಞ್ಞಾ. ಲಹುಂ ಲಹುಂ ಇದ್ಧಿಪಾದೇ ಭಾವೇತೀತಿ – ಲಹುಪಞ್ಞಾ. ಲಹುಂ ಲಹುಂ ಇನ್ದ್ರಿಯಾನಿ ಭಾವೇತೀತಿ – ಲಹುಪಞ್ಞಾ. ಲಹುಂ ಲಹುಂ ಬಲಾನಿ ಭಾವೇತೀತಿ – ಲಹುಪಞ್ಞಾ. ಲಹುಂ ಲಹುಂ ಬೋಜ್ಝಙ್ಗೇ ಭಾವೇತೀತಿ – ಲಹುಪಞ್ಞಾ. ಲಹುಂ ಲಹುಂ ಅರಿಯಮಗ್ಗಂ ಭಾವೇತೀತಿ – ಲಹುಪಞ್ಞಾ. ಲಹುಂ ಲಹುಂ ಸಾಮಞ್ಞಫಲಾನಿ ಸಚ್ಛಿಕರೋತೀತಿ – ಲಹುಪಞ್ಞಾ. ಲಹುಂ ಲಹುಂ ಅಭಿಞ್ಞಾಯೋ ಪಟಿವಿಜ್ಝತೀತಿ – ಲಹುಪಞ್ಞಾ. ಲಹುಂ ಲಹುಂ ಪರಮತ್ಥಂ ನಿಬ್ಬಾನಂ ಸಚ್ಛಿಕರೋತೀತಿ – ಲಹುಪಞ್ಞಾ. ಲಹುಪಞ್ಞತಾಯ ಸಂವತ್ತನ್ತೀತಿ – ಅಯಂ ಲಹುಪಞ್ಞಾ.

ಹಾಸಪಞ್ಞತಾಯ ಸಂವತ್ತನ್ತೀತಿ ಕತಮಾ ಹಾಸಪಞ್ಞಾ? ಇಧೇಕಚ್ಚೋ ಹಾಸಬಹುಲೋ ವೇದಬಹುಲೋ ತುಟ್ಠಿಬಹುಲೋ ಪಾಮೋಜ್ಜಬಹುಲೋ ಸೀಲಾನಿ ಪರಿಪೂರೇತೀತಿ – ಹಾಸಪಞ್ಞಾ. ಹಾಸಬಹುಲೋ ವೇದಬಹುಲೋ ತುಟ್ಠಿಬಹುಲೋ ಪಾಮೋಜ್ಜಬಹುಲೋ ಇನ್ದ್ರಿಯಸಂವರಂ ಪರಿಪೂರೇತೀತಿ – ಹಾಸಪಞ್ಞಾ. ಹಾಸಬಹುಲೋ ವೇದಬಹುಲೋ ತುಟ್ಠಿಬಹುಲೋ ಪಾಮೋಜ್ಜಬಹುಲೋ ಭೋಜನೇ ಮತ್ತಞ್ಞುತಂ ಪರಿಪೂರೇತೀತಿ – ಹಾಸಪಞ್ಞಾ. ಹಾಸಬಹುಲೋ ವೇದಬಹುಲೋ ತುಟ್ಠಿಬಹುಲೋ ಪಾಮೋಜ್ಜಬಹುಲೋ ಜಾಗರಿಯಾನುಯೋಗಂ ಪರಿಪೂರೇತೀತಿ – ಹಾಸಪಞ್ಞಾ. ಹಾಸಬಹುಲೋ ವೇದಬಹುಲೋ ತುಟ್ಠಿಬಹುಲೋ ಪಾಮೋಜ್ಜಬಹುಲೋ ಸೀಲಕ್ಖನ್ಧಂ…ಪೇ… ಸಮಾಧಿಕ್ಖನ್ಧಂ… ಪಞ್ಞಾಕ್ಖನ್ಧಂ… ವಿಮುತ್ತಿಕ್ಖನ್ಧಂ… ವಿಮುತ್ತಿಞಾಣದಸ್ಸನಕ್ಖನ್ಧಂ ಪರಿಪೂರೇತೀತಿ…ಪೇ… ಠಾನಾಟ್ಠಾನಾನಿ ಪಟಿವಿಜ್ಝತೀತಿ… ವಿಹಾರಸಮಾಪತ್ತಿಯೋ ಪರಿಪೂರೇತೀತಿ … ಅರಿಯಸಚ್ಚಾನಿ ಪಟಿವಿಜ್ಝತೀತಿ… ಸತಿಪಟ್ಠಾನೇ ಭಾವೇತೀತಿ… ಸಮ್ಮಪ್ಪಧಾನೇ ಭಾವೇತೀತಿ… ಇದ್ಧಿಪಾದೇ ಭಾವೇತೀತಿ… ಇನ್ದ್ರಿಯಾನಿ ಭಾವೇತೀತಿ… ಬಲಾನಿ ಭಾವೇತೀತಿ… ಬೋಜ್ಝಙ್ಗೇ ಭಾವೇತೀತಿ … ಅರಿಯಮಗ್ಗಂ ಭಾವೇತೀತಿ…ಪೇ… ಸಾಮಞ್ಞಫಲಾನಿ ಸಚ್ಛಿಕರೋತೀತಿ – ಹಾಸಪಞ್ಞಾ. ಹಾಸಬಹುಲೋ ವೇದಬಹುಲೋ ತುಟ್ಠಿಬಹುಲೋ ಪಾಮೋಜ್ಜಬಹುಲೋ ಅಭಿಞ್ಞಾಯೋ ಪಟಿವಿಜ್ಝತೀತಿ – ಹಾಸಪಞ್ಞಾ. ಹಾಸಬಹುಲೋ ವೇದಬಹುಲೋ ತುಟ್ಠಿಬಹುಲೋ ಪಾಮೋಜ್ಜಬಹುಲೋ ಪರಮತ್ಥಂ ನಿಬ್ಬಾನಂ ಸಚ್ಛಿಕರೋತೀತಿ – ಹಾಸಪಞ್ಞಾ. ಹಾಸಪಞ್ಞತಾಯ ಸಂವತ್ತನ್ತೀತಿ – ಅಯಂ ಹಾಸಪಞ್ಞಾ.

೭. ಜವನಪಞ್ಞತಾಯ ಸಂವತ್ತನ್ತೀತಿ ಕತಮಾ ಜವನಪಞ್ಞಾ? ಯಂ ಕಿಞ್ಚಿ ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ, ಸಬ್ಬಂ ರೂಪಂ ಅನಿಚ್ಚತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ದುಕ್ಖತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ಅನತ್ತತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ಯಾ ಕಾಚಿ ವೇದನಾ…ಪೇ… ಯಾ ಕಾಚಿ ಸಞ್ಞಾ… ಯೇ ಕೇಚಿ ಸಙ್ಖಾರಾ… ಯಂ ಕಿಞ್ಚಿ ವಿಞ್ಞಾಣಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ, ಸಬ್ಬಂ ವಿಞ್ಞಾಣಂ ಅನಿಚ್ಚತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ದುಕ್ಖತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ಅನತ್ತತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ಚಕ್ಖು…ಪೇ… ಜರಾಮರಣಂ ಅತೀತಾನಾಗತಪಚ್ಚುಪ್ಪನ್ನಂ ಅನಿಚ್ಚತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ದುಕ್ಖತೋ ಖಿಪ್ಪಂ ಜವತೀತಿ – ಜವನಪಞ್ಞಾ. ಅನತ್ತತೋ ಖಿಪ್ಪಂ ಜವತೀತಿ – ಜವನಪಞ್ಞಾ.

ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅನಿಚ್ಚಂ ಖಯಟ್ಠೇನ ದುಕ್ಖಂ ಭಯಟ್ಠೇನ ಅನತ್ತಾ ಅಸಾರಕಟ್ಠೇನಾತಿ ತುಲಯಿತ್ವಾ ತೀರಯಿತ್ವಾ ವಿಭಾವಯಿತ್ವಾ ವಿಭೂತಂ ಕತ್ವಾ ರೂಪನಿರೋಧೇ ನಿಬ್ಬಾನೇ ಖಿಪ್ಪಂ ಜವತೀತಿ – ಜವನಪಞ್ಞಾ. ವೇದನಾ…ಪೇ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ… ಚಕ್ಖು…ಪೇ… ಜರಾಮರಣಂ ಅತೀತಾನಾಗತಪಚ್ಚುಪ್ಪನ್ನಂ ಅನಿಚ್ಚಂ ಖಯಟ್ಠೇನ ದುಕ್ಖಂ ಭಯಟ್ಠೇನ ಅನತ್ತಾ ಅಸಾರಕಟ್ಠೇನಾತಿ ತುಲಯಿತ್ವಾ ತೀರಯಿತ್ವಾ ವಿಭಾವಯಿತ್ವಾ ವಿಭೂತಂ ಕತ್ವಾ ಜರಾಮರಣನಿರೋಧೇ [ಜರಾಮರಣಂ ರೂಪನಿರೋಧೇ (ಸ್ಯಾ.)] ನಿಬ್ಬಾನೇ ಖಿಪ್ಪಂ ಜವತೀತಿ – ಜವನಪಞ್ಞಾ.

ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮನ್ತಿ ತುಲಯಿತ್ವಾ ತೀರಯಿತ್ವಾ ವಿಭಾವಯಿತ್ವಾ ವಿಭೂತಂ ಕತ್ವಾ ರೂಪನಿರೋಧೇ ನಿಬ್ಬಾನೇ ಖಿಪ್ಪಂ ಜವತೀತಿ – ಜವನಪಞ್ಞಾ. ವೇದನಾ…ಪೇ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ… ಚಕ್ಖು…ಪೇ… ಜರಾಮರಣಂ ಅತೀತಾನಾಗತಪಚ್ಚುಪ್ಪನ್ನಂ ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮನ್ತಿ ತುಲಯಿತ್ವಾ ತೀರಯಿತ್ವಾ ವಿಭಾವಯಿತ್ವಾ ವಿಭೂತಂ ಕತ್ವಾ ಜರಾಮರಣನಿರೋಧೇ ನಿಬ್ಬಾನೇ ಖಿಪ್ಪಂ ಜವತೀತಿ – ಜವನಪಞ್ಞಾ. ಜವನಪಞ್ಞತಾಯ ಸಂವತ್ತನ್ತೀತಿ – ಅಯಂ ಜವನಪಞ್ಞಾ.

ತಿಕ್ಖಪಞ್ಞತಾಯ ಸಂವತ್ತನ್ತೀತಿ ಕತಮಾ ತಿಕ್ಖಪಞ್ಞಾ? ಖಿಪ್ಪಂ ಕಿಲೇಸೇ ಛಿನ್ದತೀತಿ – ತಿಕ್ಖಪಞ್ಞಾ. ಉಪ್ಪನ್ನಂ ಕಾಮವಿತಕ್ಕಂ ನಾಧಿವಾಸೇತಿ ಪಜಹತಿ ವಿನೋದೇತಿ ಬ್ಯನ್ತೀಕರೋತಿ [ಬ್ಯನ್ತಿಂ ಕರೋತಿ (ಕ.)] ಅನಭಾವಂ ಗಮೇತೀತಿ – ತಿಕ್ಖಪಞ್ಞಾ. ಉಪ್ಪನ್ನಂ ಬ್ಯಾಪಾದವಿತಕ್ಕಂ ನಾಧಿವಾಸೇತಿ ಪಜಹತಿ ವಿನೋದೇತಿ ಬ್ಯನ್ತೀಕರೋತಿ ಅನಭಾವಂ ಗಮೇತೀತಿ – ತಿಕ್ಖಪಞ್ಞಾ. ಉಪ್ಪನ್ನಂ ವಿಹಿಂಸಾವಿತಕ್ಕಂ ನಾಧಿವಾಸೇತಿ…ಪೇ… ಉಪ್ಪನ್ನುಪ್ಪನ್ನೇ ಪಾಪಕೇ ಅಕುಸಲೇ ಧಮ್ಮೇ ನಾಧಿವಾಸೇತಿ ಪಜಹತಿ ವಿನೋದೇತಿ ಬ್ಯನ್ತೀಕರೋತಿ ಅನಭಾವಂ ಗಮೇತೀತಿ – ತಿಕ್ಖಪಞ್ಞಾ. ಉಪ್ಪನ್ನಂ ರಾಗಂ ನಾಧಿವಾಸೇತಿ ಪಜಹತಿ ವಿನೋದೇತಿ ಬ್ಯನ್ತೀಕರೋತಿ ಅನಭಾವಂ ಗಮೇತೀತಿ – ತಿಕ್ಖಪಞ್ಞಾ. ಉಪ್ಪನ್ನಂ ದೋಸಂ…ಪೇ… ಉಪ್ಪನ್ನಂ ಮೋಹಂ … ಉಪ್ಪನ್ನಂ ಕೋಧಂ… ಉಪ್ಪನ್ನಂ ಉಪನಾಹಂ… ಮಕ್ಖಂ… ಪಳಾಸಂ… ಇಸ್ಸಂ… ಮಚ್ಛರಿಯಂ… ಮಾಯಂ… ಸಾಠೇಯ್ಯಂ… ಥಮ್ಭಂ… ಸಾರಮ್ಭಂ… ಮಾನಂ… ಅತಿಮಾನಂ… ಮದಂ… ಪಮಾದಂ… ಸಬ್ಬೇ ಕಿಲೇಸೇ… ಸಬ್ಬೇ ದುಚ್ಚರಿತೇ… ಸಬ್ಬೇ ಅಭಿಸಙ್ಖಾರೇ…ಪೇ… ಸಬ್ಬೇ ಭವಗಾಮಿಕಮ್ಮೇ ನಾಧಿವಾಸೇತಿ ಪಜಹತಿ ವಿನೋದೇತಿ ಬ್ಯನ್ತೀಕರೋತಿ ಅನಭಾವಂ ಗಮೇತೀತಿ – ತಿಕ್ಖಪಞ್ಞಾ. ಏಕಸ್ಮಿಂ ಆಸನೇ ಚತ್ತಾರೋ ಚ ಅರಿಯಮಗ್ಗಾ ಚತ್ತಾರಿ ಚ ಸಾಮಞ್ಞಫಲಾನಿ ಚತಸ್ಸೋ ಪಟಿಸಮ್ಭಿದಾಯೋ ಛ ಅಭಿಞ್ಞಾಯೋ ಅಧಿಗತಾ ಹೋನ್ತಿ ಸಚ್ಛಿಕತಾ ಫಸ್ಸಿತಾ ಪಞ್ಞಾಯಾತಿ – ತಿಕ್ಖಪಞ್ಞಾ. ತಿಕ್ಖಪಞ್ಞತಾಯ ಸಂವತ್ತನ್ತೀತಿ – ಅಯಂ ತಿಕ್ಖಪಞ್ಞಾ.

ನಿಬ್ಬೇಧಿಕಪಞ್ಞತಾಯ ಸಂವತ್ತನ್ತೀತಿ ಕತಮಾ ನಿಬ್ಬೇಧಿಕಪಞ್ಞಾ? ಇಧೇಕಚ್ಚೋ ಸಬ್ಬಸಙ್ಖಾರೇಸು ಉಬ್ಬೇಗಬಹುಲೋ ಹೋತಿ ಉತ್ತಾಸಬಹುಲೋ ಉಕ್ಕಣ್ಠನಬಹುಲೋ ಅರತಿಬಹುಲೋ ಅನಭಿರತಿಬಹುಲೋ. ಬಹಿಮುಖೋ ನ ರಮತಿ ಸಬ್ಬಸಙ್ಖಾರೇಸು. ಅನಿಬ್ಬಿದ್ಧಪುಬ್ಬಂ ಅಪ್ಪದಾಲಿತಪುಬ್ಬಂ ಲೋಭಕ್ಖನ್ಧಂ ನಿಬ್ಬಿಜ್ಝತಿ ಪದಾಲೇತೀತಿ – ನಿಬ್ಬೇಧಿಕಪಞ್ಞಾ. ಅನಿಬ್ಬಿದ್ಧಪುಬ್ಬಂ ಅಪ್ಪದಾಲಿತಪುಬ್ಬಂ ದೋಸಕ್ಖನ್ಧಂ ನಿಬ್ಬಿಜ್ಝತಿ ಪದಾಲೇತೀತಿ – ನಿಬ್ಬೇಧಿಕಪಞ್ಞಾ. ಅನಿಬ್ಬಿದ್ಧಪುಬ್ಬಂ ಅಪ್ಪದಾಲಿತಪುಬ್ಬಂ ಮೋಹಕ್ಖನ್ಧಂ ನಿಬ್ಬಿಜ್ಝತಿ ಪದಾಲೇತೀತಿ – ನಿಬ್ಬೇಧಿಕಪಞ್ಞಾ. ಅನಿಬ್ಬಿದ್ಧಪುಬ್ಬಂ ಅಪ್ಪದಾಲಿತಪುಬ್ಬಂ ಕೋಧಂ…ಪೇ… ಉಪನಾಹಂ… ಮಕ್ಖಂ… ಪಳಾಸಂ… ಇಸ್ಸಂ… ಮಚ್ಛರಿಯಂ… ಮಾಯಂ… ಸಾಠೇಯ್ಯಂ… ಥಮ್ಭಂ… ಸಾರಮ್ಭಂ… ಮಾನಂ… ಅತಿಮಾನಂ… ಮದಂ… ಪಮಾದಂ… ಸಬ್ಬೇ ಕಿಲೇಸೇ… ಸಬ್ಬೇ ದುಚ್ಚರಿತೇ… ಸಬ್ಬೇ ಅಭಿಸಙ್ಖಾರೇ…ಪೇ… ಸಬ್ಬೇ ಭವಗಾಮಿಕಮ್ಮೇ ನಿಬ್ಬಿಜ್ಝತಿ ಪದಾಲೇತೀತಿ – ನಿಬ್ಬೇಧಿಕಪಞ್ಞಾ. ನಿಬ್ಬೇಧಿಕಪಞ್ಞತಾಯ ಸಂವತ್ತನ್ತೀತಿ – ಅಯಂ ನಿಬ್ಬೇಧಿಕಪಞ್ಞಾ.

ಇಮಾ ಸೋಳಸ ಪಞ್ಞಾಯೋ. ಇಮಾಹಿ ಸೋಳಸಹಿ ಪಞ್ಞಾಹಿ ಸಮನ್ನಾಗತೋ ಪುಗ್ಗಲೋ ಪಟಿಸಮ್ಭಿದಪ್ಪತ್ತೋ.

೨. ಪುಗ್ಗಲವಿಸೇಸನಿದ್ದೇಸೋ

೮. ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ – ಏಕೋ ಪುಬ್ಬಯೋಗಸಮ್ಪನ್ನೋ, ಏಕೋ ನ ಪುಬ್ಬಯೋಗಸಮ್ಪನ್ನೋ. ಯೋ ಪುಬ್ಬಯೋಗಸಮ್ಪನ್ನೋ ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ – ಏಕೋ ಬಹುಸ್ಸುತೋ, ಏಕೋ ನ ಬಹುಸ್ಸುತೋ. ಯೋ ಬಹುಸ್ಸುತೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ, ದ್ವೇಪಿ ಬಹುಸ್ಸುತಾ – ಏಕೋ ದೇಸನಾಬಹುಲೋ, ಏಕೋ ನ ದೇಸನಾಬಹುಲೋ. ಯೋ ದೇಸನಾಬಹುಲೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ, ದ್ವೇಪಿ ಬಹುಸ್ಸುತಾ, ದ್ವೇಪಿ ದೇಸನಾಬಹುಲಾ – ಏಕೋ ಗರೂಪನಿಸ್ಸಿತೋ, ಏಕೋ ನ ಗರೂಪನಿಸ್ಸಿತೋ. ಯೋ ಗರೂಪನಿಸ್ಸಿತೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ, ದ್ವೇಪಿ ಬಹುಸ್ಸುತಾ, ದ್ವೇಪಿ ದೇಸನಾಬಹುಲಾ, ದ್ವೇಪಿ ಗರೂಪನಿಸ್ಸಿತಾ – ಏಕೋ ವಿಹಾರಬಹುಲೋ, ಏಕೋ ನ ವಿಹಾರಬಹುಲೋ. ಯೋ ವಿಹಾರಬಹುಲೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ, ದ್ವೇಪಿ ಬಹುಸ್ಸುತಾ, ದ್ವೇಪಿ ದೇಸನಾಬಹುಲಾ, ದ್ವೇಪಿ ಗರೂಪನಿಸ್ಸಿತಾ, ದ್ವೇಪಿ ವಿಹಾರಬಹುಲಾ – ಏಕೋ ಪಚ್ಚವೇಕ್ಖಣಾಬಹುಲೋ, ಏಕೋ ನ ಪಚ್ಚವೇಕ್ಖಣಾಬಹುಲೋ. ಯೋ ಪಚ್ಚವೇಕ್ಖಣಾಬಹುಲೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ, ದ್ವೇಪಿ ಬಹುಸ್ಸುತಾ, ದ್ವೇಪಿ ದೇಸನಾಬಹುಲಾ, ದ್ವೇಪಿ ಗರೂಪನಿಸ್ಸಿತಾ, ದ್ವೇಪಿ ವಿಹಾರಬಹುಲಾ, ದ್ವೇಪಿ ಪಚ್ಚವೇಕ್ಖಣಾಬಹುಲಾ – ಏಕೋ ಸೇಖಪಟಿಸಮ್ಭಿದಪ್ಪತ್ತೋ, ಏಕೋ ಅಸೇಖಪಟಿಸಮ್ಭಿದಪ್ಪತ್ತೋ. ಯೋ ಅಸೇಖಪಟಿಸಮ್ಭಿದಪ್ಪತ್ತೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ, ದ್ವೇಪಿ ಬಹುಸ್ಸುತಾ, ದ್ವೇಪಿ ದೇಸನಾಬಹುಲಾ, ದ್ವೇಪಿ ಗರೂಪನಿಸ್ಸಿತಾ, ದ್ವೇಪಿ ವಿಹಾರಬಹುಲಾ, ದ್ವೇಪಿ ಪಚ್ಚವೇಕ್ಖಣಾಬಹುಲಾ, ದ್ವೇಪಿ ಅಸೇಖಪಟಿಸಮ್ಭಿದಪ್ಪತ್ತಾ – ಏಕೋ ಸಾವಕಪಾರಮಿಪ್ಪತ್ತೋ, ಏಕೋ ನ ಸಾವಕಪಾರಮಿಪ್ಪತ್ತೋ. ಯೋ ಸಾವಕಪಾರಮಿಪ್ಪತ್ತೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ದ್ವೇ ಪುಗ್ಗಲಾ ಪಟಿಸಮ್ಭಿದಪ್ಪತ್ತಾ, ದ್ವೇಪಿ ಪುಬ್ಬಯೋಗಸಮ್ಪನ್ನಾ, ದ್ವೇಪಿ ಬಹುಸ್ಸುತಾ, ದ್ವೇಪಿ ದೇಸನಾಬಹುಲಾ, ದ್ವೇಪಿ ಗರೂಪನಿಸ್ಸಿತಾ, ದ್ವೇಪಿ ವಿಹಾರಬಹುಲಾ, ದ್ವೇಪಿ ಪಚ್ಚವೇಕ್ಖಣಾಬಹುಲಾ, ದ್ವೇಪಿ ಅಸೇಖಪಟಿಸಮ್ಭಿದಪ್ಪತ್ತಾ – ಏಕೋ ಸಾವಕಪಾರಮಿಪ್ಪತ್ತೋ, ಏಕೋ ಪಚ್ಚೇಕಸಮ್ಬುದ್ಧೋ. ಯೋ ಪಚ್ಚೇಕಸಮ್ಬುದ್ಧೋ, ಸೋ ತೇನ ಅತಿರೇಕೋ ಹೋತಿ, ಅಧಿಕೋ ಹೋತಿ, ವಿಸೇಸೋ ಹೋತಿ. ತಸ್ಸ ಞಾಣಂ ಪಭಿಜ್ಜತಿ.

ಪಚ್ಚೇಕಬುದ್ಧಞ್ಚ ಸದೇವಕಞ್ಚ ಲೋಕಂ ಉಪಾದಾಯ ತಥಾಗತೋ ಅರಹಂ ಸಮ್ಮಾಸಮ್ಬುದ್ಧೋ ಅಗ್ಗೋ ಪಟಿಸಮ್ಭಿದಪ್ಪತ್ತೋ ಪಞ್ಞಾಪಭೇದಕುಸಲೋ ಪಭಿನ್ನಞಾಣೋ ಅಧಿಗತಪಟಿಸಮ್ಭಿದೋ ಚತುವೇಸಾರಜ್ಜಪ್ಪತ್ತೋ ದಸಬಲಧಾರೀ ಪುರಿಸಾಸಭೋ ಪುರಿಸಸೀಹೋ…ಪೇ… ಯೇಪಿ ತೇ ಖತ್ತಿಯಪಣ್ಡಿತಾ ಬ್ರಾಹ್ಮಣಪಣ್ಡಿತಾ ಗಹಪತಿಪಣ್ಡಿತಾ ಸಮಣಪಣ್ಡಿತಾ ನಿಪುಣಾ ಕತಪರಪ್ಪವಾದಾ ವಾಲವೇಧಿರೂಪಾ ವೋಭಿನ್ದನ್ತಾ ಮಞ್ಞೇ ಚರನ್ತಿ ಪಞ್ಞಾಗತೇನ ದಿಟ್ಠಿಗತಾನಿ, ತೇ ಪಞ್ಹಂ ಅಭಿಸಙ್ಖರಿತ್ವಾ ಅಭಿಸಙ್ಖರಿತ್ವಾ ತಥಾಗತಂ ಉಪಸಙ್ಕಮಿತ್ವಾ ಪುಚ್ಛನ್ತಿ ಗೂಳ್ಹಾನಿ ಚ ಪಟಿಚ್ಛನ್ನಾನಿ ಚ. ಕಥಿತಾ ವಿಸಜ್ಜಿತಾ ಚ ತೇ ಪಞ್ಹಾ ಭಗವತಾ ಹೋನ್ತಿ ನಿದ್ದಿಟ್ಠಕಾರಣಾ, ಉಪಕ್ಖಿತ್ತಕಾ ಚ ತೇ ಭಗವತೋ ಸಮ್ಪಜ್ಜನ್ತಿ. ಅಥ ಖೋ ಭಗವಾ ತತ್ಥ ಅತಿರೋಚತಿ, ಯದಿದಂ ಪಞ್ಞಾಯಾತಿ ಅಗ್ಗೋ ಪಟಿಸಮ್ಭಿದಪ್ಪತ್ತೋತಿ.

ಮಹಾಪಞ್ಞಾಕಥಾ ನಿಟ್ಠಿತಾ.