೩. ತತಿಯಸುತ್ತನ್ತನಿದ್ದೇಸೋ

೧೯೪. ಸಾವತ್ಥಿನಿದಾನಂ [ಸಂ. ನಿ. ೫.೪೭೮-೪೭೯ ಪಸ್ಸಿತಬ್ಬಾ]. ‘‘ಪಞ್ಚಿಮಾನಿ, ಭಿಕ್ಖವೇ, ಇನ್ದ್ರಿಯಾನಿ. ಕತಮಾನಿ ಪಞ್ಚ? ಸದ್ಧಿನ್ದ್ರಿಯಂ, ವೀರಿಯಿನ್ದ್ರಿಯಂ, ಸತಿನ್ದ್ರಿಯಂ, ಸಮಾಧಿನ್ದ್ರಿಯಂ, ಪಞ್ಞಿನ್ದ್ರಿಯಂ. ಕತ್ಥ ಚ, ಭಿಕ್ಖವೇ, ಸದ್ಧಿನ್ದ್ರಿಯಂ ದಟ್ಠಬ್ಬಂ? ಚತೂಸು ಸೋತಾಪತ್ತಿಯಙ್ಗೇಸು – ಏತ್ಥ ಸದ್ಧಿನ್ದ್ರಿಯಂ ದಟ್ಠಬ್ಬಂ. ಕತ್ಥ ಚ, ಭಿಕ್ಖವೇ, ವೀರಿಯಿನ್ದ್ರಿಯಂ ದಟ್ಠಬ್ಬಂ? ಚತೂಸು ಸಮ್ಮಪ್ಪಧಾನೇಸು – ಏತ್ಥ ವೀರಿಯಿನ್ದ್ರಿಯಂ ದಟ್ಠಬ್ಬಂ. ಕತ್ಥ ಚ, ಭಿಕ್ಖವೇ, ಸತಿನ್ದ್ರಿಯಂ ದಟ್ಠಬ್ಬಂ? ಚತೂಸು ಸತಿಪಟ್ಠಾನೇಸು – ಏತ್ಥ ಸತಿನ್ದ್ರಿಯಂ ದಟ್ಠಬ್ಬಂ. ಕತ್ಥ ಚ, ಭಿಕ್ಖವೇ, ಸಮಾಧಿನ್ದ್ರಿಯಂ ದಟ್ಠಬ್ಬಂ? ಚತೂಸು ಝಾನೇಸು – ಏತ್ಥ ಸಮಾಧಿನ್ದ್ರಿಯಂ ದಟ್ಠಬ್ಬಂ. ಕತ್ಥ ಚ, ಭಿಕ್ಖವೇ, ಪಞ್ಞಿನ್ದ್ರಿಯಂ ದಟ್ಠಬ್ಬಂ? ಚತೂಸು ಅರಿಯಸಚ್ಚೇಸು – ಏತ್ಥ ಪಞ್ಞಿನ್ದ್ರಿಯಂ ದಟ್ಠಬ್ಬಂ’’.

ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ಕತಿಹಾಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಚತೂಸು ಸಮ್ಮಪ್ಪಧಾನೇಸು ವೀರಿಯಿನ್ದ್ರಿಯಸ್ಸ ವಸೇನ ಕತಿಹಾಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಚತೂಸು ಸತಿಪಟ್ಠಾನೇಸು ಸತಿನ್ದ್ರಿಯಸ್ಸ ವಸೇನ ಕತಿಹಾಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಚತೂಸು ಝಾನೇಸು ಸಮಾಧಿನ್ದ್ರಿಯಸ್ಸ ವಸೇನ ಕತಿಹಾಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ಕತಿಹಾಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ?

ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ. ಚತೂಸು ಸಮ್ಮಪ್ಪಧಾನೇಸು ವೀರಿಯಿನ್ದ್ರಿಯಸ್ಸ ವಸೇನ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ. ಚತೂಸು ಸತಿಪಟ್ಠಾನೇಸು ಸತಿನ್ದ್ರಿಯಸ್ಸ ವಸೇನ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ. ಚತೂಸು ಝಾನೇಸು ಸಮಾಧಿನ್ದ್ರಿಯಸ್ಸ ವಸೇನ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ. ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ.

ಕ. ಪಭೇದಗಣನನಿದ್ದೇಸೋ

೧೯೫. ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಸಪ್ಪುರಿಸಸಂಸೇವೇ ಸೋತಾಪತ್ತಿಯಙ್ಗೇ ಅಧಿಮೋಕ್ಖಾಧಿಪತೇಯ್ಯಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಸದ್ಧಿನ್ದ್ರಿಯಸ್ಸ ವಸೇನ ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ; ಸದ್ಧಮ್ಮಸವನೇ ಸೋತಾಪತ್ತಿಯಙ್ಗೇ… ಯೋನಿಸೋಮನಸಿಕಾರೇ ಸೋತಾಪತ್ತಿಯಙ್ಗೇ… ಧಮ್ಮಾನುಧಮ್ಮಪಟಿಪತ್ತಿಯಾ ಸೋತಾಪತ್ತಿಯಙ್ಗೇ ಅಧಿಮೋಕ್ಖಾಧಿಪತೇಯ್ಯಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಸದ್ಧಿನ್ದ್ರಿಯಸ್ಸ ವಸೇನ ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ. ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ.

ಚತೂಸು ಸಮ್ಮಪ್ಪಧಾನೇಸು ವೀರಿಯಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಸಮ್ಮಪ್ಪಧಾನೇ ಪಗ್ಗಹಾಧಿಪತೇಯ್ಯಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ವೀರಿಯಿನ್ದ್ರಿಯಸ್ಸ ವಸೇನ ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ. ಉಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಪಹಾನಾಯ ಸಮ್ಮಪ್ಪಧಾನೇ…ಪೇ… ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ ಸಮ್ಮಪ್ಪಧಾನೇ…ಪೇ… ಉಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಠಿತಿಯಾ ಅಸಮ್ಮೋಸಾಯ ಭಿಯ್ಯೋಭಾವಾಯ ವೇಪುಲ್ಲಾಯ ಭಾವನಾಯ ಪಾರಿಪೂರಿಯಾ ಸಮ್ಮಪ್ಪಧಾನೇ ಪಗ್ಗಹಾಧಿಪತೇಯ್ಯಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ವೀರಿಯಿನ್ದ್ರಿಯಸ್ಸ ವಸೇನ ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ. ಚತೂಸು ಸಮ್ಮಪ್ಪಧಾನೇಸು ವೀರಿಯಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ.

ಚತೂಸು ಸತಿಪಟ್ಠಾನೇಸು ಸತಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಕಾಯೇ ಕಾಯಾನುಪಸ್ಸನಾಸತಿಪಟ್ಠಾನೇ ಉಪಟ್ಠಾನಾಧಿಪತೇಯ್ಯಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಸತಿನ್ದ್ರಿಯಸ್ಸ ವಸೇನ ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ. ವೇದನಾಸು ವೇದನಾನುಪಸ್ಸನಾಸತಿಪಟ್ಠಾನೇ…ಪೇ… ಚಿತ್ತೇ ಚಿತ್ತಾನುಪಸ್ಸನಾಸತಿಪಟ್ಠಾನೇ… ಧಮ್ಮೇಸು ಧಮ್ಮಾನುಪಸ್ಸನಾಸತಿಪಟ್ಠಾನೇ ಉಪಟ್ಠಾನಾಧಿಪತೇಯ್ಯಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಸತಿನ್ದ್ರಿಯಸ್ಸ ವಸೇನ ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ. ಚತೂಸು ಸತಿಪಟ್ಠಾನೇಸು ಸತಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ.

ಚತೂಸು ಝಾನೇಸು ಸಮಾಧಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ಪಠಮೇ ಝಾನೇ ಅವಿಕ್ಖೇಪಾಧಿಪತೇಯ್ಯಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ಸಮಾಧಿನ್ದ್ರಿಯಸ್ಸ ವಸೇನ ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ. ದುತಿಯೇ ಝಾನೇ…ಪೇ… ತತಿಯೇ ಝಾನೇ… ಚತುತ್ಥೇ ಝಾನೇ ಅವಿಕ್ಖೇಪಾಧಿಪತೇಯ್ಯಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ, ಸಮಾಧಿನ್ದ್ರಿಯಸ್ಸ ವಸೇನ ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ. ಚತೂಸು ಝಾನೇಸು ಸಮಾಧಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ.

ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ? ದುಕ್ಖೇ ಅರಿಯಸಚ್ಚೇ ದಸ್ಸನಾಧಿಪತೇಯ್ಯಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಪಞ್ಞಿನ್ದ್ರಿಯಸ್ಸ ವಸೇನ ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ. ದುಕ್ಖಸಮುದಯೇ ಅರಿಯಸಚ್ಚೇ…ಪೇ… ದುಕ್ಖನಿರೋಧೇ ಅರಿಯಸಚ್ಚೇ… ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಅರಿಯಸಚ್ಚೇ ದಸ್ಸನಾಧಿಪತೇಯ್ಯಟ್ಠೇನ ಪಞ್ಞಿನ್ದ್ರಿಯಂ ದಟ್ಠಬ್ಬಂ, ಪಞ್ಞಿನ್ದ್ರಿಯಸ್ಸ ವಸೇನ ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ದಟ್ಠಬ್ಬಂ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ದಟ್ಠಬ್ಬಂ, ಉಪಟ್ಠಾನಟ್ಠೇನ ಸತಿನ್ದ್ರಿಯಂ ದಟ್ಠಬ್ಬಂ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ದಟ್ಠಬ್ಬಂ. ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚಿನ್ದ್ರಿಯಾನಿ ದಟ್ಠಬ್ಬಾನಿ.

ಖ. ಚರಿಯವಾರೋ

೧೯೬. ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ?

ಚತೂಸು ಸಮ್ಮಪ್ಪಧಾನೇಸು…ಪೇ… ಚತೂಸು ಸತಿಪಟ್ಠಾನೇಸು… ಚತೂಸು ಝಾನೇಸು… ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ? ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ. ಚತೂಸು ಸಮ್ಮಪ್ಪಧಾನೇಸು…ಪೇ… ಚತೂಸು ಸತಿಪಟ್ಠಾನೇಸು… ಚತೂಸು ಝಾನೇಸು… ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ.

ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ? ಸಪ್ಪುರಿಸಸಂಸೇವೇ ಸೋತಾಪತ್ತಿಯಙ್ಗೇ ಅಧಿಮೋಕ್ಖಾಧಿಪತೇಯ್ಯಟ್ಠೇನ ಸದ್ಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಸದ್ಧಿನ್ದ್ರಿಯಸ್ಸ ವಸೇನ ಪಗ್ಗಹಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಉಪಟ್ಠಾನಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ದಸ್ಸನಟ್ಠೇನ ಪಞ್ಞಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ. ಸದ್ಧಮ್ಮಸವನೇ ಸೋತಾಪತ್ತಿಯಙ್ಗೇ…ಪೇ… ಯೋನಿಸೋ ಮನಸಿಕಾರೇ ಸೋತಾಪತ್ತಿಯಙ್ಗೇ… ಧಮ್ಮಾನುಧಮ್ಮಪಟಿಪತ್ತಿಯಾ ಸೋತಾಪತ್ತಿಯಙ್ಗೇ ಅಧಿಮೋಕ್ಖಾಧಿಪತೇಯ್ಯಟ್ಠೇನ ಸದ್ಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಸದ್ಧಿನ್ದ್ರಿಯಸ್ಸ ವಸೇನ ಪಗ್ಗಹಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಉಪಟ್ಠಾನಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ದಸ್ಸನಟ್ಠೇನ ಪಞ್ಞಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ. ಚತೂಸು ಸೋತಾಪತ್ತಿಯಙ್ಗೇಸು ಸದ್ಧಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ.

ಚತೂಸು ಸಮ್ಮಪ್ಪಧಾನೇಸು ವೀರಿಯಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ? ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಸಮ್ಮಪ್ಪಧಾನೇ ಪಗ್ಗಹಾಧಿಪತೇಯ್ಯಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ವೀರಿಯಿನ್ದ್ರಿಯಸ್ಸ ವಸೇನ ಉಪಟ್ಠಾನಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ದಸ್ಸನಟ್ಠೇನ ಪಞ್ಞಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ. ಉಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಪಹಾನಾಯ ಸಮ್ಮಪ್ಪಧಾನೇ…ಪೇ… ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ ಸಮ್ಮಪ್ಪಧಾನೇ…ಪೇ… ಉಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಠಿತಿಯಾ ಅಸಮ್ಮೋಸಾಯ ಭಿಯ್ಯೋಭಾವಾಯ ವೇಪುಲ್ಲಾಯ ಭಾವನಾಯ ಪಾರಿಪೂರಿಯಾ ಸಮ್ಮಪ್ಪಧಾನೇ ಪಗ್ಗಹಾಧಿಪತೇಯ್ಯಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ…ಪೇ… ಚತೂಸು ಸಮ್ಮಪ್ಪಧಾನೇಸು ವೀರಿಯಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ.

ಚತೂಸು ಸತಿಪಟ್ಠಾನೇಸು ಸತಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ? ಕಾಯೇ ಕಾಯಾನುಪಸ್ಸನಾಸತಿಪಟ್ಠಾನೇ ಉಪಟ್ಠಾನಾಧಿಪತೇಯ್ಯಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಸತಿನ್ದ್ರಿಯಸ್ಸ ವಸೇನ ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ದಸ್ಸನಟ್ಠೇನ ಪಞ್ಞಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ. ವೇದನಾಸು ವೇದನಾನುಪಸ್ಸನಾಸತಿಪಟ್ಠಾನೇ…ಪೇ… ಚಿತ್ತೇ ಚಿತ್ತಾನುಪಸ್ಸನಾಸತಿಪಟ್ಠಾನೇ…ಪೇ… ಧಮ್ಮೇಸು ಧಮ್ಮಾನುಪಸ್ಸನಾಸತಿಪಟ್ಠಾನೇ ಉಪಟ್ಠಾನಾಧಿಪತೇಯ್ಯಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ…ಪೇ… ಚತೂಸು ಸತಿಪಟ್ಠಾನೇಸು ಸತಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ.

ಚತೂಸು ಝಾನೇಸು ಸಮಾಧಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ? ಪಠಮೇ ಝಾನೇ ಅವಿಕ್ಖೇಪಾಧಿಪತೇಯ್ಯಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಸಮಾಧಿನ್ದ್ರಿಯಸ್ಸ ವಸೇನ ದಸ್ಸನಟ್ಠೇನ ಪಞ್ಞಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಉಪಟ್ಠಾನಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ. ದುತಿಯೇ ಝಾನೇ…ಪೇ… ತತಿಯೇ ಝಾನೇ…ಪೇ… ಚತುತ್ಥೇ ಝಾನೇ ಅವಿಕ್ಖೇಪಾಧಿಪತೇಯ್ಯಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ…ಪೇ… ಚತೂಸು ಝಾನೇಸು ಸಮಾಧಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ.

ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ಕತಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ? ದುಕ್ಖೇ ಅರಿಯಸಚ್ಚೇ ದಸ್ಸನಾಧಿಪತೇಯ್ಯಟ್ಠೇನ ಪಞ್ಞಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಪಞ್ಞಿನ್ದ್ರಿಯಸ್ಸ ವಸೇನ ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಉಪಟ್ಠಾನಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ. ದುಕ್ಖಸಮುದಯೇ ಅರಿಯಸಚ್ಚೇ…ಪೇ… ದುಕ್ಖನಿರೋಧೇ ಅರಿಯಸಚ್ಚೇ… ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಅರಿಯಸಚ್ಚೇ ದಸ್ಸನಾಧಿಪತೇಯ್ಯಟ್ಠೇನ ಪಞ್ಞಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಪಞ್ಞಿನ್ದ್ರಿಯಸ್ಸ ವಸೇನ ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಪಗ್ಗಹಟ್ಠೇನ ವೀರಿಯಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಉಪಟ್ಠಾನಟ್ಠೇನ ಸತಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ, ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಸ್ಸ ಚರಿಯಾ ದಟ್ಠಬ್ಬಾ. ಚತೂಸು ಅರಿಯಸಚ್ಚೇಸು ಪಞ್ಞಿನ್ದ್ರಿಯಸ್ಸ ವಸೇನ ಇಮೇಹಿ ವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಚರಿಯಾ ದಟ್ಠಬ್ಬಾ.

ಗ. ಚಾರವಿಹಾರನಿದ್ದೇಸೋ

೧೯೭. ಚಾರೋ ಚ ವಿಹಾರೋ ಚ ಅನುಬುದ್ಧೋ ಹೋತಿ ಪಟಿವಿದ್ಧೋ, ಯಥಾಚರನ್ತಂ ಯಥಾವಿಹರನ್ತಂ ವಿಞ್ಞೂ ಸಬ್ರಹ್ಮಚಾರೀ ಗಮ್ಭೀರೇಸು ಠಾನೇಸು ಓಕಪ್ಪೇಯ್ಯುಂ – ‘‘ಅದ್ಧಾ, ಅಯಮಾಯಸ್ಮಾ ಪತ್ತೋ ವಾ ಪಾಪುಣಿಸ್ಸತಿ ವಾ’’.

ಚರಿಯಾತಿ ಅಟ್ಠ ಚರಿಯಾಯೋ – ಇರಿಯಾಪಥಚರಿಯಾ, ಆಯತನಚರಿಯಾ, ಸತಿಚರಿಯಾ, ಸಮಾಧಿಚರಿಯಾ, ಞಾಣಚರಿಯಾ, ಮಗ್ಗಚರಿಯಾ, ಪತ್ತಿಚರಿಯಾ, ಲೋಕತ್ಥಚರಿಯಾತಿ. ಇರಿಯಾಪಥಚರಿಯಾತಿ ಚತೂಸು ಇರಿಯಾಪಥೇಸು. ಆಯತನಚರಿಯಾತಿ ಛಸು ಅಜ್ಝತ್ತಿಕಬಾಹಿರೇಸು ಆಯತನೇಸು. ಸತಿಚರಿಯಾತಿ ಚತೂಸು ಸತಿಪಟ್ಠಾನೇಸು. ಸಮಾಧಿಚರಿಯಾತಿ ಚತೂಸು ಝಾನೇಸು. ಞಾಣಚರಿಯಾತಿ ಚತೂಸು ಅರಿಯಸಚ್ಚೇಸು. ಮಗ್ಗಚರಿಯಾತಿ ಚತೂಸು ಅರಿಯಮಗ್ಗೇಸು. ಪತ್ತಿಚರಿಯಾತಿ ಚತೂಸು ಸಾಮಞ್ಞಫಲೇಸು. ಲೋಕತ್ಥಚರಿಯಾತಿ ತಥಾಗತೇಸು ಅರಹನ್ತೇಸು ಸಮ್ಮಾಸಮ್ಬುದ್ಧೇಸು, ಪದೇಸೇ ಪಚ್ಚೇಕಬುದ್ಧೇಸು, ಪದೇಸೇ ಸಾವಕೇಸು. ಇರಿಯಾಪಥಚರಿಯಾ ಚ ಪಣಿಧಿಸಮ್ಪನ್ನಾನಂ, ಆಯತನಚರಿಯಾ ಚ ಇನ್ದ್ರಿಯೇಸು ಗುತ್ತದ್ವಾರಾನಂ, ಸತಿಚರಿಯಾ ಚ ಅಪ್ಪಮಾದವಿಹಾರೀನಂ, ಸಮಾಧಿಚರಿಯಾ ಚ ಅಧಿಚಿತ್ತಮನುಯುತ್ತಾನಂ, ಞಾಣಚರಿಯಾ ಚ ಬುದ್ಧಿಸಮ್ಪನ್ನಾನಂ, ಮಗ್ಗಚರಿಯಾ ಚ ಸಮ್ಮಾಪಟಿಪನ್ನಾನಂ, ಪತ್ತಿಚರಿಯಾ ಚ ಅಧಿಗತಫಲಾನಂ, ಲೋಕತ್ಥಚರಿಯಾ ಚ ತಥಾಗತಾನಂ ಅರಹನ್ತಾನಂ ಸಮ್ಮಾಸಮ್ಬುದ್ಧಾನಂ, ಪದೇಸೇ ಪಚ್ಚೇಕಬುದ್ಧಾನಂ, ಪದೇಸೇ ಸಾವಕಾನಂ. ಇಮಾ ಅಟ್ಠ ಚರಿಯಾಯೋ.

ಅಪರಾಪಿ ಅಟ್ಠ ಚರಿಯಾಯೋ. ಅಧಿಮುಚ್ಚನ್ತೋ ಸದ್ಧಾಯ ಚರತಿ, ಪಗ್ಗಣ್ಹನ್ತೋ ವೀರಿಯೇನ ಚರತಿ, ಉಪಟ್ಠಾಪೇನ್ತೋ ಸತಿಯಾ ಚರತಿ, ಅವಿಕ್ಖೇಪಂ ಕರೋನ್ತೋ ಸಮಾಧಿನಾ ಚರತಿ, ಪಜಾನನ್ತೋ ಪಞ್ಞಾಯ ಚರತಿ, ವಿಜಾನನ್ತೋ ವಿಞ್ಞಾಣಚರಿಯಾಯ ಚರತಿ, ಏವಂ ಪಟಿಪನ್ನಸ್ಸ ಕುಸಲಾ ಧಮ್ಮಾ ಆಯಾಪೇನ್ತೀತಿ ಆಯತನಚರಿಯಾಯ ಚರತಿ, ಏವಂ ಪಟಿಪನ್ನೋ ವಿಸೇಸಮಧಿಗಚ್ಛತೀತಿ ವಿಸೇಸಚರಿಯಾಯ ಚರತಿ – ಇಮಾ ಅಟ್ಠ ಚರಿಯಾಯೋ.

ಅಪರಾಪಿ ಅಟ್ಠ ಚರಿಯಾಯೋ. ದಸ್ಸನಚರಿಯಾ ಚ ಸಮ್ಮಾದಿಟ್ಠಿಯಾ, ಅಭಿನಿರೋಪನಚರಿಯಾ ಚ ಸಮ್ಮಾಸಙ್ಕಪ್ಪಸ್ಸ, ಪರಿಗ್ಗಹಚರಿಯಾ ಚ ಸಮ್ಮಾವಾಚಾಯ, ಸಮುಟ್ಠಾನಚರಿಯಾ ಚ ಸಮ್ಮಾಕಮ್ಮನ್ತಸ್ಸ, ವೋದಾನಚರಿಯಾ ಚ ಸಮ್ಮಾಆಜೀವಸ್ಸ, ಪಗ್ಗಹಚರಿಯಾ ಚ ಸಮ್ಮಾವಾಯಾಮಸ್ಸ, ಉಪಟ್ಠಾನಚರಿಯಾ ಚ ಸಮ್ಮಾಸತಿಯಾ, ಅವಿಕ್ಖೇಪಚರಿಯಾ ಚ ಸಮ್ಮಾಸಮಾಧಿಸ್ಸ – ಇಮಾ ಅಟ್ಠ ಚರಿಯಾಯೋ.

ವಿಹಾರೋತಿ ಅಧಿಮುಚ್ಚನ್ತೋ ಸದ್ಧಾಯ ವಿಹರತಿ, ಪಗ್ಗಣ್ಹನ್ತೋ ವೀರಿಯೇನ ವಿಹರತಿ, ಉಪಟ್ಠಾಪೇನ್ತೋ ಸತಿಯಾ ವಿಹರತಿ, ಅವಿಕ್ಖೇಪಂ ಕರೋನ್ತೋ ಸಮಾಧಿನಾ ವಿಹರತಿ, ಪಜಾನನ್ತೋ ಪಞ್ಞಾಯ ವಿಹರತಿ.

ಅನುಬುದ್ಧೋತಿ ಸದ್ಧಿನ್ದ್ರಿಯಸ್ಸ ಅಧಿಮೋಕ್ಖಟ್ಠೋ ಅನುಬುದ್ಧೋ ಹೋತಿ, ವೀರಿಯಿನ್ದ್ರಿಯಸ್ಸ ಪಗ್ಗಹಟ್ಠೋ ಅನುಬುದ್ಧೋ ಹೋತಿ, ಸತಿನ್ದ್ರಿಯಸ್ಸ ಉಪಟ್ಠಾನಟ್ಠೋ ಅನುಬುದ್ಧೋ ಹೋತಿ, ಸಮಾಧಿನ್ದ್ರಿಯಸ್ಸ ಅವಿಕ್ಖೇಪಟ್ಠೋ ಅನುಬುದ್ಧೋ ಹೋತಿ, ಪಞ್ಞಿನ್ದ್ರಿಯಸ್ಸ ದಸ್ಸನಟ್ಠೋ ಅನುಬುದ್ಧೋ ಹೋತಿ.

ಪಟಿವಿದ್ಧೋತಿ ಸದ್ಧಿನ್ದ್ರಿಯಸ್ಸ ಅಧಿಮೋಕ್ಖಟ್ಠೋ ಪಟಿವಿದ್ಧೋ ಹೋತಿ, ವೀರಿಯಿನ್ದ್ರಿಯಸ್ಸ ಪಗ್ಗಹಟ್ಠೋ ಪಟಿವಿದ್ಧೋ ಹೋತಿ, ಸತಿನ್ದ್ರಿಯಸ್ಸ ಉಪಟ್ಠಾನಟ್ಠೋ ಪಟಿವಿದ್ಧೋ ಹೋತಿ, ಸಮಾಧಿನ್ದ್ರಿಯಸ್ಸ ಅವಿಕ್ಖೇಪಟ್ಠೋ ಪಟಿವಿದ್ಧೋ ಹೋತಿ, ಪಞ್ಞಿನ್ದ್ರಿಯಸ್ಸ ದಸ್ಸನಟ್ಠೋ ಪಟಿವಿದ್ಧೋ ಹೋತಿ. ಯಥಾಚರನ್ತನ್ತಿ ಏವಂ ಸದ್ಧಾಯ ಚರನ್ತಂ, ಏವಂ ವೀರಿಯೇನ ಚರನ್ತಂ, ಏವಂ ಸತಿಯಾ ಚರನ್ತಂ, ಏವಂ ಸಮಾಧಿನಾ ಚರನ್ತಂ, ಏವಂ ಪಞ್ಞಾಯ ಚರನ್ತಂ. ಯಥಾವಿಹರನ್ತನ್ತಿ ಏವಂ ಸದ್ಧಾಯ ವಿಹರನ್ತಂ, ಏವಂ ವೀರಿಯೇನ ವಿಹರನ್ತಂ, ಏವಂ ಸತಿಯಾ ವಿಹರನ್ತಂ, ಏವಂ ಸಮಾಧಿನಾ ವಿಹರನ್ತಂ, ಏವಂ ಪಞ್ಞಾಯ ವಿಹರನ್ತಂ. ವಿಞ್ಞೂತಿ ವಿಞ್ಞೂ ವಿಭಾವೀ ಮೇಧಾವೀ ಪಣ್ಡಿತಾ ಬುದ್ಧಿಸಮ್ಪನ್ನಾ. ಸಬ್ರಹ್ಮಚಾರೀತಿ ಏಕಕಮ್ಮಂ ಏಕುದ್ದೇಸೋ ಸಮಸಿಕ್ಖತಾ. ಗಮ್ಭೀರೇಸು ಠಾನೇಸೂತಿ ಗಮ್ಭೀರಾನಿ ಠಾನಾನಿ ವುಚ್ಚನ್ತಿ ಝಾನಾ ಚ ವಿಮೋಕ್ಖಾ ಚ ಸಮಾಧೀ ಚ ಸಮಾಪತ್ತಿಯೋ ಚ ಮಗ್ಗಾ ಚ ಫಲಾನಿ ಚ ಅಭಿಞ್ಞಾಯೋ ಚ ಪಟಿಸಮ್ಭಿದಾ ಚ. ಓಕಪ್ಪೇಯ್ಯುನ್ತಿ ಸದ್ದಹೇಯ್ಯುಂ ಅಧಿಮುಚ್ಚೇಯ್ಯುಂ. ಅದ್ಧಾತಿ ಏಕಂಸವಚನಮೇತಂ ನಿಸ್ಸಂಸಯವಚನಮೇತಂ ನಿಕ್ಕಙ್ಖವಚನಮೇತಂ ಅದ್ವೇಜ್ಝವಚನಮೇತಂ ಅದ್ವೇಳ್ಹಕವಚನಮೇತಂ ನಿಯೋಗವಚನಮೇತಂ ಅಪಣ್ಣಕವಚನಮೇತಂ ಅವತ್ಥಾಪನವಚನಮೇತಂ – ಅದ್ಧಾತಿ. ಆಯಸ್ಮಾತಿ ಪಿಯವಚನಮೇತಂ ಗರುವಚನಮೇತಂ ಸಗಾರವಸಪ್ಪತಿಸ್ಸಾಧಿವಚನಮೇತಂ – ಆಯಸ್ಮಾತಿ. ಪತ್ತೋ ವಾತಿ ಅಧಿಗತೋ ವಾ. ಪಾಪುಣಿಸ್ಸತಿ ವಾತಿ ಅಧಿಗಮಿಸ್ಸತಿ ವಾ.

ಸುತ್ತನ್ತನಿದ್ದೇಸೋ ತತಿಯೋ.