೬. ಞಾಣರಾಸಿಛಕ್ಕನಿದ್ದೇಸೋ

೧೮೩. ಕತಮಾನಿ ಚತುವೀಸತಿ ಸಮಾಧಿವಸೇನ ಞಾಣಾನಿ? ದೀಘಂ ಅಸ್ಸಾಸವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ, ದೀಘಂ ಪಸ್ಸಾಸವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ…ಪೇ… ವಿಮೋಚಯಂ ಚಿತ್ತಂ ಅಸ್ಸಾಸವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ, ವಿಮೋಚಯಂ ಚಿತ್ತಂ ಪಸ್ಸಾಸವಸೇನ ಚಿತ್ತಸ್ಸ ಏಕಗ್ಗತಾ ಅವಿಕ್ಖೇಪೋ ಸಮಾಧಿ. ಇಮಾನಿ ಚತುವೀಸತಿ ಸಮಾಧಿವಸೇನ ಞಾಣಾನಿ.

ಕತಮಾನಿ ದ್ವೇಸತ್ತತಿ ವಿಪಸ್ಸನಾವಸೇನ ಞಾಣಾನಿ? ದೀಘಂ ಅಸ್ಸಾಸಂ ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ದುಕ್ಖತೋ ಅನುಪಸ್ಸನಟ್ಠೇನ ವಿಪಸ್ಸನಾ, ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ, ದೀಘಂ ಪಸ್ಸಾಸಂ ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ದುಕ್ಖತೋ ಅನುಪಸ್ಸನಟ್ಠೇನ ವಿಪಸ್ಸನಾ, ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ…ಪೇ… ವಿಮೋಚಯಂ ಚಿತ್ತಂ ಅಸ್ಸಾಸಂ, ವಿಮೋಚಯಂ ಚಿತ್ತಂ ಪಸ್ಸಾಸಂ ಅನಿಚ್ಚತೋ ಅನುಪಸ್ಸನಟ್ಠೇನ ವಿಪಸ್ಸನಾ, ದುಕ್ಖತೋ ಅನುಪಸ್ಸನಟ್ಠೇನ ವಿಪಸ್ಸನಾ, ಅನತ್ತತೋ ಅನುಪಸ್ಸನಟ್ಠೇನ ವಿಪಸ್ಸನಾ. ಇಮಾನಿ ದ್ವೇಸತ್ತತಿ ವಿಪಸ್ಸನಾವಸೇನ ಞಾಣಾನಿ.

ಕತಮಾನಿ ಅಟ್ಠ ನಿಬ್ಬಿದಾಞಾಣಾನಿ? ಅನಿಚ್ಚಾನುಪಸ್ಸೀ ಅಸ್ಸಾಸಂ ಯಥಾಭೂತಂ ಜಾನಾತಿ ಪಸ್ಸತೀತಿ – ನಿಬ್ಬಿದಾಞಾಣಂ, ಅನಿಚ್ಚಾನುಪಸ್ಸೀ ಪಸ್ಸಾಸಂ ಯಥಾಭೂತಂ ಜಾನಾತಿ ಪಸ್ಸತೀತಿ – ನಿಬ್ಬಿದಾಞಾಣಂ…ಪೇ… ಪಟಿನಿಸ್ಸಗ್ಗಾನುಪಸ್ಸೀ ಅಸ್ಸಾಸಂ ಯಥಾಭೂತಂ ಜಾನಾತಿ ಪಸ್ಸತೀತಿ – ನಿಬ್ಬಿದಾಞಾಣಂ, ಪಟಿನಿಸ್ಸಗ್ಗಾನುಪಸ್ಸೀ ಪಸ್ಸಾಸಂ ಯಥಾಭೂತಂ ಜಾನಾತಿ ಪಸ್ಸತೀತಿ – ನಿಬ್ಬಿದಾಞಾಣಂ. ಇಮಾನಿ ಅಟ್ಠ ನಿಬ್ಬಿದಾಞಾಣಾನಿ.

ಕತಮಾನಿ ಅಟ್ಠ ನಿಬ್ಬಿದಾನುಲೋಮೇ ಞಾಣಾನಿ? ಅನಿಚ್ಚಾನುಪಸ್ಸೀ ಅಸ್ಸಾಸಂ ಭಯತುಪಟ್ಠಾನೇ ಪಞ್ಞಾ ನಿಬ್ಬಿದಾನುಲೋಮೇ ಞಾಣಂ, ಅನಿಚ್ಚಾನುಪಸ್ಸೀ ಪಸ್ಸಾಸಂ ಭಯತುಪಟ್ಠಾನೇ ಪಞ್ಞಾ ನಿಬ್ಬಿದಾನುಲೋಮೇ ಞಾಣಂ…ಪೇ… ಪಟಿನಿಸ್ಸಗ್ಗಾನುಪಸ್ಸೀ ಅಸ್ಸಾಸಂ ಭಯತುಪಟ್ಠಾನೇ ಪಞ್ಞಾ ನಿಬ್ಬಿದಾನುಲೋಮೇ ಞಾಣಂ, ಪಟಿನಿಸ್ಸಗ್ಗಾನುಪಸ್ಸೀ ಪಸ್ಸಾಸಂ ಭಯತುಪಟ್ಠಾನೇ ಪಞ್ಞಾ ನಿಬ್ಬಿದಾನುಲೋಮೇ ಞಾಣಂ – ಇಮಾನಿ ಅಟ್ಠ ನಿಬ್ಬಿದಾನುಲೋಮೇ ಞಾಣಾನಿ.

ಕತಮಾನಿ ಅಟ್ಠ ನಿಬ್ಬಿದಾಪಟಿಪ್ಪಸ್ಸದ್ಧಿಞಾಣಾನಿ? ಅನಿಚ್ಚಾನುಪಸ್ಸೀ ಅಸ್ಸಾಸಂ ಪಟಿಸಙ್ಖಾ ಸನ್ತಿಟ್ಠನಾ ಪಞ್ಞಾ ನಿಬ್ಬಿದಾಪಟಿಪ್ಪಸ್ಸದ್ಧಿಞಾಣಂ, ಅನಿಚ್ಚಾನುಪಸ್ಸೀ ಪಸ್ಸಾಸಂ ಪಟಿಸಙ್ಖಾ ಸನ್ತಿಟ್ಠನಾ ಪಞ್ಞಾ ನಿಬ್ಬಿದಾಪಟಿಪ್ಪಸ್ಸದ್ಧಿಞಾಣಂ…ಪೇ… ಪಟಿನಿಸ್ಸಗ್ಗಾನುಪಸ್ಸೀ ಅಸ್ಸಾಸಂ ಪಟಿಸಙ್ಖಾ ಸನ್ತಿಟ್ಠನಾ ಪಞ್ಞಾ ನಿಬ್ಬಿದಾಪಟಿಪ್ಪಸ್ಸದ್ಧಿಞಾಣಂ, ಪಟಿನಿಸ್ಸಗ್ಗಾನುಪಸ್ಸೀ ಪಸ್ಸಾಸಂ ಪಟಿಸಙ್ಖಾ ಸನ್ತಿಟ್ಠನಾ ಪಞ್ಞಾ ನಿಬ್ಬಿದಾಪಟಿಪ್ಪಸ್ಸದ್ಧಿಞಾಣಂ – ಇಮಾನಿ ಅಟ್ಠ ನಿಬ್ಬಿದಾಪಟಿಪ್ಪಸ್ಸದ್ಧಿಞಾಣಾನಿ.

ಕತಮಾನಿ ಏಕವೀಸತಿ ವಿಮುತ್ತಿಸುಖೇ ಞಾಣಾನಿ? ಸೋತಾಪತ್ತಿಮಗ್ಗೇನ ಸಕ್ಕಾಯದಿಟ್ಠಿಯಾ ಪಹೀನತ್ತಾ ಸಮುಚ್ಛಿನ್ನತ್ತಾ ಉಪ್ಪಜ್ಜತಿ ವಿಮುತ್ತಿಸುಖೇ ಞಾಣಂ, ವಿಚಿಕಿಚ್ಛಾಯ ಪಹೀನತ್ತಾ ಸಮುಚ್ಛಿನ್ನತ್ತಾ ಉಪ್ಪಜ್ಜತಿ ವಿಮುತ್ತಿಸುಖೇ ಞಾಣಂ, ಸೀಲಬ್ಬತಪರಾಮಾಸಸ್ಸ…ಪೇ… ದಿಟ್ಠಾನುಸಯಸ್ಸ, ವಿಚಿಕಿಚ್ಛಾನುಸಯಸ್ಸ ಪಹೀನತ್ತಾ ಸಮುಚ್ಛಿನ್ನತ್ತಾ ಉಪ್ಪಜ್ಜತಿ ವಿಮುತ್ತಿಸುಖೇ ಞಾಣಂ, ಸಕದಾಗಾಮಿಮಗ್ಗೇನ ಓಳಾರಿಕಸ್ಸ, ಕಾಮರಾಗಸಞ್ಞೋಜನಸ್ಸ…ಪೇ… ಪಟಿಘಸಞ್ಞೋಜನಸ್ಸ, ಓಳಾರಿಕಸ್ಸ ಕಾಮರಾಗಾನುಸಯಸ್ಸ, ಪಟಿಘಾನುಸಯಸ್ಸ ಪಹೀನತ್ತಾ ಸಮುಚ್ಛಿನ್ನತ್ತಾ ಉಪ್ಪಜ್ಜತಿ ವಿಮುತ್ತಿಸುಖೇ ಞಾಣಂ, ಅನಾಗಾಮಿಮಗ್ಗೇನ ಅನುಸಹಗತಸ್ಸ ಕಾಮರಾಗಸಞ್ಞೋಜನಸ್ಸ…ಪೇ… ಪಟಿಘಸಞ್ಞೋಜನಸ್ಸ, ಅನುಸಹಗತಸ್ಸ ಕಾಮರಾಗಾನುಸಯಸ್ಸ, ಪಟಿಘಾನುಸಯಸ್ಸ ಪಹೀನತ್ತಾ ಸಮುಚ್ಛಿನ್ನತ್ತಾ ಉಪ್ಪಜ್ಜತಿ ವಿಮುತ್ತಿಸುಖೇ ಞಾಣಂ, ಅರಹತ್ತಮಗ್ಗೇನ, ರೂಪರಾಗಸ್ಸ…ಪೇ… ಅರೂಪರಾಗಸ್ಸ, ಮಾನಸ್ಸ, ಉದ್ಧಚ್ಚಸ್ಸ, ಅವಿಜ್ಜಾಯ, ಮಾನಾನುಸಯಸ್ಸ, ಭವರಾಗಾನುಸಯಸ್ಸ, ಅವಿಜ್ಜಾನುಸಯಸ್ಸ ಪಹೀನತ್ತಾ ಸಮುಚ್ಛಿನ್ನತ್ತಾ ಉಪ್ಪಜ್ಜತಿ ವಿಮುತ್ತಿಸುಖೇ ಞಾಣಂ. ಇಮಾನಿ ಏಕವೀಸತಿ ವಿಮುತ್ತಿಸುಖೇ ಞಾಣಾನಿ. ಸೋಳಸವತ್ಥುಕಂ ಆನಾಪಾನಸ್ಸತಿಸಮಾಧಿಂ ಭಾವಯತೋ ಸಮಧಿಕಾನಿ ಇಮಾನಿ ದ್ವೇ ಞಾಣಸತಾನಿ ಉಪ್ಪಜ್ಜನ್ತಿ.

ಞಾಣರಾಸಿಛಕ್ಕನಿದ್ದೇಸೋ ಛಟ್ಠೋ.

ಆನಾಪಾನಸ್ಸತಿಕಥಾ [ಆನಾಪಾನಕಥಾ (ಸ್ಯಾ. ಕ.)] ನಿಟ್ಠಿತಾ.