೭೧. ಮಹಾಕರುಣಾಞಾಣನಿದ್ದೇಸೋ

೧೧೭. ಕತಮಂ ತಥಾಗತಸ್ಸ ಮಹಾಕರುಣಾಸಮಾಪತ್ತಿಯಾ ಞಾಣಂ? ಬಹುಕೇಹಿ ಆಕಾರೇಹಿ ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಆದಿತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಉಯ್ಯುತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಪಯಾತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಕುಮ್ಮಗ್ಗಪ್ಪಟಿಪನ್ನೋ [ಕುಮ್ಮಗ್ಗಂ ಪಟಿಪನ್ನೋ (ಸ್ಯಾ.)] ಲೋಕಸನ್ನಿವಾಸೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಉಪನೀಯತಿ ಲೋಕೋ ಅದ್ಧುವೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಅತಾಣೋ [ಅತ್ತಾಣೋ (ಸ್ಯಾ.)] ಲೋಕೋ ಅನಭಿಸ್ಸರೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಅಸ್ಸಕೋ ಲೋಕೋ, ಸಬ್ಬಂ ಪಹಾಯ ಗಮನೀಯನ್ತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಊನೋ ಲೋಕೋ ಅತೀತೋ ತಣ್ಹಾದಾಸೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಅತಾಯನೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಅಲೇಣೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ …ಪೇ… ಅಸರಣೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಅಸರಣೀಭೂತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ….

ಉದ್ಧತೋ ಲೋಕೋ ಅವೂಪಸನ್ತೋತಿ – ಪಸ್ಸನ್ತಾನಂ…ಪೇ… ಸಸಲ್ಲೋ ಲೋಕಸನ್ನಿವಾಸೋ, ವಿದ್ಧೋ ಪುಥುಸಲ್ಲೇಹಿ; ತಸ್ಸ ನತ್ಥಞ್ಞೋ ಕೋಚಿ ಸಲ್ಲಾನಂ ಉದ್ಧತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಅವಿಜ್ಜನ್ಧಕಾರಾವರಣೋ ಲೋಕಸನ್ನಿವಾಸೋ ಅಣ್ಡಭೂತೋ ಕಿಲೇಸಪಞ್ಜರಪಕ್ಖಿತ್ತೋ; ತಸ್ಸ ನತ್ಥಞ್ಞೋ ಕೋಚಿ ಆಲೋಕಂ ದಸ್ಸೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಅವಿಜ್ಜಾಗತೋ ಲೋಕಸನ್ನಿವಾಸೋ ಅಣ್ಡಭೂತೋ ಪರಿಯೋನದ್ಧೋ ತನ್ತಾಕುಲಕಜಾತೋ [ತನ್ತಾಕುಲಜಾತೋ (ಸ್ಯಾ.)] ಕುಲಾಗಣ್ಡಿಕಜಾತೋ [ಗುಳಾಗುಣ್ಠಿಕಜಾತೋ (ಸ್ಯಾ.), ಗುಲಾಗುಣ್ಡಿಕಜಾತೋ (ಕ. ಸೀ. ಅಟ್ಠ.) ದೀ. ನಿ. ೨.೯೫ ಪಸ್ಸಿತಬ್ಬಾ] ಮುಞ್ಜಪಬ್ಬಜಭೂತೋ ಅಪಾಯಂ ದುಗ್ಗತಿಂ ವಿನಿಪಾತಂ ಸಂಸಾರಂ ನಾತಿವತ್ತತೀತಿ – ಪಸ್ಸನ್ತಾನಂ…ಪೇ… ಅವಿಜ್ಜಾವಿಸದೋಸಸಂಲಿತ್ತೋ ಲೋಕಸನ್ನಿವಾಸೋ ಕಿಲೇಸಕಲಲೀಭೂತೋತಿ – ಪಸ್ಸನ್ತಾನಂ…ಪೇ… ರಾಗದೋಸಮೋಹಜಟಾಜಟಿತೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಜಟಂ ವಿಜಟೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ….

ತಣ್ಹಾಸಙ್ಘಾಟಪಟಿಮುಕ್ಕೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ತಣ್ಹಾಜಾಲೇನ ಓತ್ಥಟೋ [ಓತ್ಥತೋ (ಕ.)] ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ತಣ್ಹಾಸೋತೇನ ವುಯ್ಹತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ತಣ್ಹಾಸಞ್ಞೋಜನೇನ ಸಞ್ಞುತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ತಣ್ಹಾನುಸಯೇನ ಅನುಸಟೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ತಣ್ಹಾಸನ್ತಾಪೇನ ಸನ್ತಪ್ಪತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ತಣ್ಹಾಪರಿಳಾಹೇನ ಪರಿಡಯ್ಹತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ….

ದಿಟ್ಠಿಸಙ್ಘಾಟಪಟಿಮುಕ್ಕೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಿಟ್ಠಿಜಾಲೇನ ಓತ್ಥಟೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಿಟ್ಠಿಸೋತೇನ ವುಯ್ಹತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಿಟ್ಠಿಸಞ್ಞೋಜನೇನ ಸಞ್ಞುತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಿಟ್ಠಾನುಸಯೇನ ಅನುಸಟೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಿಟ್ಠಿಸನ್ತಾಪೇನ ಸನ್ತಪ್ಪತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಿಟ್ಠಿಪರಿಳಾಹೇನ ಪರಿಡಯ್ಹತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ….

ಜಾತಿಯಾ ಅನುಗತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಜರಾಯ ಅನುಸಟೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಬ್ಯಾಧಿನಾ ಅಭಿಭೂತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ …ಪೇ… ಮರಣೇನ ಅಬ್ಭಾಹತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದುಕ್ಖೇ ಪತಿಟ್ಠಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ….

ತಣ್ಹಾಯ ಉಡ್ಡಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಜರಾಪಾಕಾರಪರಿಕ್ಖಿತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಮಚ್ಚುಪಾಸೇನ ಪರಿಕ್ಖಿತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಮಹಾಬನ್ಧನಬನ್ಧೋ ಲೋಕಸನ್ನಿವಾಸೋ – ರಾಗಬನ್ಧನೇನ ದೋಸಬನ್ಧನೇನ ಮೋಹಬನ್ಧನೇನ ಮಾನಬನ್ಧನೇನ ದಿಟ್ಠಿಬನ್ಧನೇನ ಕಿಲೇಸಬನ್ಧನೇನ ದುಚ್ಚರಿತಬನ್ಧನೇನ; ತಸ್ಸ ನತ್ಥಞ್ಞೋ ಕೋಚಿ ಬನ್ಧನಂ ಮೋಚೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಮಹಾಸಮ್ಬಾಧಪ್ಪಟಿಪನ್ನೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಓಕಾಸಂ ದಸ್ಸೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ… ಮಹಾಪಲಿಬೋಧೇನ ಪಲಿಬುದ್ಧೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಪಲಿಬೋಧಂ ಛೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಮಹಾಪಪಾತೇ ಪತಿತೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಪಪಾತಾ ಉದ್ಧತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಮಹಾಕನ್ತಾರಪ್ಪಟಿಪನ್ನೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಕನ್ತಾರಂ ತಾರೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಮಹಾಸಂಸಾರಪ್ಪಟಿಪನ್ನೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಸಂಸಾರಾ ಮೋಚೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಮಹಾವಿದುಗ್ಗೇ ಸಮ್ಪರಿವತ್ತತಿ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ವಿದುಗ್ಗಾ ಉದ್ಧತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಮಹಾಪಲಿಪೇ [ಮಹಾಪಲ್ಲೇಪೇ (ಸ್ಯಾ.)] ಪಲಿಪನ್ನೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಪಲಿಪಾ ಉದ್ಧತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ….

ಅಬ್ಭಾಹತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಆದಿತ್ತೋ ಲೋಕಸನ್ನಿವಾಸೋ – ರಾಗಗ್ಗಿನಾ ದೋಸಗ್ಗಿನಾ ಮೋಹಗ್ಗಿನಾ ಜಾತಿಯಾ ಜರಾಯ ಮರಣೇನ ಸೋಕೇಹಿ ಪರಿದೇವೇಹಿ ದುಕ್ಖೇಹಿ ದೋಮನಸ್ಸೇಹಿ ಉಪಾಯಾಸೇಹಿ; ತಸ್ಸ ನತ್ಥಞ್ಞೋ ಕೋಚಿ ನಿಬ್ಬಾಪೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಉನ್ನೀತಕೋ ಲೋಕಸನ್ನಿವಾಸೋ ಹಞ್ಞತಿ ನಿಚ್ಚಮತಾಣೋ ಪತ್ತದಣ್ಡೋ ತಕ್ಕರೋತಿ – ಪಸ್ಸನ್ತಾನಂ…ಪೇ… ವಜ್ಜಬನ್ಧನಬದ್ಧೋ ಲೋಕಸನ್ನಿವಾಸೋ ಆಘಾತನಪಚ್ಚುಪಟ್ಠಿತೋ; ತಸ್ಸ ನತ್ಥಞ್ಞೋ ಕೋಚಿ ಬನ್ಧನಂ ಮೋಚೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಅನಾಥೋ ಲೋಕಸನ್ನಿವಾಸೋ ಪರಮಕಾರುಞ್ಞಪ್ಪತ್ತೋ; ತಸ್ಸ ನತ್ಥಞ್ಞೋ ಕೋಚಿ ತಾಯೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ದುಕ್ಖಾಭಿತುನ್ನೋ [ದುಕ್ಖಾಭಿತುಣ್ಣೋ (ಕ.)] ಲೋಕಸನ್ನಿವಾಸೋ ಚಿರರತ್ತಂ ಪೀಳಿತೋತಿ – ಪಸ್ಸನ್ತಾನಂ…ಪೇ… ಗಧಿತೋ ಲೋಕಸನ್ನಿವಾಸೋ ನಿಚ್ಚಂ ಪಿಪಾಸಿತೋತಿ – ಪಸ್ಸನ್ತಾನಂ…ಪೇ….

ಅನ್ಧೋ ಲೋಕಸನ್ನಿವಾಸೋ ಅಚಕ್ಖುಕೋತಿ – ಪಸ್ಸನ್ತಾನಂ…ಪೇ… ಹತನೇತ್ತೋ ಲೋಕಸನ್ನಿವಾಸೋ ಅಪರಿಣಾಯಕೋತಿ – ಪಸ್ಸನ್ತಾನಂ…ಪೇ… ವಿಪಥಪಕ್ಖನ್ದೋ [ವಿಪಥಂ ಪಕ್ಖನ್ತೋ (ಸ್ಯಾ.)] ಲೋಕಸನ್ನಿವಾಸೋ ಅಞ್ಜಸಾಪರದ್ಧೋ; ತಸ್ಸ ನತ್ಥಞ್ಞೋ ಕೋಚಿ ಅರಿಯಪಥಂ ಆನೇತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ… ಮಹೋಘಪಕ್ಖನ್ದೋ ಲೋಕಸನ್ನಿವಾಸೋ; ತಸ್ಸ ನತ್ಥಞ್ಞೋ ಕೋಚಿ ಓಘಾ ಉದ್ಧತಾ, ಅಞ್ಞತ್ರ ಮಯಾತಿ – ಪಸ್ಸನ್ತಾನಂ…ಪೇ….

೧೧೮. ದ್ವೀಹಿ ದಿಟ್ಠಿಗತೇಹಿ ಪರಿಯುಟ್ಠಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ತೀಹಿ ದುಚ್ಚರಿತೇಹಿ ವಿಪ್ಪಟಿಪನ್ನೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಚತೂಹಿ ಯೋಗೇಹಿ ಯುತ್ತೋ ಲೋಕಸನ್ನಿವಾಸೋ ಚತುಯೋಗಯೋಜಿತೋತಿ – ಪಸ್ಸನ್ತಾನಂ…ಪೇ… ಚತೂಹಿ ಗನ್ಥೇಹಿ [ಗಣ್ಠೇಹಿ (ಸ್ಯಾ.)] ಗನ್ಥಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಚತೂಹಿ ಉಪಾದಾನೇಹಿ ಉಪಾದಿಯತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಪಞ್ಚಗತಿಸಮಾರುಳ್ಹೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಪಞ್ಚಹಿ ಕಾಮಗುಣೇಹಿ ರಜ್ಜತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಪಞ್ಚಹಿ ನೀವರಣೇಹಿ ಓತ್ಥಟೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಛಹಿ ವಿವಾದಮೂಲೇಹಿ ವಿವದತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಛಹಿ ತಣ್ಹಾಕಾಯೇಹಿ ರಜ್ಜತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಛಹಿ ದಿಟ್ಠಿಗತೇಹಿ ಪರಿಯುಟ್ಠಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ …ಪೇ… ಸತ್ತಹಿ ಅನುಸಯೇಹಿ ಅನುಸಟೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಸತ್ತಹಿ ಸಞ್ಞೋಜನೇಹಿ ಸಞ್ಞುತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಸತ್ತಹಿ ಮಾನೇಹಿ ಉನ್ನತೋ [ಉಣ್ಣತೋ (ಸ್ಯಾ. ಕ.)] ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಅಟ್ಠಹಿ ಲೋಕಧಮ್ಮೇಹಿ ಸಮ್ಪರಿವತ್ತತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಅಟ್ಠಹಿ ಮಿಚ್ಛತ್ತೇಹಿ ನಿಯ್ಯಾತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಅಟ್ಠಹಿ ಪುರಿಸದೋಸೇಹಿ ದುಸ್ಸತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ನವಹಿ ಆಘಾತವತ್ಥೂಹಿ ಆಘಾತಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ …ಪೇ… ನವವಿಧಮಾನೇಹಿ ಉನ್ನತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ನವಹಿ ತಣ್ಹಾಮೂಲಕೇಹಿ ಧಮ್ಮೇಹಿ ರಜ್ಜತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಸಹಿ ಕಿಲೇಸವತ್ಥೂಹಿ ಕಿಲಿಸ್ಸತಿ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಸಹಿ ಆಘಾತವತ್ಥೂಹಿ ಆಘಾತಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಸಹಿ ಅಕುಸಲಕಮ್ಮಪಥೇಹಿ ಸಮನ್ನಾಗತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಸಹಿ ಸಞ್ಞೋಜನೇಹಿ ಸಞ್ಞುತ್ತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಸಹಿ ಮಿಚ್ಛತ್ತೇಹಿ ನಿಯ್ಯಾತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಸವತ್ಥುಕಾಯ ಮಿಚ್ಛಾದಿಟ್ಠಿಯಾ ಸಮನ್ನಾಗತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ದಸವತ್ಥುಕಾಯ ಅನ್ತಗ್ಗಾಹಿಕಾಯ ದಿಟ್ಠಿಯಾ ಸಮನ್ನಾಗತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ…ಪೇ… ಅಟ್ಠಸತತಣ್ಹಾಪಪಞ್ಚಸತೇಹಿ ಪಪಞ್ಚಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ದ್ವಾಸಟ್ಠಿಯಾ ದಿಟ್ಠಿಗತೇಹಿ ಪರಿಯುಟ್ಠಿತೋ ಲೋಕಸನ್ನಿವಾಸೋತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ.

ಅಹಞ್ಚಮ್ಹಿ ತಿಣ್ಣೋ, ಲೋಕೋ ಚ ಅತಿಣ್ಣೋ ಅಹಂ ಚಮ್ಹಿ ಮುತ್ತೋ, ಲೋಕೋ ಚ ಅಮುತ್ತೋ; ಅಹಞ್ಚಮ್ಹಿ ದನ್ತೋ, ಲೋಕೋ ಚ ಅದನ್ತೋ; ಅಹಂ ಚಮ್ಹಿ ಸನ್ತೋ, ಲೋಕೋ ಚ ಅಸನ್ತೋ; ಅಹಂ ಚಮ್ಹಿ ಅಸ್ಸತ್ಥೋ, ಲೋಕೋ ಚ ಅನಸ್ಸತ್ಥೋ; ಅಹಂ ಚಮ್ಹಿ ಪರಿನಿಬ್ಬುತೋ, ಲೋಕೋ ಚ ಅಪರಿನಿಬ್ಬುತೋ; ಪಹೋಮಿ ಖ್ವಾಹಂ ತಿಣ್ಣೋ ತಾರೇತುಂ, ಮುತ್ತೋ ಮೋಚೇತುಂ, ದನ್ತೋ ದಮೇತುಂ, ಸನ್ತೋ ಸಮೇತುಂ, ಅಸ್ಸತ್ಥೋ ಅಸ್ಸಾಸೇತುಂ, ಪರಿನಿಬ್ಬುತೋ ಪರೇ ಚ ಪರಿನಿಬ್ಬಾಪೇತುನ್ತಿ – ಪಸ್ಸನ್ತಾನಂ ಬುದ್ಧಾನಂ ಭಗವನ್ತಾನಂ ಸತ್ತೇಸು ಮಹಾಕರುಣಾ ಓಕ್ಕಮತಿ. ಇದಂ ತಥಾಗತಸ್ಸ ಮಹಾಕರುಣಾಸಮಾಪತ್ತಿಯಾ ಞಾಣಂ.

ಮಹಾಕರುಣಾಞಾಣನಿದ್ದೇಸೋ ಏಕಸತ್ತತಿಮೋ.