೫೧. ಸೋತಧಾತುವಿಸುದ್ಧಿಞಾಣನಿದ್ದೇಸೋ

೧೦೩. ಕಥಂ ವಿತಕ್ಕವಿಪ್ಫಾರವಸೇನ ನಾನತ್ತೇಕತ್ತಸದ್ದನಿಮಿತ್ತಾನಂ ಪರಿಯೋಗಾಹಣೇ ಪಞ್ಞಾ ಸೋತಧಾತುವಿಸುದ್ಧಿಞಾಣಂ? ಇಧ ಭಿಕ್ಖು ಛನ್ದಸಮಾಧಿ…ಪೇ… ವೀರಿಯಸಮಾಧಿ… ಚಿತ್ತಸಮಾಧಿ… ವೀಮಂಸಾಸಮಾಧಿಪಧಾನಸಙ್ಖಾರಸಮನ್ನಾಗತಂ ಇದ್ಧಿಪಾದಂ ಭಾವೇತಿ. ಸೋ ಇಮೇಸು ಚತೂಸು ಇದ್ಧಿಪಾದೇಸು ಚಿತ್ತಂ ಪರಿಭಾವೇತಿ ಪರಿದಮೇತಿ, ಮುದುಂ ಕರೋತಿ ಕಮ್ಮನಿಯಂ. ಸೋ ಇಮೇಸು ಚತೂಸು ಇದ್ಧಿಪಾದೇಸು ಚಿತ್ತಂ ಪರಿಭಾವೇತ್ವಾ ಪರಿದಮೇತ್ವಾ, ಮುದುಂ ಕರಿತ್ವಾ ಕಮ್ಮನಿಯಂ ದೂರೇಪಿ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಸನ್ತಿಕೇಪಿ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಓಳಾರಿಕಾನಮ್ಪಿ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಸುಖುಮಾನಮ್ಪಿ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಸಣ್ಹಸಣ್ಹಾನಮ್ಪಿ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಪುರತ್ಥಿಮಾಯಪಿ ದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಪಚ್ಛಿಮಾಯಪಿ ದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಉತ್ತರಾಯಪಿ ದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ದಕ್ಖಿಣಾಯಪಿ ದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಪುರತ್ಥಿಮಾಯಪಿ ಅನುದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಪಚ್ಛಿಮಾಯಪಿ ಅನುದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಉತ್ತರಾಯಪಿ ಅನುದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ದಕ್ಖಿಣಾಯಪಿ ಅನುದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಹೇಟ್ಠಿಮಾಯಪಿ ದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ, ಉಪರಿಮಾಯಪಿ ದಿಸಾಯ ಸದ್ದಾನಂ ಸದ್ದನಿಮಿತ್ತಂ ಮನಸಿ ಕರೋತಿ. ಸೋ ತಥಾಭಾವಿತೇನ ಚಿತ್ತೇನ ಪರಿಸುದ್ಧೇನ ಪರಿಯೋದಾತೇನ ಸೋತಧಾತುವಿಸುದ್ಧಿಞಾಣಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ. ಸೋ ದಿಬ್ಬಾಯ ಸೋತಧಾತುಯಾ ವಿಸುದ್ಧಾಯ ಅತಿಕ್ಕನ್ತಮಾನುಸಿಕಾಯ ಉಭೋ ಸದ್ದೇ ಸುಣಾತಿ – ದಿಬ್ಬೇ ಚ ಮಾನುಸೇ ಚ ಯೇ ದೂರೇ ಸನ್ತಿಕೇ ಚ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ವಿತಕ್ಕವಿಪ್ಫಾರವಸೇನ ನಾನತ್ತೇಕತ್ತಸದ್ದನಿಮಿತ್ತಾನಂ ಪರಿಯೋಗಾಹಣೇ ಪಞ್ಞಾ ಸೋತಧಾತುವಿಸುದ್ಧಿಞಾಣಂ’’.

ಸೋತಧಾತುವಿಸುದ್ಧಿಞಾಣನಿದ್ದೇಸೋ ಏಕಪಞ್ಞಾಸಮೋ.