೩೩. ಅರಣವಿಹಾರಞಾಣನಿದ್ದೇಸೋ

೮೨. ಕಥಂ ದಸ್ಸನಾಧಿಪತೇಯ್ಯಂ ಸನ್ತೋ ಚ ವಿಹಾರಾಧಿಗಮೋ ಪಣೀತಾಧಿಮುತ್ತತಾ ಪಞ್ಞಾ ಅರಣವಿಹಾರೇ ಞಾಣಂ? ದಸ್ಸನಾಧಿಪತೇಯ್ಯನ್ತಿ ಅನಿಚ್ಚಾನುಪಸ್ಸನಾ ದಸ್ಸನಾಧಿಪತೇಯ್ಯಂ, ದುಕ್ಖಾನುಪಸ್ಸನಾ ದಸ್ಸನಾಧಿಪತೇಯ್ಯಂ, ಅನತ್ತಾನುಪಸ್ಸನಾ ದಸ್ಸನಾಧಿಪತೇಯ್ಯಂ, ರೂಪೇ ಅನಿಚ್ಚಾನುಪಸ್ಸನಾ ದಸ್ಸನಾಧಿಪತೇಯ್ಯಂ, ರೂಪೇ ದುಕ್ಖಾನುಪಸ್ಸನಾ ದಸ್ಸನಾಧಿಪತೇಯ್ಯಂ, ರೂಪೇ ಅನತ್ತಾನುಪಸ್ಸನಾ ದಸ್ಸನಾಧಿಪತೇಯ್ಯಂ; ವೇದನಾಯ…ಪೇ… ಸಞ್ಞಾಯ… ಸಙ್ಖಾರೇಸು… ವಿಞ್ಞಾಣೇ… ಚಕ್ಖುಸ್ಮಿಂ…ಪೇ… ಜರಾಮರಣೇ ಅನಿಚ್ಚಾನುಪಸ್ಸನಾ ದಸ್ಸನಾಧಿಪತೇಯ್ಯಂ, ಜರಾಮರಣೇ ದುಕ್ಖಾನುಪಸ್ಸನಾ ದಸ್ಸನಾಧಿಪತೇಯ್ಯಂ, ಜರಾಮರಣೇ ಅನತ್ತಾನುಪಸ್ಸನಾ ದಸ್ಸನಾಧಿಪತೇಯ್ಯಂ.

ಸನ್ತೋ ಚ ವಿಹಾರಾಧಿಗಮೋತಿ ಸುಞ್ಞತೋ ವಿಹಾರೋ ಸನ್ತೋ ವಿಹಾರಾಧಿಗಮೋ. ಅನಿಮಿತ್ತೋ ವಿಹಾರೋ ಸನ್ತೋ ವಿಹಾರಾಧಿಗಮೋ. ಅಪ್ಪಣಿಹಿತೋ ವಿಹಾರೋ ಸನ್ತೋ ವಿಹಾರಾಧಿಗಮೋ.

ಪಣೀತಾಧಿಮುತ್ತತಾತಿ ಸುಞ್ಞತೇ ಅಧಿಮುತ್ತತಾ ಪಣೀತಾಧಿಮುತ್ತತಾ. ಅನಿಮಿತ್ತೇ ಅಧಿಮುತ್ತತಾ ಪಣೀತಾಧಿಮುತ್ತತಾ. ಅಪ್ಪಣಿಹಿತೇ ಅಧಿಮುತ್ತತಾ ಪಣೀತಾಧಿಮುತ್ತತಾ.

ಅರಣವಿಹಾರೋತಿ ಪಠಮಂ ಝಾನಂ ಅರಣವಿಹಾರೋ. ದುತಿಯಂ ಝಾನಂ ಅರಣವಿಹಾರೋ. ತತಿಯಂ ಝಾನಂ ಅರಣವಿಹಾರೋ. ಚತುತ್ಥಂ ಝಾನಂ ಅರಣವಿಹಾರೋ. ಆಕಾಸಾನಞ್ಚಾಯತನಸಮಾಪತ್ತಿ ಅರಣವಿಹಾರೋ…ಪೇ… ನೇವಸಞ್ಞಾನಾಸಞ್ಞಾಯತನಸಮಾಪತ್ತಿ ಅರಣವಿಹಾರೋ.

ಅರಣವಿಹಾರೋತಿ ಕೇನಟ್ಠೇನ ಅರಣವಿಹಾರೋ? ಪಠಮೇನ ಝಾನೇನ ನೀವರಣೇ ಹರತೀತಿ – ಅರಣವಿಹಾರೋ. ದುತಿಯೇನ ಝಾನೇನ ವಿತಕ್ಕವಿಚಾರೇ ಹರತೀತಿ – ಅರಣವಿಹಾರೋ. ತತಿಯೇನ ಝಾನೇನ ಪೀತಿಂ ಹರತೀತಿ – ಅರಣವಿಹಾರೋ. ಚತುತ್ಥೇನ ಝಾನೇನ ಸುಖದುಕ್ಖೇ ಹರತೀತಿ – ಅರಣವಿಹಾರೋ. ಆಕಾಸಾನಞ್ಚಾಯತನಸಮಾಪತ್ತಿಯಾ ರೂಪಸಞ್ಞಂ ಪಟಿಘಸಞ್ಞಂ ನಾನತ್ತಸಞ್ಞಂ ಹರತೀತಿ – ಅರಣವಿಹಾರೋ. ವಿಞ್ಞಾಣಞ್ಚಾಯತನಸಮಾಪತ್ತಿಯಾ ಆಕಾಸಾನಞ್ಚಾಯತನಸಞ್ಞಂ ಹರತೀತಿ – ಅರಣವಿಹಾರೋ. ಆಕಿಞ್ಚಞ್ಞಾಯತನಸಮಾಪತ್ತಿಯಾ ವಿಞ್ಞಾಣಞ್ಚಾಯತನಸಞ್ಞಂ ಹರತೀತಿ – ಅರಣವಿಹಾರೋ. ನೇವಸಞ್ಞಾನಾಸಞ್ಞಾಯತನಸಮಾಪತ್ತಿಯಾ ಆಕಿಞ್ಚಞ್ಞಾಯತನಸಞ್ಞಂ ಹರತೀತಿ – ಅರಣವಿಹಾರೋ. ಅಯಂ ಅರಣವಿಹಾರೋ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ದಸ್ಸನಾಧಿಪತೇಯ್ಯಂ ಸನ್ತೋ ಚ ವಿಹಾರಾಧಿಗಮೋ ಪಣೀತಾಧಿಮುತ್ತತಾ ಪಞ್ಞಾ ಅರಣವಿಹಾರೇ ಞಾಣಂ’’.

ಅರಣವಿಹಾರಞಾಣನಿದ್ದೇಸೋ ತೇತ್ತಿಂಸತಿಮೋ.