೨೫-೨೮. ಪಟಿಸಮ್ಭಿದಾಞಾಣನಿದ್ದೇಸೋ

೭೬. ಕಥಂ ಅತ್ಥನಾನತ್ತೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮನಾನತ್ತೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿನಾನತ್ತೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನನಾನತ್ತೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ? ಸದ್ಧಿನ್ದ್ರಿಯಂ ಧಮ್ಮೋ, ವೀರಿಯಿನ್ದ್ರಿಯಂ ಧಮ್ಮೋ, ಸತಿನ್ದ್ರಿಯಂ ಧಮ್ಮೋ, ಸಮಾಧಿನ್ದ್ರಿಯಂ ಧಮ್ಮೋ, ಪಞ್ಞಿನ್ದ್ರಿಯಂ ಧಮ್ಮೋ. ಅಞ್ಞೋ ಸದ್ಧಿನ್ದ್ರಿಯಂ ಧಮ್ಮೋ, ಅಞ್ಞೋ ವೀರಿಯಿನ್ದ್ರಿಯಂ ಧಮ್ಮೋ, ಅಞ್ಞೋ ಸತಿನ್ದ್ರಿಯಂ ಧಮ್ಮೋ, ಅಞ್ಞೋ ಸಮಾಧಿನ್ದ್ರಿಯಂ ಧಮ್ಮೋ, ಅಞ್ಞೋ ಪಞ್ಞಿನ್ದ್ರಿಯಂ ಧಮ್ಮೋ. ಯೇನ ಞಾಣೇನ ಇಮೇ ನಾನಾ ಧಮ್ಮಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಧಮ್ಮಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಧಮ್ಮನಾನತ್ತೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ’’.

ಅಧಿಮೋಕ್ಖಟ್ಠೋ ಅತ್ಥೋ, ಪಗ್ಗಹಟ್ಠೋ ಅತ್ಥೋ, ಉಪಟ್ಠಾನಟ್ಠೋ ಅತ್ಥೋ, ಅವಿಕ್ಖೇಪಟ್ಠೋ ಅತ್ಥೋ, ದಸ್ಸನಟ್ಠೋ ಅತ್ಥೋ. ಅಞ್ಞೋ ಅಧಿಮೋಕ್ಖಟ್ಠೋ ಅತ್ಥೋ, ಅಞ್ಞೋ ಪಗ್ಗಹಟ್ಠೋ ಅತ್ಥೋ, ಅಞ್ಞೋ ಉಪಟ್ಠಾನಟ್ಠೋ ಅತ್ಥೋ, ಅಞ್ಞೋ ಅವಿಕ್ಖೇಪಟ್ಠೋ ಅತ್ಥೋ, ಅಞ್ಞೋ ದಸ್ಸನಟ್ಠೋ ಅತ್ಥೋ. ಯೇನ ಞಾಣೇನ ಇಮೇ ನಾನಾ ಅತ್ಥಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಅತ್ಥಾ ಪಟಿವಿದಿತಾತಿ. ತೇನ ವುಚ್ಚತಿ ‘‘ಅತ್ಥನಾನತ್ತೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ’’.

ಪಞ್ಚ ಧಮ್ಮೇ ಸನ್ದಸ್ಸೇತುಂ ಬ್ಯಞ್ಜನನಿರುತ್ತಾಭಿಲಾಪಾ, ಪಞ್ಚ ಅತ್ಥೇ ಸನ್ದಸ್ಸೇತುಂ ಬ್ಯಞ್ಜನನಿರುತ್ತಾಭಿಲಾಪಾ. ಅಞ್ಞಾ ಧಮ್ಮನಿರುತ್ತಿಯೋ, ಅಞ್ಞಾ ಅತ್ಥನಿರುತ್ತಿಯೋ. ಯೇನ ಞಾಣೇನ ಇಮಾ ನಾನಾ ನಿರುತ್ತಿಯೋ ಞಾತಾ, ತೇನೇವ ಞಾಣೇನ ಇಮಾ ನಾನಾ ನಿರುತ್ತಿಯೋ ಪಟಿವಿದಿತಾತಿ. ತೇನ ವುಚ್ಚತಿ – ‘‘ನಿರುತ್ತಿನಾನತ್ತೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ’’.

ಪಞ್ಚಸು ಧಮ್ಮೇಸು ಞಾಣಾನಿ, ಪಞ್ಚಸು ಅತ್ಥೇಸು ಞಾಣಾನಿ, ದಸಸು ನಿರುತ್ತೀಸು ಞಾಣಾನಿ. ಅಞ್ಞಾನಿ ಧಮ್ಮೇಸು ಞಾಣಾನಿ, ಅಞ್ಞಾನಿ ಅತ್ಥೇಸು ಞಾಣಾನಿ, ಅಞ್ಞಾನಿ ನಿರುತ್ತೀಸು ಞಾಣಾನಿ. ಯೇನ ಞಾಣೇನ ಇಮೇ ನಾನಾ ಞಾಣಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಞಾಣಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಪಟಿಭಾನನಾನತ್ತೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ’’.

೭೭. ಸದ್ಧಾಬಲಂ ಧಮ್ಮೋ, ವೀರಿಯಬಲಂ ಧಮ್ಮೋ, ಸತಿಬಲಂ ಧಮ್ಮೋ, ಸಮಾಧಿಬಲಂ ಧಮ್ಮೋ, ಪಞ್ಞಾಬಲಂ ಧಮ್ಮೋ. ಅಞ್ಞೋ ಸದ್ಧಾಬಲಂ ಧಮ್ಮೋ, ಅಞ್ಞೋ ವೀರಿಯಬಲಂ ಧಮ್ಮೋ, ಅಞ್ಞೋ ಸತಿಬಲಂ ಧಮ್ಮೋ, ಅಞ್ಞೋ ಸಮಾಧಿಬಲಂ ಧಮ್ಮೋ, ಅಞ್ಞೋ ಪಞ್ಞಾಬಲಂ ಧಮ್ಮೋ. ಯೇನ ಞಾಣೇನ ಇಮೇ ನಾನಾ ಧಮ್ಮಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಧಮ್ಮಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಧಮ್ಮನಾನತ್ತೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ’’.

ಅಸ್ಸದ್ಧಿಯೇ ಅಕಮ್ಪಿಯಟ್ಠೋ ಅತ್ಥೋ. ಕೋಸಜ್ಜೇ ಅಕಮ್ಪಿಯಟ್ಠೋ ಅತ್ಥೋ. ಪಮಾದೇ ಅಕಮ್ಪಿಯಟ್ಠೋ ಅತ್ಥೋ. ಉದ್ಧಚ್ಚೇ ಅಕಮ್ಪಿಯಟ್ಠೋ ಅತ್ಥೋ. ಅವಿಜ್ಜಾಯ ಅಕಮ್ಪಿಯಟ್ಠೋ ಅತ್ಥೋ. ಅಞ್ಞೋ ಅಸ್ಸದ್ಧಿಯೇ ಅಕಮ್ಪಿಯಟ್ಠೋ ಅತ್ಥೋ, ಅಞ್ಞೋ ಕೋಸಜ್ಜೇ ಅಕಮ್ಪಿಯಟ್ಠೋ ಅತ್ಥೋ, ಅಞ್ಞೋ ಪಮಾದೇ ಅಕಮ್ಪಿಯಟ್ಠೋ ಅತ್ಥೋ, ಅಞ್ಞೋ ಉದ್ಧಚ್ಚೇ ಅಕಮ್ಪಿಯಟ್ಠೋ ಅತ್ಥೋ, ಅಞ್ಞೋ ಅವಿಜ್ಜಾಯ ಅಕಮ್ಪಿಯಟ್ಠೋ ಅತ್ಥೋ. ಯೇನ ಞಾಣೇನ ಇಮೇ ನಾನಾ ಅತ್ಥಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಅತ್ಥಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಅತ್ಥನಾನತ್ತೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ’’.

ಪಞ್ಚಸು [ಪಞ್ಚ (?)] ಧಮ್ಮೇಸು ಞಾಣಾನಿ, ಪಞ್ಚಸು [ಪಞ್ಚ (?)] ಅತ್ಥೇಸು ಞಾಣಾನಿ, ದಸಸು [ದಸ (?)] ನಿರುತ್ತೀಸು ಞಾಣಾನಿ. ಅಞ್ಞಾನಿ ಧಮ್ಮೇಸು ಞಾಣಾನಿ, ಅಞ್ಞಾನಿ ಅತ್ಥೇಸು ಞಾಣಾನಿ, ಅಞ್ಞಾನಿ ನಿರುತ್ತೀಸು ಞಾಣಾನಿ. ಯೇನ ಞಾಣೇನ ಇಮೇ ನಾನಾ ಞಾಣಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಞಾಣಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಪಟಿಭಾನನಾನತ್ತೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ’’.

ಸತಿಸಮ್ಬೋಜ್ಝಙ್ಗೋ ಧಮ್ಮೋ, ಧಮ್ಮವಿಚಯಸಮ್ಬೋಜ್ಝಙ್ಗೋ ಧಮ್ಮೋ, ವೀರಿಯಸಮ್ಬೋಜ್ಝಙ್ಗೋ ಧಮ್ಮೋ, ಪೀತಿಸಮ್ಬೋಜ್ಝಙ್ಗೋ ಧಮ್ಮೋ, ಪಸ್ಸದ್ಧಿಸಮ್ಬೋಜ್ಝಙ್ಗೋ ಧಮ್ಮೋ, ಸಮಾಧಿಸಮ್ಬೋಜ್ಝಙ್ಗೋ ಧಮ್ಮೋ, ಉಪೇಕ್ಖಾಸಮ್ಬೋಜ್ಝಙ್ಗೋ ಧಮ್ಮೋ. ಅಞ್ಞೋ ಸತಿಸಮ್ಬೋಜ್ಝಙ್ಗೋ ಧಮ್ಮೋ, ಅಞ್ಞೋ ಧಮ್ಮವಿಚಯಸಮ್ಬೋಜ್ಝಙ್ಗೋ ಧಮ್ಮೋ, ಅಞ್ಞೋ ವೀರಿಯಸಮ್ಬೋಜ್ಝಙ್ಗೋ ಧಮ್ಮೋ, ಅಞ್ಞೋ ಪೀತಿಸಮ್ಬೋಜ್ಝಙ್ಗೋ ಧಮ್ಮೋ, ಅಞ್ಞೋ ಪಸ್ಸದ್ಧಿಸಮ್ಬೋಜ್ಝಙ್ಗೋ ಧಮ್ಮೋ, ಅಞ್ಞೋ ಸಮಾಧಿಸಮ್ಬೋಜ್ಝಙ್ಗೋ ಧಮ್ಮೋ, ಅಞ್ಞೋ ಉಪೇಕ್ಖಾಸಮ್ಬೋಜ್ಝಙ್ಗೋ ಧಮ್ಮೋ. ಯೇನ ಞಾಣೇನ ಇಮೇ ನಾನಾ ಧಮ್ಮಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಧಮ್ಮಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಧಮ್ಮನಾನತ್ತೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ’’.

ಉಪಟ್ಠಾನಟ್ಠೋ ಅತ್ಥೋ, ಪವಿಚಯಟ್ಠೋ ಅತ್ಥೋ, ಪಗ್ಗಹಟ್ಠೋ ಅತ್ಥೋ, ಫರಣಟ್ಠೋ ಅತ್ಥೋ, ಉಪಸಮಟ್ಠೋ ಅತ್ಥೋ, ಅವಿಕ್ಖೇಪಟ್ಠೋ ಅತ್ಥೋ, ಪಟಿಸಙ್ಖಾನಟ್ಠೋ ಅತ್ಥೋ. ಅಞ್ಞೋ ಉಪಟ್ಠಾನಟ್ಠೋ ಅತ್ಥೋ, ಅಞ್ಞೋ ಪವಿಚಯಟ್ಠೋ ಅತ್ಥೋ, ಅಞ್ಞೋ ಪಗ್ಗಹಟ್ಠೋ ಅತ್ಥೋ, ಅಞ್ಞೋ ಫರಣಟ್ಠೋ ಅತ್ಥೋ, ಅಞ್ಞೋ ಉಪಸಮಟ್ಠೋ ಅತ್ಥೋ, ಅಞ್ಞೋ ಅವಿಕ್ಖೇಪಟ್ಠೋ ಅತ್ಥೋ, ಅಞ್ಞೋ ಪಟಿಸಙ್ಖಾನಟ್ಠೋ ಅತ್ಥೋ. ಯೇನ ಞಾಣೇನ ಇಮೇ ನಾನಾ ಅತ್ಥಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಅತ್ಥಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಅತ್ಥನಾನತ್ತೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ’’.

ಸತ್ತ ಧಮ್ಮೇ ಸನ್ದಸ್ಸೇತುಂ ಬ್ಯಞ್ಜನನಿರುತ್ತಾಭಿಲಾಪಾ, ಸತ್ತ ಅತ್ಥೇ ಸನ್ದಸ್ಸೇತುಂ ಬ್ಯಞ್ಜನನಿರುತ್ತಾಭಿಲಾಪಾ. ಅಞ್ಞಾ ಧಮ್ಮನಿರುತ್ತಿಯೋ, ಅಞ್ಞಾ ಅತ್ಥನಿರುತ್ತಿಯೋ. ಯೇನ ಞಾಣೇನ ಇಮಾ ನಾನಾ ನಿರುತ್ತಿಯೋ ಞಾತಾ, ತೇನೇವ ಞಾಣೇನ ಇಮಾ ನಾನಾ ನಿರುತ್ತಿಯೋ ಪಟಿವಿದಿತಾತಿ. ತೇನ ವುಚ್ಚತಿ – ‘‘ನಿರುತ್ತಿನಾನತ್ತೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ’’.

ಸತ್ತಸು ಧಮ್ಮೇಸು ಞಾಣಾನಿ, ಸತ್ತಸು ಅತ್ಥೇಸು ಞಾಣಾನಿ, ಚುದ್ದಸಸು ನಿರುತ್ತೀಸು ಞಾಣಾನಿ. ಅಞ್ಞಾನಿ ಧಮ್ಮೇಸು ಞಾಣಾನಿ, ಅಞ್ಞಾನಿ ಅತ್ಥೇಸು ಞಾಣಾನಿ, ಅಞ್ಞಾನಿ ನಿರುತ್ತೀಸು ಞಾಣಾನಿ. ಯೇನ ಞಾಣೇನ ಇಮೇ ನಾನಾ ಞಾಣಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಞಾಣಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಪಟಿಭಾನನಾನತ್ತೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ’’.

ಸಮ್ಮಾದಿಟ್ಠಿ ಧಮ್ಮೋ, ಸಮ್ಮಾಸಙ್ಕಪ್ಪೋ ಧಮ್ಮೋ, ಸಮ್ಮಾವಾಚಾ ಧಮ್ಮೋ, ಸಮ್ಮಾಕಮ್ಮನ್ತೋ ಧಮ್ಮೋ, ಸಮ್ಮಾಆಜೀವೋ ಧಮ್ಮೋ, ಸಮ್ಮಾವಾಯಾಮೋ ಧಮ್ಮೋ, ಸಮ್ಮಾಸತಿ ಧಮ್ಮೋ, ಸಮ್ಮಾಸಮಾಧಿ ಧಮ್ಮೋ. ಅಞ್ಞೋ ಸಮ್ಮಾದಿಟ್ಠಿ ಧಮ್ಮೋ, ಅಞ್ಞೋ ಸಮ್ಮಾಸಙ್ಕಪ್ಪೋ ಧಮ್ಮೋ, ಅಞ್ಞೋ ಸಮ್ಮಾವಾಚಾ ಧಮ್ಮೋ, ಅಞ್ಞೋ ಸಮ್ಮಾಕಮ್ಮನ್ತೋ ಧಮ್ಮೋ, ಅಞ್ಞೋ ಸಮ್ಮಾಆಜೀವೋ ಧಮ್ಮೋ, ಅಞ್ಞೋ ಸಮ್ಮಾವಾಯಾಮೋ ಧಮ್ಮೋ, ಅಞ್ಞೋ ಸಮ್ಮಾಸತಿ ಧಮ್ಮೋ, ಅಞ್ಞೋ ಸಮ್ಮಾಸಮಾಧಿ ಧಮ್ಮೋ. ಯೇನ ಞಾಣೇನ ಇಮೇ ನಾನಾ ಧಮ್ಮಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಧಮ್ಮಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಧಮ್ಮನಾನತ್ತೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ’’.

ದಸ್ಸನಟ್ಠೋ ಅತ್ಥೋ, ಅಭಿನಿರೋಪನಟ್ಠೋ ಅತ್ಥೋ, ಪರಿಗ್ಗಹಟ್ಠೋ ಅತ್ಥೋ, ಸಮುಟ್ಠಾನಟ್ಠೋ ಅತ್ಥೋ, ವೋದಾನಟ್ಠೋ ಅತ್ಥೋ, ಪಗ್ಗಹಟ್ಠೋ ಅತ್ಥೋ, ಉಪಟ್ಠಾನಟ್ಠೋ ಅತ್ಥೋ, ಅವಿಕ್ಖೇಪಟ್ಠೋ ಅತ್ಥೋ. ಅಞ್ಞೋ ದಸ್ಸನಟ್ಠೋ ಅತ್ಥೋ, ಅಞ್ಞೋ ಅಭಿನಿರೋಪನಟ್ಠೋ ಅತ್ಥೋ, ಅಞ್ಞೋ ಪರಿಗ್ಗಹಟ್ಠೋ ಅತ್ಥೋ, ಅಞ್ಞೋ ಸಮುಟ್ಠಾನಟ್ಠೋ ಅತ್ಥೋ, ಅಞ್ಞೋ ವೋದಾನಟ್ಠೋ ಅತ್ಥೋ, ಅಞ್ಞೋ ಪಗ್ಗಹಟ್ಠೋ ಅತ್ಥೋ, ಅಞ್ಞೋ ಉಪಟ್ಠಾನಟ್ಠೋ ಅತ್ಥೋ, ಅಞ್ಞೋ ಅವಿಕ್ಖೇಪಟ್ಠೋ ಅತ್ಥೋ. ಯೇನ ಞಾಣೇನ ಇಮೇ ನಾನಾ ಅತ್ಥಾ ಞಾತಾ ತೇನೇವ ಞಾಣೇನ ಇಮೇ ನಾನಾ ಅತ್ಥಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಅತ್ಥನಾನತ್ತೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ’’.

ಅಟ್ಠ ಧಮ್ಮೇ ಸನ್ದಸ್ಸೇತುಂ ಬ್ಯಞ್ಜನನಿರುತ್ತಾಭಿಲಾಪಾ, ಅಟ್ಠ ಅತ್ಥೇ ಸನ್ದಸ್ಸೇತುಂ ಬ್ಯಞ್ಜನನಿರುತ್ತಾಭಿಲಾಪಾ. ಅಞ್ಞಾ ಧಮ್ಮನಿರುತ್ತಿಯೋ, ಅಞ್ಞಾ ಅತ್ಥನಿರುತ್ತಿಯೋ. ಯೇನ ಞಾಣೇನ ಇಮಾ ನಾನಾ ನಿರುತ್ತಿಯೋ ಞಾತಾ, ತೇನೇವ ಞಾಣೇನ ಇಮಾ ನಾನಾ ನಿರುತ್ತಿಯೋ ಪಟಿವಿದಿತಾತಿ. ತೇನ ವುಚ್ಚತಿ – ‘‘ನಿರುತ್ತಿನಾನತ್ತೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ’’.

ಅಟ್ಠಸು ಧಮ್ಮೇಸು ಞಾಣಾನಿ, ಅಟ್ಠಸು ಅತ್ಥೇಸು ಞಾಣಾನಿ ಸೋಳಸಸು ನಿರುತ್ತೀಸು ಞಾಣಾನಿ. ಅಞ್ಞಾನಿ ಧಮ್ಮೇಸು ಞಾಣಾನಿ, ಅಞ್ಞಾನಿ ಅತ್ಥೇಸು ಞಾಣಾನಿ, ಅಞ್ಞಾನಿ ನಿರುತ್ತೀಸು ಞಾಣಾನಿ. ಯೇನ ಞಾಣೇನ ಇಮೇ ನಾನಾ ಞಾಣಾ ಞಾತಾ, ತೇನೇವ ಞಾಣೇನ ಇಮೇ ನಾನಾ ಞಾಣಾ ಪಟಿವಿದಿತಾತಿ. ತೇನ ವುಚ್ಚತಿ – ‘‘ಪಟಿಭಾನನಾನತ್ತೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ’’. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಅತ್ಥನಾನತ್ತೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ. ಧಮ್ಮನಾನತ್ತೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ. ನಿರುತ್ತಿನಾನತ್ತೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ. ಪಟಿಭಾನನಾನತ್ತೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ’’.

ಪಟಿಸಮ್ಭಿದಾಞಾಣನಿದ್ದೇಸೋ ಅಟ್ಠವೀಸತಿಮೋ.