೨೯-೩೧. ಞಾಣತ್ತಯನಿದ್ದೇಸೋ

೭೮. ಕಥಂ ವಿಹಾರನಾನತ್ತೇ ಪಞ್ಞಾ ವಿಹಾರಟ್ಠೇ ಞಾಣಂ, ಸಮಾಪತ್ತಿನಾನತ್ತೇ ಪಞ್ಞಾ ಸಮಾಪತ್ತಟ್ಠೇ ಞಾಣಂ, ವಿಹಾರಸಮಾಪತ್ತಿನಾನತ್ತೇ ಪಞ್ಞಾ ವಿಹಾರಸಮಾಪತ್ತಟ್ಠೇ ಞಾಣಂ? ನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಅನಿಮಿತ್ತೋ ವಿಹಾರೋ. ಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಅಪ್ಪಣಿಹಿತೋ ವಿಹಾರೋ. ಅಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಸುಞ್ಞತೋ ವಿಹಾರೋ.

ನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅನಿಮಿತ್ತಂ ಆವಜ್ಜಿತ್ವಾ ಸಮಾಪಜ್ಜತಿ – ಅನಿಮಿತ್ತಾ ಸಮಾಪತ್ತಿ. ಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅಪ್ಪಣಿಹಿತಂ ಆವಜ್ಜಿತ್ವಾ ಸಮಾಪಜ್ಜತಿ – ಅಪ್ಪಣಿಹಿತಾ ಸಮಾಪತ್ತಿ. ಅಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಸುಞ್ಞತಂ ಆವಜ್ಜಿತ್ವಾ ಸಮಾಪಜ್ಜತಿ – ಸುಞ್ಞತಾ ಸಮಾಪತ್ತಿ.

ನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅನಿಮಿತ್ತಂ ಆವಜ್ಜಿತ್ವಾ ಸಮಾಪಜ್ಜತಿ – ಅನಿಮಿತ್ತವಿಹಾರಸಮಾಪತ್ತಿ. ಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅಪ್ಪಣಿಹಿತಂ ಆವಜ್ಜಿತ್ವಾ ಸಮಾಪಜ್ಜತಿ – ಅಪ್ಪಣಿಹಿತವಿಹಾರಸಮಾಪತ್ತಿ. ಅಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಸುಞ್ಞತಂ ಆವಜ್ಜಿತ್ವಾ ಸಮಾಪಜ್ಜತಿ – ಸುಞ್ಞತವಿಹಾರಸಮಾಪತ್ತಿ.

೭೯. ರೂಪನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಅನಿಮಿತ್ತೋ ವಿಹಾರೋ. ರೂಪಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಅಪ್ಪಣಿಹಿತೋ ವಿಹಾರೋ. ರೂಪಾಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಸುಞ್ಞತೋ ವಿಹಾರೋ.

ರೂಪನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅನಿಮಿತ್ತಂ ಆವಜ್ಜಿತ್ವಾ ಸಮಾಪಜ್ಜತಿ – ಅನಿಮಿತ್ತಾ ಸಮಾಪತ್ತಿ. ರೂಪಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅಪ್ಪಣಿಹಿತಂ ಆವಜ್ಜಿತ್ವಾ ಸಮಾಪಜ್ಜತಿ – ಅಪ್ಪಣಿಹಿತಾ ಸಮಾಪತ್ತಿ. ರೂಪಾಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಸುಞ್ಞತಂ ಆವಜ್ಜಿತ್ವಾ ಸಮಾಪಜ್ಜತಿ – ಸುಞ್ಞತಾ ಸಮಾಪತ್ತಿ.

ರೂಪನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅನಿಮಿತ್ತಂ ಆವಜ್ಜಿತ್ವಾ ಸಮಾಪಜ್ಜತಿ – ಅನಿಮಿತ್ತವಿಹಾರಸಮಾಪತ್ತಿ. ರೂಪಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅಪ್ಪಣಿಹಿತಂ ಆವಜ್ಜಿತ್ವಾ ಸಮಾಪಜ್ಜತಿ – ಅಪ್ಪಣಿಹಿತವಿಹಾರಸಮಾಪತ್ತಿ. ರೂಪಾಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಸುಞ್ಞತಂ ಆವಜ್ಜಿತ್ವಾ ಸಮಾಪಜ್ಜತಿ – ಸುಞ್ಞತವಿಹಾರಸಮಾಪತ್ತಿ.

ವೇದನಾನಿಮಿತ್ತಂ …ಪೇ… ಸಞ್ಞಾನಿಮಿತ್ತಂ… ಸಙ್ಖಾರನಿಮಿತ್ತಂ… ವಿಞ್ಞಾಣನಿಮಿತ್ತಂ… ಚಕ್ಖುನಿಮಿತ್ತಂ…ಪೇ… ಜರಾಮರಣನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಅನಿಮಿತ್ತೋ ವಿಹಾರೋ. ಜರಾಮರಣಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಅಪ್ಪಣಿಹಿತೋ ವಿಹಾರೋ. ಜರಾಮರಣಾಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ – ಸುಞ್ಞತೋ ವಿಹಾರೋ.

ಜರಾಮರಣನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅನಿಮಿತ್ತಂ ಆವಜ್ಜಿತ್ವಾ ಸಮಾಪಜ್ಜತಿ – ಅನಿಮಿತ್ತಾ ಸಮಾಪತ್ತಿ. ಜರಾಮರಣಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅಪ್ಪಣಿಹಿತಂ ಆವಜ್ಜಿತ್ವಾ ಸಮಾಪಜ್ಜತಿ – ಅಪ್ಪಣಿಹಿತಾ ಸಮಾಪತ್ತಿ. ಜರಾಮರಣಾಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಸುಞ್ಞತಂ ಆವಜ್ಜಿತ್ವಾ ಸಮಾಪಜ್ಜತಿ – ಸುಞ್ಞತಾ ಸಮಾಪತ್ತಿ.

ಜರಾಮರಣನಿಮಿತ್ತಂ ಭಯತೋ ಸಮ್ಪಸ್ಸಮಾನೋ ಅನಿಮಿತ್ತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅನಿಮಿತ್ತಂ ಆವಜ್ಜಿತ್ವಾ ಸಮಾಪಜ್ಜತಿ – ಅನಿಮಿತ್ತವಿಹಾರಸಮಾಪತ್ತಿ. ಜರಾಮರಣಪಣಿಧಿಂ ಭಯತೋ ಸಮ್ಪಸ್ಸಮಾನೋ ಅಪ್ಪಣಿಹಿತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಅಪ್ಪಣಿಹಿತಂ ಆವಜ್ಜಿತ್ವಾ ಸಮಾಪಜ್ಜತಿ – ಅಪ್ಪಣಿಹಿತವಿಹಾರಸಮಾಪತ್ತಿ. ಜರಾಮರಣಾಭಿನಿವೇಸಂ ಭಯತೋ ಸಮ್ಪಸ್ಸಮಾನೋ ಸುಞ್ಞತೇ ಅಧಿಮುತ್ತತ್ತಾ ಫುಸ್ಸ ಫುಸ್ಸ ವಯಂ ಪಸ್ಸತಿ, ಪವತ್ತಂ ಅಜ್ಝುಪೇಕ್ಖಿತ್ವಾ ನಿರೋಧಂ ನಿಬ್ಬಾನಂ ಸುಞ್ಞತಂ ಆವಜ್ಜಿತ್ವಾ ಸಮಾಪಜ್ಜತಿ – ಸುಞ್ಞತವಿಹಾರಸಮಾಪತ್ತಿ. ಅಞ್ಞೋ ಅನಿಮಿತ್ತೋ ವಿಹಾರೋ, ಅಞ್ಞೋ ಅಪ್ಪಣಿಹಿತೋ ವಿಹಾರೋ, ಅಞ್ಞೋ ಸುಞ್ಞತೋ ವಿಹಾರೋ. ಅಞ್ಞಾ ಅನಿಮಿತ್ತಸಮಾಪತ್ತಿ, ಅಞ್ಞಾ ಅಪ್ಪಣಿಹಿತಸಮಾಪತ್ತಿ, ಅಞ್ಞಾ ಸುಞ್ಞತಸಮಾಪತ್ತಿ. ಅಞ್ಞಾ ಅನಿಮಿತ್ತಾ ವಿಹಾರಸಮಾಪತ್ತಿ, ಅಞ್ಞಾ ಅಪ್ಪಣಿಹಿತಾ ವಿಹಾರಸಮಾಪತ್ತಿ, ಅಞ್ಞಾ ಸುಞ್ಞತಾ ವಿಹಾರಸಮಾಪತ್ತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ವಿಹಾರನಾನತ್ತೇ ಪಞ್ಞಾ ವಿಹಾರಟ್ಠೇ ಞಾಣಂ, ಸಮಾಪತ್ತಿನಾನತ್ತೇ ಪಞ್ಞಾ ಸಮಾಪತ್ತಟ್ಠೇ ಞಾಣಂ, ವಿಹಾರಸಮಾಪತ್ತಿನಾನತ್ತೇ ಪಞ್ಞಾ ವಿಹಾರಸಮಾಪತ್ತಟ್ಠೇ ಞಾಣಂ’’.

ಞಾಣತ್ತಯನಿದ್ದೇಸೋ ಏಕತಿಂಸತಿಮೋ.