೨೦-೨೪. ಞಾಣಪಞ್ಚಕನಿದ್ದೇಸೋ

೭೫. ಕಥಂ ಅಭಿಞ್ಞಾಪಞ್ಞಾ ಞಾತಟ್ಠೇ ಞಾಣಂ, ಪರಿಞ್ಞಾಪಞ್ಞಾ ತೀರಣಟ್ಠೇ ಞಾಣಂ, ಪಹಾನೇಪಞ್ಞಾ ಪರಿಚ್ಚಾಗಟ್ಠೇ ಞಾಣಂ, ಭಾವನಾ ಪಞ್ಞಾ ಏಕರಸಟ್ಠೇ ಞಾಣಂ, ಸಚ್ಛಿಕಿರಿಯಾಪಞ್ಞಾ ಫಸ್ಸನಟ್ಠೇ ಞಾಣಂ? ಯೇ ಯೇ ಧಮ್ಮಾ ಅಭಿಞ್ಞಾತಾ ಹೋನ್ತಿ, ತೇ ತೇ ಧಮ್ಮಾ ಞಾತಾ ಹೋನ್ತಿ. ಯೇ ಯೇ ಧಮ್ಮಾ ಪರಿಞ್ಞಾತಾ ಹೋನ್ತಿ, ತೇ ತೇ ಧಮ್ಮಾ ತೀರಿತಾ ಹೋನ್ತಿ. ಯೇ ಯೇ ಧಮ್ಮಾ ಪಹೀನಾ ಹೋನ್ತಿ, ತೇ ತೇ ಧಮ್ಮಾ ಪರಿಚ್ಚತ್ತಾ ಹೋನ್ತಿ. ಯೇ ಯೇ ಧಮ್ಮಾ ಭಾವಿತಾ ಹೋನ್ತಿ, ತೇ ತೇ ಧಮ್ಮಾ ಏಕರಸಾ ಹೋನ್ತಿ. ಯೇ ಯೇ ಧಮ್ಮಾ ಸಚ್ಛಿಕತಾ ಹೋನ್ತಿ, ತೇ ತೇ ಧಮ್ಮಾ ಫಸ್ಸಿತಾ ಹೋನ್ತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಅಭಿಞ್ಞಾ ಪಞ್ಞಾ ಞಾತಟ್ಠೇ ಞಾಣಂ, ಪರಿಞ್ಞಾ ಪಞ್ಞಾ ತೀರಣಟ್ಠೇ ಞಾಣಂ, ಪಹಾನೇ ಪಞ್ಞಾ ಪರಿಚ್ಚಾಗಟ್ಠೇ ಞಾಣಂ, ಭಾವನಾ ಪಞ್ಞಾ ಏಕರಸಟ್ಠೇ ಞಾಣಂ, ಸಚ್ಛಿಕಿರಿಯಾ ಪಞ್ಞಾ ಫುಸನಟ್ಠೇ ಞಾಣಂ’’.

ಞಾಣಪಞ್ಚಕನಿದ್ದೇಸೋ ಚತುವೀಸತಿಮೋ.