೧೭. ಚರಿಯಾನಾನತ್ತಞಾಣನಿದ್ದೇಸೋ

೬೮. ಕಥಂ ಚರಿಯಾವವತ್ಥಾನೇ ಪಞ್ಞಾ ಚರಿಯಾನಾನತ್ತೇ ಞಾಣಂ? ಚರಿಯಾತಿ ತಿಸ್ಸೋ ಚರಿಯಾಯೋ – ವಿಞ್ಞಾಣಚರಿಯಾ, ಅಞ್ಞಾಣಚರಿಯಾ, ಞಾಣಚರಿಯಾ.

ಕತಮಾ ವಿಞ್ಞಾಣಚರಿಯಾ? ದಸ್ಸನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ ರೂಪೇಸು, ದಸ್ಸನಟ್ಠೋ ಚಕ್ಖುವಿಞ್ಞಾಣಂ ವಿಞ್ಞಾಣಚರಿಯಾ ರೂಪೇಸು, ದಿಟ್ಠತ್ತಾ ಅಭಿನಿರೋಪನಾ ವಿಪಾಕಮನೋಧಾತು [ಅಭಿನಿರೋಪನವಿಪಾಕಮನೋಧಾತು (ಸ್ಯಾ.)] ವಿಞ್ಞಾಣಚರಿಯಾ ರೂಪೇಸು, ಅಭಿನಿರೋಪಿತತ್ತಾ ವಿಪಾಕಮನೋವಿಞ್ಞಾಣಧಾತು ವಿಞ್ಞಾಣಚರಿಯಾ ರೂಪೇಸು. ಸವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ ಸದ್ದೇಸು, ಸವನತ್ಥೋ ಸೋತವಿಞ್ಞಾಣಂ ವಿಞ್ಞಾಣಚರಿಯಾ ಸದ್ದೇಸು, ಸುತತ್ತಾ ಅಭಿನಿರೋಪನಾ ವಿಪಾಕಮನೋಧಾತು ವಿಞ್ಞಾಣಚರಿಯಾ ಸದ್ದೇಸು, ಅಭಿನಿರೋಪಿತತ್ತಾ ವಿಪಾಕಮನೋವಿಞ್ಞಾಣಧಾತು ವಿಞ್ಞಾಣಚರಿಯಾ ಸದ್ದೇಸು. ಘಾಯನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ ಗನ್ಧೇಸು, ಘಾಯನಟ್ಠೋ [ಘಾಯನತ್ಥೋ (ಸ್ಯಾ. ಕ.)] ಘಾನವಿಞ್ಞಾಣಂ ವಿಞ್ಞಾಣಚರಿಯಾ ಗನ್ಧೇಸು, ಘಾಯಿತತ್ತಾ ಅಭಿನಿರೋಪನಾ ವಿಪಾಕಮನೋಧಾತು ವಿಞ್ಞಾಣಚರಿಯಾ ಗನ್ಧೇಸು, ಅಭಿನಿರೋಪಿತತ್ತಾ ವಿಪಾಕಮನೋವಿಞ್ಞಾಣಧಾತು ವಿಞ್ಞಾಣಚರಿಯಾ ಗನ್ಧೇಸು. ಸಾಯನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ ರಸೇಸು, ಸಾಯನಟ್ಠೋ ಜಿವ್ಹಾವಿಞ್ಞಾಣಂ ವಿಞ್ಞಾಣಚರಿಯಾ ರಸೇಸು, ಸಾಯಿತತ್ತಾ ಅಭಿನಿರೋಪನಾ ವಿಪಾಕಮನೋಧಾತು ವಿಞ್ಞಾಣಚರಿಯಾ ರಸೇಸು, ಅಭಿನಿರೋಪಿತತ್ತಾ ವಿಪಾಕಮನೋವಿಞ್ಞಾಣಧಾತು ವಿಞ್ಞಾಣಚರಿಯಾ ರಸೇಸು. ಫುಸನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ ಫೋಟ್ಠಬ್ಬೇಸು, ಫುಸನಟ್ಠೋ ಕಾಯವಿಞ್ಞಾಣಂ ವಿಞ್ಞಾಣಚರಿಯಾ ಫೋಟ್ಠಬ್ಬೇಸು, ಫುಟ್ಠತ್ತಾ ಅಭಿನಿರೋಪನಾ ವಿಪಾಕಮನೋಧಾತು ವಿಞ್ಞಾಣಚರಿಯಾ ಫೋಟ್ಠಬ್ಬೇಸು, ಅಭಿನಿರೋಪಿತತ್ತಾ ವಿಪಾಕಮನೋವಿಞ್ಞಾಣಧಾತು ವಿಞ್ಞಾಣಚರಿಯಾ ಫೋಟ್ಠಬ್ಬೇಸು. ವಿಜಾನನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ ಧಮ್ಮೇಸು, ವಿಜಾನನಟ್ಠೋ ಮನೋವಿಞ್ಞಾಣಂ ವಿಞ್ಞಾಣಚರಿಯಾ ಧಮ್ಮೇಸು, ವಿಞ್ಞಾತತ್ತಾ ಅಭಿನಿರೋಪನಾ ವಿಪಾಕಮನೋಧಾತು ವಿಞ್ಞಾಣಚರಿಯಾ ಧಮ್ಮೇಸು, ಅಭಿನಿರೋಪಿತತ್ತಾ ವಿಪಾಕಮನೋವಿಞ್ಞಾಣಧಾತು ವಿಞ್ಞಾಣಚರಿಯಾ ಧಮ್ಮೇಸು.

೬೯. ವಿಞ್ಞಾಣಚರಿಯಾತಿ ಕೇನಟ್ಠೇನ ವಿಞ್ಞಾಣಚರಿಯಾ? ನೀರಾಗಾ ಚರತೀತಿ – ವಿಞ್ಞಾಣಚರಿಯಾ. ನಿದ್ದೋಸಾ ಚರತೀತಿ – ವಿಞ್ಞಾಣಚರಿಯಾ. ನಿಮ್ಮೋಹಾ ಚರತೀತಿ – ವಿಞ್ಞಾಣಚರಿಯಾ. ನಿಮ್ಮಾನಾ ಚರತೀತಿ – ವಿಞ್ಞಾಣಚರಿಯಾ. ನಿದ್ದಿಟ್ಠಿ ಚರತೀತಿ – ವಿಞ್ಞಾಣಚರಿಯಾ ನಿಉದ್ಧಚ್ಚಾ ಚರತೀತಿ – ವಿಞ್ಞಾಣಚರಿಯಾ. ನಿಬ್ಬಿಚಿಕಿಚ್ಛಾ ಚರತೀತಿ – ವಿಞ್ಞಾಣಚರಿಯಾ. ನಾನುಸಯಾ ಚರತೀತಿ – ವಿಞ್ಞಾಣಚರಿಯಾ. ರಾಗವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ದೋಸವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಮೋಹವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಮಾನವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ದಿಟ್ಠಿವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಉದ್ಧಚ್ಚವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ವಿಚಿಕಿಚ್ಛಾವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಅನುಸಯವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಕುಸಲೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಅಕುಸಲೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಸಾವಜ್ಜೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಅನವಜ್ಜೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಕಣ್ಹೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಸುಕ್ಕೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಸುಖುದ್ರಯೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ದುಕ್ಖುದ್ರಯೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ಸುಖವಿಪಾಕೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ದುಕ್ಖವಿಪಾಕೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ವಿಞ್ಞಾಣಚರಿಯಾ. ವಿಞ್ಞಾತೇ ಚರತೀತಿ – ವಿಞ್ಞಾಣಚರಿಯಾ. ವಿಞ್ಞಾಣಸ್ಸ ಏವರೂಪಾ ಚರಿಯಾ ಹೋತೀತಿ – ವಿಞ್ಞಾಣಚರಿಯಾ. ಪಕತಿಪರಿಸುದ್ಧಮಿದಂ ಚಿತ್ತಂ ನಿಕ್ಕಿಲೇಸಟ್ಠೇನಾತಿ – ವಿಞ್ಞಾಣಚರಿಯಾ. ಅಯಂ ವಿಞ್ಞಾಣಚರಿಯಾ.

ಕತಮಾ ಅಞ್ಞಾಣಚರಿಯಾ? ಮನಾಪಿಯೇಸು ರೂಪೇಸು ರಾಗಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ರಾಗಸ್ಸ ಜವನಾ ಅಞ್ಞಾಣಚರಿಯಾ. ಅಮನಾಪಿಯೇಸು ರೂಪೇಸು ದೋಸಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ದೋಸಸ್ಸ ಜವನಾ ಅಞ್ಞಾಣಚರಿಯಾ. ತದುಭಯೇನ ಅಸಮಪೇಕ್ಖನಸ್ಮಿಂ ವತ್ಥುಸ್ಮಿಂ ಮೋಹಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಮೋಹಸ್ಸ ಜವನಾ ಅಞ್ಞಾಣಚರಿಯಾ. ವಿನಿಬನ್ಧಸ್ಸ ಮಾನಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಮಾನಸ್ಸ ಜವನಾ ಅಞ್ಞಾಣಚರಿಯಾ. ಪರಾಮಟ್ಠಾಯ ದಿಟ್ಠಿಯಾ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ದಿಟ್ಠಿಯಾ ಜವನಾ ಅಞ್ಞಾಣಚರಿಯಾ. ವಿಕ್ಖೇಪಗತಸ್ಸ ಉದ್ಧಚ್ಚಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಉದ್ಧಚ್ಚಸ್ಸ ಜವನಾ ಅಞ್ಞಾಣಚರಿಯಾ. ಅನಿಟ್ಠಙ್ಗತಾಯ ವಿಚಿಕಿಚ್ಛಾಯ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ವಿಚಿಕಿಚ್ಛಾಯ ಜವನಾ ಅಞ್ಞಾಣಚರಿಯಾ. ಥಾಮಗತಸ್ಸ ಅನುಸಯಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಅನುಸಯಸ್ಸ ಜವನಾ ಅಞ್ಞಾಣಚರಿಯಾ.

ಮನಾಪಿಯೇಸು ಸದ್ದೇಸು…ಪೇ… ಮನಾಪಿಯೇಸು ಗನ್ಧೇಸು…ಪೇ… ಮನಾಪಿಯೇಸು ರಸೇಸು…ಪೇ… ಮನಾಪಿಯೇಸು ಫೋಟ್ಠಬ್ಬೇಸು…ಪೇ… ಮನಾಪಿಯೇಸು ಧಮ್ಮೇಸು ರಾಗಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ರಾಗಸ್ಸ ಜವನಾ ಅಞ್ಞಾಣಚರಿಯಾ. ಅಮನಾಪಿಯೇಸು ಧಮ್ಮೇಸು ದೋಸಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ದೋಸಸ್ಸ ಜವನಾ ಅಞ್ಞಾಣಚರಿಯಾ. ತದುಭಯೇನ ಅಸಮಪೇಕ್ಖನಸ್ಮಿಂ ವತ್ಥುಸ್ಮಿಂ ಮೋಹಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಮೋಹಸ್ಸ ಜವನಾ ಅಞ್ಞಾಣಚರಿಯಾ. ವಿನಿಬನ್ಧಸ್ಸ ಮಾನಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಮಾನಸ್ಸ ಜವನಾ ಅಞ್ಞಾಣಚರಿಯಾ. ಪರಾಮಟ್ಠಾಯ ದಿಟ್ಠಿಯಾ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ದಿಟ್ಠಿಯಾ ಜವನಾ ಅಞ್ಞಾಣಚರಿಯಾ. ವಿಕ್ಖೇಪಗತಸ್ಸ ಉದ್ಧಚ್ಚಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಉದ್ಧಚ್ಚಸ್ಸ ಜವನಾ ಅಞ್ಞಾಣಚರಿಯಾ; ಅನಿಟ್ಠಙ್ಗತಾಯ ವಿಚಿಕಿಚ್ಛಾಯ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ವಿಚಿಕಿಚ್ಛಾಯ ಜವನಾ ಅಞ್ಞಾಣಚರಿಯಾ. ಥಾಮಗತಸ್ಸ ಅನುಸಯಸ್ಸ ಜವನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಅನುಸಯಸ್ಸ ಜವನಾ ಅಞ್ಞಾಣಚರಿಯಾ.

೭೦. ಅಞ್ಞಾಣಚರಿಯಾತಿ ಕೇನಟ್ಠೇನ ಅಞ್ಞಾಣಚರಿಯಾ? ಸರಾಗಾ ಚರತೀತಿ – ಅಞ್ಞಾಣಚರಿಯಾ. ಸದೋಸಾ ಚರತೀತಿ – ಅಞ್ಞಾಣಚರಿಯಾ. ಸಮೋಹಾ ಚರತೀತಿ – ಅಞ್ಞಾಣಚರಿಯಾ. ಸಮಾನಾ ಚರತೀತಿ – ಅಞ್ಞಾಣಚರಿಯಾ. ಸದಿಟ್ಠಿ ಚರತೀತಿ – ಅಞ್ಞಾಣಚರಿಯಾ. ಸಉದ್ಧಚ್ಚಾ ಚರತೀತಿ – ಅಞ್ಞಾಣಚರಿಯಾ. ಸವಿಚಿಕಿಚ್ಛಾ ಚರತೀತಿ – ಅಞ್ಞಾಣಚರಿಯಾ. ಸಾನುಸಯಾ ಚರತೀತಿ – ಅಞ್ಞಾಣಚರಿಯಾ. ರಾಗಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ದೋಸಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಮೋಹಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಮಾನಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ದಿಟ್ಠಿಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಉದ್ಧಚ್ಚಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ವಿಚಿಕಿಚ್ಛಾಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಅನುಸಯಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಕುಸಲೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಅಕುಸಲೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಸಾವಜ್ಜೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಅನವಜ್ಜೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಕಣ್ಹೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಸುಕ್ಕೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಸುಖುದ್ರಯೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ದುಕ್ಖುದ್ರಯೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಸುಖವಿಪಾಕೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ದುಕ್ಖವಿಪಾಕೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ಅಞ್ಞಾಣಚರಿಯಾ. ಅಞ್ಞಾತೇ ಚರತೀತಿ – ಅಞ್ಞಾಣಚರಿಯಾ. ಅಞ್ಞಾಣಸ್ಸ ಏವರೂಪಾ ಚರಿಯಾ ಹೋತೀತಿ – ಅಞ್ಞಾಣಚರಿಯಾ. ಅಯಂ ಅಞ್ಞಾಣಚರಿಯಾ.

೭೧. ಕತಮಾ ಞಾಣಚರಿಯಾ? ಅನಿಚ್ಚಾನುಪಸ್ಸನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಅನಿಚ್ಚಾನುಪಸ್ಸನಾ ಞಾಣಚರಿಯಾ. ದುಕ್ಖಾನುಪಸ್ಸನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ದುಕ್ಖಾನುಪಸ್ಸನಾ ಞಾಣಚರಿಯಾ. ಅನತ್ತಾನುಪಸ್ಸನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಅನತ್ತಾನುಪಸ್ಸನಾ ಞಾಣಚರಿಯಾ. ನಿಬ್ಬಿದಾನುಪಸ್ಸನತ್ಥಾಯ…ಪೇ… ವಿರಾಗಾನುಪಸ್ಸನತ್ಥಾಯ… ನಿರೋಧಾನುಪಸ್ಸನತ್ಥಾಯ… ಪಟಿನಿಸ್ಸಗ್ಗಾನುಪಸ್ಸನತ್ಥಾಯ… ಖಯಾನುಪಸ್ಸನತ್ಥಾಯ… ವಯಾನುಪಸ್ಸನತ್ಥಾಯ… ವಿಪರಿಣಾಮಾನುಪಸ್ಸನತ್ಥಾಯ… ಅನಿಮಿತ್ತಾನುಪಸ್ಸನತ್ಥಾಯ… ಅಪ್ಪಣಿಹಿತಾನುಪಸ್ಸನತ್ಥಾಯ… ಸುಞ್ಞತಾನುಪಸ್ಸನತ್ಥಾಯ… ಅಧಿಪಞ್ಞಾಧಮ್ಮಾನುಪಸ್ಸನತ್ಥಾಯ… ಯಥಾಭೂತಞಾಣದಸ್ಸನತ್ಥಾಯ… ಆದೀನವಾನುಪಸ್ಸನತ್ಥಾಯ… ಪಟಿಸಙ್ಖಾನುಪಸ್ಸನತ್ಥಾಯ ಆವಜ್ಜನಕಿರಿಯಾಬ್ಯಾಕತಾ ವಿಞ್ಞಾಣಚರಿಯಾ; ಪಟಿಸಙ್ಖಾನುಪಸ್ಸನಾ ಞಾಣಚರಿಯಾ. ವಿವಟ್ಟನಾನುಪಸ್ಸನಾ ಞಾಣಚರಿಯಾ. ಸೋತಾಪತ್ತಿಮಗ್ಗೋ ಞಾಣಚರಿಯಾ. ಸೋತಾಪತ್ತಿಫಲಸಮಾಪತ್ತಿ ಞಾಣಚರಿಯಾ. ಸಕದಾಗಾಮಿಮಗ್ಗೋ ಞಾಣಚರಿಯಾ. ಸಕದಾಗಾಮಿಫಲಸಮಾಪತ್ತಿ ಞಾಣಚರಿಯಾ. ಅನಾಗಾಮಿಮಗ್ಗೋ ಞಾಣಚರಿಯಾ. ಅನಾಗಾಮಿಫಲಸಮಾಪತ್ತಿ ಞಾಣಚರಿಯಾ. ಅರಹತ್ತಮಗ್ಗೋ ಞಾಣಚರಿಯಾ. ಅರಹತ್ತಫಲಸಮಾಪತ್ತಿ ಞಾಣಚರಿಯಾ.

ಞಾಣಚರಿಯಾತಿ ಕೇನಟ್ಠೇನ ಞಾಣಚರಿಯಾ? ನೀರಾಗಾ ಚರತೀತಿ – ಞಾಣಚರಿಯಾ. ನಿದ್ದೋಸಾ ಚರತೀತಿ – ಞಾಣಚರಿಯಾ…ಪೇ… ನಾನುಸಯಾ ಚರತೀತಿ – ಞಾಣಚರಿಯಾ. ರಾಗವಿಪ್ಪಯುತ್ತಾ ಚರತೀತಿ – ಞಾಣಚರಿಯಾ. ದೋಸವಿಪ್ಪಯುತ್ತಾ ಚರತೀತಿ – ಞಾಣಚರಿಯಾ. ಮೋಹವಿಪ್ಪಯುತ್ತಾ ಚರತೀತಿ – ಞಾಣಚರಿಯಾ. ಮಾನವಿಪ್ಪಯುತ್ತಾ…ಪೇ… ದಿಟ್ಠಿವಿಪ್ಪಯುತ್ತಾ… ಉದ್ಧಚ್ಚವಿಪ್ಪಯುತ್ತಾ… ವಿಚಿಕಿಚ್ಛಾವಿಪ್ಪಯುತ್ತಾ… ಅನುಸಯವಿಪ್ಪಯುತ್ತಾ… ಕುಸಲೇಹಿ ಕಮ್ಮೇಹಿ ಸಮ್ಪಯುತ್ತಾ… ಅಕುಸಲೇಹಿ ಕಮ್ಮೇಹಿ ವಿಪ್ಪಯುತ್ತಾ… ಸಾವಜ್ಜೇಹಿ ಕಮ್ಮೇಹಿ ವಿಪ್ಪಯುತ್ತಾ… ಅನವಜ್ಜೇಹಿ ಕಮ್ಮೇಹಿ ಸಮ್ಪಯುತ್ತಾ… ಕಣ್ಹೇಹಿ ಕಮ್ಮೇಹಿ ವಿಪ್ಪಯುತ್ತಾ… ಸುಕ್ಕೇಹಿ ಕಮ್ಮೇಹಿ ಸಮ್ಪಯುತ್ತಾ… ಸುಖುದ್ರಯೇಹಿ ಕಮ್ಮೇಹಿ ಸಮ್ಪಯುತ್ತಾ… ದುಕ್ಖುದ್ರಯೇಹಿ ಕಮ್ಮೇಹಿ ವಿಪ್ಪಯುತ್ತಾ… ಸುಖವಿಪಾಕೇಹಿ ಕಮ್ಮೇಹಿ ಸಮ್ಪಯುತ್ತಾ ಚರತೀತಿ – ಞಾಣಚರಿಯಾ. ದುಕ್ಖವಿಪಾಕೇಹಿ ಕಮ್ಮೇಹಿ ವಿಪ್ಪಯುತ್ತಾ ಚರತೀತಿ – ಞಾಣಚರಿಯಾ. ಞಾತೇ ಚರತೀತಿ – ಞಾಣಚರಿಯಾ. ಞಾಣಸ್ಸ ಏವರೂಪಾ ಚರಿಯಾ ಹೋತೀತಿ – ಞಾಣಚರಿಯಾ. ಅಯಂ ಞಾಣಚರಿಯಾ. ಅಞ್ಞಾ ವಿಞ್ಞಾಣಚರಿಯಾ, ಅಞ್ಞಾ ಅಞ್ಞಾಣಚರಿಯಾ, ಅಞ್ಞಾ ಞಾಣಚರಿಯಾತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಚರಿಯಾವವತ್ಥಾನೇ ಪಞ್ಞಾ ಚರಿಯಾನಾನತ್ತೇ ಞಾಣಂ’’.

ಚರಿಯಾನಾನತ್ತಞಾಣನಿದ್ದೇಸೋ ಸತ್ತರಸಮೋ.