೧೪. ಪಚ್ಚವೇಕ್ಖಣಞಾಣನಿದ್ದೇಸೋ

೬೫. ಕಥಂ ತದಾ ಸಮುದಾಗತೇ ಧಮ್ಮೇ ಪಸ್ಸನೇ ಪಞ್ಞಾ ಪಚ್ಚವೇಕ್ಖಣೇ ಞಾಣಂ? ಸೋತಾಪತ್ತಿಮಗ್ಗಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ ತದಾ ಸಮುದಾಗತಾ. ಅಭಿನಿರೋಪನಟ್ಠೇನ ಸಮ್ಮಾಸಙ್ಕಪ್ಪೋ ತದಾ ಸಮುದಾಗತೋ. ಪರಿಗ್ಗಹಟ್ಠೇನ ಸಮ್ಮಾವಾಚಾ ತದಾ ಸಮುದಾಗತಾ. ಸಮುಟ್ಠಾನಟ್ಠೇನ ಸಮ್ಮಾಕಮ್ಮನ್ತೋ ತದಾ ಸಮುದಾಗತೋ. ವೋದಾನಟ್ಠೇನ ಸಮ್ಮಾಆಜೀವೋ ತದಾ ಸಮುದಾಗತೋ. ಪಗ್ಗಹಟ್ಠೇನ ಸಮ್ಮಾವಾಯಾಮೋ ತದಾ ಸಮುದಾಗತೋ. ಉಪಟ್ಠಾನಟ್ಠೇನ ಸಮ್ಮಾಸತಿ ತದಾ ಸಮುದಾಗತಾ. ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ತದಾ ಸಮುದಾಗತೋ.

ಉಪಟ್ಠಾನಟ್ಠೇನ ಸತಿಸಮ್ಬೋಜ್ಝಙ್ಗೋ ತದಾ ಸಮುದಾಗತೋ. ಪವಿಚಯಟ್ಠೇನ ಧಮ್ಮವಿಚಯಸಮ್ಬೋಜ್ಝಙ್ಗೋ ತದಾ ಸಮುದಾಗತೋ. ಪಗ್ಗಹಟ್ಠೇನ ವೀರಿಯಸಮ್ಬೋಜ್ಝಙ್ಗೋ ತದಾ ಸಮುದಾಗತೋ. ಫರಣಟ್ಠೇನ ಪೀತಿಸಮ್ಬೋಜ್ಝಙ್ಗೋ ತದಾ ಸಮುದಾಗತೋ. ಉಪಸಮಟ್ಠೇನ ಪಸ್ಸದ್ಧಿಸಮ್ಬೋಜ್ಝಙ್ಗೋ ತದಾ ಸಮುದಾಗತೋ. ಅವಿಕ್ಖೇಪಟ್ಠೇನ ಸಮಾಧಿಸಮ್ಬೋಜ್ಝಙ್ಗೋ ತದಾ ಸಮುದಾಗತೋ. ಪಟಿಸಙ್ಖಾನಟ್ಠೇನ ಉಪೇಕ್ಖಾಸಮ್ಬೋಜ್ಝಙ್ಗೋ ತದಾ ಸಮುದಾಗತೋ.

ಅಸ್ಸದ್ಧಿಯೇ ಅಕಮ್ಪಿಯಟ್ಠೇನ ಸದ್ಧಾಬಲಂ ತದಾ ಸಮುದಾಗತಂ. ಕೋಸಜ್ಜೇ ಅಕಮ್ಪಿಯಟ್ಠೇನ ವೀರಿಯಬಲಂ ತದಾ ಸಮುದಾಗತಂ. ಪಮಾದೇ ಅಕಮ್ಪಿಯಟ್ಠೇನ ಸತಿಬಲಂ ತದಾ ಸಮುದಾಗತಂ. ಉದ್ಧಚ್ಚೇ ಅಕಮ್ಪಿಯಟ್ಠೇನ ಸಮಾಧಿಬಲಂ ತದಾ ಸಮುದಾಗತಂ. ಅವಿಜ್ಜಾಯ ಅಕಮ್ಪಿಯಟ್ಠೇನ ಪಞ್ಞಾಬಲಂ ತದಾ ಸಮುದಾಗತಂ.

ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ತದಾ ಸಮುದಾಗತಂ. ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ತದಾ ಸಮುದಾಗತಂ. ಉಪಟ್ಠಾನಟ್ಠೇನ ಸತಿನ್ದ್ರಿಯಂ ತದಾ ಸಮುದಾಗತಂ. ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ತದಾ ಸಮುದಾಗತಂ. ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ತದಾ ಸಮುದಾಗತಂ.

ಆಧಿಪತೇಯ್ಯಟ್ಠೇನ ಇನ್ದ್ರಿಯಾ ತದಾ ಸಮುದಾಗತಾ. ಅಕಮ್ಪಿಯಟ್ಠೇನ ಬಲಾ ತದಾ ಸಮುದಾಗತಾ. ನಿಯ್ಯಾನಟ್ಠೇನ ಸಮ್ಬೋಜ್ಝಙ್ಗಾ ತದಾ ಸಮುದಾಗತಾ. ಹೇತುಟ್ಠೇನ ಮಗ್ಗೋ ತದಾ ಸಮುದಾಗತೋ. ಉಪಟ್ಠಾನಟ್ಠೇನ ಸತಿಪಟ್ಠಾನಾ ತದಾ ಸಮುದಾಗತಾ. ಪದಹನಟ್ಠೇನ ಸಮ್ಮಪ್ಪಧಾನಾ ತದಾ ಸಮುದಾಗತಾ. ಇಜ್ಝನಟ್ಠೇನ ಇದ್ಧಿಪಾದಾ ತದಾ ಸಮುದಾಗತಾ. ತಥಟ್ಠೇನ ಸಚ್ಚಾ ತದಾ ಸಮುದಾಗತಾ. ಅವಿಕ್ಖೇಪಟ್ಠೇನ ಸಮಥೋ ತದಾ ಸಮುದಾಗತೋ. ಅನುಪಸ್ಸನಟ್ಠೇನ ವಿಪಸ್ಸನಾ ತದಾ ಸಮುದಾಗತಾ. ಏಕರಸಟ್ಠೇನ ಸಮಥವಿಪಸ್ಸನಾ ತದಾ ಸಮುದಾಗತಾ. ಅನತಿವತ್ತನಟ್ಠೇನ ಯುಗನದ್ಧಂ ತದಾ ಸಮುದಾಗತಂ. ಸಂವರಟ್ಠೇನ ಸೀಲವಿಸುದ್ಧಿ ತದಾ ಸಮುದಾಗತಾ. ಅವಿಕ್ಖೇಪಟ್ಠೇನ ಚಿತ್ತವಿಸುದ್ಧಿ ತದಾ ಸಮುದಾಗತಾ. ದಸ್ಸನಟ್ಠೇನ ದಿಟ್ಠಿವಿಸುದ್ಧಿ ತದಾ ಸಮುದಾಗತಾ. ವಿಮುತ್ತಟ್ಠೇನ ವಿಮೋಕ್ಖೋ ತದಾ ಸಮುದಾಗತೋ. ಪಟಿವೇಧಟ್ಠೇನ ವಿಜ್ಜಾ ತದಾ ಸಮುದಾಗತಾ. ಪರಿಚ್ಚಾಗಟ್ಠೇನ ವಿಮುತ್ತಿ ತದಾ ಸಮುದಾಗತಾ. ಸಮುಚ್ಛೇದಟ್ಠೇನ ಖಯೇ ಞಾಣಂ ತದಾ ಸಮುದಾಗತಂ.

ಛನ್ದೋ ಮೂಲಟ್ಠೇನ ತದಾ ಸಮುದಾಗತೋ. ಮನಸಿಕಾರೋ ಸಮುಟ್ಠಾನಟ್ಠೇನ ತದಾ ಸಮುದಾಗತೋ. ಫಸ್ಸೋ ಸಮೋಧಾನಟ್ಠೇನ ತದಾ ಸಮುದಾಗತೋ. ವೇದನಾ ಸಮೋಸರಣಟ್ಠೇನ ತದಾ ಸಮುದಾಗತಾ. ಸಮಾಧಿ ಪಮುಖಟ್ಠೇನ ತದಾ ಸಮುದಾಗತೋ. ಸತಿ ಆಧಿಪತೇಯ್ಯಟ್ಠೇನ ತದಾ ಸಮುದಾಗತಾ. ಪಞ್ಞಾ ತದುತ್ತರಟ್ಠೇನ ತದಾ ಸಮುದಾಗತಾ. ವಿಮುತ್ತಿ ಸಾರಟ್ಠೇನ ತದಾ ಸಮುದಾಗತಾ. ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ತದಾ ಸಮುದಾಗತಂ. ವುಟ್ಠಹಿತ್ವಾ ಪಚ್ಚವೇಕ್ಖತಿ, ಇಮೇ ಧಮ್ಮಾ ತದಾ ಸಮುದಾಗತಾ.

ಸೋತಾಪತ್ತಿಫಲಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ ತದಾ ಸಮುದಾಗತಾ. ಅಭಿನಿರೋಪನಟ್ಠೇನ ಸಮ್ಮಾಸಙ್ಕಪ್ಪೋ ತದಾ ಸಮುದಾಗತೋ…ಪೇ… ಪಟಿಪ್ಪಸ್ಸದ್ಧಟ್ಠೇನ ಅನುಪ್ಪಾದೇ ಞಾಣಂ ತದಾ ಸಮುದಾಗತಂ. ಛನ್ದೋ ಮೂಲಟ್ಠೇನ ತದಾ ಸಮುದಾಗತೋ. ಮನಸಿಕಾರೋ ಸಮುಟ್ಠಾನಟ್ಠೇನ ತದಾ ಸಮುದಾಗತೋ. ಫಸ್ಸೋ ಸಮೋಧಾನಟ್ಠೇನ ತದಾ ಸಮುದಾಗತೋ. ವೇದನಾ ಸಮೋಸರಣಟ್ಠೇನ ತದಾ ಸಮುದಾಗತಾ. ಸಮಾಧಿ ಪಮುಖಟ್ಠೇನ ತದಾ ಸಮುದಾಗತೋ. ಸತಿ ಆಧಿಪತೇಯ್ಯಟ್ಠೇನ ತದಾ ಸಮುದಾಗತಾ. ಪಞ್ಞಾ ತದುತ್ತರಟ್ಠೇನ ತದಾ ಸಮುದಾಗತಾ. ವಿಮುತ್ತಿ ಸಾರಟ್ಠೇನ ತದಾ ಸಮುದಾಗತಾ. ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ತದಾ ಸಮುದಾಗತಂ. ವುಟ್ಠಹಿತ್ವಾ ಪಚ್ಚವೇಕ್ಖತಿ, ಇಮೇ ಧಮ್ಮಾ ತದಾ ಸಮುದಾಗತಾ.

ಸಕದಾಗಾಮಿಮಗ್ಗಕ್ಖಣೇ…ಪೇ… ಸಕದಾಗಾಮಿಫಲಕ್ಖಣೇ…ಪೇ… ಅನಾಗಾಮಿಮಗ್ಗಕ್ಖಣೇ…ಪೇ… ಅನಾಗಾಮಿಫಲಕ್ಖಣೇ…ಪೇ… ಅರಹತ್ತಮಗ್ಗಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ ತದಾ ಸಮುದಾಗತಾ…ಪೇ… ಸಮುಚ್ಛೇದಟ್ಠೇನ ಖಯೇ ಞಾಣಂ ತದಾ ಸಮುದಾಗತಂ. ಛನ್ದೋ ಮೂಲಟ್ಠೇನ ತದಾ ಸಮುದಾಗತೋ…ಪೇ… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ತದಾ ಸಮುದಾಗತಂ. ವುಟ್ಠಹಿತ್ವಾ ಪಚ್ಚವೇಕ್ಖತಿ, ಇಮೇ ಧಮ್ಮಾ ತದಾ ಸಮುದಾಗತಾ.

ಅರಹತ್ತಫಲಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ ತದಾ ಸಮುದಾಗತಾ …ಪೇ… ಪಟಿಪ್ಪಸ್ಸದ್ಧಟ್ಠೇನ ಅನುಪ್ಪಾದೇ ಞಾಣಂ ತದಾ ಸಮುದಾಗತಂ. ಛನ್ದೋ ಮೂಲಟ್ಠೇನ ತದಾ ಸಮುದಾಗತೋ …ಪೇ… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ತದಾ ಸಮುದಾಗತಂ. ವುಟ್ಠಹಿತ್ವಾ ಪಚ್ಚವೇಕ್ಖತಿ, ಇಮೇ ಧಮ್ಮಾ ತದಾ ಸಮುದಾಗತಾ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ತದಾ ಸಮುದಾಗತೇ ಧಮ್ಮೇ ಪಸ್ಸನೇ ಪಞ್ಞಾ ಪಚ್ಚವೇಕ್ಖಣೇ ಞಾಣಂ’’.

ಪಚ್ಚವೇಕ್ಖಣಞಾಣನಿದ್ದೇಸೋ ಚುದ್ದಸಮೋ.